| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੯. ਗਿਲਾਨਸੁਤ੍ਤવਣ੍ਣਨਾ
9. Gilānasuttavaṇṇanā
੩੭੫. ਨવਮੇ ਬੇਲ਼ੁવਗਾਮਕੇਤਿ વੇਸਾਲਿਯਾ ਸਮੀਪੇ ਏવਂਨਾਮਕੋ ਪਾਦਗਾਮੋ ਅਤ੍ਥਿ, ਤਸ੍ਮਿਂ। ਯਥਾਮਿਤ੍ਤਨ੍ਤਿਆਦੀਸੁ ਮਿਤ੍ਤਾਤਿ ਮਿਤ੍ਤਾવ। ਸਨ੍ਦਿਟ੍ਠਾਤਿ ਤਤ੍ਥ ਤਤ੍ਥ ਸਙ੍ਗਮ੍ਮ ਦਿਟ੍ਠਮਤ੍ਤਾ ਨਾਤਿਦਲ਼੍ਹਮਿਤ੍ਤਾ । ਸਮ੍ਭਤ੍ਤਾਤਿ ਸੁਟ੍ਠੁ ਭਤ੍ਤਾ ਸਿਨੇਹવਨ੍ਤੋ ਦਲ਼੍ਹਮਿਤ੍ਤਾ। ਯੇਸਂ ਯਤ੍ਥ ਯਤ੍ਥ ਏવਰੂਪਾ ਭਿਕ੍ਖੂ ਅਤ੍ਥਿ, ਤੇ ਤਤ੍ਥ ਤਤ੍ਥ વਸ੍ਸਂ ਉਪੇਥਾਤਿ ਅਤ੍ਥੋ। ਕਸ੍ਮਾ ਏવਮਾਹ? ਤੇਸਂ ਫਾਸੁવਿਹਾਰਤ੍ਥਾਯ। ਤੇਸਂ ਕਿਰ ਬੇਲ਼ੁવਗਾਮਕੇ ਸੇਨਾਸਨਂ ਨਪ੍ਪਹੋਤਿ, ਭਿਕ੍ਖਾਪਿ ਮਨ੍ਦਾ। ਸਮਨ੍ਤਾ વੇਸਾਲਿਯਾ ਪਨ ਬਹੂਨਿ ਸੇਨਾਸਨਾਨਿ, ਭਿਕ੍ਖਾਪਿ ਸੁਲਭਾ। ਤਸ੍ਮਾ ਏવਮਾਹ।
375. Navame beḷuvagāmaketi vesāliyā samīpe evaṃnāmako pādagāmo atthi, tasmiṃ. Yathāmittantiādīsu mittāti mittāva. Sandiṭṭhāti tattha tattha saṅgamma diṭṭhamattā nātidaḷhamittā . Sambhattāti suṭṭhu bhattā sinehavanto daḷhamittā. Yesaṃ yattha yattha evarūpā bhikkhū atthi, te tattha tattha vassaṃ upethāti attho. Kasmā evamāha? Tesaṃ phāsuvihāratthāya. Tesaṃ kira beḷuvagāmake senāsanaṃ nappahoti, bhikkhāpi mandā. Samantā vesāliyā pana bahūni senāsanāni, bhikkhāpi sulabhā. Tasmā evamāha.
