| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
১৬. গোচরনানত্তঞাণনিদ্দেসো
16. Gocaranānattañāṇaniddeso
৬৭. কথং বহিদ্ধা ৰৰত্থানে পঞ্ঞা গোচরনানত্তে ঞাণং? কথং বহিদ্ধা ধম্মে ৰৰত্থেতি? রূপে বহিদ্ধা ৰৰত্থেতি, সদ্দে বহিদ্ধা ৰৰত্থেতি, গন্ধে বহিদ্ধা ৰৰত্থেতি, রসে বহিদ্ধা ৰৰত্থেতি, ফোট্ঠব্বে বহিদ্ধা ৰৰত্থেতি, ধম্মে বহিদ্ধা ৰৰত্থেতি ।
67. Kathaṃ bahiddhā vavatthāne paññā gocaranānatte ñāṇaṃ? Kathaṃ bahiddhā dhamme vavattheti? Rūpe bahiddhā vavattheti, sadde bahiddhā vavattheti, gandhe bahiddhā vavattheti, rase bahiddhā vavattheti, phoṭṭhabbe bahiddhā vavattheti, dhamme bahiddhā vavattheti .
কথং রূপে বহিদ্ধা ৰৰত্থেতি? রূপা অৰিজ্জাসম্ভূতাতি ৰৰত্থেতি রূপা তণ্হাসম্ভূতাতি ৰৰত্থেতি, রূপা কম্মসম্ভূতাতি ৰৰত্থেতি, রূপা আহারসম্ভূতাতি ৰৰত্থেতি, রূপা চতুন্নং মহাভূতানং উপাদাযাতি ৰৰত্থেতি, রূপা উপ্পন্নাতি ৰৰত্থেতি, রূপা সমুদাগতাতি ৰৰত্থেতি। রূপা অহুত্ৰা সম্ভূতা, হুত্ৰা ন ভৰিস্সন্তীতি ৰৰত্থেতি। রূপে অন্তৰন্ততো ৰৰত্থেতি, রূপা অদ্ধুৰা অসস্সতা ৰিপরিণামধম্মাতি ৰৰত্থেতি । রূপা অনিচ্চা সঙ্খতা পটিচ্চসমুপ্পন্না খযধম্মা ৰযধম্মা ৰিরাগধম্মা নিরোধধম্মাতি ৰৰত্থেতি। রূপে অনিচ্চতো ৰৰত্থেতি, নো নিচ্চতো; দুক্খতো ৰৰত্থেতি, নো সুখতো; অনত্ততো ৰৰত্থেতি, নো অত্ততো; নিব্বিন্দতি, নো নন্দতি ; ৰিরজ্জতি, নো রজ্জতি; নিরোধেতি, নো সমুদেতি; পটিনিস্সজ্জতি, নো আদিযতি। অনিচ্চতো ৰৰত্থেন্তো নিচ্চসঞ্ঞং পজহতি, দুক্খতো ৰৰত্থেন্তো সুখসঞ্ঞং পজহতি, অনত্ততো ৰৰত্থেন্তো অত্তসঞ্ঞং পজহতি, নিব্বিন্দন্তো নন্দিং পজহতি, ৰিরজ্জন্তো রাগং পজহতি, নিরোধেন্তো সমুদযং পজহতি, পটিনিস্সজ্জন্তো আদানং পজহতি। এৰং রূপে বহিদ্ধা ৰৰত্থেতি।
Kathaṃ rūpe bahiddhā vavattheti? Rūpā avijjāsambhūtāti vavattheti rūpā taṇhāsambhūtāti vavattheti, rūpā kammasambhūtāti vavattheti, rūpā āhārasambhūtāti vavattheti, rūpā catunnaṃ mahābhūtānaṃ upādāyāti vavattheti, rūpā uppannāti vavattheti, rūpā samudāgatāti vavattheti. Rūpā ahutvā sambhūtā, hutvā na bhavissantīti vavattheti. Rūpe antavantato vavattheti, rūpā addhuvā asassatā vipariṇāmadhammāti vavattheti . Rūpā aniccā saṅkhatā paṭiccasamuppannā khayadhammā vayadhammā virāgadhammā nirodhadhammāti vavattheti. Rūpe aniccato vavattheti, no niccato; dukkhato vavattheti, no sukhato; anattato vavattheti, no attato; nibbindati, no nandati ; virajjati, no rajjati; nirodheti, no samudeti; paṭinissajjati, no ādiyati. Aniccato vavatthento niccasaññaṃ pajahati, dukkhato vavatthento sukhasaññaṃ pajahati, anattato vavatthento attasaññaṃ pajahati, nibbindanto nandiṃ pajahati, virajjanto rāgaṃ pajahati, nirodhento samudayaṃ pajahati, paṭinissajjanto ādānaṃ pajahati. Evaṃ rūpe bahiddhā vavattheti.
