| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೪. ಚತುತ್ಥವಗ್ಗೋ
4. Catutthavaggo
೧. ಗಿಹಿಸ್ಸ ಅರಹಾತಿಕಥಾವಣ್ಣನಾ
1. Gihissa arahātikathāvaṇṇanā
೩೮೭. ಇದಾನಿ ಗಿಹಿಸ್ಸ ಅರಹಾತಿ ಕಥಾ ನಾಮ ಹೋತಿ। ತತ್ಥ ಯೇಸಂ ಯಸಕುಲಪುತ್ತಾದೀನಂ ಗಿಹಿಬ್ಯಞ್ಜನೇ ಠಿತಾನಂ ಅರಹತ್ತಪ್ಪತ್ತಿಂ ದಿಸ್ವಾ ‘‘ಗಿಹಿ ಅಸ್ಸ ಅರಹಾ’’ತಿ ಲದ್ಧಿ, ಸೇಯ್ಯಥಾಪಿ ಏತರಹಿ ಉತ್ತರಾಪಥಕಾನಂ; ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ। ತತ್ಥ ಗಿಹಿಸ್ಸಾತಿ ಯೋ ಗಿಹಿಸಂಯೋಜನಸಮ್ಪಯುತ್ತತಾಯ ಗಿಹಿ, ಸೋ ಅರಹಂ ಅಸ್ಸಾತಿ ಅತ್ಥೋ। ಪರವಾದೀ ಪನ ಅಧಿಪ್ಪಾಯಂ ಅಸಲ್ಲಕ್ಖೇತ್ವಾ ಗಿಹಿಬ್ಯಞ್ಜನಮತ್ತಮೇವ ಪಸ್ಸನ್ತೋ ಪಟಿಜಾನಾತಿ। ಇದಾನಿಸ್ಸ ‘‘ಗಿಹಿ ನಾಮ ಗಿಹಿಸಂಯೋಜನೇನ ಹೋತಿ, ನ ಬ್ಯಞ್ಜನಮತ್ತೇನ। ಯಥಾಹ ಭಗವಾ –
387. Idāni gihissa arahāti kathā nāma hoti. Tattha yesaṃ yasakulaputtādīnaṃ gihibyañjane ṭhitānaṃ arahattappattiṃ disvā ‘‘gihi assa arahā’’ti laddhi, seyyathāpi etarahi uttarāpathakānaṃ; te sandhāya pucchā sakavādissa. Tattha gihissāti yo gihisaṃyojanasampayuttatāya gihi, so arahaṃ assāti attho. Paravādī pana adhippāyaṃ asallakkhetvā gihibyañjanamattameva passanto paṭijānāti. Idānissa ‘‘gihi nāma gihisaṃyojanena hoti, na byañjanamattena. Yathāha bhagavā –
‘ಅಲಙ್ಕತೋ ಚೇಪಿ ಸಮಂ ಚರೇಯ್ಯ,
‘Alaṅkato cepi samaṃ careyya,
ಸನ್ತೋ ದನ್ತೋ ನಿಯತೋ ಬ್ರಹ್ಮಚಾರೀ।
Santo danto niyato brahmacārī;
ಸಬ್ಬೇಸು ಭೂತೇಸು ನಿಧಾಯ ದಣ್ಡಂ,
Sabbesu bhūtesu nidhāya daṇḍaṃ,
ಸೋ ಬ್ರಾಹ್ಮಣೋ ಸೋ ಸಮಣೋ ಸ ಭಿಕ್ಖೂ’’’ತಿ॥ (ಧ॰ ಪ॰ ೧೪೨)।
So brāhmaṇo so samaṇo sa bhikkhū’’’ti. (dha. pa. 142);
ಇಮಂ ನಯಂ ದಸ್ಸೇತುಂ ಅತ್ಥಿ ಅರಹತೋತಿಆದಿ ಆರದ್ಧಂ। ತಂ ಸಬ್ಬಂ ಉತ್ತಾನತ್ಥಮೇವಾತಿ।
Imaṃ nayaṃ dassetuṃ atthi arahatotiādi āraddhaṃ. Taṃ sabbaṃ uttānatthamevāti.
ಗಿಹಿಸ್ಸ ಅರಹಾತಿಕಥಾವಣ್ಣನಾ।
Gihissa arahātikathāvaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೩೩) ೧. ಗಿಹಿಸ್ಸ ಅರಹಾತಿಕಥಾ • (33) 1. Gihissa arahātikathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೧. ಗಿಹಿಸ್ಸ ಅರಹಾತಿಕಥಾವಣ್ಣನಾ • 1. Gihissa arahātikathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೧. ಗಿಹಿಸ್ಸ ಅರಹಾತಿಕಥಾವಣ್ಣನಾ • 1. Gihissa arahātikathāvaṇṇanā