ਅਥ ਕਸ੍ਮਾ ‘‘ਯਥਾਸੁਖਂ ਗਚ੍ਛਥਾ’’ਤਿ ਨ વਿਸ੍ਸਜ੍ਜੇਸਿ? ਤੇਸਂ ਅਨੁਕਮ੍ਪਾਯ। ਏવਂ ਕਿਰਸ੍ਸ ਅਹੋਸਿ – ‘‘ਅਹਂ ਦਸਮਾਸਮਤ੍ਤਂ ਠਤ੍વਾ ਪਰਿਨਿਬ੍ਬਾਯਿਸ੍ਸਾਮਿ। ਸਚੇ ਇਮੇ ਦੂਰਂ ਗਚ੍ਛਿਸ੍ਸਨ੍ਤਿ, ਮਂ ਪਰਿਨਿਬ੍ਬਾਨਕਾਲੇ ਦਟ੍ਠੁਂ ਨ ਸਕ੍ਖਿਸ੍ਸਨ੍ਤਿ। ਅਥ ਨੇਸਂ ‘ਸਤ੍ਥਾ ਪਰਿਨਿਬ੍ਬਾਯਨ੍ਤੋ ਅਮ੍ਹਾਕਂ ਸਤਿਮਤ੍ਤਮ੍ਪਿ ਨ ਅਦਾਸਿ। ਸਚੇ ਜਾਨੇਯ੍ਯਾਮ, ਨ ਏવਂ ਦੂਰੇ વਸੇਯ੍ਯਾਮਾ’ਤਿ વਿਪ੍ਪਟਿਸਾਰੋ ਭવੇਯ੍ਯ। વੇਸਾਲਿਯਾ ਸਮਨ੍ਤਾ ਪਨ વਸ੍ਸਂ વਸਨ੍ਤਾ ਮਾਸਸ੍ਸ ਅਟ੍ਠ વਾਰੇ ਆਗਨ੍ਤ੍વਾ ਧਮ੍ਮਂ ਸੁਣਿਸ੍ਸਨ੍ਤਿ, ਸੁਗਤੋવਾਦਂ ਲਭਿਸ੍ਸਨ੍ਤੀ’’ਤਿ ਨ વਿਸ੍ਸਜ੍ਜੇਸਿ।
Atha kasmā ‘‘yathāsukhaṃ gacchathā’’ti na vissajjesi? Tesaṃ anukampāya. Evaṃ kirassa ahosi – ‘‘ahaṃ dasamāsamattaṃ ṭhatvā parinibbāyissāmi. Sace ime dūraṃ gacchissanti, maṃ parinibbānakāle daṭṭhuṃ na sakkhissanti. Atha nesaṃ ‘satthā parinibbāyanto amhākaṃ satimattampi na adāsi. Sace jāneyyāma, na evaṃ dūre vaseyyāmā’ti vippaṭisāro bhaveyya. Vesāliyā samantā pana vassaṃ vasantā māsassa aṭṭha vāre āgantvā dhammaṃ suṇissanti, sugatovādaṃ labhissantī’’ti na vissajjesi.
ਖਰੋਤਿ ਫਰੁਸੋ। ਆਬਾਧੋਤਿ વਿਸਭਾਗਰੋਗੋ। ਬਾਲ਼੍ਹਾਤਿ ਬਲવਤਿਯੋ। ਮਾਰਣਨ੍ਤਿਕਾਤਿ ਮਰਣਨ੍ਤਂ ਮਰਣਸਨ੍ਤਿਕਂ ਪਾਪਨਸਮਤ੍ਥਾ। ਸਤੋ ਸਮ੍ਪਜਾਨੋ ਅਧਿવਾਸੇਸੀਤਿ ਸਤਿਂ ਸੂਪਟ੍ਠਿਤਂ ਕਤ੍વਾ ਞਾਣੇਨ ਪਰਿਚ੍ਛਿਨ੍ਦਿਤ੍વਾ ਅਧਿવਾਸੇਸਿ। ਅવਿਹਞ੍ਞਮਾਨੋਤਿ વੇਦਨਾਨੁવਤ੍ਤਨવਸੇਨ ਅਪਰਾਪਰਂ ਪਰਿવਤ੍ਤਨਂ ਅਕਰੋਨ੍ਤੋ ਅਪੀਲ਼ਿਯਮਾਨੋ ਅਦੁਕ੍ਖਿਯਮਾਨੋ ਚ ਅਧਿવਾਸੇਸਿ। ਅਨਾਮਨ੍ਤੇਤ੍વਾਤਿ ਅਜਾਨਾਪੇਤ੍વਾ। ਅਨਪਲੋਕੇਤ੍વਾਤਿ ਅਜਾਨਾਪੇਤ੍વਾવ ਓવਾਦਾਨੁਸਾਸਨਿਂ ਅਦਤ੍વਾਤਿ વੁਤ੍ਤਂ ਹੋਤਿ। વੀਰਿਯੇਨਾਤਿ ਪੁਬ੍ਬਭਾਗવੀਰਿਯੇਨ ਚੇવ ਫਲਸਮਾਪਤ੍ਤਿવੀਰਿਯੇਨ ਚ। ਪਟਿਪਣਾਮੇਤ੍વਾਤਿ વਿਕ੍ਖਮ੍ਭੇਤ੍વਾ। ਜੀવਿਤਸਙ੍ਖਾਰਨ੍ਤਿ ਏਤ੍ਥ ਜੀવਿਤਮ੍ਪਿ ਜੀવਿਤਸਙ੍ਖਾਰੋ। ਯੇਨ ਜੀવਿਤਂ ਸਙ੍ਖਰੀਯਤਿ ਛਿਜ੍ਜਮਾਨਂ ਘਟੇਤ੍વਾ ਠਪੀਯਤਿ, ਸੋ ਫਲਸਮਾਪਤ੍ਤਿਧਮ੍ਮੋਪਿ ਜੀવਿਤਸਙ੍ਖਾਰੋ। ਸੋ ਇਧ ਅਧਿਪ੍ਪੇਤੋ। ਅਧਿਟ੍ਠਾਯਾਤਿ ਅਧਿਟ੍ਠਹਿਤ੍વਾ ਪવਤ੍ਤੇਤ੍વਾ ਜੀવਿਤਠਪਨਸਮਤ੍ਥਂ ਫਲਸਮਾਪਤ੍ਤਿਂ ਸਮਾਪਜ੍ਜੇਯ੍ਯਨ੍ਤਿ ਅਯਮੇਤ੍ਥ ਸਙ੍ਖੇਪਤ੍ਥੋ।
Kharoti pharuso. Ābādhoti visabhāgarogo. Bāḷhāti balavatiyo. Māraṇantikāti maraṇantaṃ maraṇasantikaṃ pāpanasamatthā. Sato sampajāno adhivāsesīti satiṃ sūpaṭṭhitaṃ katvā ñāṇena paricchinditvā adhivāsesi. Avihaññamānoti vedanānuvattanavasena aparāparaṃ parivattanaṃ akaronto apīḷiyamāno adukkhiyamāno ca adhivāsesi. Anāmantetvāti ajānāpetvā. Anapaloketvāti ajānāpetvāva ovādānusāsaniṃ adatvāti vuttaṃ hoti. Vīriyenāti pubbabhāgavīriyena ceva phalasamāpattivīriyena ca. Paṭipaṇāmetvāti vikkhambhetvā. Jīvitasaṅkhāranti ettha jīvitampi jīvitasaṅkhāro. Yena jīvitaṃ saṅkharīyati chijjamānaṃ ghaṭetvā ṭhapīyati, so phalasamāpattidhammopi jīvitasaṅkhāro. So idha adhippeto. Adhiṭṭhāyāti adhiṭṭhahitvā pavattetvā jīvitaṭhapanasamatthaṃ phalasamāpattiṃ samāpajjeyyanti ayamettha saṅkhepattho.
