| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
4. චතුත්‌ථවග්‌ගො
4. Catutthavaggo
(33) 1. ගිහිස්‌ස අරහාතිකථා
(33) 1. Gihissa arahātikathā
387. ගිහිස්‌ස අරහාති? ආමන්‌තා. අත්‌ථි අරහතො ගිහිසංයොජනන්‌ති? න හෙවං වත්‌තබ්‌බෙ…පෙ.… නත්‌ථි අරහතො ගිහිසංයොජනන්‌ති? ආමන්‌තා. හඤ්‌චි නත්‌ථි අරහතො ගිහිසංයොජනං, නො ච වත රෙ වත්‌තබ්‌බෙ – ‘‘ගිහිස්‌ස අරහා’’ති.
387. Gihissa arahāti? Āmantā. Atthi arahato gihisaṃyojananti? Na hevaṃ vattabbe…pe… natthi arahato gihisaṃyojananti? Āmantā. Hañci natthi arahato gihisaṃyojanaṃ, no ca vata re vattabbe – ‘‘gihissa arahā’’ti.
ගිහිස්‌ස අරහාති? ආමන්‌තා. නනු අරහතො ගිහිසංයොජනං පහීනං උච්‌ඡින්‌නමූලං තාලාවත්‌ථුකතං අනභාවඞ්‌කතං ආයතිං අනුප්‌පාදධම්‌මන්‌ති? ආමන්‌තා. හඤ්‌චි අරහතො ගිහිසංයොජනං පහීනං උච්‌ඡින්‌නමූලං තාලාවත්‌ථුකතං අනභාවඞ්‌කතං ආයතිං අනුප්‌පාදධම්‌මං, නො ච වත රෙ වත්‌තබ්‌බෙ – ‘‘ගිහිස්‌ස අරහා’’ති.
Gihissa arahāti? Āmantā. Nanu arahato gihisaṃyojanaṃ pahīnaṃ ucchinnamūlaṃ tālāvatthukataṃ anabhāvaṅkataṃ āyatiṃ anuppādadhammanti? Āmantā. Hañci arahato gihisaṃyojanaṃ pahīnaṃ ucchinnamūlaṃ tālāvatthukataṃ anabhāvaṅkataṃ āyatiṃ anuppādadhammaṃ, no ca vata re vattabbe – ‘‘gihissa arahā’’ti.
ගිහිස්‌ස අරහාති? ආමන්‌තා. අත්‌ථි කොචි ගිහී ගිහිසංයොජනං අප්‌පහාය දිට්‌ඨෙව ධම්‌මෙ දුක්‌ඛස්‌සන්‌තකරොති 1? නත්‌ථි. හඤ්‌චි නත්‌ථි කොචි ගිහී ගිහිසංයොජනං අප්‌පහාය දිට්‌ඨෙව ධම්‌මෙ දුක්‌ඛස්‌සන්‌තකරො, නො ච වත රෙ වත්‌තබ්‌බෙ – ‘‘ගිහිස්‌ස අරහා’’ති.
Gihissa arahāti? Āmantā. Atthi koci gihī gihisaṃyojanaṃ appahāya diṭṭheva dhamme dukkhassantakaroti 2? Natthi. Hañci natthi koci gihī gihisaṃyojanaṃ appahāya diṭṭheva dhamme dukkhassantakaro, no ca vata re vattabbe – ‘‘gihissa arahā’’ti.
ගිහිස්‌ස අරහාති? ආමන්‌තා. නනු වච්‌ඡගොත්‌තො පරිබ්‌බාජකො භගවන්‌තං එතදවොච – ‘‘අත්‌ථි නු ඛො, භො ගොතම, කොචි ගිහී ගිහිසංයොජනං අප්‌පහාය කායස්‌ස භෙදා දුක්‌ඛස්‌සන්‌තකරො’’ති? ‘‘නත්‌ථි ඛො, වච්‌ඡ, කොචි ගිහී ගිහිසංයොජනං අප්‌පහාය කායස්‌ස භෙදා දුක්‌ඛස්‌සන්‌තකරො’’ති. අත්‌ථෙව සුත්‌තන්‌තොති? ආමන්‌තා . තෙන හි න වත්‌තබ්‌බං – ‘‘ගිහිස්‌ස අරහා’’ති.
