| Library / Tipiṭaka / තිපිටක • Tipiṭaka / චූළවග්‌ගපාළි • Cūḷavaggapāḷi |
ගිහිවිකතඅනුජානනං
Gihivikataanujānanaṃ
314. තෙන ඛො පන සමයෙන මනුස්‌සා භත්‌තග්‌ගෙ අන්‌තරඝරෙ උච්‌චාසයනමහාසයනානි පඤ්‌ඤපෙන්‌ති, සෙය්‍යථිදං – ආසන්‌දිං, පල්‌ලඞ්‌කං, ගොනකං, චිත්‌තකං, පටිකං, පටලිකං, තූලිකං, විකතිකං, උද්‌දලොමිං, එකන්‌තලොමිං, කට්‌ටිස්‌සං, කොසෙය්‍යං 1, කුත්‌තකං, හත්‌ථත්‌ථරං, අස්‌සත්‌ථරං, රථත්‌ථරං, අජිනපවෙණිං, කදලිමිගපවරපච්‌චත්‌ථරණං, සඋත්‌තරච්‌ඡදං, උභතොලොහිතකූපධානං. භික්‌ඛූ කුක්‌කුච්‌චායන්‌තා නාභිනිසීදන්‌ති. භගවතො එතමත්‌ථං ආරොචෙසුං. ‘‘අනුජානාමි, භික්‌ඛවෙ, ඨපෙත්‌වා තීණි – ආසන්‌දිං, පල්‌ලඞ්‌කං, තූලිකං – ගිහිවිකතං 2 අභිනිසීදිතුං, නත්‌වෙව අභිනිපජ්‌ජිතු’’න්‌ති.
314. Tena kho pana samayena manussā bhattagge antaraghare uccāsayanamahāsayanāni paññapenti, seyyathidaṃ – āsandiṃ, pallaṅkaṃ, gonakaṃ, cittakaṃ, paṭikaṃ, paṭalikaṃ, tūlikaṃ, vikatikaṃ, uddalomiṃ, ekantalomiṃ, kaṭṭissaṃ, koseyyaṃ 3, kuttakaṃ, hatthattharaṃ, assattharaṃ, rathattharaṃ, ajinapaveṇiṃ, kadalimigapavarapaccattharaṇaṃ, sauttaracchadaṃ, ubhatolohitakūpadhānaṃ. Bhikkhū kukkuccāyantā nābhinisīdanti. Bhagavato etamatthaṃ ārocesuṃ. ‘‘Anujānāmi, bhikkhave, ṭhapetvā tīṇi – āsandiṃ, pallaṅkaṃ, tūlikaṃ – gihivikataṃ 4 abhinisīdituṃ, natveva abhinipajjitu’’nti.
තෙන ඛො පන සමයෙන මනුස්‌සා භත්‌තග්‌ගෙ අන්‌තරඝරෙ තූලොනද්‌ධං මඤ්‌චම්‌පි පීඨම්‌පි පඤ්‌ඤපෙන්‌ති . භික්‌ඛූ කුක්‌කුච්‌චායන්‌තා නාභිනිසීදන්‌ති. භගවතො එතමත්‌ථං ආරොචෙසුං. ‘‘අනුජානාමි, භික්‌ඛවෙ, ගිහිවිකතං අභිනිසීදිතුං, නත්‌වෙව අභිනිපජ්‌ජිතු’’න්‌ති.
Tena kho pana samayena manussā bhattagge antaraghare tūlonaddhaṃ mañcampi pīṭhampi paññapenti . Bhikkhū kukkuccāyantā nābhinisīdanti. Bhagavato etamatthaṃ ārocesuṃ. ‘‘Anujānāmi, bhikkhave, gihivikataṃ abhinisīdituṃ, natveva abhinipajjitu’’nti.
Footnotes:
Related texts:
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / ආසනප්‌පටිබාහනාදිකථාවණ්‌ණනා • Āsanappaṭibāhanādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / විහාරානුජානනකථාවණ්‌ණනා • Vihārānujānanakathāvaṇṇanā
