| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. கி³ஞ்ஜகாவஸத²ஸுத்தவண்ணனா
3. Giñjakāvasathasuttavaṇṇanā
97. ததியே தா⁴துங், பி⁴க்க²வேதி இதோ பட்டா²ய அஜ்ஜா²ஸயங் தா⁴தூதி தீ³பேதி. உப்பஜ்ஜதி ஸஞ்ஞாதி அஜ்ஜா²ஸயங் படிச்ச ஸஞ்ஞா உப்பஜ்ஜதி, தி³ட்டி² உப்பஜ்ஜதி, விதக்கோ உப்பஜ்ஜதீதி. இதா⁴பி ‘‘கச்சானோ பஞ்ஹங் புச்சி²ஸ்ஸதீ’’தி தஸ்ஸ ஓகாஸதா³னத்த²ங் எத்தாவதாவ தே³ஸனங் நிட்டா²பேஸி. அஸம்மாஸம்பு³த்³தே⁴ஸூதி ச²ஸு ஸத்தா²ரேஸு. ஸம்மாஸம்பு³த்³தா⁴தி மயமஸ்ம ஸம்மாஸம்பு³த்³தா⁴தி. கிங் படிச்ச பஞ்ஞாயதீதி கிஸ்மிங் ஸதி ஹோதீதி? ஸத்தா²ரானங் உப்பன்னங் தி³ட்டி²ங் புச்ச²தி. அஸம்மாஸம்பு³த்³தே⁴ஸு தேஸு ஸம்மாஸம்பு³த்³தா⁴ ஏதேதி ஏவங் உப்பன்னங் தித்தி²யஸாவகானம்பி தி³ட்டி²ங் புச்ச²தியேவ.
97. Tatiye dhātuṃ, bhikkhaveti ito paṭṭhāya ajjhāsayaṃ dhātūti dīpeti. Uppajjati saññāti ajjhāsayaṃ paṭicca saññā uppajjati, diṭṭhi uppajjati, vitakko uppajjatīti. Idhāpi ‘‘kaccāno pañhaṃ pucchissatī’’ti tassa okāsadānatthaṃ ettāvatāva desanaṃ niṭṭhāpesi. Asammāsambuddhesūti chasu satthāresu. Sammāsambuddhāti mayamasma sammāsambuddhāti. Kiṃ paṭicca paññāyatīti kismiṃ sati hotīti? Satthārānaṃ uppannaṃ diṭṭhiṃ pucchati. Asammāsambuddhesu tesu sammāsambuddhā eteti evaṃ uppannaṃ titthiyasāvakānampi diṭṭhiṃ pucchatiyeva.
இதா³னி யஸ்மா தேஸங் அவிஜ்ஜாதா⁴துங் படிச்ச ஸா தி³ட்டி² ஹோதி, அவிஜ்ஜாதா⁴து ச நாம மஹதீ தா⁴து, தஸ்மா மஹதிங் தா⁴துங் படிச்ச தஸ்ஸா உப்பத்திங் தீ³பெந்தோ மஹதீ கோ² ஏஸாதிஆதி³மாஹ. ஹீனங், கச்சான, தா⁴துங் படிச்சாதி ஹீனங் அஜ்ஜா²ஸயங் படிச்ச. பணிதீ⁴தி சித்தட்ட²பனங். ஸா பனேஸா இத்தி²பா⁴வங் வா மக்கடாதி³திரச்சா²னபா⁴வங் வா பத்தெ²ந்தஸ்ஸ உப்பஜ்ஜதி. ஹீனோ புக்³க³லோதி யஸ்ஸேதே ஹீனா த⁴ம்மா உப்பஜ்ஜந்தி, ஸப்³போ³ ஸோ புக்³க³லோபி ஹீனோ நாம. ஹீனா வாசாதி யா தஸ்ஸ வாசா, ஸாபி ஹீனா. ஹீனங் ஆசிக்க²தீதி ஸோ ஆசிக்க²ந்தோபி ஹீனமேவ ஆசிக்க²தி, தே³ஸெந்தோபி ஹீனமேவ தே³ஸேதீதி ஸப்³ப³பதா³னி யோஜேதப்³பா³னி. உபபத்தீதி த்³வே உபபத்தியோ படிலாபோ⁴ ச நிப்³ப³த்தி ச. நிப்³ப³த்தி ஹீனகுலாதி³வஸேன வேதி³தப்³பா³, படிலாபோ⁴ சித்துப்பாத³க்க²ணே ஹீனத்திகவஸேன. கத²ங்? தஸ்ஸ ஹி பஞ்சஸு நீசகுலேஸு உப்பஜ்ஜனதோ ஹீனா நிப்³ப³த்தி, வெஸ்ஸஸுத்³த³குலேஸு உப்பஜ்ஜனதோ மஜ்ஜி²மா, க²த்தியப்³ராஹ்மணகுலேஸு உப்பஜ்ஜனதோ பணீதா. த்³வாத³ஸாகுஸலசித்துப்பாதா³னங் பன படிலாப⁴தோ ஹீனோ படிலாபோ⁴, தேபூ⁴மகத⁴ம்மானங் படிலாப⁴தோ மஜ்ஜி²மோ, நவலோகுத்தரத⁴ம்மானங் படிலாப⁴தோ பணீதோ. இமஸ்மிங் பன டா²னே நிப்³ப³த்தியேவ அதி⁴ப்பேதாதி. ததியங்.
Idāni yasmā tesaṃ avijjādhātuṃ paṭicca sā diṭṭhi hoti, avijjādhātu ca nāma mahatī dhātu, tasmā mahatiṃ dhātuṃ paṭicca tassā uppattiṃ dīpento mahatī kho esātiādimāha. Hīnaṃ, kaccāna, dhātuṃ paṭiccāti hīnaṃ ajjhāsayaṃ paṭicca. Paṇidhīti cittaṭṭhapanaṃ. Sā panesā itthibhāvaṃ vā makkaṭāditiracchānabhāvaṃ vā patthentassa uppajjati. Hīnopuggaloti yassete hīnā dhammā uppajjanti, sabbo so puggalopi hīno nāma. Hīnā vācāti yā tassa vācā, sāpi hīnā. Hīnaṃ ācikkhatīti so ācikkhantopi hīnameva ācikkhati, desentopi hīnameva desetīti sabbapadāni yojetabbāni. Upapattīti dve upapattiyo paṭilābho ca nibbatti ca. Nibbatti hīnakulādivasena veditabbā, paṭilābho cittuppādakkhaṇe hīnattikavasena. Kathaṃ? Tassa hi pañcasu nīcakulesu uppajjanato hīnā nibbatti, vessasuddakulesu uppajjanato majjhimā, khattiyabrāhmaṇakulesu uppajjanato paṇītā. Dvādasākusalacittuppādānaṃ pana paṭilābhato hīno paṭilābho, tebhūmakadhammānaṃ paṭilābhato majjhimo, navalokuttaradhammānaṃ paṭilābhato paṇīto. Imasmiṃ pana ṭhāne nibbattiyeva adhippetāti. Tatiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. கி³ஞ்ஜகாவஸத²ஸுத்தங் • 3. Giñjakāvasathasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. கி³ஞ்ஜகாவஸத²ஸுத்தவண்ணனா • 3. Giñjakāvasathasuttavaṇṇanā
