| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
16. கோ³சரனானத்தஞாணனித்³தே³ஸவண்ணனா
16. Gocaranānattañāṇaniddesavaṇṇanā
67. கோ³சரனானத்தஞாணனித்³தே³ஸே ரூபே ப³ஹித்³தா⁴ வவத்தே²தீதி அஜ்ஜ²த்ததோ ப³ஹித்³தா⁴பூ⁴தே ரூபாயதனத⁴ம்மே வவத்த²பேதீதி அத்தோ². அவிஜ்ஜாஸம்பூ⁴தாதிஆதி³ அத்தபா⁴வபரியாபன்னகம்மஜரூபத்தா வுத்தங். ஆஹாரோபி ஹி கம்மஜரூபஸ்ஸ உபத்த²ம்ப⁴கபச்சயோ ஹோதி. ஸத்³த³ஸ்ஸ பன உதுசித்தஸமுட்டா²னத்தா அவிஜ்ஜாஸம்பூ⁴தாதி³சதுக்கங் ந வுத்தங். பொ²ட்ட²ப்³பா³னங் ஸயங் மஹாபூ⁴தத்தா ‘‘சதுன்னங் மஹாபூ⁴தானங் உபாதா³யா’’தி ந வுத்தங். த⁴ம்மாதி செத்த² ப⁴வங்க³மனோஸம்பயுத்தா தயோ அரூபினோ க²ந்தா⁴, த⁴ம்மாயதனபரியாபன்னானி ஸுகு²மரூபானி ச கம்மஸமுட்டா²னானி, ஸப்³பா³னிபி ரூபாதீ³னி ச. அபிச யானி யானி யேன யேன ஸமுட்ட²ஹந்தி, தானி தானி தேன தேன வேதி³தப்³பா³னி. இதரதா² ஹி ஸகஸந்தானபரியாபன்னாபி ரூபாத³யோ த⁴ம்மா ஸப்³பே³ ந ஸங்க³ண்ஹெய்யுங். யஸ்மா அனிந்த்³ரியப³த்³த⁴ரூபாத³யோபி விபஸ்ஸனூபகா³, தஸ்மா தேஸங் கம்மஸம்பூ⁴தபதே³ன ஸங்க³ஹோ வேதி³தப்³போ³. தேபி ஹி ஸப்³ப³ஸத்தஸாதா⁴ரணகம்மபச்சயஉதுஸமுட்டா²னா. அஞ்ஞே பன ‘‘அனிந்த்³ரியப³த்³தா⁴ ரூபாத³யோ அவிபஸ்ஸனூபகா³’’தி வத³ந்தி. தங் பன –
67. Gocaranānattañāṇaniddese rūpe bahiddhā vavatthetīti ajjhattato bahiddhābhūte rūpāyatanadhamme vavatthapetīti attho. Avijjāsambhūtātiādi attabhāvapariyāpannakammajarūpattā vuttaṃ. Āhāropi hi kammajarūpassa upatthambhakapaccayo hoti. Saddassa pana utucittasamuṭṭhānattā avijjāsambhūtādicatukkaṃ na vuttaṃ. Phoṭṭhabbānaṃ sayaṃ mahābhūtattā ‘‘catunnaṃ mahābhūtānaṃ upādāyā’’ti na vuttaṃ. Dhammāti cettha bhavaṅgamanosampayuttā tayo arūpino khandhā, dhammāyatanapariyāpannāni sukhumarūpāni ca kammasamuṭṭhānāni, sabbānipi rūpādīni ca. Apica yāni yāni yena yena samuṭṭhahanti, tāni tāni tena tena veditabbāni. Itarathā hi sakasantānapariyāpannāpi rūpādayo dhammā sabbe na saṅgaṇheyyuṃ. Yasmā anindriyabaddharūpādayopi vipassanūpagā, tasmā tesaṃ kammasambhūtapadena saṅgaho veditabbo. Tepi hi sabbasattasādhāraṇakammapaccayautusamuṭṭhānā. Aññe pana ‘‘anindriyabaddhā rūpādayo avipassanūpagā’’ti vadanti. Taṃ pana –
‘‘ஸப்³பே³ ஸங்கா²ரா அனிச்சாதி, யதா³ பஞ்ஞாய பஸ்ஸதி;
‘‘Sabbe saṅkhārā aniccāti, yadā paññāya passati;
அத² நிப்³பி³ந்த³தி து³க்கே², ஏஸ மக்³கோ³ விஸுத்³தி⁴யா’’தி. (த⁴॰ ப॰ 277) –
Atha nibbindati dukkhe, esa maggo visuddhiyā’’ti. (dha. pa. 277) –
ஆதி³காய பாளியா விருஜ்ஜ²தி. வுத்தஞ்ச விஸுத்³தி⁴மக்³கே³ – ‘‘இதே⁴கச்சோ ஆதி³தோவ அஜ்ஜ²த்தஸங்கா²ரே அபி⁴னிவிஸித்வா விபஸ்ஸதி, யஸ்மா பன ந ஸுத்³த⁴அஜ்ஜ²த்தத³ஸ்ஸனமத்தேனேவ மக்³க³வுட்டா²னங் ஹோதி, ப³ஹித்³தா⁴பி த³ட்ட²ப்³ப³மேவ, தஸ்மா பரஸ்ஸ க²ந்தே⁴பி அனுபாதி³ன்னஸங்கா²ரேபி அனிச்சங் து³க்க²மனத்தாதி விபஸ்ஸதீ’’தி (விஸுத்³தி⁴॰ 2.784). தஸ்மா பரேஸங் சக்கா²தி³வவத்தா²னம்பி அனிந்த்³ரியப³த்³த⁴ரூபாதி³வவத்தா²னம்பி இச்சி²தப்³ப³மேவ, தஸ்மா தேபூ⁴மகஸங்கா²ரா அவிபஸ்ஸனூபகா³ நாம நத்தி².
Ādikāya pāḷiyā virujjhati. Vuttañca visuddhimagge – ‘‘idhekacco āditova ajjhattasaṅkhāre abhinivisitvā vipassati, yasmā pana na suddhaajjhattadassanamatteneva maggavuṭṭhānaṃ hoti, bahiddhāpi daṭṭhabbameva, tasmā parassa khandhepi anupādinnasaṅkhārepi aniccaṃ dukkhamanattāti vipassatī’’ti (visuddhi. 2.784). Tasmā paresaṃ cakkhādivavatthānampi anindriyabaddharūpādivavatthānampi icchitabbameva, tasmā tebhūmakasaṅkhārā avipassanūpagā nāma natthi.
கோ³சரனானத்தஞாணனித்³தே³ஸவண்ணனா நிட்டி²தா.
Gocaranānattañāṇaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 16. கோ³சரனானத்தஞாணனித்³தே³ஸோ • 16. Gocaranānattañāṇaniddeso
