| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[164] 4. கி³ஜ்ஜ²ஜாதகவண்ணனா
[164] 4. Gijjhajātakavaṇṇanā
யங் நு கி³ஜ்ஜோ² யோஜனஸதந்தி இத³ங் ஸத்தா² ஜேதவனே விஹரந்தோ ஏகங் மாதுபோஸகபி⁴க்கு²ங் ஆரப்³ப⁴ கதே²ஸி. வத்து² ஸாமஜாதகே (ஜா॰ 2.22.296 ஆத³யோ) ஆவிப⁴விஸ்ஸதி. ஸத்தா² பன தங் பி⁴க்கு²ங் ‘‘ஸச்சங் கிர த்வங், பி⁴க்கு², கி³ஹீ போஸேஸீ’’தி புச்சி²த்வா ‘‘ஸச்ச’’ந்தி வுத்தே ‘‘கிங் பன தே ஹொந்தீ’’தி புச்சி²த்வா ‘‘மாதாபிதரோ மே, ப⁴ந்தே’’தி வுத்தே ‘‘ஸாது⁴ ஸாதூ⁴’’தி தஸ்ஸ ஸாது⁴காரங் த³த்வா ‘‘மா, பி⁴க்க²வே, இமங் பி⁴க்கு²ங் உஜ்ஜா²யித்த², போராணகபண்டி³தாபி கு³ணவஸேன அஞ்ஞாதகானம்பி உபகாரங் அகங்ஸு, இமஸ்ஸ பன மாதாபிதூனங் உபகாரகரணங் பா⁴ரோயேவா’’தி வத்வா அதீதங் ஆஹரி.
Yaṃnu gijjho yojanasatanti idaṃ satthā jetavane viharanto ekaṃ mātuposakabhikkhuṃ ārabbha kathesi. Vatthu sāmajātake (jā. 2.22.296 ādayo) āvibhavissati. Satthā pana taṃ bhikkhuṃ ‘‘saccaṃ kira tvaṃ, bhikkhu, gihī posesī’’ti pucchitvā ‘‘sacca’’nti vutte ‘‘kiṃ pana te hontī’’ti pucchitvā ‘‘mātāpitaro me, bhante’’ti vutte ‘‘sādhu sādhū’’ti tassa sādhukāraṃ datvā ‘‘mā, bhikkhave, imaṃ bhikkhuṃ ujjhāyittha, porāṇakapaṇḍitāpi guṇavasena aññātakānampi upakāraṃ akaṃsu, imassa pana mātāpitūnaṃ upakārakaraṇaṃ bhāroyevā’’ti vatvā atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ கி³ஜ்ஜ²கூடபப்³ப³தே கி³ஜ்ஜ²யோனியங் நிப்³ப³த்தித்வா மாதாபிதரோ போஸேதி. அதே²கஸ்மிங் காலே மஹதீ வாதவுட்டி² அஹோஸி. கி³ஜ்ஜா² வாதவுட்டி²ங் ஸஹிதுங் அஸக்கொந்தா ஸீதப⁴யேன பா³ராணஸிங் க³ந்த்வா பாகாரஸமீபே ச பரிகா²ஸமீபே ச ஸீதேன கம்பமானா நிஸீதி³ங்ஸு. ததா³ பா³ராணஸிஸெட்டி² நக³ரா நிக்க²மித்வா ந்ஹாயிதுங் க³ச்ச²ந்தோ தே கி³ஜ்ஜே² கிலமந்தே தி³ஸ்வா ஏகஸ்மிங் அனோவஸ்ஸகட்டா²னே ஸன்னிபாதெத்வா அக்³கி³ங் காராபெத்வா கோ³ஸுஸானங் பேஸெத்வா கோ³மங்ஸங் ஆஹராபெத்வா தேஸங் தா³பெத்வா ஆரக்க²ங் ட²பேஸி. கி³ஜ்ஜா² வூபஸந்தாய வாதவுட்டி²யா கல்லஸரீரா ஹுத்வா பப்³ப³தமேவ அக³மங்ஸு. தே தத்தே²வ ஸன்னிபதித்வா ஏவங் மந்தயிங்ஸு – ‘‘பா³ராணஸிஸெட்டி²னா அம்ஹாகங் உபகாரோ கதோ, கதூபகாரஸ்ஸ ச நாம பச்சுபகாரங் காதுங் வட்டதி, தஸ்மா இதோ பட்டா²ய தும்ஹேஸு யோ யங் வத்த²ங் வா ஆப⁴ரணங் வா லப⁴தி, தேன தங் பா³ராணஸிஸெட்டி²ஸ்ஸ கே³ஹே ஆகாஸங்க³ணே பாதேதப்³ப³’’ந்தி.
