| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၇. ဂိရိမာနန္ဒတ္ထေရအပဒာနဝဏ္ဏနာ
7. Girimānandattheraapadānavaṇṇanā
သတ္တမာပဒာနေ ဘရိယာ မေ ကာလင္ကတာတိအာဒိကံ အာယသ္မတော ဂိရိမာနန္ဒတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော သုမေဓသ္သ ဘဂဝတော ကာလေ ကုလဂေဟေ နိဗ္ဗတ္တော ဝယပ္ပတ္တော ဃရာဝာသံ သဏ္ဌပေတ္ဝာ ဝသန္တော အတ္တနော ဘရိယာယ စ ပုတ္တေ စ ကာလင္ကတေ သောကသလ္လသမပ္ပိတော အရညံ ပဝိသိတ္ဝာ ပဝတ္တဖလဘောဇနော ရုက္ခမူလေ ဝိဟာသိ။ တဒာ သုမေဓော ဘဂဝာ တသ္သာနုကမ္ပာယ တတ္ထ ဂန္တ္ဝာ ဓမ္မံ ဒေသေတ္ဝာ သောကသလ္လံ အဗ္ဗူဠ္ဟေသိ ။ သော ဓမ္မံ သုတ္ဝာ ပသန္နမာနသော သုဂန္ဓပုပ္ဖေဟိ ဘဂဝန္တံ ပူဇေတ္ဝာ ပဉ္စပတိဋ္ဌိတေန ဝန္ဒိတ္ဝာ သိရသိ အဉ္ဇလိံ ကတ္ဝာ အဘိတ္ထဝိ။
Sattamāpadāne bhariyā me kālaṅkatātiādikaṃ āyasmato girimānandattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sumedhassa bhagavato kāle kulagehe nibbatto vayappatto gharāvāsaṃ saṇṭhapetvā vasanto attano bhariyāya ca putte ca kālaṅkate sokasallasamappito araññaṃ pavisitvā pavattaphalabhojano rukkhamūle vihāsi. Tadā sumedho bhagavā tassānukampāya tattha gantvā dhammaṃ desetvā sokasallaṃ abbūḷhesi . So dhammaṃ sutvā pasannamānaso sugandhapupphehi bhagavantaṃ pūjetvā pañcapatiṭṭhitena vanditvā sirasi añjaliṃ katvā abhitthavi.
သော တေန ပုညေန ဒေဝမနုသ္သေသု သံသရန္တော ဥဘယတ္ထ သုခံ အနုဘဝိတ္ဝာ ဣမသ္မိံ ဗုဒ္ဓုပ္ပာဒေ ရာဇဂဟေ ဗိမ္ဗိသာရရညော ပုရောဟိတသ္သ ပုတ္တော ဟုတ္ဝာ နိဗ္ဗတ္တိ, ဂိရိမာနန္ဒောတိသ္သ နာမံ အဟောသိ။ သော ဝိညုတံ ပတ္ဝာ သတ္ထု ရာဇဂဟာဂမနေ ဗုဒ္ဓာနုဘာဝံ ဒိသ္ဝာ ပဋိလဒ္ဓသဒ္ဓော ပဗ္ဗဇိတ္ဝာ သမဏဓမ္မံ ကရောန္တော ကတိပယံ ဒိဝသံ ဂာမကာဝာသေ ဝသိတ္ဝာ သတ္ထာရံ ဝန္ဒိတုံ ရာဇဂဟံ အဂမာသိ။ ဗိမ္ဗိသာရမဟာရာဇာ တသ္သ အာဂမနံ သုတ္ဝာ တံ ဥပသင္ကမိတ္ဝာ ‘‘ဣဓေဝ, ဘန္တေ, ဝသထ, အဟံ စတူဟိ ပစ္စယေဟိ ဥပဋ္ဌဟာမီ’’တိ သမ္ပဝာရေတ္ဝာ ဂတောပိ ဗဟုကိစ္စတ္တာ တံ န သရိ။ ‘‘ထေရော အဗ္ဘောကာသေယေဝ ဝသတီ’’တိ။ ဒေဝတာ ထေရသ္သ တေမနဘယေန ဝသ္သဓာရံ ဝာရေသုံ။ ရာဇာ အဝသ္သနကာရဏံ ဥပဓာရေတ္ဝာ ဉတ္ဝာ ထေရသ္သ ကုဋိကံ ကာရာပေသိ။ ထေရော ကုဋိကာယံ ဝသန္တော သေနာသနသပ္ပာယလာဘေန စိတ္တသမာဓာနံ လဘိတ္ဝာ ဝီရိယသမတံ ယောဇေတ္ဝာ ဝိပသ္သနံ ဥသ္သုက္ကာပေတ္ဝာ အရဟတ္တံ ပာပုဏိ။
