| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
156. ගිහිවිකතානුඤ්‌ඤාතාදි
156. Gihivikatānuññātādi
256. තෙන ඛො පන සමයෙන මනුස්‌සානං මඤ්‌චම්‌පි පීඨම්‌පි චම්‌මොනද්‌ධානි හොන්‌ති, චම්‌මවිනද්‌ධානි. භික්‌ඛූ කුක්‌කුච්‌චායන්‌තා නාභිනිසීදන්‌ති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, ගිහිවිකතං අභිනිසීදිතුං, න ත්‌වෙව අභිනිපජ්‌ජිතුන්‌ති.
256. Tena kho pana samayena manussānaṃ mañcampi pīṭhampi cammonaddhāni honti, cammavinaddhāni. Bhikkhū kukkuccāyantā nābhinisīdanti. Bhagavato etamatthaṃ ārocesuṃ. Anujānāmi, bhikkhave, gihivikataṃ abhinisīdituṃ, na tveva abhinipajjitunti.
තෙන ඛො පන සමයෙන විහාරා චම්‌මවද්‌ධෙහි ඔගුම්‌ඵියන්‌ති 1. භික්‌ඛූ කුක්‌කුච්‌චායන්‌තා නාභිනිසීදන්‌ති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, බන්‌ධනමත්‌තං අභිනිසීදිතුන්‌ති.
Tena kho pana samayena vihārā cammavaddhehi ogumphiyanti 2. Bhikkhū kukkuccāyantā nābhinisīdanti. Bhagavato etamatthaṃ ārocesuṃ. Anujānāmi, bhikkhave, bandhanamattaṃ abhinisīditunti.
තෙන ඛො පන සමයෙන ඡබ්‌බග්‌ගියා භික්‌ඛූ සඋපාහනා ගාමං පවිසන්‌ති. මනුස්‌සා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘සෙය්‍යථාපි ගිහී කාමභොගිනො’’ති. භගවතො එතමත්‌ථං ආරොචෙසුං . න, භික්‌ඛවෙ, සඋපාහනෙන ගාමො පවිසිතබ්‌බො. යො පවිසෙය්‍ය, ආපත්‌ති දුක්‌කටස්‌සාති.
Tena kho pana samayena chabbaggiyā bhikkhū saupāhanā gāmaṃ pavisanti. Manussā ujjhāyanti khiyyanti vipācenti – ‘‘seyyathāpi gihī kāmabhogino’’ti. Bhagavato etamatthaṃ ārocesuṃ . Na, bhikkhave, saupāhanena gāmo pavisitabbo. Yo paviseyya, āpatti dukkaṭassāti.
තෙන ඛො පන සමයෙන අඤ්‌ඤතරො භික්‌ඛු ගිලානො හොති, න සක්‌කොති විනා උපාහනෙන ගාමං පවිසිතුං. භගවතො එතමත්‌ථං ආරොචෙසුං. අනුජානාමි, භික්‌ඛවෙ, ගිලානෙන භික්‌ඛුනා සඋපාහනෙන ගාමං පවිසිතුන්‌ති.
Tena kho pana samayena aññataro bhikkhu gilāno hoti, na sakkoti vinā upāhanena gāmaṃ pavisituṃ. Bhagavato etamatthaṃ ārocesuṃ. Anujānāmi, bhikkhave, gilānena bhikkhunā saupāhanena gāmaṃ pavisitunti.
ගිහිවිකතානුඤ්‌ඤාතාදි නිට්‌ඨිතා.
Gihivikatānuññātādi niṭṭhitā.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / සබ්‌බචම්‌මපටික්‌ඛෙපාදිකථා • Sabbacammapaṭikkhepādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / ගිහිවිකතානුඤ්‌ඤාතාදිකථාවණ්‌ණනා • Gihivikatānuññātādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / සබ්‌බචම්‌මපටික්‌ඛෙපාදිකථාවණ්‌ණනා • Sabbacammapaṭikkhepādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / ගිහිවිකතානුඤ්‌ඤාතාදිකථාවණ්‌ණනා • Gihivikatānuññātādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 155. සබ්‌බචම්‌මපටික්‌ඛෙපාදිකථා • 155. Sabbacammapaṭikkhepādikathā