কথং সদ্দে বহিদ্ধা ৰৰত্থেতি? সদ্দা অৰিজ্জাসম্ভূতাতি ৰৰত্থেতি…পে॰… সদ্দা চতুন্নং মহাভূতানং উপাদাযাতি ৰৰত্থেতি, সদ্দা উপ্পন্নাতি ৰৰত্থেতি, সদ্দা সমুদাগতাতি ৰৰত্থেতি। সদ্দা অহুত্ৰা সম্ভূতা, হুত্ৰা ন ভৰিস্সন্তীতি ৰৰত্থেতি। সদ্দে অন্তৰন্ততো ৰৰত্থেতি, সদ্দা অদ্ধুৰা অসস্সতা ৰিপরিণামধম্মাতি ৰৰত্থেতি, সদ্দা অনিচ্চা সঙ্খতা পটিচ্চসমুপ্পন্না খযধম্মা ৰযধম্মা ৰিরাগধম্মা নিরোধধম্মাতি ৰৰত্থেতি। সদ্দে অনিচ্চতো ৰৰত্থেতি, নো নিচ্চতো…পে॰… এৰং সদ্দে বহিদ্ধা ৰৰত্থেতি।
Kathaṃ sadde bahiddhā vavattheti? Saddā avijjāsambhūtāti vavattheti…pe… saddā catunnaṃ mahābhūtānaṃ upādāyāti vavattheti, saddā uppannāti vavattheti, saddā samudāgatāti vavattheti. Saddā ahutvā sambhūtā, hutvā na bhavissantīti vavattheti. Sadde antavantato vavattheti, saddā addhuvā asassatā vipariṇāmadhammāti vavattheti, saddā aniccā saṅkhatā paṭiccasamuppannā khayadhammā vayadhammā virāgadhammā nirodhadhammāti vavattheti. Sadde aniccato vavattheti, no niccato…pe… evaṃ sadde bahiddhā vavattheti.
কথং গন্ধে বহিদ্ধা ৰৰত্থেতি? গন্ধা অৰিজ্জাসম্ভূতাতি ৰৰত্থেতি, গন্ধা তণ্হাসম্ভূতাতি ৰৰত্থেতি…পে॰… এৰং গন্ধে বহিদ্ধা ৰৰত্থেতি। কথং রসে বহিদ্ধা ৰৰত্থেতি? রসা অৰিজ্জাসম্ভূতাতি ৰৰত্থেতি, রসা তণ্হাসম্ভূতাতি ৰৰত্থেতি…পে॰… এৰং রসে বহিদ্ধা ৰৰত্থেতি। কথং ফোট্ঠব্বে বহিদ্ধা ৰৰত্থেতি? ফোট্ঠব্বা অৰিজ্জাসম্ভূতাতি ৰৰত্থেতি, ফোট্ঠব্বা তণ্হাসম্ভূতাতি ৰৰত্থেতি, ফোট্ঠব্বা কম্মসম্ভূতাতি ৰৰত্থেতি, ফোট্ঠব্বা আহারসম্ভূতাতি ৰৰত্থেতি, ফোট্ঠব্বা উপ্পন্নাতি ৰৰত্থেতি। ফোট্ঠব্বা সমুদাগতাতি ৰৰত্থেতি…পে॰… এৰং ফোট্ঠব্বে বহিদ্ধা ৰৰত্থেতি।
Kathaṃ gandhe bahiddhā vavattheti? Gandhā avijjāsambhūtāti vavattheti, gandhā taṇhāsambhūtāti vavattheti…pe… evaṃ gandhe bahiddhā vavattheti. Kathaṃ rase bahiddhā vavattheti? Rasā avijjāsambhūtāti vavattheti, rasā taṇhāsambhūtāti vavattheti…pe… evaṃ rase bahiddhā vavattheti. Kathaṃ phoṭṭhabbe bahiddhā vavattheti? Phoṭṭhabbā avijjāsambhūtāti vavattheti, phoṭṭhabbā taṇhāsambhūtāti vavattheti, phoṭṭhabbā kammasambhūtāti vavattheti, phoṭṭhabbā āhārasambhūtāti vavattheti, phoṭṭhabbā uppannāti vavattheti. Phoṭṭhabbā samudāgatāti vavattheti…pe… evaṃ phoṭṭhabbe bahiddhā vavattheti.
