Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၂. ဂိလာနသုတ္တဝဏ္ဏနာ
2. Gilānasuttavaṇṇanā
၂၂. ဒုတိယေ ဟိတာနီတိ ဘဗ္ယာနိ။ ဝုဒ္ဓိကရာနီတိ အာရောဂ္ယာဒိဝုဒ္ဓိကရာနိ။ အနုစ္ဆဝိကန္တိ ဥပဋ္ဌာနကိရိယာယ အနုရူပံ။ ဝာတာပမာရရောဂေနာတိ ဝာတရောဂေန စ အပမာရရောဂေန စ, ဝာတနိဒာနေန ဝာ အပမာရရောဂေန။ နိဋ္ဌပ္ပတ္တဂိလာနောတိ ‘‘ဣမိနာ ရောဂေန န စိရသ္သေဝ မရိသ္သတီ’’တိ နိဋ္ဌံ ပတ္တော ဂိလာနော။ ခိပိတကံ နာမ ဝမထုရောဂော။ ကစ္ဆူတိ ထုလ္လကစ္ဆုအာဗာဓော။ တိဏပုပ္ဖကဇရော ဝိသမဝာတသမ္ဖသ္သဇရောဂော။ ယေသန္တိ ယေသံ ရောဂာနံ။ ပဋိဇဂ္ဂနေနာတိ ပဋိကာရမတ္တေန။ ဖာသုကန္တိ ဗ္ယာဓိဝူပသမနေန သရီရသ္သ ဖာသုဘာဝော။ ဗ္ယာဓိနိဒာနသမုဋ္ဌာနဇာနနေန ပဏ္ဍိတော, ပဋိကာရကိရိယာယ ယုတ္တကာရိတာယ ဒက္ခော, ဥဋ္ဌာနဝီရိယသမ္ပတ္တိယာ အနလသော။
22. Dutiye hitānīti bhabyāni. Vuddhikarānīti ārogyādivuddhikarāni. Anucchavikanti upaṭṭhānakiriyāya anurūpaṃ. Vātāpamārarogenāti vātarogena ca apamārarogena ca, vātanidānena vā apamārarogena. Niṭṭhappattagilānoti ‘‘iminā rogena na cirasseva marissatī’’ti niṭṭhaṃ patto gilāno. Khipitakaṃ nāma vamathurogo. Kacchūti thullakacchuābādho. Tiṇapupphakajaro visamavātasamphassajarogo. Yesanti yesaṃ rogānaṃ. Paṭijagganenāti paṭikāramattena. Phāsukanti byādhivūpasamanena sarīrassa phāsubhāvo. Byādhinidānasamuṭṭhānajānanena paṇḍito, paṭikārakiriyāya yuttakāritāya dakkho, uṭṭhānavīriyasampattiyā analaso.
ပဒပရမော ပုဂ္ဂလော ကထိတော သမ္မတ္တနိယာမောက္ကမနသ္သ အယောဂ္ဂဘာဝတော။ အလဘန္တောဝ တထာဂတပ္ပဝေဒိတံ ဓမ္မဝိနယံ သဝနာယ ဩက္ကမတိ နိယာမံ ကုသလေသု ဓမ္မေသု သမ္မတ္တံ ပစ္စေကဗောဓိံ။ ယန္တိ, ယတော။ ဩဝာဒံ လဘိတ္ဝာတိ အာဘိသမာစာရိကဝတ္တံ ဩဝာဒမတ္တံ။ ဧတ္တကောပိ ဟိ တသ္သ ဟိတာဝဟောတိ။ တန္နိသ္သိတောဝာတိ ဝိပဉ္စိတညုနိသ္သိတောဝ ဟောတိ။ ပုနပ္ပုနံ ဒေသေတဗ္ဗောဝ သမ္မတ္တနိယာမောက္ကမနသ္သ ယောဂ္ဂဘာဝတော။
Padaparamopuggalo kathito sammattaniyāmokkamanassa ayoggabhāvato. Alabhantova tathāgatappaveditaṃ dhammavinayaṃ savanāya okkamati niyāmaṃ kusalesu dhammesu sammattaṃ paccekabodhiṃ. Yanti, yato. Ovādaṃ labhitvāti ābhisamācārikavattaṃ ovādamattaṃ. Ettakopi hi tassa hitāvahoti. Tannissitovāti vipañcitaññunissitova hoti. Punappunaṃ desetabbova sammattaniyāmokkamanassa yoggabhāvato.
ဂိလာနသုတ္တဝဏ္ဏနာ နိဋ္ဌိတာ။
Gilānasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၂. ဂိလာနသုတ္တံ • 2. Gilānasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၂. ဂိလာနသုတ္တဝဏ္ဏနာ • 2. Gilānasuttavaṇṇanā