| Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi |
༤. ཙཏུཏྠཝགྒོ
4. Catutthavaggo
(༣༣) ༡. གིཧིསྶ ཨརཧཱཏིཀཐཱ
(33) 1. Gihissa arahātikathā
༣༨༧. གིཧིསྶ ཨརཧཱཏི? ཨཱམནྟཱ། ཨཏྠི ཨརཧཏོ གིཧིསཾཡོཛནནྟི? ན ཧེཝཾ ཝཏྟབྦེ…པེ॰… ནཏྠི ཨརཧཏོ གིཧིསཾཡོཛནནྟི? ཨཱམནྟཱ། ཧཉྩི ནཏྠི ཨརཧཏོ གིཧིསཾཡོཛནཾ, ནོ ཙ ཝཏ རེ ཝཏྟབྦེ – ‘‘གིཧིསྶ ཨརཧཱ’’ཏི།
387. Gihissa arahāti? Āmantā. Atthi arahato gihisaṃyojananti? Na hevaṃ vattabbe…pe… natthi arahato gihisaṃyojananti? Āmantā. Hañci natthi arahato gihisaṃyojanaṃ, no ca vata re vattabbe – ‘‘gihissa arahā’’ti.
གིཧིསྶ ཨརཧཱཏི? ཨཱམནྟཱ། ནནུ ཨརཧཏོ གིཧིསཾཡོཛནཾ པཧཱིནཾ ཨུཙྪིནྣམཱུལཾ ཏཱལཱཝཏྠུཀཏཾ ཨནབྷཱཝངྐཏཾ ཨཱཡཏིཾ ཨནུཔྤཱདདྷམྨནྟི? ཨཱམནྟཱ། ཧཉྩི ཨརཧཏོ གིཧིསཾཡོཛནཾ པཧཱིནཾ ཨུཙྪིནྣམཱུལཾ ཏཱལཱཝཏྠུཀཏཾ ཨནབྷཱཝངྐཏཾ ཨཱཡཏིཾ ཨནུཔྤཱདདྷམྨཾ, ནོ ཙ ཝཏ རེ ཝཏྟབྦེ – ‘‘གིཧིསྶ ཨརཧཱ’’ཏི།
Gihissa arahāti? Āmantā. Nanu arahato gihisaṃyojanaṃ pahīnaṃ ucchinnamūlaṃ tālāvatthukataṃ anabhāvaṅkataṃ āyatiṃ anuppādadhammanti? Āmantā. Hañci arahato gihisaṃyojanaṃ pahīnaṃ ucchinnamūlaṃ tālāvatthukataṃ anabhāvaṅkataṃ āyatiṃ anuppādadhammaṃ, no ca vata re vattabbe – ‘‘gihissa arahā’’ti.
གིཧིསྶ ཨརཧཱཏི? ཨཱམནྟཱ། ཨཏྠི ཀོཙི གིཧཱི གིཧིསཾཡོཛནཾ ཨཔྤཧཱཡ དིཊྛེཝ དྷམྨེ དུཀྑསྶནྟཀརོཏི 1? ནཏྠི། ཧཉྩི ནཏྠི ཀོཙི གིཧཱི གིཧིསཾཡོཛནཾ ཨཔྤཧཱཡ དིཊྛེཝ དྷམྨེ དུཀྑསྶནྟཀརོ, ནོ ཙ ཝཏ རེ ཝཏྟབྦེ – ‘‘གིཧིསྶ ཨརཧཱ’’ཏི།
Gihissa arahāti? Āmantā. Atthi koci gihī gihisaṃyojanaṃ appahāya diṭṭheva dhamme dukkhassantakaroti 2? Natthi. Hañci natthi koci gihī gihisaṃyojanaṃ appahāya diṭṭheva dhamme dukkhassantakaro, no ca vata re vattabbe – ‘‘gihissa arahā’’ti.
གིཧིསྶ ཨརཧཱཏི? ཨཱམནྟཱ། ནནུ ཝཙྪགོཏྟོ པརིབྦཱཛཀོ བྷགཝནྟཾ ཨེཏདཝོཙ – ‘‘ཨཏྠི ནུ ཁོ, བྷོ གོཏམ, ཀོཙི གིཧཱི གིཧིསཾཡོཛནཾ ཨཔྤཧཱཡ ཀཱཡསྶ བྷེདཱ དུཀྑསྶནྟཀརོ’’ཏི? ‘‘ནཏྠི ཁོ, ཝཙྪ, ཀོཙི གིཧཱི གིཧིསཾཡོཛནཾ ཨཔྤཧཱཡ ཀཱཡསྶ བྷེདཱ དུཀྑསྶནྟཀརོ’’ཏི། ཨཏྠེཝ སུཏྟནྟོཏི? ཨཱམནྟཱ ། ཏེན ཧི ན ཝཏྟབྦཾ – ‘‘གིཧིསྶ ཨརཧཱ’’ཏི།
Gihissa arahāti? Āmantā. Nanu vacchagotto paribbājako bhagavantaṃ etadavoca – ‘‘atthi nu kho, bho gotama, koci gihī gihisaṃyojanaṃ appahāya kāyassa bhedā dukkhassantakaro’’ti? ‘‘Natthi kho, vaccha, koci gihī gihisaṃyojanaṃ appahāya kāyassa bhedā dukkhassantakaro’’ti. Attheva suttantoti? Āmantā . Tena hi na vattabbaṃ – ‘‘gihissa arahā’’ti.
