| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৩. গিঞ্জকাৰসথসুত্তং
3. Giñjakāvasathasuttaṃ
৯৭. একং সমযং ভগৰা ঞাতিকে ৰিহরতি গিঞ্জকাৰসথে। তত্র খো ভগৰা ভিক্খূ আমন্তেসি – ‘‘ভিক্খৰো’’তি। ‘‘ভদন্তে’’তি তে ভিক্খূ ভগৰতো পচ্চস্সোসুং। ভগৰা এতদৰোচ –
97. Ekaṃ samayaṃ bhagavā ñātike viharati giñjakāvasathe. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘ধাতুং, ভিক্খৰে, পটিচ্চ উপ্পজ্জতি সঞ্ঞা, উপ্পজ্জতি দিট্ঠি, উপ্পজ্জতি ৰিতক্কো’’তি। এৰং ৰুত্তে, আযস্মা কচ্চানো 1 ভগৰন্তং এতদৰোচ – ‘‘যাযং, ভন্তে, দিট্ঠি – ‘অসম্মাসম্বুদ্ধেসু সম্মাসম্বুদ্ধা’তি, অযং নু খো, ভন্তে, দিট্ঠি কিং পটিচ্চ পঞ্ঞাযতী’’তি?
‘‘Dhātuṃ, bhikkhave, paṭicca uppajjati saññā, uppajjati diṭṭhi, uppajjati vitakko’’ti. Evaṃ vutte, āyasmā kaccāno 2 bhagavantaṃ etadavoca – ‘‘yāyaṃ, bhante, diṭṭhi – ‘asammāsambuddhesu sammāsambuddhā’ti, ayaṃ nu kho, bhante, diṭṭhi kiṃ paṭicca paññāyatī’’ti?
‘‘মহতি খো এসা, কচ্চান, ধাতু যদিদং অৰিজ্জাধাতু। হীনং , কচ্চান, ধাতুং পটিচ্চ উপ্পজ্জতি হীনা সঞ্ঞা, হীনা দিট্ঠি, হীনো ৰিতক্কো, হীনা চেতনা, হীনা পত্থনা, হীনো পণিধি, হীনো পুগ্গলো, হীনা ৰাচা; হীনং আচিক্খতি দেসেতি পঞ্ঞপেতি পট্ঠপেতি ৰিৰরতি ৰিভজতি উত্তানীকরোতি; হীনা তস্স উপপত্তীতি ৰদামি।
‘‘Mahati kho esā, kaccāna, dhātu yadidaṃ avijjādhātu. Hīnaṃ , kaccāna, dhātuṃ paṭicca uppajjati hīnā saññā, hīnā diṭṭhi, hīno vitakko, hīnā cetanā, hīnā patthanā, hīno paṇidhi, hīno puggalo, hīnā vācā; hīnaṃ ācikkhati deseti paññapeti paṭṭhapeti vivarati vibhajati uttānīkaroti; hīnā tassa upapattīti vadāmi.
‘‘মজ্ঝিমং , কচ্চান, ধাতুং পটিচ্চ উপ্পজ্জতি মজ্ঝিমা সঞ্ঞা, মজ্ঝিমা দিট্ঠি, মজ্ঝিমো ৰিতক্কো, মজ্ঝিমা চেতনা, মজ্ঝিমা পত্থনা, মজ্ঝিমো পণিধি, মজ্ঝিমো পুগ্গলো, মজ্ঝিমা ৰাচা; মজ্ঝিমং আচিক্খতি দেসেতি পঞ্ঞপেতি পট্ঠপেতি ৰিৰরতি ৰিভজতি উত্তানীকরোতি; মজ্ঝিমা তস্স উপপত্তীতি ৰদামি।
‘‘Majjhimaṃ , kaccāna, dhātuṃ paṭicca uppajjati majjhimā saññā, majjhimā diṭṭhi, majjhimo vitakko, majjhimā cetanā, majjhimā patthanā, majjhimo paṇidhi, majjhimo puggalo, majjhimā vācā; majjhimaṃ ācikkhati deseti paññapeti paṭṭhapeti vivarati vibhajati uttānīkaroti; majjhimā tassa upapattīti vadāmi.
‘‘পণীতং, কচ্চান, ধাতুং পটিচ্চ উপ্পজ্জতি পণীতা সঞ্ঞা, পণীতা দিট্ঠি, পণীতো ৰিতক্কো, পণীতা চেতনা, পণীতা পত্থনা, পণীতো পণিধি, পণীতো পুগ্গলো, পণীতা ৰাচা; পণীতং আচিক্খতি দেসেতি পঞ্ঞপেতি পট্ঠপেতি ৰিৰরতি ৰিভজতি উত্তানীকরোতি; পণীতা তস্স উপপত্তীতি ৰদামী’’তি। ততিযং।
‘‘Paṇītaṃ, kaccāna, dhātuṃ paṭicca uppajjati paṇītā saññā, paṇītā diṭṭhi, paṇīto vitakko, paṇītā cetanā, paṇītā patthanā, paṇīto paṇidhi, paṇīto puggalo, paṇītā vācā; paṇītaṃ ācikkhati deseti paññapeti paṭṭhapeti vivarati vibhajati uttānīkaroti; paṇītā tassa upapattīti vadāmī’’ti. Tatiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. গিঞ্জকাৰসথসুত্তৰণ্ণনা • 3. Giñjakāvasathasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩. গিঞ্জকাৰসথসুত্তৰণ্ণনা • 3. Giñjakāvasathasuttavaṇṇanā