So tena puññena devamanussesu saṃsaranto ubhayattha sukhaṃ anubhavitvā imasmiṃ buddhuppāde rājagahe bimbisārarañño purohitassa putto hutvā nibbatti, girimānandotissa nāmaṃ ahosi. So viññutaṃ patvā satthu rājagahāgamane buddhānubhāvaṃ disvā paṭiladdhasaddho pabbajitvā samaṇadhammaṃ karonto katipayaṃ divasaṃ gāmakāvāse vasitvā satthāraṃ vandituṃ rājagahaṃ agamāsi. Bimbisāramahārājā tassa āgamanaṃ sutvā taṃ upasaṅkamitvā ‘‘idheva, bhante, vasatha, ahaṃ catūhi paccayehi upaṭṭhahāmī’’ti sampavāretvā gatopi bahukiccattā taṃ na sari. ‘‘Thero abbhokāseyeva vasatī’’ti. Devatā therassa temanabhayena vassadhāraṃ vāresuṃ. Rājā avassanakāraṇaṃ upadhāretvā ñatvā therassa kuṭikaṃ kārāpesi. Thero kuṭikāyaṃ vasanto senāsanasappāyalābhena cittasamādhānaṃ labhitvā vīriyasamataṃ yojetvā vipassanaṃ ussukkāpetvā arahattaṃ pāpuṇi.
၄၁၉. သော အရဟတ္တံ ပတ္ဝာ အတ္တနော ပုဗ္ဗကမ္မံ သရိတ္ဝာ သဉ္ဇာတသောမနသ္သော ပုဗ္ဗစရိတာပဒာနံ ပကာသေန္တော ဘရိယာ မေ ကာလင္ကတာတိအာဒိမာဟ။ တံ ဘဂဝတော နိဝေဒနဉ္စ ဘဂဝတာ ကတာနုသာသနဉ္စ မဂ္ဂံ ဖလာဓိဂမာပဒာနဉ္စ ပာဌာနုသာရေန သုဝိညေယ္ယမေဝာတိ။
419. So arahattaṃ patvā attano pubbakammaṃ saritvā sañjātasomanasso pubbacaritāpadānaṃ pakāsento bhariyā me kālaṅkatātiādimāha. Taṃ bhagavato nivedanañca bhagavatā katānusāsanañca maggaṃ phalādhigamāpadānañca pāṭhānusārena suviññeyyamevāti.
ဂိရိမာနန္ဒတ္ထေရအပဒာနဝဏ္ဏနာ သမတ္တာ။
Girimānandattheraapadānavaṇṇanā samattā.
အဋ္ဌမနဝမဒသမာပဒာနာနိ ဥတ္တာနတ္ထာနေဝာတိ။
Aṭṭhamanavamadasamāpadānāni uttānatthānevāti.
စတ္တာလီသမဝဂ္ဂဝဏ္ဏနာ သမတ္တာ။
Cattālīsamavaggavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၇. ဂိရိမာနန္ဒတ္ထေရအပဒာနံ • 7. Girimānandattheraapadānaṃ
