| Library / Tipiṭaka / д̇ибидага • Tipiṭaka / махааваг̇г̇абаал̣и • Mahāvaggapāḷi |
224. г̇илаанавад̇т̇угат̇аа
224. Gilānavatthukathā
365. д̇зна ко бана самаязна ан̃н̃ад̇арасса бхигкуно гужчивигаарааб̣аад̇хо ход̇и. со сагз муд̇д̇агарийсз балибанно сзд̇и. ат̇а ко бхаг̇аваа ааяасмад̇аа аананд̣̇зна бажчаасаман̣зна сзнаасанажааригам̣ аахин̣д̣анд̇о язна д̇асса бхигкуно вихааро д̇знубасан̇гами. ад̣̇д̣̇асаа ко бхаг̇аваа д̇ам̣ бхигкум̣ сагз муд̇д̇агарийсз балибаннам̣ саяамаанам̣, д̣̇исваана язна со бхигку д̇знубасан̇гами, убасан̇гамид̇ваа д̇ам̣ бхигкум̣ зд̇ад̣̇авожа – ‘‘гим̣ д̇з, бхигку, ааб̣аад̇хо’’д̇и? ‘‘гужчивигааро мз, бхаг̇аваа’’д̇и. ‘‘ад̇т̇и бана д̇з, бхигку, убадтааго’’д̇и? ‘‘над̇т̇и, бхаг̇аваа’’д̇и . ‘‘гисса д̇ам̣ бхигкуу на убадтзнд̇ий’’д̇и? ‘‘ахам̣ ко, бханд̇з, бхигкуунам̣ агаараго; д̇зна мам̣ бхигкуу на убадтзнд̇ий’’д̇и. ат̇а ко бхаг̇аваа ааяасманд̇ам̣ аананд̣̇ам̣ ааманд̇зси – ‘‘г̇ажчаананд̣̇а, уд̣̇агам̣ аахара, имам̣ бхигкум̣ нахаабзссаамаа’’д̇и. ‘‘звам̣, бханд̇з’’д̇и ко ааяасмаа аананд̣̇о бхаг̇авад̇о бадиссун̣ид̇ваа уд̣̇агам̣ аахари. бхаг̇аваа уд̣̇агам̣ аасин̃жи. ааяасмаа аананд̣̇о барид̇хови. бхаг̇аваа сийсад̇о аг̇г̇ахзси. ааяасмаа аананд̣̇о баад̣̇ад̇о ужжаарзд̇ваа ман̃жагз нибаад̇зсум̣. ат̇а ко бхаг̇аваа зд̇асмим̣ нид̣̇аанз зд̇асмим̣ багаран̣з бхигкусан̇гхам̣ саннибаад̇аабзд̇ваа бхигкуу бадибужчи – ‘‘ад̇т̇и, бхигкавз, амугасмим̣ вихаарз бхигку г̇илаано’’д̇и? ‘‘ад̇т̇и, бхаг̇аваа’’д̇и. ‘‘гим̣ д̇асса, бхигкавз, бхигкуно ааб̣аад̇хо’’д̇и? ‘‘д̇асса, бханд̇з, ааяасмад̇о гужчивигаарааб̣аад̇хо’’д̇и. ‘‘ад̇т̇и бана, бхигкавз, д̇асса бхигкуно убадтааго’’д̇и? ‘‘над̇т̇и, бхаг̇аваа’’д̇и . ‘‘гисса д̇ам̣ бхигкуу на убадтзнд̇ий’’д̇и? ‘‘зсо, бханд̇з, бхигку бхигкуунам̣ агаараго; д̇зна д̇ам̣ бхигкуу на убадтзнд̇ий’’д̇и. ‘‘над̇т̇и во, бхигкавз, маад̇аа, над̇т̇и бид̇аа, яз во убадтахзяяум̣. д̇умхз жз, бхигкавз, ан̃н̃аман̃н̃ам̣ на убадтахиссат̇а, ат̇а го жарахи убадтахиссад̇и? яо, бхигкавз, мам̣ убадтахзяяа со г̇илаанам̣ убадтахзяяа. сажз убаж̇жхааяо ход̇и, убаж̇жхааязна яааваж̇ийвам̣ убадтаад̇аб̣б̣о; вудтаанамасса ааг̇амзд̇аб̣б̣ам̣. сажз аажарияо ход̇и, аажариязна яааваж̇ийвам̣ убадтаад̇аб̣б̣о; вудтаанамасса ааг̇амзд̇аб̣б̣ам̣. сажз сад̣̇д̇хивихаариго ход̇и , сад̣̇д̇хивихааригзна яааваж̇ийвам̣ убадтаад̇аб̣б̣о; вудтаанамасса ааг̇амзд̇аб̣б̣ам̣. сажз анд̇зваасиго ход̇и, анд̇зваасигзна яааваж̇ийвам̣ убадтаад̇аб̣б̣о; вудтаанамасса ааг̇амзд̇аб̣б̣ам̣. сажз самаанубаж̇жхааяаго ход̇и, самаанубаж̇жхааяагзна яааваж̇ийвам̣ убадтаад̇аб̣б̣о ; вудтаанамасса ааг̇амзд̇аб̣б̣ам̣. сажз самаанаажарияаго ход̇и, самаанаажарияагзна яааваж̇ийвам̣ убадтаад̇аб̣б̣о; вудтаанамасса ааг̇амзд̇аб̣б̣ам̣. сажз на ход̇и убаж̇жхааяо ваа аажарияо ваа сад̣̇д̇хивихаариго ваа анд̇зваасиго ваа самаанубаж̇жхааяаго ваа самаанаажарияаго ваа сан̇гхзна убадтаад̇аб̣б̣о. но жз убадтахзяяа, аабад̇д̇и д̣̇уггадасса’’.
