| Library / Tipiṭaka / ติปิฎก • Tipiṭaka / สํยุตฺตนิกาย (อฎฺฐกถา) • Saṃyuttanikāya (aṭṭhakathā) |
๑๐. คิลานทสฺสนสุตฺตวณฺณนา
10. Gilānadassanasuttavaṇṇanā
๓๕๒. ทสเม อารามเทวตาติ ปุปฺผารามผลาราเมสุ อธิวตฺถา เทวตาฯ วนเทวตาติ วนสเณฺฑสุ อธิวตฺถา เทวตาฯ รุกฺขเทวตาติ มตฺตราชกาเล เวสฺสวโณ จ เทวตาติ เอวํ เตสุ เตสุ รุเกฺขสุ อธิวตฺถา เทวตาฯ โอสธิติณวนปฺปตีสูติ หรีตกามลกีอาทีสุ มุญฺชปพฺพชาทีสุ วนเชฎฺฐรุเกฺขสุ จ อธิวตฺถา เทวตาฯ สํคมฺมาติ สนฺนิปติตฺวาฯ สมาคมฺมาติ ตโต ตโต สมาคนฺตฺวาฯ ปณิเธหีติ ปตฺถนาวเสน ฐเปหิฯ อิชฺฌิสฺสติ สีลวโต เจโตปณิธีติ สมิชฺฌิสฺสติ สีลวนฺตสฺส จิตฺตปตฺถนาฯ ธมฺมิโกติ ทสกุสลธมฺมสมนฺนาคโต อคติคมนรหิโตฯ ธมฺมราชาติ ตเสฺสว เววจนํ, ธเมฺมน วา ลทฺธรชฺชตฺตา ธมฺมราชาฯ ตสฺมาติ ‘‘ยสฺมา เตน หิ, อยฺยปุตฺต, อเมฺหปิ โอวทาหี’’ติ วทถ, ตสฺมาฯ อปฺปฎิวิภตฺตนฺติ ‘‘อิทํ ภิกฺขูนํ ทสฺสาม, อิทํ อตฺตนา ภุญฺชิสฺสามา’’ติ เอวํ อวิภตฺตํ ภิกฺขูหิ สทฺธิํ สาธารณเมว ภวิสฺสตีติฯ
352. Dasame ārāmadevatāti pupphārāmaphalārāmesu adhivatthā devatā. Vanadevatāti vanasaṇḍesu adhivatthā devatā. Rukkhadevatāti mattarājakāle vessavaṇo ca devatāti evaṃ tesu tesu rukkhesu adhivatthā devatā. Osadhitiṇavanappatīsūti harītakāmalakīādīsu muñjapabbajādīsu vanajeṭṭharukkhesu ca adhivatthā devatā. Saṃgammāti sannipatitvā. Samāgammāti tato tato samāgantvā. Paṇidhehīti patthanāvasena ṭhapehi. Ijjhissati sīlavato cetopaṇidhīti samijjhissati sīlavantassa cittapatthanā. Dhammikoti dasakusaladhammasamannāgato agatigamanarahito. Dhammarājāti tasseva vevacanaṃ, dhammena vā laddharajjattā dhammarājā. Tasmāti ‘‘yasmā tena hi, ayyaputta, amhepi ovadāhī’’ti vadatha, tasmā. Appaṭivibhattanti ‘‘idaṃ bhikkhūnaṃ dassāma, idaṃ attanā bhuñjissāmā’’ti evaṃ avibhattaṃ bhikkhūhi saddhiṃ sādhāraṇameva bhavissatīti.
จิตฺตสํยุตฺตวณฺณนา นิฎฺฐิตาฯ
Cittasaṃyuttavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๑๐. คิลานทสฺสนสุตฺตํ • 10. Gilānadassanasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๑๐. คิลานทสฺสนสุตฺตวณฺณนา • 10. Gilānadassanasuttavaṇṇanā
