| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೩. ಗಿಞ್ಜಕಾವಸಥಸುತ್ತಂ
3. Giñjakāvasathasuttaṃ
೯೭. ಏಕಂ ಸಮಯಂ ಭಗವಾ ಞಾತಿಕೇ ವಿಹರತಿ ಗಿಞ್ಜಕಾವಸಥೇ। ತತ್ರ ಖೋ ಭಗವಾ ಭಿಕ್ಖೂ ಆಮನ್ತೇಸಿ – ‘‘ಭಿಕ್ಖವೋ’’ತಿ। ‘‘ಭದನ್ತೇ’’ತಿ ತೇ ಭಿಕ್ಖೂ ಭಗವತೋ ಪಚ್ಚಸ್ಸೋಸುಂ। ಭಗವಾ ಏತದವೋಚ –
97. Ekaṃ samayaṃ bhagavā ñātike viharati giñjakāvasathe. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘ಧಾತುಂ, ಭಿಕ್ಖವೇ, ಪಟಿಚ್ಚ ಉಪ್ಪಜ್ಜತಿ ಸಞ್ಞಾ, ಉಪ್ಪಜ್ಜತಿ ದಿಟ್ಠಿ, ಉಪ್ಪಜ್ಜತಿ ವಿತಕ್ಕೋ’’ತಿ। ಏವಂ ವುತ್ತೇ, ಆಯಸ್ಮಾ ಕಚ್ಚಾನೋ 1 ಭಗವನ್ತಂ ಏತದವೋಚ – ‘‘ಯಾಯಂ, ಭನ್ತೇ, ದಿಟ್ಠಿ – ‘ಅಸಮ್ಮಾಸಮ್ಬುದ್ಧೇಸು ಸಮ್ಮಾಸಮ್ಬುದ್ಧಾ’ತಿ, ಅಯಂ ನು ಖೋ, ಭನ್ತೇ, ದಿಟ್ಠಿ ಕಿಂ ಪಟಿಚ್ಚ ಪಞ್ಞಾಯತೀ’’ತಿ?
‘‘Dhātuṃ, bhikkhave, paṭicca uppajjati saññā, uppajjati diṭṭhi, uppajjati vitakko’’ti. Evaṃ vutte, āyasmā kaccāno 2 bhagavantaṃ etadavoca – ‘‘yāyaṃ, bhante, diṭṭhi – ‘asammāsambuddhesu sammāsambuddhā’ti, ayaṃ nu kho, bhante, diṭṭhi kiṃ paṭicca paññāyatī’’ti?
‘‘ಮಹತಿ ಖೋ ಏಸಾ, ಕಚ್ಚಾನ, ಧಾತು ಯದಿದಂ ಅವಿಜ್ಜಾಧಾತು। ಹೀನಂ , ಕಚ್ಚಾನ, ಧಾತುಂ ಪಟಿಚ್ಚ ಉಪ್ಪಜ್ಜತಿ ಹೀನಾ ಸಞ್ಞಾ, ಹೀನಾ ದಿಟ್ಠಿ, ಹೀನೋ ವಿತಕ್ಕೋ, ಹೀನಾ ಚೇತನಾ, ಹೀನಾ ಪತ್ಥನಾ, ಹೀನೋ ಪಣಿಧಿ, ಹೀನೋ ಪುಗ್ಗಲೋ, ಹೀನಾ ವಾಚಾ; ಹೀನಂ ಆಚಿಕ್ಖತಿ ದೇಸೇತಿ ಪಞ್ಞಪೇತಿ ಪಟ್ಠಪೇತಿ ವಿವರತಿ ವಿಭಜತಿ ಉತ್ತಾನೀಕರೋತಿ; ಹೀನಾ ತಸ್ಸ ಉಪಪತ್ತೀತಿ ವದಾಮಿ।
‘‘Mahati kho esā, kaccāna, dhātu yadidaṃ avijjādhātu. Hīnaṃ , kaccāna, dhātuṃ paṭicca uppajjati hīnā saññā, hīnā diṭṭhi, hīno vitakko, hīnā cetanā, hīnā patthanā, hīno paṇidhi, hīno puggalo, hīnā vācā; hīnaṃ ācikkhati deseti paññapeti paṭṭhapeti vivarati vibhajati uttānīkaroti; hīnā tassa upapattīti vadāmi.
