| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2. கி³லானஸுத்தவண்ணனா
2. Gilānasuttavaṇṇanā
22. து³தியே ஹிதானீதி ப⁴ப்³யானி. வுத்³தி⁴கரானீதி ஆரொக்³யாதி³வுத்³தி⁴கரானி. அனுச்ச²விகந்தி உபட்டா²னகிரியாய அனுரூபங். வாதாபமாரரோகே³னாதி வாதரோகே³ன ச அபமாரரோகே³ன ச, வாதனிதா³னேன வா அபமாரரோகே³ன. நிட்ட²ப்பத்தகி³லானோதி ‘‘இமினா ரோகே³ன ந சிரஸ்ஸேவ மரிஸ்ஸதீ’’தி நிட்ட²ங் பத்தோ கி³லானோ. கி²பிதகங் நாம வமது²ரோகோ³. கச்சூ²தி து²ல்லகச்சு²ஆபா³தோ⁴. திணபுப்ப²கஜரோ விஸமவாதஸம்ப²ஸ்ஸஜரோகோ³. யேஸந்தி யேஸங் ரோகா³னங். படிஜக்³க³னேனாதி படிகாரமத்தேன. பா²ஸுகந்தி ப்³யாதி⁴வூபஸமனேன ஸரீரஸ்ஸ பா²ஸுபா⁴வோ. ப்³யாதி⁴னிதா³னஸமுட்டா²னஜானநேன பண்டி³தோ, படிகாரகிரியாய யுத்தகாரிதாய த³க்கோ², உட்டா²னவீரியஸம்பத்தியா அனலஸோ.
22. Dutiye hitānīti bhabyāni. Vuddhikarānīti ārogyādivuddhikarāni. Anucchavikanti upaṭṭhānakiriyāya anurūpaṃ. Vātāpamārarogenāti vātarogena ca apamārarogena ca, vātanidānena vā apamārarogena. Niṭṭhappattagilānoti ‘‘iminā rogena na cirasseva marissatī’’ti niṭṭhaṃ patto gilāno. Khipitakaṃ nāma vamathurogo. Kacchūti thullakacchuābādho. Tiṇapupphakajaro visamavātasamphassajarogo. Yesanti yesaṃ rogānaṃ. Paṭijagganenāti paṭikāramattena. Phāsukanti byādhivūpasamanena sarīrassa phāsubhāvo. Byādhinidānasamuṭṭhānajānanena paṇḍito, paṭikārakiriyāya yuttakāritāya dakkho, uṭṭhānavīriyasampattiyā analaso.
பத³பரமோ புக்³க³லோ கதி²தோ ஸம்மத்தனியாமோக்கமனஸ்ஸ அயொக்³க³பா⁴வதோ. அலப⁴ந்தோவ ததா²க³தப்பவேதி³தங் த⁴ம்மவினயங் ஸவனாய ஓக்கமதி நியாமங் குஸலேஸு த⁴ம்மேஸு ஸம்மத்தங் பச்சேகபோ³தி⁴ங். யந்தி, யதோ. ஓவாத³ங் லபி⁴த்வாதி ஆபி⁴ஸமாசாரிகவத்தங் ஓவாத³மத்தங். எத்தகோபி ஹி தஸ்ஸ ஹிதாவஹோதி. தன்னிஸ்ஸிதோவாதி விபஞ்சிதஞ்ஞுனிஸ்ஸிதோவ ஹோதி. புனப்புனங் தே³ஸேதப்³போ³வ ஸம்மத்தனியாமோக்கமனஸ்ஸ யொக்³க³பா⁴வதோ.
Padaparamopuggalo kathito sammattaniyāmokkamanassa ayoggabhāvato. Alabhantova tathāgatappaveditaṃ dhammavinayaṃ savanāya okkamati niyāmaṃ kusalesu dhammesu sammattaṃ paccekabodhiṃ. Yanti, yato. Ovādaṃ labhitvāti ābhisamācārikavattaṃ ovādamattaṃ. Ettakopi hi tassa hitāvahoti. Tannissitovāti vipañcitaññunissitova hoti. Punappunaṃ desetabbova sammattaniyāmokkamanassa yoggabhāvato.
கி³லானஸுத்தவண்ணனா நிட்டி²தா.
Gilānasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. கி³லானஸுத்தங் • 2. Gilānasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. கி³லானஸுத்தவண்ணனா • 2. Gilānasuttavaṇṇanā