365. Tena kho pana samayena aññatarassa bhikkhuno kucchivikārābādho hoti. So sake muttakarīse palipanno seti. Atha kho bhagavā āyasmatā ānandena pacchāsamaṇena senāsanacārikaṃ āhiṇḍanto yena tassa bhikkhuno vihāro tenupasaṅkami. Addasā kho bhagavā taṃ bhikkhuṃ sake muttakarīse palipannaṃ sayamānaṃ, disvāna yena so bhikkhu tenupasaṅkami, upasaṅkamitvā taṃ bhikkhuṃ etadavoca – ‘‘kiṃ te, bhikkhu, ābādho’’ti? ‘‘Kucchivikāro me, bhagavā’’ti. ‘‘Atthi pana te, bhikkhu, upaṭṭhāko’’ti? ‘‘Natthi, bhagavā’’ti . ‘‘Kissa taṃ bhikkhū na upaṭṭhentī’’ti? ‘‘Ahaṃ kho, bhante, bhikkhūnaṃ akārako; tena maṃ bhikkhū na upaṭṭhentī’’ti. Atha kho bhagavā āyasmantaṃ ānandaṃ āmantesi – ‘‘gacchānanda, udakaṃ āhara, imaṃ bhikkhuṃ nahāpessāmā’’ti. ‘‘Evaṃ, bhante’’ti kho āyasmā ānando bhagavato paṭissuṇitvā udakaṃ āhari. Bhagavā udakaṃ āsiñci. Āyasmā ānando paridhovi. Bhagavā sīsato aggahesi. Āyasmā ānando pādato uccāretvā mañcake nipātesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘atthi, bhikkhave, amukasmiṃ vihāre bhikkhu gilāno’’ti? ‘‘Atthi, bhagavā’’ti. ‘‘Kiṃ tassa, bhikkhave, bhikkhuno ābādho’’ti? ‘‘Tassa, bhante, āyasmato kucchivikārābādho’’ti. ‘‘Atthi pana, bhikkhave, tassa bhikkhuno upaṭṭhāko’’ti? ‘‘Natthi, bhagavā’’ti . ‘‘Kissa taṃ bhikkhū na upaṭṭhentī’’ti? ‘‘Eso, bhante, bhikkhu bhikkhūnaṃ akārako; tena taṃ bhikkhū na upaṭṭhentī’’ti. ‘‘Natthi vo, bhikkhave, mātā, natthi pitā, ye vo upaṭṭhaheyyuṃ. Tumhe ce, bhikkhave, aññamaññaṃ na upaṭṭhahissatha, atha ko carahi upaṭṭhahissati? Yo, bhikkhave, maṃ upaṭṭhaheyya so gilānaṃ upaṭṭhaheyya. Sace upajjhāyo hoti, upajjhāyena yāvajīvaṃ upaṭṭhātabbo; vuṭṭhānamassa āgametabbaṃ. Sace ācariyo hoti, ācariyena yāvajīvaṃ upaṭṭhātabbo; vuṭṭhānamassa āgametabbaṃ. Sace saddhivihāriko hoti , saddhivihārikena yāvajīvaṃ upaṭṭhātabbo; vuṭṭhānamassa āgametabbaṃ. Sace antevāsiko hoti, antevāsikena yāvajīvaṃ upaṭṭhātabbo; vuṭṭhānamassa āgametabbaṃ. Sace samānupajjhāyako hoti, samānupajjhāyakena yāvajīvaṃ upaṭṭhātabbo ; vuṭṭhānamassa āgametabbaṃ. Sace samānācariyako hoti, samānācariyakena yāvajīvaṃ upaṭṭhātabbo; vuṭṭhānamassa āgametabbaṃ. Sace na hoti upajjhāyo vā ācariyo vā saddhivihāriko vā antevāsiko vā samānupajjhāyako vā samānācariyako vā saṅghena upaṭṭhātabbo. No ce upaṭṭhaheyya, āpatti dukkaṭassa’’.
