| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
10. கி³லானத³ஸ்ஸனஸுத்தங்
10. Gilānadassanasuttaṃ
352. தேன கோ² பன ஸமயேன சித்தோ க³ஹபதி ஆபா³தி⁴கோ ஹோதி து³க்கி²தோ பா³ள்ஹகி³லானோ. அத² கோ² ஸம்ப³ஹுலா ஆராமதே³வதா வனதே³வதா ருக்க²தே³வதா ஓஸதி⁴திணவனப்பதீஸு அதி⁴வத்தா² தே³வதா ஸங்க³ம்ம ஸமாக³ம்ம சித்தங் க³ஹபதிங் ஏதத³வோசுங் – ‘‘பணிதே⁴ஹி, க³ஹபதி, அனாக³தமத்³தா⁴னங் ராஜா அஸ்ஸங் சக்கவத்தீ’’தி.
352. Tena kho pana samayena citto gahapati ābādhiko hoti dukkhito bāḷhagilāno. Atha kho sambahulā ārāmadevatā vanadevatā rukkhadevatā osadhitiṇavanappatīsu adhivatthā devatā saṅgamma samāgamma cittaṃ gahapatiṃ etadavocuṃ – ‘‘paṇidhehi, gahapati, anāgatamaddhānaṃ rājā assaṃ cakkavattī’’ti.
ஏவங் வுத்தே, சித்தோ க³ஹபதி தா ஆராமதே³வதா வனதே³வதா ருக்க²தே³வதா ஓஸதி⁴திணவனப்பதீஸு அதி⁴வத்தா² தே³வதா ஏதத³வோச – ‘‘தம்பி அனிச்சங், தம்பி அத்³து⁴வங், தம்பி பஹாய க³மனீய’’ந்தி. ஏவங் வுத்தே, சித்தஸ்ஸ க³ஹபதினோ மித்தாமச்சா ஞாதிஸாலோஹிதா சித்தங் க³ஹபதிங் ஏதத³வோசுங் – ‘‘ஸதிங், அய்யபுத்த, உபட்ட²பேஹி, மா விப்பலபீ’’தி. ‘‘கிங் தாஹங் வதா³மி யங் மங் தும்ஹே ஏவங் வதே³த² – ‘ஸதிங், அய்யபுத்த, உபட்ட²பேஹி, மா விப்பலபீ’’’தி? ‘‘ஏவங் கோ² த்வங், அய்யபுத்த, வதே³ஸி – ‘தம்பி அனிச்சங், தம்பி அத்³து⁴வங், தம்பி பஹாய க³மனீய’’’ந்தி. ‘‘ததா² ஹி பன மங் ஆராமதே³வதா வனதே³வதா ருக்க²தே³வதா ஓஸதி⁴திணவனப்பதீஸு அதி⁴வத்தா² தே³வதா ஏவமாஹங்ஸு – ‘பணிதே⁴ஹி, க³ஹபதி, அனாக³தமத்³தா⁴னங் ராஜா அஸ்ஸங் சக்கவத்தீ’தி. தாஹங் ஏவங் வதா³மி – ‘தம்பி அனிச்சங்…பே॰… தம்பி பஹாய க³மனீய’’’ந்தி. ‘‘கிங் பன தா, அய்யபுத்த, ஆராமதே³வதா வனதே³வதா ருக்க²தே³வதா ஓஸதி⁴திணவனப்பதீஸு அதி⁴வத்தா² தே³வதா அத்த²வஸங் ஸம்பஸ்ஸமானா ஏவமாஹங்ஸு – ‘பணிதே⁴ஹி, க³ஹபதி, அனாக³தமத்³தா⁴னங் ராஜா அஸ்ஸங் சக்கவத்தீ’’’தி? ‘‘தாஸங் கோ² ஆராமதே³வதானங் வனதே³வதானங் ருக்க²தே³வதானங் ஓஸதி⁴திணவனப்பதீஸு அதி⁴வத்தா²னங் தே³வதானங் ஏவங் ஹோதி – ‘அயங் கோ² சித்தோ க³ஹபதி, ஸீலவா 1 கல்யாணத⁴ம்மோ. ஸசே பணித³ஹிஸ்ஸதி – அனாக³தமத்³தா⁴னங் ராஜா அஸ்ஸங் சக்கவத்தீ’தி, ‘தஸ்ஸ கோ² அயங் இஜ்ஜி²ஸ்ஸதி, ஸீலவதோ சேதோபணிதி⁴ விஸுத்³த⁴த்தா த⁴ம்மிகோ த⁴ம்மிகங் ப²லங் அனுபஸ்ஸதீ’தி. இமங் கோ² தா ஆராமதே³வதா வனதே³வதா ருக்க²தே³வதா ஓஸதி⁴திணவனப்பதீஸு அதி⁴வத்தா² தே³வதா அத்த²வஸங் ஸம்பஸ்ஸமானா ஏவமாஹங்ஸு – ‘பணிதே⁴ஹி, க³ஹபதி, அனாக³தமத்³தா⁴னங் ராஜா அஸ்ஸங் சக்கவத்தீ’தி. தாஹங் ஏவங் வதா³மி – ‘தம்பி அனிச்சங், தம்பி அத்³து⁴வங், தம்பி பஹாய க³மனீய’’’ந்தி.