གིཧིསྶ ཨརཧཱཏི? ཨཱམནྟཱ། ཨརཧཱ མེཐུནཾ དྷམྨཾ པཊིསེཝེཡྻ, མེཐུནཾ ཨུཔྤཱདེཡྻ, པུཏྟསམྦཱདྷསཡནཾ ཨཛ྄ཛྷཱཝསེཡྻ, ཀཱསིཀཙནྡནཾ པཙྩནུབྷཝེཡྻ, མཱལཱགནྡྷཝིལེཔནཾ དྷཱརེཡྻ, ཛཱཏརཱུཔརཛཏཾ སཱདིཡེཡྻ, ཨཛེལ༹ཀཾ པཊིགྒཎྷེཡྻ, ཀུཀྐུཊསཱུཀརཾ པཊིགྒཎྷེཡྻ, ཧཏྠིགཝསྶཝལ༹ཝཾ པཊིགྒཎྷེཡྻ, ཏིཏྟིརཝཊྚཀམོརཀཔིཉྫརཾ 3 པཊིགྒཎྷེཡྻ, ཙིཏྟཝཎྜཝཱལམོལི༹ཾ 4 དྷཱརེཡྻ, ཨོདཱཏཱནི ཝཏྠཱནི དཱིགྷདསཱནི དྷཱརེཡྻ, ཡཱཝཛཱིཝཾ ཨགཱརིཡབྷཱུཏོ ཨསྶཱཏི? ན ཧེཝཾ ཝཏྟབྦེ…པེ॰…།
Gihissa arahāti? Āmantā. Arahā methunaṃ dhammaṃ paṭiseveyya, methunaṃ uppādeyya, puttasambādhasayanaṃ ajjhāvaseyya, kāsikacandanaṃ paccanubhaveyya, mālāgandhavilepanaṃ dhāreyya, jātarūparajataṃ sādiyeyya, ajeḷakaṃ paṭiggaṇheyya, kukkuṭasūkaraṃ paṭiggaṇheyya, hatthigavassavaḷavaṃ paṭiggaṇheyya, tittiravaṭṭakamorakapiñjaraṃ 5 paṭiggaṇheyya, cittavaṇḍavālamoḷiṃ 6 dhāreyya, odātāni vatthāni dīghadasāni dhāreyya, yāvajīvaṃ agāriyabhūto assāti? Na hevaṃ vattabbe…pe….
ན ཝཏྟབྦཾ – ‘‘གིཧིསྶ ཨརཧཱ’’ཏི? ཨཱམནྟཱ། ནནུ ཡསོ ཀུལཔུཏྟོ, ཨུཏྟིཡོ གཧཔཏི, སེཏུ མཱཎཝོ, གིཧིབྱཉྫནེན ཨརཧཏྟཾ པཏྟོཏི? ཨཱམནྟཱ། ཧཉྩི ཡསོ ཀུལཔུཏྟོ, ཨུཏྟིཡོ གཧཔཏི, སེཏུ མཱཎཝོ, གིཧིབྱཉྫནེན ཨརཧཏྟཾ པཏྟོ, ཏེན ཝཏ རེ ཝཏྟབྦེ – ‘‘གིཧིསྶ ཨརཧཱ’’ཏི།
Na vattabbaṃ – ‘‘gihissa arahā’’ti? Āmantā. Nanu yaso kulaputto, uttiyo gahapati, setu māṇavo, gihibyañjanena arahattaṃ pattoti? Āmantā. Hañci yaso kulaputto, uttiyo gahapati, setu māṇavo, gihibyañjanena arahattaṃ patto, tena vata re vattabbe – ‘‘gihissa arahā’’ti.
གིཧིསྶ ཨརཧཱཏིཀཐཱ ནིཊྛིཏཱ།
Gihissa arahātikathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༡. གིཧིསྶ ཨརཧཱཏིཀཐཱཝཎྞནཱ • 1. Gihissa arahātikathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༡. གིཧིསྶ ཨརཧཱཏིཀཐཱཝཎྞནཱ • 1. Gihissa arahātikathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༡. གིཧིསྶ ཨརཧཱཏིཀཐཱཝཎྞནཱ • 1. Gihissa arahātikathāvaṇṇanā