366. бан̃жахи, бхигкавз, ан̇г̇зхи саманнааг̇ад̇о г̇илаано д̣̇уубадто ход̇и – асаббааяагаарий ход̇и, саббааяз мад̇д̇ам̣ на ж̇аанаад̇и, бхзсаж̇ж̇ам̣ на бадисзвид̇аа ход̇и, ад̇т̇агаамасса г̇илаанубадтаагасса яат̇аабхууд̇ам̣ ааб̣аад̇хам̣ наавигад̇д̇аа ход̇и ‘абхиггаманд̇ам̣ ваа абхиггамад̇ийд̇и, бадиггаманд̇ам̣ ваа бадиггамад̇ийд̇и, тид̇ам̣ ваа тид̇о’д̇и, уббаннаанам̣ саарийригаанам̣ взд̣̇анаанам̣ д̣̇угкаанам̣ д̇иб̣б̣аанам̣ караанам̣ гадугаанам̣ асаад̇аанам̣ аманаабаанам̣ баан̣ахараанам̣ анад̇хиваасагаж̇аад̇иго ход̇и. имзхи ко, бхигкавз, бан̃жахан̇г̇зхи саманнааг̇ад̇о г̇илаано д̣̇уубадто ход̇и.
366. Pañcahi, bhikkhave, aṅgehi samannāgato gilāno dūpaṭṭho hoti – asappāyakārī hoti, sappāye mattaṃ na jānāti, bhesajjaṃ na paṭisevitā hoti, atthakāmassa gilānupaṭṭhākassa yathābhūtaṃ ābādhaṃ nāvikattā hoti ‘abhikkamantaṃ vā abhikkamatīti, paṭikkamantaṃ vā paṭikkamatīti, ṭhitaṃ vā ṭhito’ti, uppannānaṃ sārīrikānaṃ vedanānaṃ dukkhānaṃ tibbānaṃ kharānaṃ kaṭukānaṃ asātānaṃ amanāpānaṃ pāṇaharānaṃ anadhivāsakajātiko hoti. Imehi kho, bhikkhave, pañcahaṅgehi samannāgato gilāno dūpaṭṭho hoti.
бан̃жахи, бхигкавз , ан̇г̇зхи саманнааг̇ад̇о г̇илаано суубадто ход̇и – саббааяагаарий ход̇и, саббааяз мад̇д̇ам̣ ж̇аанаад̇и, бхзсаж̇ж̇ам̣ бадисзвид̇аа ход̇и, ад̇т̇агаамасса г̇илаанубадтаагасса яат̇аабхууд̇ам̣ ааб̣аад̇хам̣ аавигад̇д̇аа ход̇и ‘абхиггаманд̇ам̣ ваа абхиггамад̇ийд̇и, бадиггаманд̇ам̣ ваа бадиггамад̇ийд̇и, тид̇ам̣ ваа тид̇о’д̇и, уббаннаанам̣ саарийригаанам̣ взд̣̇анаанам̣ д̣̇угкаанам̣ д̇иб̣б̣аанам̣ караанам̣ гадугаанам̣ асаад̇аанам̣ аманаабаанам̣ баан̣ахараанам̣ ад̇хиваасагаж̇аад̇иго ход̇и. имзхи ко, бхигкавз, бан̃жахан̇г̇зхи саманнааг̇ад̇о г̇илаано суубадто ход̇и.
Pañcahi, bhikkhave , aṅgehi samannāgato gilāno sūpaṭṭho hoti – sappāyakārī hoti, sappāye mattaṃ jānāti, bhesajjaṃ paṭisevitā hoti, atthakāmassa gilānupaṭṭhākassa yathābhūtaṃ ābādhaṃ āvikattā hoti ‘abhikkamantaṃ vā abhikkamatīti, paṭikkamantaṃ vā paṭikkamatīti, ṭhitaṃ vā ṭhito’ti, uppannānaṃ sārīrikānaṃ vedanānaṃ dukkhānaṃ tibbānaṃ kharānaṃ kaṭukānaṃ asātānaṃ amanāpānaṃ pāṇaharānaṃ adhivāsakajātiko hoti. Imehi kho, bhikkhave, pañcahaṅgehi samannāgato gilāno sūpaṭṭho hoti.
