| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
৪. চতুত্থৰগ্গো
4. Catutthavaggo
(৩৩) ১. গিহিস্স অরহাতিকথা
(33) 1. Gihissa arahātikathā
৩৮৭. গিহিস্স অরহাতি? আমন্তা। অত্থি অরহতো গিহিসংযোজনন্তি? ন হেৰং ৰত্তব্বে…পে॰… নত্থি অরহতো গিহিসংযোজনন্তি? আমন্তা। হঞ্চি নত্থি অরহতো গিহিসংযোজনং, নো চ ৰত রে ৰত্তব্বে – ‘‘গিহিস্স অরহা’’তি।
387. Gihissa arahāti? Āmantā. Atthi arahato gihisaṃyojananti? Na hevaṃ vattabbe…pe… natthi arahato gihisaṃyojananti? Āmantā. Hañci natthi arahato gihisaṃyojanaṃ, no ca vata re vattabbe – ‘‘gihissa arahā’’ti.
গিহিস্স অরহাতি? আমন্তা। ননু অরহতো গিহিসংযোজনং পহীনং উচ্ছিন্নমূলং তালাৰত্থুকতং অনভাৰঙ্কতং আযতিং অনুপ্পাদধম্মন্তি? আমন্তা। হঞ্চি অরহতো গিহিসংযোজনং পহীনং উচ্ছিন্নমূলং তালাৰত্থুকতং অনভাৰঙ্কতং আযতিং অনুপ্পাদধম্মং, নো চ ৰত রে ৰত্তব্বে – ‘‘গিহিস্স অরহা’’তি।
Gihissa arahāti? Āmantā. Nanu arahato gihisaṃyojanaṃ pahīnaṃ ucchinnamūlaṃ tālāvatthukataṃ anabhāvaṅkataṃ āyatiṃ anuppādadhammanti? Āmantā. Hañci arahato gihisaṃyojanaṃ pahīnaṃ ucchinnamūlaṃ tālāvatthukataṃ anabhāvaṅkataṃ āyatiṃ anuppādadhammaṃ, no ca vata re vattabbe – ‘‘gihissa arahā’’ti.
গিহিস্স অরহাতি? আমন্তা। অত্থি কোচি গিহী গিহিসংযোজনং অপ্পহায দিট্ঠেৰ ধম্মে দুক্খস্সন্তকরোতি 1? নত্থি। হঞ্চি নত্থি কোচি গিহী গিহিসংযোজনং অপ্পহায দিট্ঠেৰ ধম্মে দুক্খস্সন্তকরো, নো চ ৰত রে ৰত্তব্বে – ‘‘গিহিস্স অরহা’’তি।
Gihissa arahāti? Āmantā. Atthi koci gihī gihisaṃyojanaṃ appahāya diṭṭheva dhamme dukkhassantakaroti 2? Natthi. Hañci natthi koci gihī gihisaṃyojanaṃ appahāya diṭṭheva dhamme dukkhassantakaro, no ca vata re vattabbe – ‘‘gihissa arahā’’ti.
গিহিস্স অরহাতি? আমন্তা। ননু ৰচ্ছগোত্তো পরিব্বাজকো ভগৰন্তং এতদৰোচ – ‘‘অত্থি নু খো, ভো গোতম, কোচি গিহী গিহিসংযোজনং অপ্পহায কাযস্স ভেদা দুক্খস্সন্তকরো’’তি? ‘‘নত্থি খো, ৰচ্ছ, কোচি গিহী গিহিসংযোজনং অপ্পহায কাযস্স ভেদা দুক্খস্সন্তকরো’’তি। অত্থেৰ সুত্তন্তোতি? আমন্তা । তেন হি ন ৰত্তব্বং – ‘‘গিহিস্স অরহা’’তি।
Gihissa arahāti? Āmantā. Nanu vacchagotto paribbājako bhagavantaṃ etadavoca – ‘‘atthi nu kho, bho gotama, koci gihī gihisaṃyojanaṃ appahāya kāyassa bhedā dukkhassantakaro’’ti? ‘‘Natthi kho, vaccha, koci gihī gihisaṃyojanaṃ appahāya kāyassa bhedā dukkhassantakaro’’ti. Attheva suttantoti? Āmantā . Tena hi na vattabbaṃ – ‘‘gihissa arahā’’ti.
গিহিস্স অরহাতি? আমন্তা। অরহা মেথুনং ধম্মং পটিসেৰেয্য, মেথুনং উপ্পাদেয্য, পুত্তসম্বাধসযনং অজ্ঝাৰসেয্য, কাসিকচন্দনং পচ্চনুভৰেয্য, মালাগন্ধৰিলেপনং ধারেয্য, জাতরূপরজতং সাদিযেয্য, অজেল়কং পটিগ্গণ্হেয্য, কুক্কুটসূকরং পটিগ্গণ্হেয্য, হত্থিগৰস্সৰল়ৰং পটিগ্গণ্হেয্য, তিত্তিরৰট্টকমোরকপিঞ্জরং 3 পটিগ্গণ্হেয্য, চিত্তৰণ্ডৰালমোল়িং 4 ধারেয্য, ওদাতানি ৰত্থানি দীঘদসানি ধারেয্য, যাৰজীৰং অগারিযভূতো অস্সাতি? ন হেৰং ৰত্তব্বে…পে॰…।
Gihissa arahāti? Āmantā. Arahā methunaṃ dhammaṃ paṭiseveyya, methunaṃ uppādeyya, puttasambādhasayanaṃ ajjhāvaseyya, kāsikacandanaṃ paccanubhaveyya, mālāgandhavilepanaṃ dhāreyya, jātarūparajataṃ sādiyeyya, ajeḷakaṃ paṭiggaṇheyya, kukkuṭasūkaraṃ paṭiggaṇheyya, hatthigavassavaḷavaṃ paṭiggaṇheyya, tittiravaṭṭakamorakapiñjaraṃ 5 paṭiggaṇheyya, cittavaṇḍavālamoḷiṃ 6 dhāreyya, odātāni vatthāni dīghadasāni dhāreyya, yāvajīvaṃ agāriyabhūto assāti? Na hevaṃ vattabbe…pe….
ন ৰত্তব্বং – ‘‘গিহিস্স অরহা’’তি? আমন্তা। ননু যসো কুলপুত্তো, উত্তিযো গহপতি, সেতু মাণৰো, গিহিব্যঞ্জনেন অরহত্তং পত্তোতি? আমন্তা। হঞ্চি যসো কুলপুত্তো, উত্তিযো গহপতি, সেতু মাণৰো, গিহিব্যঞ্জনেন অরহত্তং পত্তো, তেন ৰত রে ৰত্তব্বে – ‘‘গিহিস্স অরহা’’তি।
Na vattabbaṃ – ‘‘gihissa arahā’’ti? Āmantā. Nanu yaso kulaputto, uttiyo gahapati, setu māṇavo, gihibyañjanena arahattaṃ pattoti? Āmantā. Hañci yaso kulaputto, uttiyo gahapati, setu māṇavo, gihibyañjanena arahattaṃ patto, tena vata re vattabbe – ‘‘gihissa arahā’’ti.
গিহিস্স অরহাতিকথা নিট্ঠিতা।
Gihissa arahātikathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ১. গিহিস্স অরহাতিকথাৰণ্ণনা • 1. Gihissa arahātikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১. গিহিস্স অরহাতিকথাৰণ্ণনা • 1. Gihissa arahātikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১. গিহিস্স অরহাতিকথাৰণ্ণনা • 1. Gihissa arahātikathāvaṇṇanā