ਕਿਂ ਪਨ ਭਗવਾ ਇਤੋ ਪੁਬ੍ਬੇ ਫਲਸਮਾਪਤ੍ਤਿਂ ਨ ਸਮਾਪਜ੍ਜਤੀਤਿ? ਸਮਾਪਜ੍ਜਤਿ। ਸਾ ਪਨ ਖਣਿਕਸਮਾਪਤ੍ਤਿ। ਖਣਿਕਸਮਾਪਤ੍ਤਿ ਚ ਅਨ੍ਤੋਸਮਾਪਤ੍ਤਿਯਂਯੇવ વੇਦਨਂ વਿਕ੍ਖਮ੍ਭੇਤਿ, ਸਮਾਪਤ੍ਤਿਤੋ વੁਟ੍ਠਿਤਮਤ੍ਤਸ੍ਸ ਕਟ੍ਠਪਾਤੇਨ વਾ ਕਠਲਪਾਤੇਨ વਾ ਛਿਨ੍ਨਸੇવਾਲੋ વਿਯ ਉਦਕਂ, ਪੁਨ ਸਰੀਰਂ વੇਦਨਾ ਅਜ੍ਝੋਤ੍ਥਰਤਿ। ਯਾ ਪਨ ਰੂਪਸਤ੍ਤਕਂ ਅਰੂਪਸਤ੍ਤਕਞ੍ਚ ਨਿਗ੍ਗੁਮ੍ਬਂ ਨਿਜ੍ਜਟਂ ਕਤ੍વਾ ਮਹਾવਿਪਸ੍ਸਨਾવਸੇਨ ਸਮਾਪਨ੍ਨਾ ਸਮਾਪਤ੍ਤਿ , ਸਾ ਸੁਟ੍ਠੁ વਿਕ੍ਖਮ੍ਭੇਤਿ। ਯਥਾ ਨਾਮ ਪੁਰਿਸੇਨ ਪੋਕ੍ਖਰਣਿਂ ਓਗਾਹੇਤ੍વਾ ਹਤ੍ਥੇਹਿ ਚ ਪਾਦੇਹਿ ਚ ਸੁਟ੍ਠੁ ਅਪਬ੍ਯੁਲ਼੍ਹਸੇવਾਲੋ ਚਿਰੇਨ ਉਦਕਂ ਓਤ੍ਥਰਤਿ, ਏવਮੇવ ਤਤੋ વੁਟ੍ਠਿਤਸ੍ਸ ਚਿਰੇਨ વੇਦਨਾ ਉਪ੍ਪਜ੍ਜਤਿ। ਇਤਿ ਭਗવਾ ਤਂਦਿવਸਂ ਮਹਾਬੋਧਿਪਲ੍ਲਙ੍ਕੇ ਅਭਿਨવਂ વਿਪਸ੍ਸਨਂ ਪਟ੍ਠਪੇਨ੍ਤੋ વਿਯ ਰੂਪਸਤ੍ਤਕਂ ਅਰੂਪਸਤ੍ਤਕਞ੍ਚ ਨਿਗ੍ਗੁਮ੍ਬਂ ਨਿਜ੍ਜਟਂ ਕਤ੍વਾ ਚੁਦ੍ਦਸਹਾਕਾਰੇਹਿ ਸਨ੍ਨੇਤ੍વਾ ਮਹਾવਿਪਸ੍ਸਨਾਯ વੇਦਨਂ વਿਕ੍ਖਮ੍ਭੇਤ੍વਾ ‘‘ਦਸਮਾਸੇ ਮਾ ਉਪ੍ਪਜ੍ਜਿਤ੍ਥਾ’’ਤਿ ਸਮਾਪਤ੍ਤਿਂ ਸਮਾਪਜ੍ਜਿ, ਸਮਾਪਤ੍ਤਿવਿਕ੍ਖਮ੍ਭਿਤਾ વੇਦਨਾ ਦਸ ਮਾਸੇ ਨ ਉਪ੍ਪਜ੍ਜਿਯੇવ।
Kiṃ pana bhagavā ito pubbe phalasamāpattiṃ na samāpajjatīti? Samāpajjati. Sā pana khaṇikasamāpatti. Khaṇikasamāpatti ca antosamāpattiyaṃyeva vedanaṃ vikkhambheti, samāpattito vuṭṭhitamattassa kaṭṭhapātena vā kaṭhalapātena vā chinnasevālo viya udakaṃ, puna sarīraṃ vedanā ajjhottharati. Yā pana rūpasattakaṃ arūpasattakañca niggumbaṃ nijjaṭaṃ katvā mahāvipassanāvasena samāpannā samāpatti , sā suṭṭhu vikkhambheti. Yathā nāma purisena pokkharaṇiṃ ogāhetvā hatthehi ca pādehi ca suṭṭhu apabyuḷhasevālo cirena udakaṃ ottharati, evameva tato vuṭṭhitassa cirena vedanā uppajjati. Iti bhagavā taṃdivasaṃ mahābodhipallaṅke abhinavaṃ vipassanaṃ paṭṭhapento viya rūpasattakaṃ arūpasattakañca niggumbaṃ nijjaṭaṃ katvā cuddasahākārehi sannetvā mahāvipassanāya vedanaṃ vikkhambhetvā ‘‘dasamāse mā uppajjitthā’’ti samāpattiṃ samāpajji, samāpattivikkhambhitā vedanā dasa māse na uppajjiyeva.
