| Library / Tipiṭaka / तिपिटक • Tipiṭaka / अङ्गुत्तरनिकाय • Aṅguttaranikāya |
१०. गिहिसामीचिसुत्तं
10. Gihisāmīcisuttaṃ
६०. अथ खो अनाथपिण्डिको गहपति येन भगवा तेनुपसङ्कमि; उपसङ्कमित्वा भगवन्तं अभिवादेत्वा एकमन्तं निसीदि। एकमन्तं निसिन्नं खो अनाथपिण्डिकं गहपतिं भगवा एतदवोच –
60. Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho anāthapiṇḍikaṃ gahapatiṃ bhagavā etadavoca –
‘‘चतूहि खो, गहपति, धम्मेहि समन्नागतो अरियसावको गिहिसामीचिपटिपदं पटिपन्नो होति यसोपटिलाभिनिं सग्गसंवत्तनिकं। कतमेहि चतूहि? इध, गहपति, अरियसावको भिक्खुसङ्घं पच्चुपट्ठितो होति चीवरेन, भिक्खुसङ्घं पच्चुपट्ठितो होति पिण्डपातेन, भिक्खुसङ्घं पच्चुपट्ठितो होति सेनासनेन , भिक्खुसङ्घं पच्चुपट्ठितो होति गिलानप्पच्चयभेसज्जपरिक्खारेन। इमेहि खो, गहपति, चतूहि धम्मेहि समन्नागतो अरियसावको गिहिसामीचिपटिपदं पटिपन्नो होति यसोपटिलाभिनिं सग्गसंवत्तनिक’’न्ति।
‘‘Catūhi kho, gahapati, dhammehi samannāgato ariyasāvako gihisāmīcipaṭipadaṃ paṭipanno hoti yasopaṭilābhiniṃ saggasaṃvattanikaṃ. Katamehi catūhi? Idha, gahapati, ariyasāvako bhikkhusaṅghaṃ paccupaṭṭhito hoti cīvarena, bhikkhusaṅghaṃ paccupaṭṭhito hoti piṇḍapātena, bhikkhusaṅghaṃ paccupaṭṭhito hoti senāsanena , bhikkhusaṅghaṃ paccupaṭṭhito hoti gilānappaccayabhesajjaparikkhārena. Imehi kho, gahapati, catūhi dhammehi samannāgato ariyasāvako gihisāmīcipaṭipadaṃ paṭipanno hoti yasopaṭilābhiniṃ saggasaṃvattanika’’nti.
‘‘गिहिसामीचिपटिपदं, पटिपज्जन्ति पण्डिता।
‘‘Gihisāmīcipaṭipadaṃ, paṭipajjanti paṇḍitā;
सम्मग्गते सीलवन्ते, चीवरेन उपट्ठिता॥
Sammaggate sīlavante, cīvarena upaṭṭhitā.
पिण्डपातसयनेन, गिलानप्पच्चयेन च।
Piṇḍapātasayanena, gilānappaccayena ca;
तेसं दिवा च रत्तो च, सदा पुञ्ञं पवड्ढति।
Tesaṃ divā ca ratto ca, sadā puññaṃ pavaḍḍhati;
सग्गञ्च कमतिट्ठानं 1, कम्मं कत्वान भद्दक’’न्ति॥ दसमं।
Saggañca kamatiṭṭhānaṃ 2, kammaṃ katvāna bhaddaka’’nti. dasamaṃ;
पुञ्ञाभिसन्दवग्गो पठमो।
Puññābhisandavaggo paṭhamo.
तस्सुद्दानं –
Tassuddānaṃ –
द्वे पुञ्ञाभिसन्दा द्वे च, संवासा समजीविनो।
Dve puññābhisandā dve ca, saṃvāsā samajīvino;
सुप्पवासा सुदत्तो च, भोजनं गिहिसामिचीति॥
Suppavāsā sudatto ca, bhojanaṃ gihisāmicīti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / १०. गिहिसामीचिसुत्तवण्णना • 10. Gihisāmīcisuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ७-१०. सुप्पवासासुत्तादिवण्णना • 7-10. Suppavāsāsuttādivaṇṇanā
