| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
224. ගිලානවත්‌ථුකථා
224. Gilānavatthukathā
365. මඤ්‌චකෙ නිපාතෙසුන්‌ති එත්‌ථ මඤ්‌චකෙ නිපාතනං නාම මඤ්‌චකෙ නිපජ්‌ජාපනන්‌ති ආහ ‘‘මඤ්‌චකෙ නිපජ්‌ජාපෙසු’’න්‌ති. මුත්‌තකරීසකිලිට්‌ඨන්‌ති මුත්‌තකරීසෙහි කිලිට්‌ඨං. යොති යො කොචි. මන්‌ති මම. තමත්‌ථං දස්‌සෙන්‌තො ආහ ‘‘ඔවාදානුසාසනීකරණෙනා’’ති. මම ඔවාදස්‌ස ච අනුසාසනියා ච කරණෙනාති අත්‌ථො. එත්‌ථාති ‘‘යො භික්‌ඛවෙ මං උපට්‌ඨහෙය්‍යා’’තිආදිපාඨෙ. සුත්‌තස්‌ස නෙය්‍යත්‌ථත්‌තා අගහෙතබ්‌බත්‌ථං දස්‌සෙන්‌තො ආහ ‘‘භගවතො චා’’තිආදි. යස්‌සාති ගිලානස්‌ස. උපජ්‌ඣායාදයොති එත්‌ථ ආදිසද්‌දෙන ආචරියසද්‌ධිවිහාරිකඅන්‌තෙවාසිකසමානුපජ්‌ඣායකසමානාචරියකසඞ්‌ඛාතෙ පඤ්‌ච ජනෙ සඞ්‌ගණ්‌හාති. එකචාරිකො වා හොතීති සම්‌බන්‌ධො. සඞ්‌ඝත්‌ථෙරොපීති පිසද්‌දො පගෙව අඤ්‌ඤෙසන්‌ති දස්‌සෙති.
365.Mañcake nipātesunti ettha mañcake nipātanaṃ nāma mañcake nipajjāpananti āha ‘‘mañcake nipajjāpesu’’nti. Muttakarīsakiliṭṭhanti muttakarīsehi kiliṭṭhaṃ. Yoti yo koci. Manti mama. Tamatthaṃ dassento āha ‘‘ovādānusāsanīkaraṇenā’’ti. Mama ovādassa ca anusāsaniyā ca karaṇenāti attho. Etthāti ‘‘yo bhikkhave maṃ upaṭṭhaheyyā’’tiādipāṭhe. Suttassa neyyatthattā agahetabbatthaṃ dassento āha ‘‘bhagavato cā’’tiādi. Yassāti gilānassa. Upajjhāyādayoti ettha ādisaddena ācariyasaddhivihārikaantevāsikasamānupajjhāyakasamānācariyakasaṅkhāte pañca jane saṅgaṇhāti. Ekacāriko vā hotīti sambandho. Saṅghattheropīti pisaddo pageva aññesanti dasseti.
366. අභික්‌කමන්‌තං වාති එත්‌ථ අභිමුඛං කමතීති අභික්‌කමන්‌තොති වුත්‌තෙ වඩ්‌ඪනත්‌ථොති ආහ ‘‘වඩ්‌ඪන්‌තං වා’’ති. ආබාධං නාවිකරොතීති සම්‌බන්‌ධො. ඉමිනා අන්‌තපච්‌චයස්‌ස සරූපං දස්‌සෙති. ඉදං නාම භොජනන්‌ති සම්‌බන්‌ධො. සංවිධාතුන්‌ති එත්‌ථ සංවිපුබ්‌බො ධාධාතු කරධාත්‌වත්‌ථො, කරධාතු ච සබ්‌බධාත්‌වත්‌ථො, තස්‌මා වුත්‌තං ‘‘භෙසජ්‌ජං යොජෙතු’’න්‌ති . අස්‌සාති ගිලානුපට්‌ඨාකස්‌ස. අන්‌තරසද්‌දස්‌ස මජ්‌ඣත්‌ථාදයො පටික්‌ඛිපන්‌තො ආහ ‘‘කාරණං වුච්‌චතී’’ති.
366.Abhikkamantaṃ vāti ettha abhimukhaṃ kamatīti abhikkamantoti vutte vaḍḍhanatthoti āha ‘‘vaḍḍhantaṃ vā’’ti. Ābādhaṃ nāvikarotīti sambandho. Iminā antapaccayassa sarūpaṃ dasseti. Idaṃ nāma bhojananti sambandho. Saṃvidhātunti ettha saṃvipubbo dhādhātu karadhātvattho, karadhātu ca sabbadhātvattho, tasmā vuttaṃ ‘‘bhesajjaṃ yojetu’’nti . Assāti gilānupaṭṭhākassa. Antarasaddassa majjhatthādayo paṭikkhipanto āha ‘‘kāraṇaṃ vuccatī’’ti.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi / 224. ගිලානවත්‌ථුකථා • 224. Gilānavatthukathā
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / ගිලානවත්‌ථුකථා • Gilānavatthukathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / ගිලානවත්‌ථුකථාවණ්‌ණනා • Gilānavatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / ගිලානවත්‌ථුකථාවණ්‌ණනා • Gilānavatthukathāvaṇṇanā
