༡. གིལཱནསུཏྟཾ

1. Gilānasuttaṃ

༡༢༡. ཨེཀཾ སམཡཾ བྷགཝཱ ཝེསཱལིཡཾ ཝིཧརཏི མཧཱཝནེ ཀཱུཊཱགཱརསཱལཱཡཾ། ཨཐ ཁོ བྷགཝཱ སཱཡནྷསམཡཾ པཊིསལླཱནཱ ཝུཊྛིཏོ ཡེན གིལཱནསཱལཱ ཏེནུཔསངྐམི། ཨདྡསཱ ཁོ བྷགཝཱ ཨཉྙཏརཾ བྷིཀྑུཾ དུབྦལཾ གིལཱནཀཾ; དིསྭཱ པཉྙཏྟེ ཨཱསནེ ནིསཱིདི། ནིསཛྫ ཁོ བྷགཝཱ བྷིཀྑཱུ ཨཱམནྟེསི –

121. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho bhagavā sāyanhasamayaṃ paṭisallānā vuṭṭhito yena gilānasālā tenupasaṅkami. Addasā kho bhagavā aññataraṃ bhikkhuṃ dubbalaṃ gilānakaṃ; disvā paññatte āsane nisīdi. Nisajja kho bhagavā bhikkhū āmantesi –

‘‘ཡཾ ཀིཉྩི ¹, བྷིཀྑཝེ, བྷིཀྑུཾ དུབྦལཾ ² གིལཱནཀཾ པཉྩ དྷམྨཱ ན ཝིཛཧནྟི, ཏསྶེཏཾ པཱཊིཀངྑཾ – ‘ནཙིརསྶེཝ ཨཱསཝཱནཾ ཁཡཱ ཨནཱསཝཾ ཙེཏོཝིམུཏྟིཾ པཉྙཱཝིམུཏྟིཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརིསྶཏཱི’’’ཏི།

‘‘Yaṃ kiñci ³, bhikkhave, bhikkhuṃ dubbalaṃ ⁴ gilānakaṃ pañca dhammā na vijahanti, tassetaṃ pāṭikaṅkhaṃ – ‘nacirasseva āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharissatī’’’ti.

‘‘ཀཏམེ པཉྩ? ཨིདྷ, བྷིཀྑཝེ, བྷིཀྑུ ཨསུབྷཱནུཔསྶཱི ཀཱཡེ ཝིཧརཏི, ཨཱཧཱརེ པཊིཀཱུལསཉྙཱི, སབྦལོཀེ ཨནབྷིརཏསཉྙཱི ⁵, སབྦསངྑཱརེསུ ཨནིཙྩཱནུཔསྶཱི, མརཎསཉྙཱ ཁོ པནསྶ ཨཛ྄ཛྷཏྟཾ སཱུཔཊྛིཏཱ ཧོཏི། ཡཾ ཀིཉྩི, བྷིཀྑཝེ, བྷིཀྑུཾ དུབྦལཾ གིལཱནཀཾ ཨིམེ པཉྩ དྷམྨཱ ན ཝིཛཧནྟི, ཏསྶེཏཾ པཱཊིཀངྑཾ – ‘ནཙིརསྶེཝ ཨཱསཝཱནཾ ཁཡཱ…པེ॰… སཙྪིཀཏྭཱ ཨུཔསམྤཛྫ ཝིཧརིསྶཏཱི’’’ཏི། པཋམཾ།

‘‘Katame pañca? Idha, bhikkhave, bhikkhu asubhānupassī kāye viharati, āhāre paṭikūlasaññī, sabbaloke anabhiratasaññī ⁶, sabbasaṅkhāresu aniccānupassī, maraṇasaññā kho panassa ajjhattaṃ sūpaṭṭhitā hoti. Yaṃ kiñci, bhikkhave, bhikkhuṃ dubbalaṃ gilānakaṃ ime pañca dhammā na vijahanti, tassetaṃ pāṭikaṅkhaṃ – ‘nacirasseva āsavānaṃ khayā…pe… sacchikatvā upasampajja viharissatī’’’ti. Paṭhamaṃ.

Next: ༢. སཏིསཱུཔཊྛིཏསུཏྟཾ • 2. Satisūpaṭṭhitasuttaṃ

Footnotes:

1. ཡཾ ཀིཉྩི (སྱཱ॰ ཀཾ॰)

2. བྷིཀྑཝེ དུབྦལཾ (སཱི॰ སྱཱ॰ ཀཾ॰ པཱི॰)

3. yaṃ kiñci (syā. kaṃ.)

4. bhikkhave dubbalaṃ (sī. syā. kaṃ. pī.)

5. སབྦཏྠཔི ཨེཝམེཝ དིསྶཏི

6. sabbatthapi evameva dissati

Related texts:

ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༥-༡༣. མཙྪརིནཱིསུཏྟཱདིཝཎྞནཱ • 5-13. Maccharinīsuttādivaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact