| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༡༠. གིརིམཱནནྡསུཏྟཾ
10. Girimānandasuttaṃ
༦༠. ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཨཱཡསྨཱ གིརིམཱནནྡོ ཨཱབཱདྷིཀོ ཧོཏི དུཀྑིཏོ བཱལ༹ྷགིལཱནོ། ཨཐ ཁོ ཨཱཡསྨཱ ཨཱནནྡོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ ཨཱནནྡོ བྷགཝནྟཾ ཨེཏདཝོཙ –
60. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā girimānando ābādhiko hoti dukkhito bāḷhagilāno. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca –
‘‘ཨཱཡསྨཱ, བྷནྟེ, གིརིམཱནནྡོ ཨཱབཱདྷིཀོ ཧོཏི དུཀྑིཏོ བཱལ༹ྷགིལཱནོ ། སཱདྷུ, བྷནྟེ, བྷགཝཱ ཡེནཱཡསྨཱ གིརིམཱནནྡོ ཏེནུཔསངྐམཏུ ཨནུཀམྤཾ ཨུཔཱདཱཡཱ’’ཏི། ‘‘སཙེ ཁོ ཏྭཾ, ཨཱནནྡ, གིརིམཱནནྡསྶ བྷིཀྑུནོ དས སཉྙཱ བྷཱསེཡྻཱསི, ཋཱནཾ ཁོ པནེཏཾ ཝིཛྫཏི ཡཾ གིརིམཱནནྡསྶ བྷིཀྑུནོ དས སཉྙཱ སུཏྭཱ སོ ཨཱབཱདྷོ ཋཱནསོ པཊིཔྤསྶམྦྷེཡྻ།
‘‘Āyasmā, bhante, girimānando ābādhiko hoti dukkhito bāḷhagilāno . Sādhu, bhante, bhagavā yenāyasmā girimānando tenupasaṅkamatu anukampaṃ upādāyā’’ti. ‘‘Sace kho tvaṃ, ānanda, girimānandassa bhikkhuno dasa saññā bhāseyyāsi, ṭhānaṃ kho panetaṃ vijjati yaṃ girimānandassa bhikkhuno dasa saññā sutvā so ābādho ṭhānaso paṭippassambheyya.
‘‘ཀཏམཱ དས? ཨནིཙྩསཉྙཱ , ཨནཏྟསཉྙཱ, ཨསུབྷསཉྙཱ, ཨཱདཱིནཝསཉྙཱ, པཧཱནསཉྙཱ, ཝིརཱགསཉྙཱ, ནིརོདྷསཉྙཱ, སབྦལོཀེ ཨནབྷིརཏསཉྙཱ 1, སབྦསངྑཱརེསུ ཨནིཙྪཱསཉྙཱ, ཨཱནཱཔཱནསྶཏི།
‘‘Katamā dasa? Aniccasaññā , anattasaññā, asubhasaññā, ādīnavasaññā, pahānasaññā, virāgasaññā, nirodhasaññā, sabbaloke anabhiratasaññā 2, sabbasaṅkhāresu anicchāsaññā, ānāpānassati.
‘‘ཀཏམཱ ཙཱནནྡ, ཨནིཙྩསཉྙཱ? ཨིདྷཱནནྡ, བྷིཀྑུ ཨརཉྙགཏོ ཝཱ རུཀྑམཱུལགཏོ ཝཱ སུཉྙཱགཱརགཏོ ཝཱ ཨིཏི པཊིསཉྩིཀྑཏི – ‘རཱུཔཾ ཨནིཙྩཾ, ཝེདནཱ ཨནིཙྩཱ , སཉྙཱ ཨནིཙྩཱ , སངྑཱརཱ ཨནིཙྩཱ, ཝིཉྙཱཎཾ ཨནིཙྩ’ནྟི། ཨིཏི ཨིམེསུ པཉྩསུ ཨུཔཱདཱནཀྑནྡྷེསུ ཨནིཙྩཱནུཔསྶཱི ཝིཧརཏི། ཨཡཾ ཝུཙྩཏཱནནྡ, ཨནིཙྩསཉྙཱ།
‘‘Katamā cānanda, aniccasaññā? Idhānanda, bhikkhu araññagato vā rukkhamūlagato vā suññāgāragato vā iti paṭisañcikkhati – ‘rūpaṃ aniccaṃ, vedanā aniccā , saññā aniccā , saṅkhārā aniccā, viññāṇaṃ anicca’nti. Iti imesu pañcasu upādānakkhandhesu aniccānupassī viharati. Ayaṃ vuccatānanda, aniccasaññā.
‘‘ཀཏམཱ ཙཱནནྡ, ཨནཏྟསཉྙཱ? ཨིདྷཱནནྡ, བྷིཀྑུ ཨརཉྙགཏོ ཝཱ རུཀྑམཱུལགཏོ ཝཱ སུཉྙཱགཱརགཏོ ཝཱ ཨིཏི པཊིསཉྩིཀྑཏི – ‘ཙཀྑུ ཨནཏྟཱ, རཱུཔཱ ཨནཏྟཱ, སོཏཾ ཨནཏྟཱ, སདྡཱ ཨནཏྟཱ, གྷཱནཾ ཨནཏྟཱ, གནྡྷཱ ཨནཏྟཱ, ཛིཝ྄ཧཱ ཨནཏྟཱ, རསཱ ཨནཏྟཱ, ཀཱཡཱ ཨནཏྟཱ, ཕོཊྛབྦཱ ཨནཏྟཱ, མནོ ཨནཏྟཱ, དྷམྨཱ ཨནཏྟཱ’ཏི། ཨིཏི ཨིམེསུ ཚསུ ཨཛ྄ཛྷཏྟིཀབཱཧིརེསུ ཨཱཡཏནེསུ ཨནཏྟཱནུཔསྶཱི ཝིཧརཏི། ཨཡཾ ཝུཙྩཏཱནནྡ, ཨནཏྟསཉྙཱ།
‘‘Katamā cānanda, anattasaññā? Idhānanda, bhikkhu araññagato vā rukkhamūlagato vā suññāgāragato vā iti paṭisañcikkhati – ‘cakkhu anattā, rūpā anattā, sotaṃ anattā, saddā anattā, ghānaṃ anattā, gandhā anattā, jivhā anattā, rasā anattā, kāyā anattā, phoṭṭhabbā anattā, mano anattā, dhammā anattā’ti. Iti imesu chasu ajjhattikabāhiresu āyatanesu anattānupassī viharati. Ayaṃ vuccatānanda, anattasaññā.
‘‘ཀཏམཱ ཙཱནནྡ, ཨསུབྷསཉྙཱ? ཨིདྷཱནནྡ, བྷིཀྑུ ཨིམམེཝ ཀཱཡཾ ཨུདྡྷཾ པཱདཏལཱ ཨདྷོ ཀེསམཏྠཀཱ ཏཙཔརིཡནྟཾ པཱུརཾ ནཱནཱཔྤཀཱརསྶ ཨསུཙིནོ པཙྩཝེཀྑཏི – ‘ཨཏྠི ཨིམསྨིཾ ཀཱཡེ ཀེསཱ ལོམཱ ནཁཱ དནྟཱ ཏཙོ མཾསཾ ནྷཱརུ ཨཊྛི ཨཊྛིམིཉྫཾ ཝཀྐཾ ཧདཡཾ ཡཀནཾ ཀིལོམཀཾ པིཧཀཾ པཔྥཱསཾ ཨནྟཾ ཨནྟགུཎཾ ཨུདརིཡཾ ཀརཱིསཾ པིཏྟཾ སེམྷཾ པུབྦོ ལོཧིཏཾ སེདོ མེདོ ཨསྶུ ཝསཱ ཁེལོ༹ སིངྒྷཱཎིཀཱ ལསིཀཱ མུཏྟ’ནྟི། ཨིཏི ཨིམསྨིཾ ཀཱཡེ ཨསུབྷཱནུཔསྶཱི ཝིཧརཏི། ཨཡཾ ཝུཙྩཏཱནནྡ, ཨསུབྷསཉྙཱ།
‘‘Katamā cānanda, asubhasaññā? Idhānanda, bhikkhu imameva kāyaṃ uddhaṃ pādatalā adho kesamatthakā tacapariyantaṃ pūraṃ nānāppakārassa asucino paccavekkhati – ‘atthi imasmiṃ kāye kesā lomā nakhā dantā taco maṃsaṃ nhāru aṭṭhi aṭṭhimiñjaṃ vakkaṃ hadayaṃ yakanaṃ kilomakaṃ pihakaṃ papphāsaṃ antaṃ antaguṇaṃ udariyaṃ karīsaṃ pittaṃ semhaṃ pubbo lohitaṃ sedo medo assu vasā kheḷo siṅghāṇikā lasikā mutta’nti. Iti imasmiṃ kāye asubhānupassī viharati. Ayaṃ vuccatānanda, asubhasaññā.
‘‘ཀཏམཱ ཙཱནནྡ, ཨཱདཱིནཝསཉྙཱ? ཨིདྷཱནནྡ, བྷིཀྑུ ཨརཉྙགཏོ ཝཱ རུཀྑམཱུལགཏོ ཝཱ སུཉྙཱགཱརགཏོ ཝཱ ཨིཏི པཊིསཉྩིཀྑཏི – ‘བཧུདུཀྑོ ཁོ ཨཡཾ ཀཱཡོ བཧུཨཱདཱིནཝོ? ཨིཏི ཨིམསྨིཾ ཀཱཡེ ཝིཝིདྷཱ ཨཱབཱདྷཱ ཨུཔྤཛྫནྟི, སེཡྻཐིདཾ – ཙཀྑུརོགོ སོཏརོགོ གྷཱནརོགོ ཛིཝ྄ཧཱརོགོ ཀཱཡརོགོ སཱིསརོགོ ཀཎྞརོགོ མུཁརོགོ དནྟརོགོ ཨོཊྛརོགོ ཀཱསོ སཱསོ པིནཱསོ ཌཱཧོ 3 ཛརོ ཀུཙྪིརོགོ མུཙྪཱ པཀྑནྡིཀཱ སཱུལཱ ཝིསཱུཙིཀཱ ཀུཊྛཾ གཎྜོ ཀིལཱསོ སོསོ ཨཔམཱརོ དདྡུ ཀཎྜུ ཀཙྪུ ནཁསཱ ཝིཏཙྪིཀཱ ལོཧིཏཾ པིཏྟཾ 4 མདྷུམེཧོ ཨཾསཱ པིལ༹ཀཱ བྷགནྡལཱ པིཏྟསམུཊྛཱནཱ ཨཱབཱདྷཱ སེམྷསམུཊྛཱནཱ ཨཱབཱདྷཱ ཝཱཏསམུཊྛཱནཱ ཨཱབཱདྷཱ སནྣིཔཱཏིཀཱ ཨཱབཱདྷཱ ཨུཏུཔརིཎཱམཛཱ ཨཱབཱདྷཱ ཝིསམཔརིཧཱརཛཱ ཨཱབཱདྷཱ ཨོཔཀྐམིཀཱ ཨཱབཱདྷཱ ཀམྨཝིཔཱཀཛཱ ཨཱབཱདྷཱ སཱིཏཾ ཨུཎྷཾ ཛིགྷཙྪཱ པིཔཱསཱ ཨུཙྩཱརོ པསྶཱཝོ’ཏི། ཨིཏི ཨིམསྨིཾ ཀཱཡེ ཨཱདཱིནཝཱནུཔསྶཱི ཝིཧརཏི། ཨཡཾ ཝུཙྩཏཱནནྡ, ཨཱདཱིནཝསཉྙཱ།
‘‘Katamā cānanda, ādīnavasaññā? Idhānanda, bhikkhu araññagato vā rukkhamūlagato vā suññāgāragato vā iti paṭisañcikkhati – ‘bahudukkho kho ayaṃ kāyo bahuādīnavo? Iti imasmiṃ kāye vividhā ābādhā uppajjanti, seyyathidaṃ – cakkhurogo sotarogo ghānarogo jivhārogo kāyarogo sīsarogo kaṇṇarogo mukharogo dantarogo oṭṭharogo kāso sāso pināso ḍāho 5 jaro kucchirogo mucchā pakkhandikā sūlā visūcikā kuṭṭhaṃ gaṇḍo kilāso soso apamāro daddu kaṇḍu kacchu nakhasā vitacchikā lohitaṃ pittaṃ 6 madhumeho aṃsā piḷakā bhagandalā pittasamuṭṭhānā ābādhā semhasamuṭṭhānā ābādhā vātasamuṭṭhānā ābādhā sannipātikā ābādhā utupariṇāmajā ābādhā visamaparihārajā ābādhā opakkamikā ābādhā kammavipākajā ābādhā sītaṃ uṇhaṃ jighacchā pipāsā uccāro passāvo’ti. Iti imasmiṃ kāye ādīnavānupassī viharati. Ayaṃ vuccatānanda, ādīnavasaññā.
‘‘ཀཏམཱ ཙཱནནྡ, པཧཱནསཉྙཱ? ཨིདྷཱནནྡ, བྷིཀྑུ ཨུཔྤནྣཾ ཀཱམཝིཏཀྐཾ ནཱདྷིཝཱསེཏི, པཛཧཏི , ཝིནོདེཏི, བྱནྟཱིཀརོཏི, ཨནབྷཱཝཾ གམེཏི། ཨུཔྤནྣཾ བྱཱཔཱདཝིཏཀྐཾ ནཱདྷིཝཱསེཏི, པཛཧཏི, ཝིནོདེཏི, བྱནྟཱིཀརོཏི, ཨནབྷཱཝཾ གམེཏི། ཨུཔྤནྣཾ ཝིཧིཾསཱཝིཏཀྐཾ ནཱདྷིཝཱསེཏི, པཛཧཏི, ཝིནོདེཏི, བྱནྟཱིཀརོཏི, ཨནབྷཱཝཾ གམེཏི། ཨུཔྤནྣུཔྤནྣེ པཱཔཀེ ཨཀུསལེ དྷམྨེ ནཱདྷིཝཱསེཏི, པཛཧཏི, ཝིནོདེཏི, བྱནྟཱིཀརོཏི, ཨནབྷཱཝཾ གམེཏི། ཨཡཾ ཝུཙྩཏཱནནྡ, པཧཱནསཉྙཱ།
‘‘Katamā cānanda, pahānasaññā? Idhānanda, bhikkhu uppannaṃ kāmavitakkaṃ nādhivāseti, pajahati , vinodeti, byantīkaroti, anabhāvaṃ gameti. Uppannaṃ byāpādavitakkaṃ nādhivāseti, pajahati, vinodeti, byantīkaroti, anabhāvaṃ gameti. Uppannaṃ vihiṃsāvitakkaṃ nādhivāseti, pajahati, vinodeti, byantīkaroti, anabhāvaṃ gameti. Uppannuppanne pāpake akusale dhamme nādhivāseti, pajahati, vinodeti, byantīkaroti, anabhāvaṃ gameti. Ayaṃ vuccatānanda, pahānasaññā.
‘‘ཀཏམཱ ཙཱནནྡ, ཝིརཱགསཉྙཱ? ཨིདྷཱནནྡ, བྷིཀྑུ ཨརཉྙགཏོ ཝཱ རུཀྑམཱུལགཏོ ཝཱ སུཉྙཱགཱརགཏོ ཝཱ ཨིཏི པཊིསཉྩིཀྑཏི – ‘ཨེཏཾ སནྟཾ ཨེཏཾ པཎཱིཏཾ ཡདིདཾ སབྦསངྑཱརསམཐོ སབྦཱུཔདྷིཔྤཊིནིསྶགྒོ ཏཎྷཱཀྑཡོ ཝིརཱགོ ནིབྦཱན’ནྟི། ཨཡཾ ཝུཙྩཏཱནནྡ, ཝིརཱགསཉྙཱ།
‘‘Katamā cānanda, virāgasaññā? Idhānanda, bhikkhu araññagato vā rukkhamūlagato vā suññāgāragato vā iti paṭisañcikkhati – ‘etaṃ santaṃ etaṃ paṇītaṃ yadidaṃ sabbasaṅkhārasamatho sabbūpadhippaṭinissaggo taṇhākkhayo virāgo nibbāna’nti. Ayaṃ vuccatānanda, virāgasaññā.
‘‘ཀཏམཱ ཙཱནནྡ, ནིརོདྷསཉྙཱ? ཨིདྷཱནནྡ, བྷིཀྑུ ཨརཉྙགཏོ ཝཱ རུཀྑམཱུལགཏོ ཝཱ སུཉྙཱགཱརགཏོ ཝཱ ཨིཏི པཊིསཉྩིཀྑཏི – ‘ཨེཏཾ སནྟཾ ཨེཏཾ པཎཱིཏཾ ཡདིདཾ སབྦསངྑཱརསམཐོ སབྦཱུཔདྷིཔྤཊིནིསྶགྒོ ཏཎྷཱཀྑཡོ ནིརོདྷོ ནིབྦཱན’ནྟི། ཨཡཾ ཝུཙྩཏཱནནྡ, ནིརོདྷསཉྙཱ།
‘‘Katamā cānanda, nirodhasaññā? Idhānanda, bhikkhu araññagato vā rukkhamūlagato vā suññāgāragato vā iti paṭisañcikkhati – ‘etaṃ santaṃ etaṃ paṇītaṃ yadidaṃ sabbasaṅkhārasamatho sabbūpadhippaṭinissaggo taṇhākkhayo nirodho nibbāna’nti. Ayaṃ vuccatānanda, nirodhasaññā.
‘‘ཀཏམཱ ཙཱནནྡ, སབྦལོཀེ ཨནབྷིརཏསཉྙཱ? ཨིདྷཱནནྡ, བྷིཀྑུ ཡེ ལོཀེ ཨུཔཱདཱནཱ ཙེཏསོ ཨདྷིཊྛཱནཱབྷིནིཝེསཱནུསཡཱ, ཏེ པཛཧནྟོ ཝིཧརཏི ཨནུཔཱདིཡནྟོ། ཨཡཾ ཝུཙྩཏཱནནྡ, སབྦལོཀེ ཨནབྷིརཏསཉྙཱ།
‘‘Katamā cānanda, sabbaloke anabhiratasaññā? Idhānanda, bhikkhu ye loke upādānā cetaso adhiṭṭhānābhinivesānusayā, te pajahanto viharati anupādiyanto. Ayaṃ vuccatānanda, sabbaloke anabhiratasaññā.
‘‘ཀཏམཱ ཙཱནནྡ, སབྦསངྑཱརེསུ ཨནིཙྪཱསཉྙཱ? ཨིདྷཱནནྡ, བྷིཀྑུ སབྦསངྑཱརེསུ ཨཊྚཱིཡཏི ཧརཱཡཏི ཛིགུཙྪཏི། ཨཡཾ ཝུཙྩཏཱནནྡ, སབྦསངྑཱརེསུ ཨནིཙྪཱསཉྙཱ།
‘‘Katamā cānanda, sabbasaṅkhāresu anicchāsaññā? Idhānanda, bhikkhu sabbasaṅkhāresu aṭṭīyati harāyati jigucchati. Ayaṃ vuccatānanda, sabbasaṅkhāresu anicchāsaññā.
‘‘ཀཏམཱ ཙཱནནྡ, ཨཱནཱཔཱནསྶཏི? ཨིདྷཱནནྡ, བྷིཀྑུ ཨརཉྙགཏོ ཝཱ རུཀྑམཱུལགཏོ ཝཱ སུཉྙཱགཱརགཏོ ཝཱ ནིསཱིདཏི པལླངྐཾ ཨཱབྷུཛིཏྭཱ ཨུཛུཾ ཀཱཡཾ པཎིདྷཱཡ པརིམུཁཾ སཏིཾ ཨུཔཊྛཔེཏྭཱ། སོ སཏོཝ ཨསྶསཏི སཏོཝ པསྶསཏི། དཱིགྷཾ ཝཱ ཨསྶསནྟོ ‘དཱིགྷཾ ཨསྶསཱམཱི’ཏི པཛཱནཱཏི། དཱིགྷཾ ཝཱ པསྶསནྟོ ‘དཱིགྷཾ པསྶསཱམཱི’ཏི པཛཱནཱཏི། རསྶཾ ཝཱ ཨསྶསནྟོ ‘རསྶཾ ཨསྶསཱམཱི’ཏི པཛཱནཱཏི། རསྶཾ ཝཱ པསྶསནྟོ ‘རསྶཾ པསྶསཱམཱི’ཏི པཛཱནཱཏི། ‘སབྦཀཱཡཔཊིསཾཝེདཱི ཨསྶསིསྶཱམཱི’ཏི སིཀྑཏི། ‘སབྦཀཱཡཔཊིསཾཝེདཱི པསྶསིསྶཱམཱི’ཏི སིཀྑཏི། ‘པསྶམྦྷཡཾ ཀཱཡསངྑཱརཾ ཨསྶསིསྶཱམཱི’ཏི སིཀྑཏི། ‘པསྶམྦྷཡཾ ཀཱཡསངྑཱརཾ པསྶསིསྶཱམཱི’ཏི སིཀྑཏི། ‘པཱིཏིཔཊིསཾཝེདཱི ཨསྶསིསྶཱམཱི’ཏི སིཀྑཏི། ‘པཱིཏིཔཊིསཾཝེདཱི པསྶསིསྶཱམཱི’ཏི སིཀྑཏི། ‘སུཁཔཊིསཾཝེདཱི ཨསྶསིསྶཱམཱི’ཏི སིཀྑཏི། ‘སུཁཔཊིསཾཝེདཱི པསྶསིསྶཱམཱི’ཏི