| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
7. கி³ரிமானந்த³த்தே²ரஅபதா³னவண்ணனா
7. Girimānandattheraapadānavaṇṇanā
ஸத்தமாபதா³னே ப⁴ரியா மே காலங்கதாதிஆதி³கங் ஆயஸ்மதோ கி³ரிமானந்த³த்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸுமேத⁴ஸ்ஸ ப⁴க³வதோ காலே குலகே³ஹே நிப்³ப³த்தோ வயப்பத்தோ க⁴ராவாஸங் ஸண்ட²பெத்வா வஸந்தோ அத்தனோ ப⁴ரியாய ச புத்தே ச காலங்கதே ஸோகஸல்லஸமப்பிதோ அரஞ்ஞங் பவிஸித்வா பவத்தப²லபோ⁴ஜனோ ருக்க²மூலே விஹாஸி. ததா³ ஸுமேதோ⁴ ப⁴க³வா தஸ்ஸானுகம்பாய தத்த² க³ந்த்வா த⁴ம்மங் தே³ஸெத்வா ஸோகஸல்லங் அப்³பூ³ள்ஹேஸி . ஸோ த⁴ம்மங் ஸுத்வா பஸன்னமானஸோ ஸுக³ந்த⁴புப்பே²ஹி ப⁴க³வந்தங் பூஜெத்வா பஞ்சபதிட்டி²தேன வந்தி³த்வா ஸிரஸி அஞ்ஜலிங் கத்வா அபி⁴த்த²வி.
Sattamāpadāne bhariyā me kālaṅkatātiādikaṃ āyasmato girimānandattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sumedhassa bhagavato kāle kulagehe nibbatto vayappatto gharāvāsaṃ saṇṭhapetvā vasanto attano bhariyāya ca putte ca kālaṅkate sokasallasamappito araññaṃ pavisitvā pavattaphalabhojano rukkhamūle vihāsi. Tadā sumedho bhagavā tassānukampāya tattha gantvā dhammaṃ desetvā sokasallaṃ abbūḷhesi . So dhammaṃ sutvā pasannamānaso sugandhapupphehi bhagavantaṃ pūjetvā pañcapatiṭṭhitena vanditvā sirasi añjaliṃ katvā abhitthavi.
ஸோ தேன புஞ்ஞேன தே³வமனுஸ்ஸேஸு ஸங்ஸரந்தோ உப⁴யத்த² ஸுக²ங் அனுப⁴வித்வா இமஸ்மிங் பு³த்³து⁴ப்பாதே³ ராஜக³ஹே பி³ம்பி³ஸாரரஞ்ஞோ புரோஹிதஸ்ஸ புத்தோ ஹுத்வா நிப்³ப³த்தி, கி³ரிமானந்தோ³திஸ்ஸ நாமங் அஹோஸி. ஸோ விஞ்ஞுதங் பத்வா ஸத்து² ராஜக³ஹாக³மனே பு³த்³தா⁴னுபா⁴வங் தி³ஸ்வா படிலத்³த⁴ஸத்³தோ⁴ பப்³ப³ஜித்வா ஸமணத⁴ம்மங் கரொந்தோ கதிபயங் தி³வஸங் கா³மகாவாஸே வஸித்வா ஸத்தா²ரங் வந்தி³துங் ராஜக³ஹங் அக³மாஸி. பி³ம்பி³ஸாரமஹாராஜா தஸ்ஸ ஆக³மனங் ஸுத்வா தங் உபஸங்கமித்வா ‘‘இதே⁴வ, ப⁴ந்தே, வஸத², அஹங் சதூஹி பச்சயேஹி உபட்ட²ஹாமீ’’தி ஸம்பவாரெத்வா க³தோபி ப³ஹுகிச்சத்தா தங் ந ஸரி. ‘‘தே²ரோ அப்³போ⁴காஸேயேவ வஸதீ’’தி. தே³வதா தே²ரஸ்ஸ தேமனப⁴யேன வஸ்ஸதா⁴ரங் வாரேஸுங். ராஜா அவஸ்ஸனகாரணங் உபதா⁴ரெத்வா ஞத்வா தே²ரஸ்ஸ குடிகங் காராபேஸி. தே²ரோ குடிகாயங் வஸந்தோ ஸேனாஸனஸப்பாயலாபே⁴ன சித்தஸமாதா⁴னங் லபி⁴த்வா வீரியஸமதங் யோஜெத்வா விபஸ்ஸனங் உஸ்ஸுக்காபெத்வா அரஹத்தங் பாபுணி.
So tena puññena devamanussesu saṃsaranto ubhayattha sukhaṃ anubhavitvā imasmiṃ buddhuppāde rājagahe bimbisārarañño purohitassa putto hutvā nibbatti, girimānandotissa nāmaṃ ahosi. So viññutaṃ patvā satthu rājagahāgamane buddhānubhāvaṃ disvā paṭiladdhasaddho pabbajitvā samaṇadhammaṃ karonto katipayaṃ divasaṃ gāmakāvāse vasitvā satthāraṃ vandituṃ rājagahaṃ agamāsi. Bimbisāramahārājā tassa āgamanaṃ sutvā taṃ upasaṅkamitvā ‘‘idheva, bhante, vasatha, ahaṃ catūhi paccayehi upaṭṭhahāmī’’ti sampavāretvā gatopi bahukiccattā taṃ na sari. ‘‘Thero abbhokāseyeva vasatī’’ti. Devatā therassa temanabhayena vassadhāraṃ vāresuṃ. Rājā avassanakāraṇaṃ upadhāretvā ñatvā therassa kuṭikaṃ kārāpesi. Thero kuṭikāyaṃ vasanto senāsanasappāyalābhena cittasamādhānaṃ labhitvā vīriyasamataṃ yojetvā vipassanaṃ ussukkāpetvā arahattaṃ pāpuṇi.
419. ஸோ அரஹத்தங் பத்வா அத்தனோ புப்³ப³கம்மங் ஸரித்வா ஸஞ்ஜாதஸோமனஸ்ஸோ புப்³ப³சரிதாபதா³னங் பகாஸெந்தோ ப⁴ரியா மே காலங்கதாதிஆதி³மாஹ. தங் ப⁴க³வதோ நிவேத³னஞ்ச ப⁴க³வதா கதானுஸாஸனஞ்ச மக்³க³ங் ப²லாதி⁴க³மாபதா³னஞ்ச பாடா²னுஸாரேன ஸுவிஞ்ஞெய்யமேவாதி.
419. So arahattaṃ patvā attano pubbakammaṃ saritvā sañjātasomanasso pubbacaritāpadānaṃ pakāsento bhariyā me kālaṅkatātiādimāha. Taṃ bhagavato nivedanañca bhagavatā katānusāsanañca maggaṃ phalādhigamāpadānañca pāṭhānusārena suviññeyyamevāti.
கி³ரிமானந்த³த்தே²ரஅபதா³னவண்ணனா ஸமத்தா.
Girimānandattheraapadānavaṇṇanā samattā.
அட்ட²மனவமத³ஸமாபதா³னானி உத்தானத்தா²னேவாதி.
Aṭṭhamanavamadasamāpadānāni uttānatthānevāti.
சத்தாலீஸமவக்³க³வண்ணனா ஸமத்தா.
Cattālīsamavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 7. கி³ரிமானந்த³த்தே²ரஅபதா³னங் • 7. Girimānandattheraapadānaṃ