ਗਿਲਾਨਾ વੁਟ੍ਠਿਤੋਤਿ ਗਿਲਾਨੋ ਹੁਤ੍વਾ ਪੁਨ વੁਟ੍ਠਿਤੋ। ਮਧੁਰਕਜਾਤੋ વਿਯਾਤਿ ਸਞ੍ਜਾਤਗਰੁਭਾવੋ ਸਞ੍ਜਾਤਥਦ੍ਧਭਾવੋ ਸੂਲੇ ਉਤ੍ਤਾਸਿਤਪੁਰਿਸੋ વਿਯ। ਨ ਪਕ੍ਖਾਯਨ੍ਤੀਤਿ ਨ ਪਕਾਸਨ੍ਤਿ, ਨਾਨਾਕਾਰਤੋ ਨ ਉਪਟ੍ਠਹਨ੍ਤਿ। ਧਮ੍ਮਾਪਿ ਮਂ ਨਪ੍ਪਟਿਭਨ੍ਤੀਤਿ ਸਤਿਪਟ੍ਠਾਨਧਮ੍ਮਾ ਮਯ੍ਹਂ ਪਾਕਟਾ ਨ ਹੋਨ੍ਤੀਤਿ ਦੀਪੇਤਿ। ਤਨ੍ਤਿਧਮ੍ਮਾ ਪਨ ਥੇਰਸ੍ਸ ਸੁਪ੍ਪਗੁਣਾ। ਨ ਉਦਾਹਰਤੀਤਿ ਪਚ੍ਛਿਮਓવਾਦਂ ਨ ਦੇਤਿ, ਤਂ ਸਨ੍ਧਾਯ વਦਤਿ।
Gilānā vuṭṭhitoti gilāno hutvā puna vuṭṭhito. Madhurakajāto viyāti sañjātagarubhāvo sañjātathaddhabhāvo sūle uttāsitapuriso viya. Na pakkhāyantīti na pakāsanti, nānākārato na upaṭṭhahanti. Dhammāpi maṃ nappaṭibhantīti satipaṭṭhānadhammā mayhaṃ pākaṭā na hontīti dīpeti. Tantidhammā pana therassa suppaguṇā. Na udāharatīti pacchimaovādaṃ na deti, taṃ sandhāya vadati.
ਅਨਨ੍ਤਰਂ ਅਬਾਹਿਰਨ੍ਤਿ ਧਮ੍ਮવਸੇਨ વਾ ਪੁਗ੍ਗਲવਸੇਨ વਾ ਉਭਯਂ ਅਕਤ੍વਾ। ‘‘ਏਤ੍ਤਕਂ ਧਮ੍ਮਂ ਪਰਸ੍ਸ ਨ ਦੇਸੇਸ੍ਸਾਮੀ’’ਤਿ ਹਿ ਚਿਨ੍ਤੇਨ੍ਤੋ ਧਮ੍ਮਂ ਅਬ੍ਭਨ੍ਤਰਂ ਕਰੋਤਿ ਨਾਮ, ‘‘ਏਤ੍ਤਕਂ ਪਰਸ੍ਸ ਦੇਸੇਸ੍ਸਾਮੀ’’ਤਿ ਚਿਨ੍ਤੇਨ੍ਤੋ ਬਾਹਿਰਂ ਕਰੋਤਿ ਨਾਮ। ‘‘ਇਮਸ੍ਸ ਪੁਗ੍ਗਲਸ੍ਸ ਦੇਸੇਸ੍ਸਾਮੀ’’ਤਿ ਚਿਨ੍ਤੇਨ੍ਤੋ ਪਨ ਪੁਗ੍ਗਲਂ ਅਬ੍ਭਨ੍ਤਰਂ ਕਰੋਤਿ ਨਾਮ, ‘‘ਇਮਸ੍ਸ ਨ ਦੇਸੇਸ੍ਸਾਮੀ’’ਤਿ ਚਿਨ੍ਤੇਨ੍ਤੋ ਪੁਗ੍ਗਲਂ ਬਾਹਿਰਂ ਕਰੋਤਿ ਨਾਮ। ਏવਂ ਅਕਤ੍વਾ ਦੇਸਿਤੋਤਿ ਅਤ੍ਥੋ। ਆਚਰਿਯਮੁਟ੍ਠੀਤਿ ਯਥਾ ਬਾਹਿਰਕਾਨਂ ਆਚਰਿਯਮੁਟ੍ਠਿ ਨਾਮ ਹੋਤਿ, ਦਹਰਕਾਲੇ ਕਸ੍ਸਚਿ ਅਕਥੇਤ੍વਾ ਪਚ੍ਛਿਮਕਾਲੇ ਮਰਣਮਞ੍ਚੇ ਨਿਪਨ੍ਨਾ ਪਿਯਮਨਾਪਸ੍ਸ ਅਨ੍ਤੇવਾਸਿਕਸ੍ਸ ਕਥੇਨ੍ਤਿ, ਏવਂ ਤਥਾਗਤਸ੍ਸ ‘‘ਇਦਂ ਮਹਲ੍ਲਕਕਾਲੇ ਪਚ੍ਛਿਮਠਾਨੇ ਕਥੇਸ੍ਸਾਮੀ’’ਤਿ ਮੁਟ੍ਠਿਂ ਕਤ੍વਾ ਪਰਿਹਰਿਤ੍વਾ ਠਪਿਤਂ ਕਿਞ੍ਚਿ ਨਤ੍ਥੀਤਿ ਦਸ੍ਸੇਤਿ।
