| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
10. ගිහිසාමීචිසුත්‌තං
10. Gihisāmīcisuttaṃ
60. අථ ඛො අනාථපිණ්‌ඩිකො ගහපති යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නං ඛො අනාථපිණ්‌ඩිකං ගහපතිං භගවා එතදවොච –
60. Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho anāthapiṇḍikaṃ gahapatiṃ bhagavā etadavoca –
‘‘චතූහි ඛො, ගහපති, ධම්‌මෙහි සමන්‌නාගතො අරියසාවකො ගිහිසාමීචිපටිපදං පටිපන්‌නො හොති යසොපටිලාභිනිං සග්‌ගසංවත්‌තනිකං. කතමෙහි චතූහි? ඉධ, ගහපති, අරියසාවකො භික්‌ඛුසඞ්‌ඝං පච්‌චුපට්‌ඨිතො හොති චීවරෙන, භික්‌ඛුසඞ්‌ඝං පච්‌චුපට්‌ඨිතො හොති පිණ්‌ඩපාතෙන, භික්‌ඛුසඞ්‌ඝං පච්‌චුපට්‌ඨිතො හොති සෙනාසනෙන , භික්‌ඛුසඞ්‌ඝං පච්‌චුපට්‌ඨිතො හොති ගිලානප්‌පච්‌චයභෙසජ්‌ජපරික්‌ඛාරෙන. ඉමෙහි ඛො, ගහපති, චතූහි ධම්‌මෙහි සමන්‌නාගතො අරියසාවකො ගිහිසාමීචිපටිපදං පටිපන්‌නො හොති යසොපටිලාභිනිං සග්‌ගසංවත්‌තනික’’න්‌ති.
‘‘Catūhi kho, gahapati, dhammehi samannāgato ariyasāvako gihisāmīcipaṭipadaṃ paṭipanno hoti yasopaṭilābhiniṃ saggasaṃvattanikaṃ. Katamehi catūhi? Idha, gahapati, ariyasāvako bhikkhusaṅghaṃ paccupaṭṭhito hoti cīvarena, bhikkhusaṅghaṃ paccupaṭṭhito hoti piṇḍapātena, bhikkhusaṅghaṃ paccupaṭṭhito hoti senāsanena , bhikkhusaṅghaṃ paccupaṭṭhito hoti gilānappaccayabhesajjaparikkhārena. Imehi kho, gahapati, catūhi dhammehi samannāgato ariyasāvako gihisāmīcipaṭipadaṃ paṭipanno hoti yasopaṭilābhiniṃ saggasaṃvattanika’’nti.
‘‘ගිහිසාමීචිපටිපදං, පටිපජ්‌ජන්‌ති පණ්‌ඩිතා;
‘‘Gihisāmīcipaṭipadaṃ, paṭipajjanti paṇḍitā;
සම්‌මග්‌ගතෙ සීලවන්‌තෙ, චීවරෙන උපට්‌ඨිතා.
Sammaggate sīlavante, cīvarena upaṭṭhitā.
පිණ්‌ඩපාතසයනෙන, ගිලානප්‌පච්‌චයෙන ච;
Piṇḍapātasayanena, gilānappaccayena ca;
තෙසං දිවා ච රත්‌තො ච, සදා පුඤ්‌ඤං පවඩ්‌ඪති;
Tesaṃ divā ca ratto ca, sadā puññaṃ pavaḍḍhati;
සග්‌ගඤ්‌ච කමතිට්‌ඨානං 1, කම්‌මං කත්‌වාන භද්‌දක’’න්‌ති. දසමං;
Saggañca kamatiṭṭhānaṃ 2, kammaṃ katvāna bhaddaka’’nti. dasamaṃ;
පුඤ්‌ඤාභිසන්‌දවග්‌ගො පඨමො.
Puññābhisandavaggo paṭhamo.
තස්‌සුද්‌දානං –
Tassuddānaṃ –
ද්‌වෙ පුඤ්‌ඤාභිසන්‌දා ද්‌වෙ ච, සංවාසා සමජීවිනො;
Dve puññābhisandā dve ca, saṃvāsā samajīvino;
සුප්‌පවාසා සුදත්‌තො ච, භොජනං ගිහිසාමිචීති.
Suppavāsā sudatto ca, bhojanaṃ gihisāmicīti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 10. ගිහිසාමීචිසුත්‌තවණ්‌ණනා • 10. Gihisāmīcisuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 7-10. සුප්‌පවාසාසුත්‌තාදිවණ්‌ණනා • 7-10. Suppavāsāsuttādivaṇṇanā
