| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៣. គិញ្ជកាវសថសុត្តំ
3. Giñjakāvasathasuttaṃ
៩៧. ឯកំ សមយំ ភគវា ញាតិកេ វិហរតិ គិញ្ជកាវសថេ។ តត្រ ខោ ភគវា ភិក្ខូ អាមន្តេសិ – ‘‘ភិក្ខវោ’’តិ។ ‘‘ភទន្តេ’’តិ តេ ភិក្ខូ ភគវតោ បច្ចស្សោសុំ។ ភគវា ឯតទវោច –
97. Ekaṃ samayaṃ bhagavā ñātike viharati giñjakāvasathe. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘ធាតុំ, ភិក្ខវេ, បដិច្ច ឧប្បជ្ជតិ សញ្ញា, ឧប្បជ្ជតិ ទិដ្ឋិ, ឧប្បជ្ជតិ វិតក្កោ’’តិ។ ឯវំ វុត្តេ, អាយស្មា កច្ចានោ 1 ភគវន្តំ ឯតទវោច – ‘‘យាយំ, ភន្តេ, ទិដ្ឋិ – ‘អសម្មាសម្ពុទ្ធេសុ សម្មាសម្ពុទ្ធា’តិ, អយំ នុ ខោ, ភន្តេ, ទិដ្ឋិ កិំ បដិច្ច បញ្ញាយតី’’តិ?
‘‘Dhātuṃ, bhikkhave, paṭicca uppajjati saññā, uppajjati diṭṭhi, uppajjati vitakko’’ti. Evaṃ vutte, āyasmā kaccāno 2 bhagavantaṃ etadavoca – ‘‘yāyaṃ, bhante, diṭṭhi – ‘asammāsambuddhesu sammāsambuddhā’ti, ayaṃ nu kho, bhante, diṭṭhi kiṃ paṭicca paññāyatī’’ti?
‘‘មហតិ ខោ ឯសា, កច្ចាន, ធាតុ យទិទំ អវិជ្ជាធាតុ។ ហីនំ , កច្ចាន, ធាតុំ បដិច្ច ឧប្បជ្ជតិ ហីនា សញ្ញា, ហីនា ទិដ្ឋិ, ហីនោ វិតក្កោ, ហីនា ចេតនា, ហីនា បត្ថនា, ហីនោ បណិធិ, ហីនោ បុគ្គលោ, ហីនា វាចា; ហីនំ អាចិក្ខតិ ទេសេតិ បញ្ញបេតិ បដ្ឋបេតិ វិវរតិ វិភជតិ ឧត្តានីករោតិ; ហីនា តស្ស ឧបបត្តីតិ វទាមិ។
‘‘Mahati kho esā, kaccāna, dhātu yadidaṃ avijjādhātu. Hīnaṃ , kaccāna, dhātuṃ paṭicca uppajjati hīnā saññā, hīnā diṭṭhi, hīno vitakko, hīnā cetanā, hīnā patthanā, hīno paṇidhi, hīno puggalo, hīnā vācā; hīnaṃ ācikkhati deseti paññapeti paṭṭhapeti vivarati vibhajati uttānīkaroti; hīnā tassa upapattīti vadāmi.
‘‘មជ្ឈិមំ , កច្ចាន, ធាតុំ បដិច្ច ឧប្បជ្ជតិ មជ្ឈិមា សញ្ញា, មជ្ឈិមា ទិដ្ឋិ, មជ្ឈិមោ វិតក្កោ, មជ្ឈិមា ចេតនា, មជ្ឈិមា បត្ថនា, មជ្ឈិមោ បណិធិ, មជ្ឈិមោ បុគ្គលោ, មជ្ឈិមា វាចា; មជ្ឈិមំ អាចិក្ខតិ ទេសេតិ បញ្ញបេតិ បដ្ឋបេតិ វិវរតិ វិភជតិ ឧត្តានីករោតិ; មជ្ឈិមា តស្ស ឧបបត្តីតិ វទាមិ។
‘‘Majjhimaṃ , kaccāna, dhātuṃ paṭicca uppajjati majjhimā saññā, majjhimā diṭṭhi, majjhimo vitakko, majjhimā cetanā, majjhimā patthanā, majjhimo paṇidhi, majjhimo puggalo, majjhimā vācā; majjhimaṃ ācikkhati deseti paññapeti paṭṭhapeti vivarati vibhajati uttānīkaroti; majjhimā tassa upapattīti vadāmi.
‘‘បណីតំ, កច្ចាន, ធាតុំ បដិច្ច ឧប្បជ្ជតិ បណីតា សញ្ញា, បណីតា ទិដ្ឋិ, បណីតោ វិតក្កោ, បណីតា ចេតនា, បណីតា បត្ថនា, បណីតោ បណិធិ, បណីតោ បុគ្គលោ, បណីតា វាចា; បណីតំ អាចិក្ខតិ ទេសេតិ បញ្ញបេតិ បដ្ឋបេតិ វិវរតិ វិភជតិ ឧត្តានីករោតិ; បណីតា តស្ស ឧបបត្តីតិ វទាមី’’តិ។ តតិយំ។
‘‘Paṇītaṃ, kaccāna, dhātuṃ paṭicca uppajjati paṇītā saññā, paṇītā diṭṭhi, paṇīto vitakko, paṇītā cetanā, paṇītā patthanā, paṇīto paṇidhi, paṇīto puggalo, paṇītā vācā; paṇītaṃ ācikkhati deseti paññapeti paṭṭhapeti vivarati vibhajati uttānīkaroti; paṇītā tassa upapattīti vadāmī’’ti. Tatiyaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៣. គិញ្ជកាវសថសុត្តវណ្ណនា • 3. Giñjakāvasathasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៣. គិញ្ជកាវសថសុត្តវណ្ណនា • 3. Giñjakāvasathasuttavaṇṇanā
