| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
4. ගිලානසුත්‌තවණ්‌ණනා
4. Gilānasuttavaṇṇanā
1050. න ඛො පනෙතන්‌ති න ඛො එතං, නොති ච අම්‌හෙහීති අත්‌ථොති ආහ ‘‘න ඛො අම්‌හෙහී’’තිආදි. අස්‌සසන්‌තීති අස්‌සාසනීයාති ආහ ‘‘අස්‌සාසකරෙහී’’ති. මරිස්‌සතීති මාරිසො, එකන්‌තභාවිමරණො, සො පන මරණාධීනවුත්‌තිකොති වුත්‌තං ‘‘මරණපටිබද්‌ධො’’ති. අධිමුච්‌චෙහීති අධිමුත්‌තිං උප්‌පාදෙහි. තං පන තථා චිත්‌තස්‌ස පණිධානං ඨපනන්‌ති ආහ ‘‘ඨපෙහී’’ති. ආගමනීයගුණෙසූති පුබ්‌බභාගගුණෙසු. පමාණං නාම නත්‌ථි අනන්‌තාපරිමාණත්‌තා. නානාකරණං නත්‌ථි විමුත්‌තියා නින්‌නානත්‌තා.
1050.Na kho panetanti na kho etaṃ, noti ca amhehīti atthoti āha ‘‘na kho amhehī’’tiādi. Assasantīti assāsanīyāti āha ‘‘assāsakarehī’’ti. Marissatīti māriso, ekantabhāvimaraṇo, so pana maraṇādhīnavuttikoti vuttaṃ ‘‘maraṇapaṭibaddho’’ti. Adhimuccehīti adhimuttiṃ uppādehi. Taṃ pana tathā cittassa paṇidhānaṃ ṭhapananti āha ‘‘ṭhapehī’’ti. Āgamanīyaguṇesūti pubbabhāgaguṇesu. Pamāṇaṃ nāma natthi anantāparimāṇattā. Nānākaraṇaṃ natthi vimuttiyā ninnānattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 4. ගිලානසුත්‌තං • 4. Gilānasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 4. ගිලානසුත්‌තවණ්‌ණනා • 4. Gilānasuttavaṇṇanā