Atīte bārāṇasiyaṃ brahmadatte rajjaṃ kārente bodhisatto gijjhakūṭapabbate gijjhayoniyaṃ nibbattitvā mātāpitaro poseti. Athekasmiṃ kāle mahatī vātavuṭṭhi ahosi. Gijjhā vātavuṭṭhiṃ sahituṃ asakkontā sītabhayena bārāṇasiṃ gantvā pākārasamīpe ca parikhāsamīpe ca sītena kampamānā nisīdiṃsu. Tadā bārāṇasiseṭṭhi nagarā nikkhamitvā nhāyituṃ gacchanto te gijjhe kilamante disvā ekasmiṃ anovassakaṭṭhāne sannipātetvā aggiṃ kārāpetvā gosusānaṃ pesetvā gomaṃsaṃ āharāpetvā tesaṃ dāpetvā ārakkhaṃ ṭhapesi. Gijjhā vūpasantāya vātavuṭṭhiyā kallasarīrā hutvā pabbatameva agamaṃsu. Te tattheva sannipatitvā evaṃ mantayiṃsu – ‘‘bārāṇasiseṭṭhinā amhākaṃ upakāro kato, katūpakārassa ca nāma paccupakāraṃ kātuṃ vaṭṭati, tasmā ito paṭṭhāya tumhesu yo yaṃ vatthaṃ vā ābharaṇaṃ vā labhati, tena taṃ bārāṇasiseṭṭhissa gehe ākāsaṅgaṇe pātetabba’’nti.
ததோ பட்டா²ய கி³ஜ்ஜா² மனுஸ்ஸானங் வத்தா²ப⁴ரணானி ஆதபே ஸுக்கா²பெந்தானங் பமாத³ங் ஓலோகெத்வா ஸேனா விய மங்ஸபேஸிங் ஸஹஸா க³ஹெத்வா பா³ராணஸிஸெட்டி²ஸ்ஸ கே³ஹே ஆகாஸங்க³ணே பாதெந்தி. ஸோ கி³ஜ்ஜா²னங் ஆஹரணபா⁴வங் ஞத்வா ஸப்³பா³னி தானி விஸுங்யேவ ட²பேஸி. ‘‘கி³ஜ்ஜா² நக³ரங் விலும்பந்தீ’’தி ரஞ்ஞோ ஆரோசேஸுங். ராஜா ‘‘ஏகங் கி³ஜ்ஜ²ம்பி தாவ க³ண்ஹத², ஸப்³ப³ங் ஆஹராபெஸ்ஸாமீ’’தி தத்த² தத்த² பாஸே சேவ ஜாலானி ச ஒட்³டா³பேஸி. மாதுபோஸககி³ஜ்ஜோ² பாஸே ப³ஜ்ஜி², தங் க³ஹெத்வா ‘‘ரஞ்ஞோ த³ஸ்ஸெஸ்ஸாமா’’தி நெந்தி. பா³ராணஸிஸெட்டி² ராஜுபட்டா²னங் க³ச்ச²ந்தோ தே மனுஸ்ஸே கி³ஜ்ஜ²ங் க³ஹெத்வா க³ச்ச²ந்தே தி³ஸ்வா ‘‘மா இமங் கி³ஜ்ஜ²ங் பா³த⁴யிங்ஸூ’’தி ஸத்³தி⁴ஞ்ஞேவ அக³மாஸி. கி³ஜ்ஜ²ங் ரஞ்ஞோ த³ஸ்ஸேஸுங். அத² நங் ராஜா புச்சி² – ‘‘தும்ஹே நக³ரங் விலும்பித்வா வத்தா²தீ³னி க³ண்ஹதா²’’தி. ‘‘ஆம, மஹாராஜா’’தி. ‘‘கஸ்ஸ தானி தி³ன்னானீ’’தி? ‘‘பா³ராணஸிஸெட்டி²ஸ்ஸா’’தி. ‘‘கிங்காரணா’’தி? ‘‘அம்ஹாகங் தேன ஜீவிதங் த்³வின்னங், உபகாரஸ்ஸ நாம பச்சுபகாரங் காதுங் வட்டதி, தஸ்மா அத³ம்ஹா’’தி. அத² நங் ராஜா ‘‘கி³ஜ்ஜா² கிர யோஜனஸதமத்த²கே ட²த்வா குணபங் பஸ்ஸந்தி, கஸ்மா த்வங் அத்தனோ ஒட்³டி³தங் பாஸங் ந பஸ்ஸஸீ’’தி வத்வா பட²மங் கா³த²மாஹ –