Evaṃ vutte, citto gahapati tā ārāmadevatā vanadevatā rukkhadevatā osadhitiṇavanappatīsu adhivatthā devatā etadavoca – ‘‘tampi aniccaṃ, tampi addhuvaṃ, tampi pahāya gamanīya’’nti. Evaṃ vutte, cittassa gahapatino mittāmaccā ñātisālohitā cittaṃ gahapatiṃ etadavocuṃ – ‘‘satiṃ, ayyaputta, upaṭṭhapehi, mā vippalapī’’ti. ‘‘Kiṃ tāhaṃ vadāmi yaṃ maṃ tumhe evaṃ vadetha – ‘satiṃ, ayyaputta, upaṭṭhapehi, mā vippalapī’’’ti? ‘‘Evaṃ kho tvaṃ, ayyaputta, vadesi – ‘tampi aniccaṃ, tampi addhuvaṃ, tampi pahāya gamanīya’’’nti. ‘‘Tathā hi pana maṃ ārāmadevatā vanadevatā rukkhadevatā osadhitiṇavanappatīsu adhivatthā devatā evamāhaṃsu – ‘paṇidhehi, gahapati, anāgatamaddhānaṃ rājā assaṃ cakkavattī’ti. Tāhaṃ evaṃ vadāmi – ‘tampi aniccaṃ…pe… tampi pahāya gamanīya’’’nti. ‘‘Kiṃ pana tā, ayyaputta, ārāmadevatā vanadevatā rukkhadevatā osadhitiṇavanappatīsu adhivatthā devatā atthavasaṃ sampassamānā evamāhaṃsu – ‘paṇidhehi, gahapati, anāgatamaddhānaṃ rājā assaṃ cakkavattī’’’ti? ‘‘Tāsaṃ kho ārāmadevatānaṃ vanadevatānaṃ rukkhadevatānaṃ osadhitiṇavanappatīsu adhivatthānaṃ devatānaṃ evaṃ hoti – ‘ayaṃ kho citto gahapati, sīlavā 2 kalyāṇadhammo. Sace paṇidahissati – anāgatamaddhānaṃ rājā assaṃ cakkavattī’ti, ‘tassa kho ayaṃ ijjhissati, sīlavato cetopaṇidhi visuddhattā dhammiko dhammikaṃ phalaṃ anupassatī’ti. Imaṃ kho tā ārāmadevatā vanadevatā rukkhadevatā osadhitiṇavanappatīsu adhivatthā devatā atthavasaṃ sampassamānā evamāhaṃsu – ‘paṇidhehi, gahapati, anāgatamaddhānaṃ rājā assaṃ cakkavattī’ti. Tāhaṃ evaṃ vadāmi – ‘tampi aniccaṃ, tampi addhuvaṃ, tampi pahāya gamanīya’’’nti.
