| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৩. গিঞ্জকাৰসথসুত্তৰণ্ণনা
3. Giñjakāvasathasuttavaṇṇanā
৯৭. ইতো পট্ঠাযাতি ‘‘ধাতুং, ভিক্খৰে’’তি ইমস্মা ততিযসুত্ততো পট্ঠায। যাৰ কম্মৰগ্গো, তাৰ নেত্ৰা উপগন্ত্ৰা সেতি এত্থাতি আসযো, হীনাদিভাৰেন অধীনো আসযো অজ্ঝাসযো, তং অজ্ঝাসযং, অধিমুত্তন্তি অত্থো। সঞ্ঞা উপ্পজ্জতীতিআদীসু হীনাদিভেদং অজ্ঝাসযং পটিচ্চ হীনাদিভেদা সঞ্ঞা, তন্নিস্সযদিট্ঠিৰিকপ্পনা, ৰিতক্কো চ উপ্পজ্জতি সহজাতকোটিযা উপনিস্সযকোটিযা চ। সত্থারেসূতি তেসং সত্থুপটিঞ্ঞতায ৰুত্তং, ন সত্থুলক্খণসব্ভাৰতো। অসম্মাসম্বুদ্ধেসূতি আধারে ৰিসযে চ ভুম্মং একতো কত্ৰা ৰুত্তন্তি পঠমং তাৰ দস্সেন্তো ‘‘মযং সম্মাসম্বুদ্ধা’’তিআদিং ৰত্ৰা ইতরং দস্সেন্তো ‘‘তেসু সম্মাসম্বুদ্ধা এতে’’তিআদিমাহ। তেসং ‘‘মযং সম্মাসম্বুদ্ধা’’তি উপ্পন্নদিট্ঠি ইধ মূলভাৰেন পুচ্ছিতা, ইতরা অনুসঙ্কিতাতি পুচ্ছতিযেৰাতি সাসঙ্কং ৰদতি।
97.Ito paṭṭhāyāti ‘‘dhātuṃ, bhikkhave’’ti imasmā tatiyasuttato paṭṭhāya. Yāva kammavaggo, tāva netvā upagantvā seti etthāti āsayo, hīnādibhāvena adhīno āsayo ajjhāsayo, taṃ ajjhāsayaṃ, adhimuttanti attho. Saññā uppajjatītiādīsu hīnādibhedaṃ ajjhāsayaṃ paṭicca hīnādibhedā saññā, tannissayadiṭṭhivikappanā, vitakko ca uppajjati sahajātakoṭiyā upanissayakoṭiyā ca. Satthāresūti tesaṃ satthupaṭiññatāya vuttaṃ, na satthulakkhaṇasabbhāvato. Asammāsambuddhesūti ādhāre visaye ca bhummaṃ ekato katvā vuttanti paṭhamaṃ tāva dassento ‘‘mayaṃ sammāsambuddhā’’tiādiṃ vatvā itaraṃ dassento ‘‘tesu sammāsambuddhā ete’’tiādimāha. Tesaṃ ‘‘mayaṃ sammāsambuddhā’’ti uppannadiṭṭhi idha mūlabhāvena pucchitā, itarā anusaṅkitāti pucchatiyevāti sāsaṅkaṃ vadati.
‘‘মহতী’’তি এত্থ মহাসদ্দো ‘‘মহাজনো’’তিআদীসু ৰিয বহুঅত্থৰাচকোতি দট্ঠব্বো। অৰিজ্জাপি হীনহীনতরহীনতমাদিভেদেন বহুপকারা। তস্সাতি দিট্ঠিযা। কস্মা পনেত্থ ‘‘যদিদং অৰিজ্জা ধাতূ’’তি অৰিজ্জং উদ্ধরিত্ৰা ‘‘হীনং ধাতুং পটিচ্চা’’তি অজ্ঝাসযধাতু নিদ্দিট্ঠাতি? ন খো পনেতং এৰং দট্ঠব্বং, ‘‘অঞ্ঞং উদ্ধরিত্ৰা অঞ্ঞং নিদ্দিট্ঠা’’তি, যতো অৰিজ্জাসীসেন অজ্ঝাসযধাতু এৰ গহিতা। অৰিজ্জাগহিতো হি পুরিসপুগ্গলো দিট্ঠজ্ঝাসযো হীনাদিভেদং অৰিজ্জাধাতুং নিস্সায ততো সঞ্ঞাদিট্ঠিআদিকে সঙ্কপ্পেতি। পণিধি পত্থনা, সা পন তথা তথা চিত্তস্স ঠপনৰসেন হোতীতি আহ ‘‘চিত্তট্ঠপন’’ন্তি। তেনাহ ‘‘সা পনেসা’’তিআদি। এতেতি হীনপচ্চযা সঞ্ঞাদিট্ঠিৰিতক্কচেতনা পত্থনা পণিধিসঙ্খাতা হীনা ধম্মা। হীনো নাম হীনধম্মসমাযোগতো। সব্বপদানীতি ‘‘পঞ্ঞপেতী’’তিআদীনি পদানি যোজেতব্বানি হীনসদ্দেন মজ্ঝিমুত্তমট্ঠানন্তরস্স অসম্ভৰতো। উপপজ্জনং ‘‘উপপত্তী’’তি আহ ‘‘দ্ৰে উপপত্তিযো পটিলাভো চ নিব্বত্তি চা’’তি। তত্থ হীনকুলাদীতি আদি-সদ্দেন হীনরূপভোগপরিসাদীনং সঙ্গহো। হীনত্তিকৰসেনাতি হীনত্তিকে ৰুত্তত্তিকপদৰসেনাতি অধিপ্পাযো। চিত্তুপ্পাদক্খণেতি ইদং হীনত্তিকপরিযাপন্নানং চিত্তুপ্পাদানং ৰসেন তত্থ তত্থ লদ্ধত্তা ৰুত্তং। পঞ্চসু নীচকুলেসূতি চণ্ডালৰেননেসাদরথকারপুক্কুসকুলেসু। দ্ৰাদসঅকুসলচিত্তুপ্পাদানং পন যো কোচি পটিলাভো হীনোতি যোজনা। সেসদ্ৰযেপি এসেৰ নযো। ইমস্মিং ঠানেতি ‘‘যাযং, ভন্তে, দিট্ঠী’’তিআদিনা আগতে ইমস্মিং ঠানে। ‘‘ধাতুং, ভিক্খৰে, পটিচ্চ উপ্পজ্জতী’’তিআদিনা আগতত্তা নিব্বত্তিযেৰ অধিপ্পেতা, ন পটিলাভো।
‘‘Mahatī’’ti ettha mahāsaddo ‘‘mahājano’’tiādīsu viya bahuatthavācakoti daṭṭhabbo. Avijjāpi hīnahīnatarahīnatamādibhedena bahupakārā. Tassāti diṭṭhiyā. Kasmā panettha ‘‘yadidaṃ avijjā dhātū’’ti avijjaṃ uddharitvā ‘‘hīnaṃ dhātuṃ paṭiccā’’ti ajjhāsayadhātu niddiṭṭhāti? Na kho panetaṃ evaṃ daṭṭhabbaṃ, ‘‘aññaṃ uddharitvā aññaṃ niddiṭṭhā’’ti, yato avijjāsīsena ajjhāsayadhātu eva gahitā. Avijjāgahito hi purisapuggalo diṭṭhajjhāsayo hīnādibhedaṃ avijjādhātuṃ nissāya tato saññādiṭṭhiādike saṅkappeti. Paṇidhi patthanā, sā pana tathā tathā cittassa ṭhapanavasena hotīti āha ‘‘cittaṭṭhapana’’nti. Tenāha ‘‘sā panesā’’tiādi. Eteti hīnapaccayā saññādiṭṭhivitakkacetanā patthanā paṇidhisaṅkhātā hīnā dhammā. Hīno nāma hīnadhammasamāyogato. Sabbapadānīti ‘‘paññapetī’’tiādīni padāni yojetabbāni hīnasaddena majjhimuttamaṭṭhānantarassa asambhavato. Upapajjanaṃ ‘‘upapattī’’ti āha ‘‘dve upapattiyo paṭilābho ca nibbatti cā’’ti. Tattha hīnakulādīti ādi-saddena hīnarūpabhogaparisādīnaṃ saṅgaho. Hīnattikavasenāti hīnattike vuttattikapadavasenāti adhippāyo. Cittuppādakkhaṇeti idaṃ hīnattikapariyāpannānaṃ cittuppādānaṃ vasena tattha tattha laddhattā vuttaṃ. Pañcasu nīcakulesūti caṇḍālavenanesādarathakārapukkusakulesu. Dvādasaakusalacittuppādānaṃ pana yo koci paṭilābho hīnoti yojanā. Sesadvayepi eseva nayo. Imasmiṃ ṭhāneti ‘‘yāyaṃ, bhante, diṭṭhī’’tiādinā āgate imasmiṃ ṭhāne. ‘‘Dhātuṃ, bhikkhave, paṭicca uppajjatī’’tiādinā āgatattā nibbattiyeva adhippetā, na paṭilābho.
গিঞ্জকাৰসথসুত্তৰণ্ণনা নিট্ঠিতা।
Giñjakāvasathasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৩. গিঞ্জকাৰসথসুত্তং • 3. Giñjakāvasathasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. গিঞ্জকাৰসথসুত্তৰণ্ণনা • 3. Giñjakāvasathasuttavaṇṇanā
