| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༡༦. གོཙརནཱནཏྟཉཱཎནིདྡེསོ
16. Gocaranānattañāṇaniddeso
༦༧. ཀཐཾ བཧིདྡྷཱ ཝཝཏྠཱནེ པཉྙཱ གོཙརནཱནཏྟེ ཉཱཎཾ? ཀཐཾ བཧིདྡྷཱ དྷམྨེ ཝཝཏྠེཏི? རཱུཔེ བཧིདྡྷཱ ཝཝཏྠེཏི, སདྡེ བཧིདྡྷཱ ཝཝཏྠེཏི, གནྡྷེ བཧིདྡྷཱ ཝཝཏྠེཏི, རསེ བཧིདྡྷཱ ཝཝཏྠེཏི, ཕོཊྛབྦེ བཧིདྡྷཱ ཝཝཏྠེཏི, དྷམྨེ བཧིདྡྷཱ ཝཝཏྠེཏི །
67. Kathaṃ bahiddhā vavatthāne paññā gocaranānatte ñāṇaṃ? Kathaṃ bahiddhā dhamme vavattheti? Rūpe bahiddhā vavattheti, sadde bahiddhā vavattheti, gandhe bahiddhā vavattheti, rase bahiddhā vavattheti, phoṭṭhabbe bahiddhā vavattheti, dhamme bahiddhā vavattheti .
ཀཐཾ རཱུཔེ བཧིདྡྷཱ ཝཝཏྠེཏི? རཱུཔཱ ཨཝིཛྫཱསམྦྷཱུཏཱཏི ཝཝཏྠེཏི རཱུཔཱ ཏཎྷཱསམྦྷཱུཏཱཏི ཝཝཏྠེཏི, རཱུཔཱ ཀམྨསམྦྷཱུཏཱཏི ཝཝཏྠེཏི, རཱུཔཱ ཨཱཧཱརསམྦྷཱུཏཱཏི ཝཝཏྠེཏི, རཱུཔཱ ཙཏུནྣཾ མཧཱབྷཱུཏཱནཾ ཨུཔཱདཱཡཱཏི ཝཝཏྠེཏི, རཱུཔཱ ཨུཔྤནྣཱཏི ཝཝཏྠེཏི, རཱུཔཱ སམུདཱགཏཱཏི ཝཝཏྠེཏི། རཱུཔཱ ཨཧུཏྭཱ སམྦྷཱུཏཱ, ཧུཏྭཱ ན བྷཝིསྶནྟཱིཏི ཝཝཏྠེཏི། རཱུཔེ ཨནྟཝནྟཏོ ཝཝཏྠེཏི, རཱུཔཱ ཨདྡྷུཝཱ ཨསསྶཏཱ ཝིཔརིཎཱམདྷམྨཱཏི ཝཝཏྠེཏི ། རཱུཔཱ ཨནིཙྩཱ སངྑཏཱ པཊིཙྩསམུཔྤནྣཱ ཁཡདྷམྨཱ ཝཡདྷམྨཱ ཝིརཱགདྷམྨཱ ནིརོདྷདྷམྨཱཏི ཝཝཏྠེཏི། རཱུཔེ ཨནིཙྩཏོ ཝཝཏྠེཏི, ནོ ནིཙྩཏོ; དུཀྑཏོ ཝཝཏྠེཏི, ནོ སུཁཏོ; ཨནཏྟཏོ ཝཝཏྠེཏི, ནོ ཨཏྟཏོ; ནིབྦིནྡཏི, ནོ ནནྡཏི ; ཝིརཛྫཏི, ནོ རཛྫཏི; ནིརོདྷེཏི, ནོ སམུདེཏི; པཊིནིསྶཛྫཏི, ནོ ཨཱདིཡཏི། ཨནིཙྩཏོ ཝཝཏྠེནྟོ ནིཙྩསཉྙཾ པཛཧཏི, དུཀྑཏོ ཝཝཏྠེནྟོ སུཁསཉྙཾ པཛཧཏི, ཨནཏྟཏོ ཝཝཏྠེནྟོ ཨཏྟསཉྙཾ པཛཧཏི, ནིབྦིནྡནྟོ ནནྡིཾ པཛཧཏི, ཝིརཛྫནྟོ རཱགཾ པཛཧཏི, ནིརོདྷེནྟོ སམུདཡཾ པཛཧཏི, པཊིནིསྶཛྫནྟོ ཨཱདཱནཾ པཛཧཏི། ཨེཝཾ རཱུཔེ བཧིདྡྷཱ ཝཝཏྠེཏི།
Kathaṃ rūpe bahiddhā vavattheti? Rūpā avijjāsambhūtāti vavattheti rūpā taṇhāsambhūtāti vavattheti, rūpā kammasambhūtāti vavattheti, rūpā āhārasambhūtāti vavattheti, rūpā catunnaṃ mahābhūtānaṃ upādāyāti vavattheti, rūpā uppannāti vavattheti, rūpā samudāgatāti vavattheti. Rūpā ahutvā sambhūtā, hutvā na bhavissantīti vavattheti. Rūpe antavantato vavattheti, rūpā addhuvā asassatā vipariṇāmadhammāti vavattheti . Rūpā aniccā saṅkhatā paṭiccasamuppannā khayadhammā vayadhammā virāgadhammā nirodhadhammāti vavattheti. Rūpe aniccato vavattheti, no niccato; dukkhato vavattheti, no sukhato; anattato vavattheti, no attato; nibbindati, no nandati ; virajjati, no rajjati; nirodheti, no samudeti; paṭinissajjati, no ādiyati. Aniccato vavatthento niccasaññaṃ pajahati, dukkhato vavatthento sukhasaññaṃ pajahati, anattato vavatthento attasaññaṃ pajahati, nibbindanto nandiṃ pajahati, virajjanto rāgaṃ pajahati, nirodhento samudayaṃ pajahati, paṭinissajjanto ādānaṃ pajahati. Evaṃ rūpe bahiddhā vavattheti.