‘‘ಮಜ್ಝಿಮಂ , ಕಚ್ಚಾನ, ಧಾತುಂ ಪಟಿಚ್ಚ ಉಪ್ಪಜ್ಜತಿ ಮಜ್ಝಿಮಾ ಸಞ್ಞಾ, ಮಜ್ಝಿಮಾ ದಿಟ್ಠಿ, ಮಜ್ಝಿಮೋ ವಿತಕ್ಕೋ, ಮಜ್ಝಿಮಾ ಚೇತನಾ, ಮಜ್ಝಿಮಾ ಪತ್ಥನಾ, ಮಜ್ಝಿಮೋ ಪಣಿಧಿ, ಮಜ್ಝಿಮೋ ಪುಗ್ಗಲೋ, ಮಜ್ಝಿಮಾ ವಾಚಾ; ಮಜ್ಝಿಮಂ ಆಚಿಕ್ಖತಿ ದೇಸೇತಿ ಪಞ್ಞಪೇತಿ ಪಟ್ಠಪೇತಿ ವಿವರತಿ ವಿಭಜತಿ ಉತ್ತಾನೀಕರೋತಿ; ಮಜ್ಝಿಮಾ ತಸ್ಸ ಉಪಪತ್ತೀತಿ ವದಾಮಿ।
‘‘Majjhimaṃ , kaccāna, dhātuṃ paṭicca uppajjati majjhimā saññā, majjhimā diṭṭhi, majjhimo vitakko, majjhimā cetanā, majjhimā patthanā, majjhimo paṇidhi, majjhimo puggalo, majjhimā vācā; majjhimaṃ ācikkhati deseti paññapeti paṭṭhapeti vivarati vibhajati uttānīkaroti; majjhimā tassa upapattīti vadāmi.
‘‘ಪಣೀತಂ, ಕಚ್ಚಾನ, ಧಾತುಂ ಪಟಿಚ್ಚ ಉಪ್ಪಜ್ಜತಿ ಪಣೀತಾ ಸಞ್ಞಾ, ಪಣೀತಾ ದಿಟ್ಠಿ, ಪಣೀತೋ ವಿತಕ್ಕೋ, ಪಣೀತಾ ಚೇತನಾ, ಪಣೀತಾ ಪತ್ಥನಾ, ಪಣೀತೋ ಪಣಿಧಿ, ಪಣೀತೋ ಪುಗ್ಗಲೋ, ಪಣೀತಾ ವಾಚಾ; ಪಣೀತಂ ಆಚಿಕ್ಖತಿ ದೇಸೇತಿ ಪಞ್ಞಪೇತಿ ಪಟ್ಠಪೇತಿ ವಿವರತಿ ವಿಭಜತಿ ಉತ್ತಾನೀಕರೋತಿ; ಪಣೀತಾ ತಸ್ಸ ಉಪಪತ್ತೀತಿ ವದಾಮೀ’’ತಿ। ತತಿಯಂ।
‘‘Paṇītaṃ, kaccāna, dhātuṃ paṭicca uppajjati paṇītā saññā, paṇītā diṭṭhi, paṇīto vitakko, paṇītā cetanā, paṇītā patthanā, paṇīto paṇidhi, paṇīto puggalo, paṇītā vācā; paṇītaṃ ācikkhati deseti paññapeti paṭṭhapeti vivarati vibhajati uttānīkaroti; paṇītā tassa upapattīti vadāmī’’ti. Tatiyaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೩. ಗಿಞ್ಜಕಾವಸಥಸುತ್ತವಣ್ಣನಾ • 3. Giñjakāvasathasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೩. ಗಿಞ್ಜಕಾವಸಥಸುತ್ತವಣ್ಣನಾ • 3. Giñjakāvasathasuttavaṇṇanā