Anantaraṃ abāhiranti dhammavasena vā puggalavasena vā ubhayaṃ akatvā. ‘‘Ettakaṃ dhammaṃ parassa na desessāmī’’ti hi cintento dhammaṃ abbhantaraṃ karoti nāma, ‘‘ettakaṃ parassa desessāmī’’ti cintento bāhiraṃ karoti nāma. ‘‘Imassa puggalassa desessāmī’’ti cintento pana puggalaṃ abbhantaraṃ karoti nāma, ‘‘imassa na desessāmī’’ti cintento puggalaṃ bāhiraṃ karoti nāma. Evaṃ akatvā desitoti attho. Ācariyamuṭṭhīti yathā bāhirakānaṃ ācariyamuṭṭhi nāma hoti, daharakāle kassaci akathetvā pacchimakāle maraṇamañce nipannā piyamanāpassa antevāsikassa kathenti, evaṃ tathāgatassa ‘‘idaṃ mahallakakāle pacchimaṭhāne kathessāmī’’ti muṭṭhiṃ katvā pariharitvā ṭhapitaṃ kiñci natthīti dasseti.
ਅਹਂ ਭਿਕ੍ਖੁਸਙ੍ਘਨ੍ਤਿ ਅਹਮੇવ ਭਿਕ੍ਖੁਸਙ੍ਘਂ ਪਰਿਹਰਿਸ੍ਸਾਮੀਤਿ વਾ, ਮਮੁਦ੍ਦੇਸਿਕੋਤਿ ਅਹਂ ਉਦ੍ਦਿਸਿਤਬ੍ਬਟ੍ਠੇਨ ਉਦ੍ਦੇਸੋ ਅਸ੍ਸਾਤਿ ਮਮੁਦ੍ਦੇਸਿਕੋ, ਮਮੇવ ਉਦ੍ਦਿਸ੍ਸਿਤ੍વਾ ਮਂ ਪਚ੍ਚਾਸੀਸਮਾਨੋ ਭਿਕ੍ਖੁਸਙ੍ਘੋ ਹੋਤੁ ਮਮ ਅਚ੍ਚਯੇਨ ਮਾ વਾ ਅਹੋਸਿ, ਯਂ વਾ ਤਂ વਾ ਹੋਤੂਤਿ ਇਤਿ વਾ ਪਨ ਯਸ੍ਸ ਅਸ੍ਸਾਤਿ ਅਤ੍ਥੋ। ਨ ਏવਂ ਹੋਤੀਤਿ ਬੋਧਿਪਲ੍ਲਙ੍ਕੇਯੇવ ਇਸ੍ਸਾਮਚ੍ਛੇਰਾਨਂ વਿਗਤਤ੍ਤਾ ਏવਂ ਨ ਹੋਤਿ। ਸ ਕਿਨ੍ਤਿ ਸੋ ਕਿਂ। ਆਸੀਤਿਕੋਤਿ ਅਸੀਤਿਸਂવਚ੍ਛਰਿਕੋ, ਇਦਂ ਪਚ੍ਛਿਮવਯਂ ਅਨੁਪ੍ਪਤ੍ਤਭਾવਦੀਪਨਤ੍ਥਂ વੁਤ੍ਤਂ। વੇਠਮਿਸ੍ਸਕੇਨਾਤਿ ਬਾਹਬਨ੍ਧਚਕ੍ਕਬਨ੍ਧਾਦਿਨਾ ਪਟਿਸਙ੍ਖਰਣੇਨ વੇਠਮਿਸ੍ਸਕੇਨ। ਮਞ੍ਞੇਤਿ ਜਰਸਕਟਂ વਿਯ વੇਠਮਿਸ੍ਸਕੇਨ ਮਞ੍ਞੇ ਯਾਪੇਤਿ, ਅਰਹਤ੍ਤਫਲવੇਠਨੇਨ ਚਤੁਇਰਿਯਾਪਥਕਪ੍ਪਨਂ ਤਥਾਗਤਸ੍ਸ ਹੋਤੀਤਿ ਦਸ੍ਸੇਤਿ।