Tato paṭṭhāya gijjhā manussānaṃ vatthābharaṇāni ātape sukkhāpentānaṃ pamādaṃ oloketvā senā viya maṃsapesiṃ sahasā gahetvā bārāṇasiseṭṭhissa gehe ākāsaṅgaṇe pātenti. So gijjhānaṃ āharaṇabhāvaṃ ñatvā sabbāni tāni visuṃyeva ṭhapesi. ‘‘Gijjhā nagaraṃ vilumpantī’’ti rañño ārocesuṃ. Rājā ‘‘ekaṃ gijjhampi tāva gaṇhatha, sabbaṃ āharāpessāmī’’ti tattha tattha pāse ceva jālāni ca oḍḍāpesi. Mātuposakagijjho pāse bajjhi, taṃ gahetvā ‘‘rañño dassessāmā’’ti nenti. Bārāṇasiseṭṭhi rājupaṭṭhānaṃ gacchanto te manusse gijjhaṃ gahetvā gacchante disvā ‘‘mā imaṃ gijjhaṃ bādhayiṃsū’’ti saddhiññeva agamāsi. Gijjhaṃ rañño dassesuṃ. Atha naṃ rājā pucchi – ‘‘tumhe nagaraṃ vilumpitvā vatthādīni gaṇhathā’’ti. ‘‘Āma, mahārājā’’ti. ‘‘Kassa tāni dinnānī’’ti? ‘‘Bārāṇasiseṭṭhissā’’ti. ‘‘Kiṃkāraṇā’’ti? ‘‘Amhākaṃ tena jīvitaṃ dvinnaṃ, upakārassa nāma paccupakāraṃ kātuṃ vaṭṭati, tasmā adamhā’’ti. Atha naṃ rājā ‘‘gijjhā kira yojanasatamatthake ṭhatvā kuṇapaṃ passanti, kasmā tvaṃ attano oḍḍitaṃ pāsaṃ na passasī’’ti vatvā paṭhamaṃ gāthamāha –
27.
27.
‘‘யங் நு கி³ஜ்ஜோ² யோஜனஸதங், குணபானி அவெக்க²தி;
‘‘Yaṃ nu gijjho yojanasataṃ, kuṇapāni avekkhati;
கஸ்மா ஜாலஞ்ச பாஸஞ்ச, ஆஸஜ்ஜாபி ந பு³ஜ்ஜ²ஸீ’’தி.
Kasmā jālañca pāsañca, āsajjāpi na bujjhasī’’ti.
தத்த² யந்தி நிபாதமத்தங், நூதி நாமத்தே² நிபாதோ. கி³ஜ்ஜோ² நாம யோஜனஸதங் அதிக்கமித்வா டி²தானி குணபானி அவெக்க²தி, பஸ்ஸதீதி அத்தோ². ஆஸஜ்ஜாபீதி ஆஸாதெ³த்வாபி, ஸம்பாபுணித்வாபீதி அத்தோ². ‘‘த்வங் அத்தனோ அத்தா²ய ஒட்³டி³தங் ஜாலஞ்ச பாஸஞ்ச பத்வாபி கஸ்மா ந பு³ஜ்ஜ²ஸீ’’தி புச்சி².
