| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
224. கி³லானவத்து²கதா²
224. Gilānavatthukathā
365. மஞ்சகே நிபாதேஸுந்தி எத்த² மஞ்சகே நிபாதனங் நாம மஞ்சகே நிபஜ்ஜாபனந்தி ஆஹ ‘‘மஞ்சகே நிபஜ்ஜாபேஸு’’ந்தி. முத்தகரீஸகிலிட்ட²ந்தி முத்தகரீஸேஹி கிலிட்ட²ங். யோதி யோ கோசி. மந்தி மம. தமத்த²ங் த³ஸ்ஸெந்தோ ஆஹ ‘‘ஓவாதா³னுஸாஸனீகரணேனா’’தி. மம ஓவாத³ஸ்ஸ ச அனுஸாஸனியா ச கரணேனாதி அத்தோ². எத்தா²தி ‘‘யோ பி⁴க்க²வே மங் உபட்ட²ஹெய்யா’’திஆதி³பாடே². ஸுத்தஸ்ஸ நெய்யத்த²த்தா அக³ஹேதப்³ப³த்த²ங் த³ஸ்ஸெந்தோ ஆஹ ‘‘ப⁴க³வதோ சா’’திஆதி³. யஸ்ஸாதி கி³லானஸ்ஸ. உபஜ்ஜா²யாத³யோதி எத்த² ஆதி³ஸத்³தே³ன ஆசரியஸத்³தி⁴விஹாரிகஅந்தேவாஸிகஸமானுபஜ்ஜா²யகஸமானாசரியகஸங்கா²தே பஞ்ச ஜனே ஸங்க³ண்ஹாதி. ஏகசாரிகோ வா ஹோதீதி ஸம்ப³ந்தோ⁴. ஸங்க⁴த்தே²ரோபீதி பிஸத்³தோ³ பகே³வ அஞ்ஞேஸந்தி த³ஸ்ஸேதி.
365.Mañcake nipātesunti ettha mañcake nipātanaṃ nāma mañcake nipajjāpananti āha ‘‘mañcake nipajjāpesu’’nti. Muttakarīsakiliṭṭhanti muttakarīsehi kiliṭṭhaṃ. Yoti yo koci. Manti mama. Tamatthaṃ dassento āha ‘‘ovādānusāsanīkaraṇenā’’ti. Mama ovādassa ca anusāsaniyā ca karaṇenāti attho. Etthāti ‘‘yo bhikkhave maṃ upaṭṭhaheyyā’’tiādipāṭhe. Suttassa neyyatthattā agahetabbatthaṃ dassento āha ‘‘bhagavato cā’’tiādi. Yassāti gilānassa. Upajjhāyādayoti ettha ādisaddena ācariyasaddhivihārikaantevāsikasamānupajjhāyakasamānācariyakasaṅkhāte pañca jane saṅgaṇhāti. Ekacāriko vā hotīti sambandho. Saṅghattheropīti pisaddo pageva aññesanti dasseti.
366. அபி⁴க்கமந்தங் வாதி எத்த² அபி⁴முக²ங் கமதீதி அபி⁴க்கமந்தோதி வுத்தே வட்³ட⁴னத்தோ²தி ஆஹ ‘‘வட்³ட⁴ந்தங் வா’’தி. ஆபா³த⁴ங் நாவிகரோதீதி ஸம்ப³ந்தோ⁴. இமினா அந்தபச்சயஸ்ஸ ஸரூபங் த³ஸ்ஸேதி. இத³ங் நாம போ⁴ஜனந்தி ஸம்ப³ந்தோ⁴. ஸங்விதா⁴துந்தி எத்த² ஸங்விபுப்³போ³ தா⁴தா⁴து கரதா⁴த்வத்தோ², கரதா⁴து ச ஸப்³ப³தா⁴த்வத்தோ², தஸ்மா வுத்தங் ‘‘பே⁴ஸஜ்ஜங் யோஜேது’’ந்தி . அஸ்ஸாதி கி³லானுபட்டா²கஸ்ஸ. அந்தரஸத்³த³ஸ்ஸ மஜ்ஜ²த்தா²த³யோ படிக்கி²பந்தோ ஆஹ ‘‘காரணங் வுச்சதீ’’தி.
366.Abhikkamantaṃ vāti ettha abhimukhaṃ kamatīti abhikkamantoti vutte vaḍḍhanatthoti āha ‘‘vaḍḍhantaṃ vā’’ti. Ābādhaṃ nāvikarotīti sambandho. Iminā antapaccayassa sarūpaṃ dasseti. Idaṃ nāma bhojananti sambandho. Saṃvidhātunti ettha saṃvipubbo dhādhātu karadhātvattho, karadhātu ca sabbadhātvattho, tasmā vuttaṃ ‘‘bhesajjaṃ yojetu’’nti . Assāti gilānupaṭṭhākassa. Antarasaddassa majjhatthādayo paṭikkhipanto āha ‘‘kāraṇaṃ vuccatī’’ti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 224. கி³லானவத்து²கதா² • 224. Gilānavatthukathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / கி³லானவத்து²கதா² • Gilānavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கி³லானவத்து²கதா²வண்ணனா • Gilānavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கி³லானவத்து²கதா²வண்ணனா • Gilānavatthukathāvaṇṇanā
