| Library / Tipiṭaka / तिपिटक • Tipiṭaka / अङ्गुत्तरनिकाय (अट्ठकथा) • Aṅguttaranikāya (aṭṭhakathā) |
९. गिहिसुत्तवण्णना
9. Gihisuttavaṇṇanā
१७९. नवमे संवुतकम्मन्तन्ति पिहितकम्मन्तं। आभिचेतसिकानन्ति उत्तमचित्तनिस्सितानं। दिट्ठधम्मसुखविहारानन्ति पच्चक्खेयेव धम्मे पवत्तिक्खणे सुखविहारानं। अरियकन्तेहीति अरियानं कन्तेहि मग्गफलसीलेहि।
179. Navame saṃvutakammantanti pihitakammantaṃ. Ābhicetasikānanti uttamacittanissitānaṃ. Diṭṭhadhammasukhavihārānanti paccakkheyeva dhamme pavattikkhaṇe sukhavihārānaṃ. Ariyakantehīti ariyānaṃ kantehi maggaphalasīlehi.
अरियधम्मं समादायाति एत्थ अरियधम्मोति पञ्च सीलानि कथितानि। मेरयं वारुणिन्ति चतुब्बिधं मेरयं पञ्चविधञ्च सुरं। धम्मञ्चानुवितक्कयेति नवविधं लोकुत्तरधम्मं अनुस्सतिवसेनेव वितक्केय्य। अब्यापज्झं हितं चित्तन्ति निद्दुक्खं मेत्तादिब्रह्मविहारचित्तं। देवलोकाय भावयेति ब्रह्मलोकत्थाय भावेय्य। पुञ्ञत्थस्स जिगीसतोति पुञ्ञेन अत्थिकस्स पुञ्ञं गवेसन्तस्स। सन्तेसूति बुद्धपच्चेकबुद्धतथागतसावकेसु। विपुला होति दक्खिणाति एवं दिन्नदानं महप्फलं होति। अनुपुब्बेनाति सीलपूरणादिना अनुक्कमेन। सेसं तिकनिपाते वुत्तत्थमेव।
Ariyadhammaṃ samādāyāti ettha ariyadhammoti pañca sīlāni kathitāni. Merayaṃ vāruṇinti catubbidhaṃ merayaṃ pañcavidhañca suraṃ. Dhammañcānuvitakkayeti navavidhaṃ lokuttaradhammaṃ anussativaseneva vitakkeyya. Abyāpajjhaṃ hitaṃ cittanti niddukkhaṃ mettādibrahmavihāracittaṃ. Devalokāya bhāvayeti brahmalokatthāya bhāveyya. Puññatthassa jigīsatoti puññena atthikassa puññaṃ gavesantassa. Santesūti buddhapaccekabuddhatathāgatasāvakesu. Vipulā hoti dakkhiṇāti evaṃ dinnadānaṃ mahapphalaṃ hoti. Anupubbenāti sīlapūraṇādinā anukkamena. Sesaṃ tikanipāte vuttatthameva.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / ९. गिहिसुत्तं • 9. Gihisuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ९. गिहिसुत्तवण्णना • 9. Gihisuttavaṇṇanā