কথং ধম্মে বহিদ্ধা ৰৰত্থেতি? ধম্মা অৰিজ্জাসম্ভূতাতি ৰৰত্থেতি, ধম্মা তণ্হাসম্ভূতাতি ৰৰত্থেতি, ধম্মা কম্মসম্ভূতাতি ৰৰত্থেতি, ধম্মা আহারসম্ভূতাতি ৰৰত্থেতি, ধম্মা উপ্পন্নাতি ৰৰত্থেতি, ধম্মা সমুদাগতাতি ৰৰত্থেতি। ধম্মা অহুত্ৰা সম্ভূতা , হুত্ৰা ন ভৰিস্সন্তীতি ৰৰত্থেতি। ধম্মে অন্তৰন্ততো ৰৰত্থেতি, ধম্মা অদ্ধুৰা অসস্সতা ৰিপরিণামধম্মাতি ৰৰত্থেতি, ধম্মা অনিচ্চা সঙ্খতা পটিচ্চসমুপ্পন্না খযধম্মা ৰযধম্মা ৰিরাগধম্মা নিরোধধম্মাতি ৰৰত্থেতি। ধম্মে অনিচ্চতো ৰৰত্থেতি, নো নিচ্চতো; দুক্খতো ৰৰত্থেতি, নো সুখতো; অনত্ততো ৰৰত্থেতি, নো অত্ততো; নিব্বিন্দতি, নো নন্দতি; ৰিরজ্জতি, নো রজ্জতি; নিরোধেতি, নো সমুদেতি; পটিনিস্সজ্জতি, নো আদিযতি…পে॰… অনিচ্চতো ৰৰত্থেন্তো নিচ্চসঞ্ঞং পজহতি, দুক্খতো ৰৰত্থেন্তো সুখসঞ্ঞং পজহতি, অনত্ততো ৰৰত্থেন্তো অত্তসঞ্ঞং পজহতি, নিব্বিন্দন্তো নন্দিং পজহতি, ৰিরজ্জন্তো রাগং পজহতি, নিরোধেন্তো সমুদযং পজহতি, পটিনিস্সজ্জন্তো আদানং পজহতি। এৰং ধম্মে বহিদ্ধা ৰৰত্থেতি। তং ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘বহিদ্ধা ৰৰত্থানে পঞ্ঞা গোচরনানত্তে ঞাণং’’।
Kathaṃ dhamme bahiddhā vavattheti? Dhammā avijjāsambhūtāti vavattheti, dhammā taṇhāsambhūtāti vavattheti, dhammā kammasambhūtāti vavattheti, dhammā āhārasambhūtāti vavattheti, dhammā uppannāti vavattheti, dhammā samudāgatāti vavattheti. Dhammā ahutvā sambhūtā , hutvā na bhavissantīti vavattheti. Dhamme antavantato vavattheti, dhammā addhuvā asassatā vipariṇāmadhammāti vavattheti, dhammā aniccā saṅkhatā paṭiccasamuppannā khayadhammā vayadhammā virāgadhammā nirodhadhammāti vavattheti. Dhamme aniccato vavattheti, no niccato; dukkhato vavattheti, no sukhato; anattato vavattheti, no attato; nibbindati, no nandati; virajjati, no rajjati; nirodheti, no samudeti; paṭinissajjati, no ādiyati…pe… aniccato vavatthento niccasaññaṃ pajahati, dukkhato vavatthento sukhasaññaṃ pajahati, anattato vavatthento attasaññaṃ pajahati, nibbindanto nandiṃ pajahati, virajjanto rāgaṃ pajahati, nirodhento samudayaṃ pajahati, paṭinissajjanto ādānaṃ pajahati. Evaṃ dhamme bahiddhā vavattheti. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘bahiddhā vavatthāne paññā gocaranānatte ñāṇaṃ’’.
গোচরনানত্তঞাণনিদ্দেসো সোল়সমো।
Gocaranānattañāṇaniddeso soḷasamo.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ১৬. গোচরনানত্তঞাণনিদ্দেসৰণ্ণনা • 16. Gocaranānattañāṇaniddesavaṇṇanā
