| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
៤. ចតុត្ថវគ្គោ
4. Catutthavaggo
(៣៣) ១. គិហិស្ស អរហាតិកថា
(33) 1. Gihissa arahātikathā
៣៨៧. គិហិស្ស អរហាតិ? អាមន្តា។ អត្ថិ អរហតោ គិហិសំយោជនន្តិ? ន ហេវំ វត្តព្ពេ…បេ.… នត្ថិ អរហតោ គិហិសំយោជនន្តិ? អាមន្តា។ ហញ្ចិ នត្ថិ អរហតោ គិហិសំយោជនំ, នោ ច វត រេ វត្តព្ពេ – ‘‘គិហិស្ស អរហា’’តិ។
387. Gihissa arahāti? Āmantā. Atthi arahato gihisaṃyojananti? Na hevaṃ vattabbe…pe… natthi arahato gihisaṃyojananti? Āmantā. Hañci natthi arahato gihisaṃyojanaṃ, no ca vata re vattabbe – ‘‘gihissa arahā’’ti.
គិហិស្ស អរហាតិ? អាមន្តា។ ននុ អរហតោ គិហិសំយោជនំ បហីនំ ឧច្ឆិន្នមូលំ តាលាវត្ថុកតំ អនភាវង្កតំ អាយតិំ អនុប្បាទធម្មន្តិ? អាមន្តា។ ហញ្ចិ អរហតោ គិហិសំយោជនំ បហីនំ ឧច្ឆិន្នមូលំ តាលាវត្ថុកតំ អនភាវង្កតំ អាយតិំ អនុប្បាទធម្មំ, នោ ច វត រេ វត្តព្ពេ – ‘‘គិហិស្ស អរហា’’តិ។
Gihissa arahāti? Āmantā. Nanu arahato gihisaṃyojanaṃ pahīnaṃ ucchinnamūlaṃ tālāvatthukataṃ anabhāvaṅkataṃ āyatiṃ anuppādadhammanti? Āmantā. Hañci arahato gihisaṃyojanaṃ pahīnaṃ ucchinnamūlaṃ tālāvatthukataṃ anabhāvaṅkataṃ āyatiṃ anuppādadhammaṃ, no ca vata re vattabbe – ‘‘gihissa arahā’’ti.
គិហិស្ស អរហាតិ? អាមន្តា។ អត្ថិ កោចិ គិហី គិហិសំយោជនំ អប្បហាយ ទិដ្ឋេវ ធម្មេ ទុក្ខស្សន្តករោតិ 1? នត្ថិ។ ហញ្ចិ នត្ថិ កោចិ គិហី គិហិសំយោជនំ អប្បហាយ ទិដ្ឋេវ ធម្មេ ទុក្ខស្សន្តករោ, នោ ច វត រេ វត្តព្ពេ – ‘‘គិហិស្ស អរហា’’តិ។
Gihissa arahāti? Āmantā. Atthi koci gihī gihisaṃyojanaṃ appahāya diṭṭheva dhamme dukkhassantakaroti 2? Natthi. Hañci natthi koci gihī gihisaṃyojanaṃ appahāya diṭṭheva dhamme dukkhassantakaro, no ca vata re vattabbe – ‘‘gihissa arahā’’ti.
គិហិស្ស អរហាតិ? អាមន្តា។ ននុ វច្ឆគោត្តោ បរិព្ពាជកោ ភគវន្តំ ឯតទវោច – ‘‘អត្ថិ នុ ខោ, ភោ គោតម, កោចិ គិហី គិហិសំយោជនំ អប្បហាយ កាយស្ស ភេទា ទុក្ខស្សន្តករោ’’តិ? ‘‘នត្ថិ ខោ, វច្ឆ, កោចិ គិហី គិហិសំយោជនំ អប្បហាយ កាយស្ស ភេទា ទុក្ខស្សន្តករោ’’តិ។ អត្ថេវ សុត្តន្តោតិ? អាមន្តា ។ តេន ហិ ន វត្តព្ពំ – ‘‘គិហិស្ស អរហា’’តិ។
Gihissa arahāti? Āmantā. Nanu vacchagotto paribbājako bhagavantaṃ etadavoca – ‘‘atthi nu kho, bho gotama, koci gihī gihisaṃyojanaṃ appahāya kāyassa bhedā dukkhassantakaro’’ti? ‘‘Natthi kho, vaccha, koci gihī gihisaṃyojanaṃ appahāya kāyassa bhedā dukkhassantakaro’’ti. Attheva suttantoti? Āmantā . Tena hi na vattabbaṃ – ‘‘gihissa arahā’’ti.