‘‘தேன ஹி, அய்யபுத்த, அம்ஹேபி ஓவதா³ஹீ’’தி. ‘‘தஸ்மா ஹி வோ ஏவங் ஸிக்கி²தப்³ப³ங் – பு³த்³தே⁴ அவேச்சப்பஸாதே³ன ஸமன்னாக³தா ப⁴விஸ்ஸாம – ‘இதிபி ஸோ ப⁴க³வா அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா’தி. த⁴ம்மே அவேச்சப்பஸாதே³ன ஸமன்னாக³தா ப⁴விஸ்ஸாம – ‘ஸ்வாக்கா²தோ ப⁴க³வதா த⁴ம்மோ ஸந்தி³ட்டி²கோ அகாலிகோ ஏஹிபஸ்ஸிகோ ஓபனெய்யிகோ பச்சத்தங் வேதி³தப்³போ³ விஞ்ஞூஹீ’தி. ஸங்கே⁴ அவேச்சப்பஸாதே³ன ஸமன்னாக³தா ப⁴விஸ்ஸாம – ‘ஸுப்படிபன்னோ ப⁴க³வதோ ஸாவகஸங்கோ⁴, உஜுப்படிபன்னோ ப⁴க³வதோ ஸாவகஸங்கோ⁴, ஞாயப்படிபன்னோ ப⁴க³வதோ ஸாவகஸங்கோ⁴, ஸாமீசிப்படிபன்னோ ப⁴க³வதோ ஸாவகஸங்கோ⁴, யதி³த³ங் சத்தாரி புரிஸயுகா³னி அட்ட² புரிஸபுக்³க³லா ஏஸ ப⁴க³வதோ ஸாவகஸங்கோ⁴ ஆஹுனெய்யோ பாஹுனெய்யோ த³க்கி²ணெய்யோ அஞ்ஜலிகரணீயோ அனுத்தரங் புஞ்ஞக்கெ²த்தங் லோகஸ்ஸா’தி. யங் கோ² பன கிஞ்சி குலே தெ³ய்யத⁴ம்மங் ஸப்³ப³ங் தங் அப்படிவிப⁴த்தங் ப⁴விஸ்ஸதி ஸீலவந்தேஹி கல்யாணத⁴ம்மேஹீதி ஏவஞ்ஹி வோ ஸிக்கி²தப்³ப³’’ந்தி. அத² கோ² சித்தோ க³ஹபதி மித்தாமச்சே ஞாதிஸாலோஹிதே பு³த்³தே⁴ ச த⁴ம்மே ச ஸங்கே⁴ ச சாகே³ ச ஸமாத³பெத்வா காலமகாஸீதி. த³ஸமங்.
‘‘Tena hi, ayyaputta, amhepi ovadāhī’’ti. ‘‘Tasmā hi vo evaṃ sikkhitabbaṃ – buddhe aveccappasādena samannāgatā bhavissāma – ‘itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā’ti. Dhamme aveccappasādena samannāgatā bhavissāma – ‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṃ veditabbo viññūhī’ti. Saṅghe aveccappasādena samannāgatā bhavissāma – ‘suppaṭipanno bhagavato sāvakasaṅgho, ujuppaṭipanno bhagavato sāvakasaṅgho, ñāyappaṭipanno bhagavato sāvakasaṅgho, sāmīcippaṭipanno bhagavato sāvakasaṅgho, yadidaṃ cattāri purisayugāni aṭṭha purisapuggalā esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassā’ti. Yaṃ kho pana kiñci kule deyyadhammaṃ sabbaṃ taṃ appaṭivibhattaṃ bhavissati sīlavantehi kalyāṇadhammehīti evañhi vo sikkhitabba’’nti. Atha kho citto gahapati mittāmacce ñātisālohite buddhe ca dhamme ca saṅghe ca cāge ca samādapetvā kālamakāsīti. Dasamaṃ.
சித்தஸங்யுத்தங் ஸமத்தங்.
Cittasaṃyuttaṃ samattaṃ.
தஸ்ஸுத்³தா³னங் –
Tassuddānaṃ –
ஸங்யோஜனங் த்³வே இஸித³த்தா, மஹகோ காமபூ⁴பி ச;
Saṃyojanaṃ dve isidattā, mahako kāmabhūpi ca;
கோ³த³த்தோ ச நிக³ண்டோ² ச, அசேலேன கி³லானத³ஸ்ஸனந்தி.
Godatto ca nigaṇṭho ca, acelena gilānadassananti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. கி³லானத³ஸ்ஸனஸுத்தவண்ணனா • 10. Gilānadassanasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. கி³லானத³ஸ்ஸனஸுத்தவண்ணனா • 10. Gilānadassanasuttavaṇṇanā