Ahaṃ bhikkhusaṅghanti ahameva bhikkhusaṅghaṃ pariharissāmīti vā, mamuddesikoti ahaṃ uddisitabbaṭṭhena uddeso assāti mamuddesiko, mameva uddissitvā maṃ paccāsīsamāno bhikkhusaṅgho hotu mama accayena mā vā ahosi, yaṃ vā taṃ vā hotūti iti vā pana yassa assāti attho. Na evaṃ hotīti bodhipallaṅkeyeva issāmaccherānaṃ vigatattā evaṃ na hoti. Sa kinti so kiṃ. Āsītikoti asītisaṃvacchariko, idaṃ pacchimavayaṃ anuppattabhāvadīpanatthaṃ vuttaṃ. Veṭhamissakenāti bāhabandhacakkabandhādinā paṭisaṅkharaṇena veṭhamissakena. Maññeti jarasakaṭaṃ viya veṭhamissakena maññe yāpeti, arahattaphalaveṭhanena catuiriyāpathakappanaṃ tathāgatassa hotīti dasseti.
ਇਦਾਨਿ ਤਮਤ੍ਥਂ ਪਕਾਸੇਨ੍ਤੋ ਯਸ੍ਮਿਂ ਆਨਨ੍ਦ ਸਮਯੇਤਿਆਦਿਮਾਹ। ਤਤ੍ਥ ਸਬ੍ਬਨਿਮਿਤ੍ਤਾਨਨ੍ਤਿ ਰੂਪਨਿਮਿਤ੍ਤਾਦੀਨਂ। ਏਕਚ੍ਚਾਨਂ વੇਦਨਾਨਨ੍ਤਿ ਲੋਕਿਯਾਨਂ વੇਦਨਾਨਂ। ਤਸ੍ਮਾਤਿਹਾਨਨ੍ਦਾਤਿ ਯਸ੍ਮਾ ਇਮਿਨਾ ਫਲਸਮਾਪਤ੍ਤਿવਿਹਾਰੇਨ ਫਾਸੁ ਹੋਤਿ, ਤਸ੍ਮਾ ਤੁਮ੍ਹੇਪਿ ਤਦਤ੍ਥਾਯ ਏવਂ વਿਹਰਥਾਤਿ ਦਸ੍ਸੇਤਿ। ਅਤ੍ਤਦੀਪਾਤਿ ਮਹਾਸਮੁਦ੍ਦਗਤਾ ਦੀਪਂ વਿਯ ਅਤ੍ਤਾਨਂ ਦੀਪਂ ਪਤਿਟ੍ਠਂ ਕਤ੍વਾ વਿਹਰਥ। ਅਤ੍ਤਸਰਣਾਤਿ ਅਤ੍ਤਗਤਿਕਾવ ਹੋਥ, ਮਾ ਅਞ੍ਞਗਤਿਕਾ। ਧਮ੍ਮਦੀਪਧਮ੍ਮਸਰਣਪਦੇਸੁਪਿ ਏਸੇવ ਨਯੋ। ਏਤ੍ਥ ਚ ਧਮ੍ਮੋਤਿ ਨવવਿਧੋ ਲੋਕੁਤ੍ਤਰਧਮ੍ਮੋ વੇਦਿਤਬ੍ਬੋ। ਤਮਤਗ੍ਗੇਤਿ ਤਮਅਗ੍ਗੇ, ਮਜ੍ਝੇ ਤ-ਕਾਰੋ ਪਦਸਨ੍ਧਿવਸੇਨ વੁਤ੍ਤੋ। ਇਦਂ વੁਤ੍ਤਂ ਹੋਤਿ – ਇਮੇ ਅਗ੍ਗਤਮਾਤਿ ਤਮਤਗ੍ਗਾਤਿ । ਏવਂ ਸਬ੍ਬਂ ਤਮਸੋਤਂ ਛਿਨ੍ਦਿਤ੍વਾ ਅਤਿવਿਯ ਅਗ੍ਗੇ ਉਤ੍ਤਮਭਾવੇ ਏਤੇ, ਆਨਨ੍ਦ, ਮਮ ਭਿਕ੍ਖੂ ਭવਿਸ੍ਸਨ੍ਤਿ, ਤੇਸਂ ਅਗ੍ਗੇ ਭવਿਸ੍ਸਨ੍ਤਿ। ਯੇ ਕੇਚਿ ਸਿਕ੍ਖਾਕਾਮਾ, ਸਬ੍ਬੇਸਂ ਤੇਸਂ ਚਤੁਸਤਿਪਟ੍ਠਾਨਗੋਚਰਾવ ਭਿਕ੍ਖੂ ਅਗ੍ਗੇ ਭવਿਸ੍ਸਨ੍ਤੀਤਿ ਅਰਹਤ੍ਤਨਿਕੂਟੇਨ ਦੇਸਨਂ ਗਣ੍ਹੀਤਿ।
Idāni tamatthaṃ pakāsento yasmiṃ ānanda samayetiādimāha. Tattha sabbanimittānanti rūpanimittādīnaṃ. Ekaccānaṃ vedanānanti lokiyānaṃ vedanānaṃ. Tasmātihānandāti yasmā iminā phalasamāpattivihārena phāsu hoti, tasmā tumhepi tadatthāya evaṃ viharathāti dasseti. Attadīpāti mahāsamuddagatā dīpaṃ viya attānaṃ dīpaṃ patiṭṭhaṃ katvā viharatha. Attasaraṇāti attagatikāva hotha, mā aññagatikā. Dhammadīpadhammasaraṇapadesupi eseva nayo. Ettha ca dhammoti navavidho lokuttaradhammo veditabbo. Tamataggeti tamaagge, majjhe ta-kāro padasandhivasena vutto. Idaṃ vuttaṃ hoti – ime aggatamāti tamataggāti . Evaṃ sabbaṃ tamasotaṃ chinditvā ativiya agge uttamabhāve ete, ānanda, mama bhikkhū bhavissanti, tesaṃ agge bhavissanti. Ye keci sikkhākāmā, sabbesaṃ tesaṃ catusatipaṭṭhānagocarāva bhikkhū agge bhavissantīti arahattanikūṭena desanaṃ gaṇhīti.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੯. ਗਿਲਾਨਸੁਤ੍ਤਂ • 9. Gilānasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੯. ਗਿਲਾਨਸੁਤ੍ਤવਣ੍ਣਨਾ • 9. Gilānasuttavaṇṇanā