Tattha yanti nipātamattaṃ, nūti nāmatthe nipāto. Gijjho nāma yojanasataṃ atikkamitvā ṭhitāni kuṇapāni avekkhati, passatīti attho. Āsajjāpīti āsādetvāpi, sampāpuṇitvāpīti attho. ‘‘Tvaṃ attano atthāya oḍḍitaṃ jālañca pāsañca patvāpi kasmā na bujjhasī’’ti pucchi.
கி³ஜ்ஜோ² தஸ்ஸ வசனங் ஸுத்வா து³தியங் கா³த²மாஹ –
Gijjho tassa vacanaṃ sutvā dutiyaṃ gāthamāha –
28.
28.
‘‘யதா³ பராப⁴வோ ஹோதி, போஸோ ஜீவிதஸங்க²யே;
‘‘Yadā parābhavo hoti, poso jīvitasaṅkhaye;
அத² ஜாலஞ்ச பாஸஞ்ச, ஆஸஜ்ஜாபி ந பு³ஜ்ஜ²தீ’’தி.
Atha jālañca pāsañca, āsajjāpi na bujjhatī’’ti.
தத்த² பராப⁴வோதி வினாஸோ. போஸோதி ஸத்தோ.
Tattha parābhavoti vināso. Posoti satto.
கி³ஜ்ஜ²ஸ்ஸ வசனங் ஸுத்வா ராஜா ஸெட்டி²ங் புச்சி² – ‘‘ஸச்சங் கிர, மஹாஸெட்டி², கி³ஜ்ஜே²ஹி தும்ஹாகங் கே³ஹே வத்தா²தீ³னி ஆப⁴தானீ’’தி. ‘‘ஸச்சங், தே³வா’’தி. ‘‘கஹங் தானீ’’தி? ‘‘தே³வ, மயா தானி ஸப்³பா³னி விஸுங் ட²பிதானி, யங் யேஸங் ஸந்தகங், தங் தேஸங் த³ஸ்ஸாமி, இமங் கி³ஜ்ஜ²ங் விஸ்ஸஜ்ஜேதா²’’தி கி³ஜ்ஜ²ங் விஸ்ஸஜ்ஜாபெத்வா மஹாஸெட்டி²ங் ஸப்³பே³ஸங் ஸந்தகானி தா³பேஸி.
Gijjhassa vacanaṃ sutvā rājā seṭṭhiṃ pucchi – ‘‘saccaṃ kira, mahāseṭṭhi, gijjhehi tumhākaṃ gehe vatthādīni ābhatānī’’ti. ‘‘Saccaṃ, devā’’ti. ‘‘Kahaṃ tānī’’ti? ‘‘Deva, mayā tāni sabbāni visuṃ ṭhapitāni, yaṃ yesaṃ santakaṃ, taṃ tesaṃ dassāmi, imaṃ gijjhaṃ vissajjethā’’ti gijjhaṃ vissajjāpetvā mahāseṭṭhiṃ sabbesaṃ santakāni dāpesi.
ஸத்தா² இமங் த⁴ம்மதே³ஸனங் ஆஹரித்வா ஸச்சானி பகாஸெத்வா ஜாதகங் ஸமோதா⁴னேஸி, ஸச்சபரியோஸானே மாதுபோஸகபி⁴க்கு² ஸோதாபத்திப²லே பதிட்ட²ஹி . ‘‘ததா³ ராஜா ஆனந்தோ³ அஹோஸி, பா³ராணஸிஸெட்டி² ஸாரிபுத்தோ, மாதுபோஸககி³ஜ்ஜோ² பன அஹமேவ அஹோஸி’’ந்தி.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne mātuposakabhikkhu sotāpattiphale patiṭṭhahi . ‘‘Tadā rājā ānando ahosi, bārāṇasiseṭṭhi sāriputto, mātuposakagijjho pana ahameva ahosi’’nti.
கி³ஜ்ஜ²ஜாதகவண்ணனா சதுத்தா².
Gijjhajātakavaṇṇanā catutthā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 164. கி³ஜ்ஜ²ஜாதகங் • 164. Gijjhajātakaṃ