Gihissa arahāti? Āmantā. Nanu vacchagotto paribbājako bhagavantaṃ etadavoca – ‘‘atthi nu kho, bho gotama, koci gihī gihisaṃyojanaṃ appahāya kāyassa bhedā dukkhassantakaro’’ti? ‘‘Natthi kho, vaccha, koci gihī gihisaṃyojanaṃ appahāya kāyassa bhedā dukkhassantakaro’’ti. Attheva suttantoti? Āmantā . Tena hi na vattabbaṃ – ‘‘gihissa arahā’’ti.
ගිහිස්‌ස අරහාති? ආමන්‌තා. අරහා මෙථුනං ධම්‌මං පටිසෙවෙය්‍ය, මෙථුනං උප්‌පාදෙය්‍ය, පුත්‌තසම්‌බාධසයනං අජ්‌ඣාවසෙය්‍ය, කාසිකචන්‌දනං පච්‌චනුභවෙය්‍ය, මාලාගන්‌ධවිලෙපනං ධාරෙය්‍ය, ජාතරූපරජතං සාදියෙය්‍ය, අජෙළකං පටිග්‌ගණ්‌හෙය්‍ය, කුක්‌කුටසූකරං පටිග්‌ගණ්‌හෙය්‍ය, හත්‌ථිගවස්‌සවළවං පටිග්‌ගණ්‌හෙය්‍ය, තිත්‌තිරවට්‌ටකමොරකපිඤ්‌ජරං 3 පටිග්‌ගණ්‌හෙය්‍ය, චිත්‌තවණ්‌ඩවාලමොළිං 4 ධාරෙය්‍ය, ඔදාතානි වත්‌ථානි දීඝදසානි ධාරෙය්‍ය, යාවජීවං අගාරියභූතො අස්‌සාති? න හෙවං වත්‌තබ්‌බෙ…පෙ.….
Gihissa arahāti? Āmantā. Arahā methunaṃ dhammaṃ paṭiseveyya, methunaṃ uppādeyya, puttasambādhasayanaṃ ajjhāvaseyya, kāsikacandanaṃ paccanubhaveyya, mālāgandhavilepanaṃ dhāreyya, jātarūparajataṃ sādiyeyya, ajeḷakaṃ paṭiggaṇheyya, kukkuṭasūkaraṃ paṭiggaṇheyya, hatthigavassavaḷavaṃ paṭiggaṇheyya, tittiravaṭṭakamorakapiñjaraṃ 5 paṭiggaṇheyya, cittavaṇḍavālamoḷiṃ 6 dhāreyya, odātāni vatthāni dīghadasāni dhāreyya, yāvajīvaṃ agāriyabhūto assāti? Na hevaṃ vattabbe…pe….
න වත්‌තබ්‌බං – ‘‘ගිහිස්‌ස අරහා’’ති? ආමන්‌තා. නනු යසො කුලපුත්‌තො, උත්‌තියො ගහපති, සෙතු මාණවො, ගිහිබ්‍යඤ්‌ජනෙන අරහත්‌තං පත්‌තොති? ආමන්‌තා. හඤ්‌චි යසො කුලපුත්‌තො, උත්‌තියො ගහපති, සෙතු මාණවො, ගිහිබ්‍යඤ්‌ජනෙන අරහත්‌තං පත්‌තො, තෙන වත රෙ වත්‌තබ්‌බෙ – ‘‘ගිහිස්‌ස අරහා’’ති.
Na vattabbaṃ – ‘‘gihissa arahā’’ti? Āmantā. Nanu yaso kulaputto, uttiyo gahapati, setu māṇavo, gihibyañjanena arahattaṃ pattoti? Āmantā. Hañci yaso kulaputto, uttiyo gahapati, setu māṇavo, gihibyañjanena arahattaṃ patto, tena vata re vattabbe – ‘‘gihissa arahā’’ti.
ගිහිස්‌ස අරහාතිකථා නිට්‌ඨිතා.
Gihissa arahātikathā niṭṭhitā.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 1. ගිහිස්‌ස අරහාතිකථාවණ්‌ණනා • 1. Gihissa arahātikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 1. ගිහිස්‌ස අරහාතිකථාවණ්‌ණනා • 1. Gihissa arahātikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 1. ගිහිස්‌ස අරහාතිකථාවණ්‌ණනා • 1. Gihissa arahātikathāvaṇṇanā
