| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
२. गिलानसुत्तवण्णना
2. Gilānasuttavaṇṇanā
२२. दुतिये हितानीति भब्यानि। वुद्धिकरानीति आरोग्यादिवुद्धिकरानि। अनुच्छविकन्ति उपट्ठानकिरियाय अनुरूपं। वातापमाररोगेनाति वातरोगेन च अपमाररोगेन च, वातनिदानेन वा अपमाररोगेन। निट्ठप्पत्तगिलानोति ‘‘इमिना रोगेन न चिरस्सेव मरिस्सती’’ति निट्ठं पत्तो गिलानो। खिपितकं नाम वमथुरोगो। कच्छूति थुल्लकच्छुआबाधो। तिणपुप्फकजरो विसमवातसम्फस्सजरोगो। येसन्ति येसं रोगानं। पटिजग्गनेनाति पटिकारमत्तेन। फासुकन्ति ब्याधिवूपसमनेन सरीरस्स फासुभावो। ब्याधिनिदानसमुट्ठानजाननेन पण्डितो, पटिकारकिरियाय युत्तकारिताय दक्खो, उट्ठानवीरियसम्पत्तिया अनलसो।
22. Dutiye hitānīti bhabyāni. Vuddhikarānīti ārogyādivuddhikarāni. Anucchavikanti upaṭṭhānakiriyāya anurūpaṃ. Vātāpamārarogenāti vātarogena ca apamārarogena ca, vātanidānena vā apamārarogena. Niṭṭhappattagilānoti ‘‘iminā rogena na cirasseva marissatī’’ti niṭṭhaṃ patto gilāno. Khipitakaṃ nāma vamathurogo. Kacchūti thullakacchuābādho. Tiṇapupphakajaro visamavātasamphassajarogo. Yesanti yesaṃ rogānaṃ. Paṭijagganenāti paṭikāramattena. Phāsukanti byādhivūpasamanena sarīrassa phāsubhāvo. Byādhinidānasamuṭṭhānajānanena paṇḍito, paṭikārakiriyāya yuttakāritāya dakkho, uṭṭhānavīriyasampattiyā analaso.
पदपरमो पुग्गलो कथितो सम्मत्तनियामोक्कमनस्स अयोग्गभावतो। अलभन्तोव तथागतप्पवेदितं धम्मविनयं सवनाय ओक्कमति नियामं कुसलेसु धम्मेसु सम्मत्तं पच्चेकबोधिं। यन्ति, यतो। ओवादं लभित्वाति आभिसमाचारिकवत्तं ओवादमत्तं। एत्तकोपि हि तस्स हितावहोति। तन्निस्सितोवाति विपञ्चितञ्ञुनिस्सितोव होति। पुनप्पुनं देसेतब्बोव सम्मत्तनियामोक्कमनस्स योग्गभावतो।
Padaparamopuggalo kathito sammattaniyāmokkamanassa ayoggabhāvato. Alabhantova tathāgatappaveditaṃ dhammavinayaṃ savanāya okkamati niyāmaṃ kusalesu dhammesu sammattaṃ paccekabodhiṃ. Yanti, yato. Ovādaṃ labhitvāti ābhisamācārikavattaṃ ovādamattaṃ. Ettakopi hi tassa hitāvahoti. Tannissitovāti vipañcitaññunissitova hoti. Punappunaṃ desetabbova sammattaniyāmokkamanassa yoggabhāvato.
गिलानसुत्तवण्णना निट्ठिता।
Gilānasuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / २. गिलानसुत्तं • 2. Gilānasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / २. गिलानसुत्तवण्णना • 2. Gilānasuttavaṇṇanā