སིཀྑཏི། ‘ཙིཏྟསངྑཱརཔཊིསཾཝེདཱི ཨསྶསིསྶཱམཱི’ཏི སིཀྑཏི། ‘ཙིཏྟསངྑཱརཔཊིསཾཝེདཱི པསྶསིསྶཱམཱི’ཏི སིཀྑཏི། ‘པསྶམྦྷཡཾ ཙིཏྟསངྑཱརཾ ཨསྶསིསྶཱམཱི’ཏི སིཀྑཏི། ‘པསྶམྦྷཡཾ ཙིཏྟསངྑཱརཾ པསྶསིསྶཱམཱི’ཏི སིཀྑཏི། ‘ཙིཏྟཔཊིསཾཝེདཱི ཨསྶསིསྶཱམཱི’ཏི སིཀྑཏི། ‘ཙིཏྟཔཊིསཾཝེདཱི པསྶསིསྶཱམཱི’ཏི སིཀྑཏི ། ཨབྷིཔྤམོདཡཾ ཙིཏྟཾ…པེ॰… སམཱདཧཾ ཙིཏྟཾ…པེ॰… ཝིམོཙཡཾ ཙིཏྟཾ…པེ॰… ཨནིཙྩཱནུཔསྶཱི…པེ॰… ཝིརཱགཱནུཔསྶཱི…པེ॰… ནིརོདྷཱནུཔསྶཱི…པེ॰… ‘པཊིནིསྶགྒཱནུཔསྶཱི ཨསྶསིསྶཱམཱི’ཏི སིཀྑཏི། ‘པཊིནིསྶགྒཱནུཔསྶཱི པསྶསིསྶཱམཱི’ཏི སིཀྑཏི། ཨཡཾ ཝུཙྩཏཱནནྡ, ཨཱནཱཔཱནསྶཏི།
‘‘Katamā cānanda, ānāpānassati? Idhānanda, bhikkhu araññagato vā rukkhamūlagato vā suññāgāragato vā nisīdati pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā. So satova assasati satova passasati. Dīghaṃ vā assasanto ‘dīghaṃ assasāmī’ti pajānāti. Dīghaṃ vā passasanto ‘dīghaṃ passasāmī’ti pajānāti. Rassaṃ vā assasanto ‘rassaṃ assasāmī’ti pajānāti. Rassaṃ vā passasanto ‘rassaṃ passasāmī’ti pajānāti. ‘Sabbakāyapaṭisaṃvedī assasissāmī’ti sikkhati. ‘Sabbakāyapaṭisaṃvedī passasissāmī’ti sikkhati. ‘Passambhayaṃ kāyasaṅkhāraṃ assasissāmī’ti sikkhati. ‘Passambhayaṃ kāyasaṅkhāraṃ passasissāmī’ti sikkhati. ‘Pītipaṭisaṃvedī assasissāmī’ti sikkhati. ‘Pītipaṭisaṃvedī passasissāmī’ti sikkhati. ‘Sukhapaṭisaṃvedī assasissāmī’ti sikkhati. ‘Sukhapaṭisaṃvedī passasissāmī’ti sikkhati. ‘Cittasaṅkhārapaṭisaṃvedī assasissāmī’ti sikkhati. ‘Cittasaṅkhārapaṭisaṃvedī passasissāmī’ti sikkhati. ‘Passambhayaṃ cittasaṅkhāraṃ assasissāmī’ti sikkhati. ‘Passambhayaṃ cittasaṅkhāraṃ passasissāmī’ti sikkhati. ‘Cittapaṭisaṃvedī assasissāmī’ti sikkhati. ‘Cittapaṭisaṃvedī passasissāmī’ti sikkhati . Abhippamodayaṃ cittaṃ…pe… samādahaṃ cittaṃ…pe… vimocayaṃ cittaṃ…pe… aniccānupassī…pe… virāgānupassī…pe… nirodhānupassī…pe… ‘paṭinissaggānupassī assasissāmī’ti sikkhati. ‘Paṭinissaggānupassī passasissāmī’ti sikkhati. Ayaṃ vuccatānanda, ānāpānassati.
