| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
3. ගිඤ්‌ජකාවසථසුත්‌තං
3. Giñjakāvasathasuttaṃ
97. එකං සමයං භගවා ඤාතිකෙ විහරති ගිඤ්‌ජකාවසථෙ. තත්‍ර ඛො භගවා භික්‌ඛූ ආමන්‌තෙසි – ‘‘භික්‌ඛවො’’ති. ‘‘භදන්‌තෙ’’ති තෙ භික්‌ඛූ භගවතො පච්‌චස්‌සොසුං. භගවා එතදවොච –
97. Ekaṃ samayaṃ bhagavā ñātike viharati giñjakāvasathe. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘ධාතුං, භික්‌ඛවෙ, පටිච්‌ච උප්‌පජ්‌ජති සඤ්‌ඤා, උප්‌පජ්‌ජති දිට්‌ඨි, උප්‌පජ්‌ජති විතක්‌කො’’ති. එවං වුත්‌තෙ, ආයස්‌මා කච්‌චානො 1 භගවන්‌තං එතදවොච – ‘‘යායං, භන්‌තෙ, දිට්‌ඨි – ‘අසම්‌මාසම්‌බුද්‌ධෙසු සම්‌මාසම්‌බුද්‌ධා’ති, අයං නු ඛො, භන්‌තෙ, දිට්‌ඨි කිං පටිච්‌ච පඤ්‌ඤායතී’’ති?
‘‘Dhātuṃ, bhikkhave, paṭicca uppajjati saññā, uppajjati diṭṭhi, uppajjati vitakko’’ti. Evaṃ vutte, āyasmā kaccāno 2 bhagavantaṃ etadavoca – ‘‘yāyaṃ, bhante, diṭṭhi – ‘asammāsambuddhesu sammāsambuddhā’ti, ayaṃ nu kho, bhante, diṭṭhi kiṃ paṭicca paññāyatī’’ti?
‘‘මහති ඛො එසා, කච්‌චාන, ධාතු යදිදං අවිජ්‌ජාධාතු. හීනං , කච්‌චාන, ධාතුං පටිච්‌ච උප්‌පජ්‌ජති හීනා සඤ්‌ඤා, හීනා දිට්‌ඨි, හීනො විතක්‌කො, හීනා චෙතනා, හීනා පත්‌ථනා, හීනො පණිධි, හීනො පුග්‌ගලො, හීනා වාචා; හීනං ආචික්‌ඛති දෙසෙති පඤ්‌ඤපෙති පට්‌ඨපෙති විවරති විභජති උත්‌තානීකරොති; හීනා තස්‌ස උපපත්‌තීති වදාමි.
‘‘Mahati kho esā, kaccāna, dhātu yadidaṃ avijjādhātu. Hīnaṃ , kaccāna, dhātuṃ paṭicca uppajjati hīnā saññā, hīnā diṭṭhi, hīno vitakko, hīnā cetanā, hīnā patthanā, hīno paṇidhi, hīno puggalo, hīnā vācā; hīnaṃ ācikkhati deseti paññapeti paṭṭhapeti vivarati vibhajati uttānīkaroti; hīnā tassa upapattīti vadāmi.
‘‘මජ්‌ඣිමං , කච්‌චාන, ධාතුං පටිච්‌ච උප්‌පජ්‌ජති මජ්‌ඣිමා සඤ්‌ඤා, මජ්‌ඣිමා දිට්‌ඨි, මජ්‌ඣිමො විතක්‌කො, මජ්‌ඣිමා චෙතනා, මජ්‌ඣිමා පත්‌ථනා, මජ්‌ඣිමො පණිධි, මජ්‌ඣිමො පුග්‌ගලො, මජ්‌ඣිමා වාචා; මජ්‌ඣිමං ආචික්‌ඛති දෙසෙති පඤ්‌ඤපෙති පට්‌ඨපෙති විවරති විභජති උත්‌තානීකරොති; මජ්‌ඣිමා තස්‌ස උපපත්‌තීති වදාමි.
‘‘Majjhimaṃ , kaccāna, dhātuṃ paṭicca uppajjati majjhimā saññā, majjhimā diṭṭhi, majjhimo vitakko, majjhimā cetanā, majjhimā patthanā, majjhimo paṇidhi, majjhimo puggalo, majjhimā vācā; majjhimaṃ ācikkhati deseti paññapeti paṭṭhapeti vivarati vibhajati uttānīkaroti; majjhimā tassa upapattīti vadāmi.
‘‘පණීතං, කච්‌චාන, ධාතුං පටිච්‌ච උප්‌පජ්‌ජති පණීතා සඤ්‌ඤා, පණීතා දිට්‌ඨි, පණීතො විතක්‌කො, පණීතා චෙතනා, පණීතා පත්‌ථනා, පණීතො පණිධි, පණීතො පුග්‌ගලො, පණීතා වාචා; පණීතං ආචික්‌ඛති දෙසෙති පඤ්‌ඤපෙති පට්‌ඨපෙති විවරති විභජති උත්‌තානීකරොති; පණීතා තස්‌ස උපපත්‌තීති වදාමී’’ති. තතියං.
‘‘Paṇītaṃ, kaccāna, dhātuṃ paṭicca uppajjati paṇītā saññā, paṇītā diṭṭhi, paṇīto vitakko, paṇītā cetanā, paṇītā patthanā, paṇīto paṇidhi, paṇīto puggalo, paṇītā vācā; paṇītaṃ ācikkhati deseti paññapeti paṭṭhapeti vivarati vibhajati uttānīkaroti; paṇītā tassa upapattīti vadāmī’’ti. Tatiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3. ගිඤ්‌ජකාවසථසුත්‌තවණ්‌ණනා • 3. Giñjakāvasathasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3. ගිඤ්‌ජකාවසථසුත්‌තවණ්‌ණනා • 3. Giñjakāvasathasuttavaṇṇanā