គិហិស្ស អរហាតិ? អាមន្តា។ អរហា មេថុនំ ធម្មំ បដិសេវេយ្យ, មេថុនំ ឧប្បាទេយ្យ, បុត្តសម្ពាធសយនំ អជ្ឈាវសេយ្យ, កាសិកចន្ទនំ បច្ចនុភវេយ្យ, មាលាគន្ធវិលេបនំ ធារេយ្យ, ជាតរូបរជតំ សាទិយេយ្យ, អជេឡកំ បដិគ្គណ្ហេយ្យ, កុក្កុដសូករំ បដិគ្គណ្ហេយ្យ, ហត្ថិគវស្សវឡវំ បដិគ្គណ្ហេយ្យ, តិត្តិរវដ្ដកមោរកបិញ្ជរំ 3 បដិគ្គណ្ហេយ្យ, ចិត្តវណ្ឌវាលមោឡិំ 4 ធារេយ្យ, ឱទាតានិ វត្ថានិ ទីឃទសានិ ធារេយ្យ, យាវជីវំ អគារិយភូតោ អស្សាតិ? ន ហេវំ វត្តព្ពេ…បេ.…។
Gihissa arahāti? Āmantā. Arahā methunaṃ dhammaṃ paṭiseveyya, methunaṃ uppādeyya, puttasambādhasayanaṃ ajjhāvaseyya, kāsikacandanaṃ paccanubhaveyya, mālāgandhavilepanaṃ dhāreyya, jātarūparajataṃ sādiyeyya, ajeḷakaṃ paṭiggaṇheyya, kukkuṭasūkaraṃ paṭiggaṇheyya, hatthigavassavaḷavaṃ paṭiggaṇheyya, tittiravaṭṭakamorakapiñjaraṃ 5 paṭiggaṇheyya, cittavaṇḍavālamoḷiṃ 6 dhāreyya, odātāni vatthāni dīghadasāni dhāreyya, yāvajīvaṃ agāriyabhūto assāti? Na hevaṃ vattabbe…pe….
ន វត្តព្ពំ – ‘‘គិហិស្ស អរហា’’តិ? អាមន្តា។ ននុ យសោ កុលបុត្តោ, ឧត្តិយោ គហបតិ, សេតុ មាណវោ, គិហិព្យញ្ជនេន អរហត្តំ បត្តោតិ? អាមន្តា។ ហញ្ចិ យសោ កុលបុត្តោ, ឧត្តិយោ គហបតិ, សេតុ មាណវោ, គិហិព្យញ្ជនេន អរហត្តំ បត្តោ, តេន វត រេ វត្តព្ពេ – ‘‘គិហិស្ស អរហា’’តិ។
Na vattabbaṃ – ‘‘gihissa arahā’’ti? Āmantā. Nanu yaso kulaputto, uttiyo gahapati, setu māṇavo, gihibyañjanena arahattaṃ pattoti? Āmantā. Hañci yaso kulaputto, uttiyo gahapati, setu māṇavo, gihibyañjanena arahattaṃ patto, tena vata re vattabbe – ‘‘gihissa arahā’’ti.
គិហិស្ស អរហាតិកថា និដ្ឋិតា។
Gihissa arahātikathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ១. គិហិស្ស អរហាតិកថាវណ្ណនា • 1. Gihissa arahātikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ១. គិហិស្ស អរហាតិកថាវណ្ណនា • 1. Gihissa arahātikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ១. គិហិស្ស អរហាតិកថាវណ្ណនា • 1. Gihissa arahātikathāvaṇṇanā