‘‘སཙེ ཁོ ཏྭཾ, ཨཱནནྡ, གིརིམཱནནྡསྶ བྷིཀྑུནོ ཨིམཱ དས སཉྙཱ བྷཱསེཡྻཱསི, ཋཱནཾ ཁོ པནེཏཾ ཝིཛྫཏི ཡཾ གིརིམཱནནྡསྶ བྷིཀྑུནོ ཨིམཱ དས སཉྙཱ སུཏྭཱ སོ ཨཱབཱདྷོ ཋཱནསོ པཊིཔྤསྶམྦྷེཡྻཱ’’ཏི།
‘‘Sace kho tvaṃ, ānanda, girimānandassa bhikkhuno imā dasa saññā bhāseyyāsi, ṭhānaṃ kho panetaṃ vijjati yaṃ girimānandassa bhikkhuno imā dasa saññā sutvā so ābādho ṭhānaso paṭippassambheyyā’’ti.
ཨཐ ཁོ ཨཱཡསྨཱ ཨཱནནྡོ བྷགཝཏོ སནྟིཀེ ཨིམཱ དས སཉྙཱ ཨུགྒཧེཏྭཱ ཡེནཱཡསྨཱ གིརིམཱནནྡོ ཏེནུཔསངྐམི; ཨུཔསངྐམིཏྭཱ ཨཱཡསྨཏོ གིརིམཱནནྡསྶ ཨིམཱ དས སཉྙཱ ཨབྷཱསི། ཨཐ ཁོ ཨཱཡསྨཏོ གིརིམཱནནྡསྶ དས སཉྙཱ སུཏྭཱ སོ ཨཱབཱདྷོ ཋཱནསོ པཊིཔྤསྶམྦྷི། ཝུཊྛཧི ཙཱཡསྨཱ གིརིམཱནནྡོ ཏམྷཱ ཨཱབཱདྷཱ། ཏཐཱ པཧཱིནོ ཙ པནཱཡསྨཏོ གིརིམཱནནྡསྶ སོ ཨཱབཱདྷོ ཨཧོསཱི’’ཏི། དསམཾ།
Atha kho āyasmā ānando bhagavato santike imā dasa saññā uggahetvā yenāyasmā girimānando tenupasaṅkami; upasaṅkamitvā āyasmato girimānandassa imā dasa saññā abhāsi. Atha kho āyasmato girimānandassa dasa saññā sutvā so ābādho ṭhānaso paṭippassambhi. Vuṭṭhahi cāyasmā girimānando tamhā ābādhā. Tathā pahīno ca panāyasmato girimānandassa so ābādho ahosī’’ti. Dasamaṃ.
སཙིཏྟཝགྒོ པཋམོ།
Sacittavaggo paṭhamo.
ཏསྶུདྡཱནཾ –
Tassuddānaṃ –
སཙིཏྟཉྩ སཱརིཔུཏྟ, ཋིཏི ཙ སམཐེན ཙ།
Sacittañca sāriputta, ṭhiti ca samathena ca;
པརིཧཱནོ ཙ དྭེ སཉྙཱ, མཱུལཱ པབྦཛིཏཾ གིརཱིཏི༎
Parihāno ca dve saññā, mūlā pabbajitaṃ girīti.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡༠. གིརིམཱནནྡསུཏྟཝཎྞནཱ • 10. Girimānandasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༡༠. སཙིཏྟསུཏྟཱདིཝཎྞནཱ • 1-10. Sacittasuttādivaṇṇanā