бан̃жахи, бхигкавз, ан̇г̇зхи саманнааг̇ад̇о г̇илаанубадтааго наалам̣ г̇илаанам̣ убадтаад̇ум̣ – на бадиб̣ало ход̇и бхзсаж̇ж̇ам̣ сам̣вид̇хаад̇ум̣, саббааяаасаббааяам̣ на ж̇аанаад̇и, асаббааяам̣ убанаамзд̇и саббааяам̣ абанаамзд̇и, аамисанд̇аро г̇илаанам̣ убадтаад̇и но мзд̇д̇ажид̇д̇о, ж̇зг̇ужчий ход̇и ужжаарам̣ ваа бассаавам̣ ваа кзл̣ам̣ ваа ванд̇ам̣ ваа нийхаад̇ум̣, на бадиб̣ало ход̇и г̇илаанам̣ гаалзна гаалам̣ д̇хаммияаа гат̇ааяа санд̣̇ассзд̇ум̣ самаад̣̇абзд̇ум̣ самуд̇д̇зж̇зд̇ум̣ самбахам̣сзд̇ум̣. имзхи ко, бхигкавз, бан̃жахан̇г̇зхи саманнааг̇ад̇о г̇илаанубадтааго наалам̣ г̇илаанам̣ убадтаад̇ум̣.
Pañcahi, bhikkhave, aṅgehi samannāgato gilānupaṭṭhāko nālaṃ gilānaṃ upaṭṭhātuṃ – na paṭibalo hoti bhesajjaṃ saṃvidhātuṃ, sappāyāsappāyaṃ na jānāti, asappāyaṃ upanāmeti sappāyaṃ apanāmeti, āmisantaro gilānaṃ upaṭṭhāti no mettacitto, jegucchī hoti uccāraṃ vā passāvaṃ vā kheḷaṃ vā vantaṃ vā nīhātuṃ, na paṭibalo hoti gilānaṃ kālena kālaṃ dhammiyā kathāya sandassetuṃ samādapetuṃ samuttejetuṃ sampahaṃsetuṃ. Imehi kho, bhikkhave, pañcahaṅgehi samannāgato gilānupaṭṭhāko nālaṃ gilānaṃ upaṭṭhātuṃ.
бан̃жахи , бхигкавз, ан̇г̇зхи саманнааг̇ад̇о г̇илаанубадтааго алам̣ г̇илаанам̣ убадтаад̇ум̣ – бадиб̣ало ход̇и бхзсаж̇ж̇ам̣ сам̣вид̇хаад̇ум̣, саббааяаасаббааяам̣ ж̇аанаад̇и, асаббааяам̣ абанаамзд̇и саббааяам̣ убанаамзд̇и, мзд̇д̇ажид̇д̇о г̇илаанам̣ убадтаад̇и но аамисанд̇аро, аж̇зг̇ужчий ход̇и ужжаарам̣ ваа бассаавам̣ ваа кзл̣ам̣ ваа ванд̇ам̣ ваа нийхаад̇ум̣, бадиб̣ало ход̇и г̇илаанам̣ гаалзна гаалам̣ д̇хаммияаа гат̇ааяа санд̣̇ассзд̇ум̣ самаад̣̇абзд̇ум̣ самуд̇д̇зж̇зд̇ум̣ самбахам̣сзд̇ум̣. имзхи ко, бхигкавз, бан̃жахан̇г̇зхи саманнааг̇ад̇о г̇илаанубадтааго алам̣ г̇илаанам̣ убадтаад̇унд̇и.
Pañcahi , bhikkhave, aṅgehi samannāgato gilānupaṭṭhāko alaṃ gilānaṃ upaṭṭhātuṃ – paṭibalo hoti bhesajjaṃ saṃvidhātuṃ, sappāyāsappāyaṃ jānāti, asappāyaṃ apanāmeti sappāyaṃ upanāmeti, mettacitto gilānaṃ upaṭṭhāti no āmisantaro, ajegucchī hoti uccāraṃ vā passāvaṃ vā kheḷaṃ vā vantaṃ vā nīhātuṃ, paṭibalo hoti gilānaṃ kālena kālaṃ dhammiyā kathāya sandassetuṃ samādapetuṃ samuttejetuṃ sampahaṃsetuṃ. Imehi kho, bhikkhave, pañcahaṅgehi samannāgato gilānupaṭṭhāko alaṃ gilānaṃ upaṭṭhātunti.
г̇илаанавад̇т̇угат̇аа нидтид̇аа.
Gilānavatthukathā niṭṭhitā.
Related texts:
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / г̇илаанавад̇т̇угат̇аа • Gilānavatthukathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / г̇илаанавад̇т̇угат̇ааван̣н̣анаа • Gilānavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / г̇илаанавад̇т̇угат̇ааван̣н̣анаа • Gilānavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 224. г̇илаанавад̇т̇угат̇аа • 224. Gilānavatthukathā