ཀཐཾ སདྡེ བཧིདྡྷཱ ཝཝཏྠེཏི? སདྡཱ ཨཝིཛྫཱསམྦྷཱུཏཱཏི ཝཝཏྠེཏི…པེ॰… སདྡཱ ཙཏུནྣཾ མཧཱབྷཱུཏཱནཾ ཨུཔཱདཱཡཱཏི ཝཝཏྠེཏི, སདྡཱ ཨུཔྤནྣཱཏི ཝཝཏྠེཏི, སདྡཱ སམུདཱགཏཱཏི ཝཝཏྠེཏི། སདྡཱ ཨཧུཏྭཱ སམྦྷཱུཏཱ, ཧུཏྭཱ ན བྷཝིསྶནྟཱིཏི ཝཝཏྠེཏི། སདྡེ ཨནྟཝནྟཏོ ཝཝཏྠེཏི, སདྡཱ ཨདྡྷུཝཱ ཨསསྶཏཱ ཝིཔརིཎཱམདྷམྨཱཏི ཝཝཏྠེཏི, སདྡཱ ཨནིཙྩཱ སངྑཏཱ པཊིཙྩསམུཔྤནྣཱ ཁཡདྷམྨཱ ཝཡདྷམྨཱ ཝིརཱགདྷམྨཱ ནིརོདྷདྷམྨཱཏི ཝཝཏྠེཏི། སདྡེ ཨནིཙྩཏོ ཝཝཏྠེཏི, ནོ ནིཙྩཏོ…པེ॰… ཨེཝཾ སདྡེ བཧིདྡྷཱ ཝཝཏྠེཏི།
Kathaṃ sadde bahiddhā vavattheti? Saddā avijjāsambhūtāti vavattheti…pe… saddā catunnaṃ mahābhūtānaṃ upādāyāti vavattheti, saddā uppannāti vavattheti, saddā samudāgatāti vavattheti. Saddā ahutvā sambhūtā, hutvā na bhavissantīti vavattheti. Sadde antavantato vavattheti, saddā addhuvā asassatā vipariṇāmadhammāti vavattheti, saddā aniccā saṅkhatā paṭiccasamuppannā khayadhammā vayadhammā virāgadhammā nirodhadhammāti vavattheti. Sadde aniccato vavattheti, no niccato…pe… evaṃ sadde bahiddhā vavattheti.
ཀཐཾ གནྡྷེ བཧིདྡྷཱ ཝཝཏྠེཏི? གནྡྷཱ ཨཝིཛྫཱསམྦྷཱུཏཱཏི ཝཝཏྠེཏི, གནྡྷཱ ཏཎྷཱསམྦྷཱུཏཱཏི ཝཝཏྠེཏི…པེ॰… ཨེཝཾ གནྡྷེ བཧིདྡྷཱ ཝཝཏྠེཏི། ཀཐཾ རསེ བཧིདྡྷཱ ཝཝཏྠེཏི? རསཱ ཨཝིཛྫཱསམྦྷཱུཏཱཏི ཝཝཏྠེཏི, རསཱ ཏཎྷཱསམྦྷཱུཏཱཏི ཝཝཏྠེཏི…པེ॰… ཨེཝཾ རསེ བཧིདྡྷཱ ཝཝཏྠེཏི། ཀཐཾ ཕོཊྛབྦེ བཧིདྡྷཱ ཝཝཏྠེཏི? ཕོཊྛབྦཱ ཨཝིཛྫཱསམྦྷཱུཏཱཏི ཝཝཏྠེཏི, ཕོཊྛབྦཱ ཏཎྷཱསམྦྷཱུཏཱཏི ཝཝཏྠེཏི, ཕོཊྛབྦཱ ཀམྨསམྦྷཱུཏཱཏི ཝཝཏྠེཏི, ཕོཊྛབྦཱ ཨཱཧཱརསམྦྷཱུཏཱཏི ཝཝཏྠེཏི, ཕོཊྛབྦཱ ཨུཔྤནྣཱཏི ཝཝཏྠེཏི། ཕོཊྛབྦཱ སམུདཱགཏཱཏི ཝཝཏྠེཏི…པེ॰… ཨེཝཾ ཕོཊྛབྦེ བཧིདྡྷཱ ཝཝཏྠེཏི།
Kathaṃ gandhe bahiddhā vavattheti? Gandhā avijjāsambhūtāti vavattheti, gandhā taṇhāsambhūtāti vavattheti…pe… evaṃ gandhe bahiddhā vavattheti. Kathaṃ rase bahiddhā vavattheti? Rasā avijjāsambhūtāti vavattheti, rasā taṇhāsambhūtāti vavattheti…pe… evaṃ rase bahiddhā vavattheti. Kathaṃ phoṭṭhabbe bahiddhā vavattheti? Phoṭṭhabbā avijjāsambhūtāti vavattheti, phoṭṭhabbā taṇhāsambhūtāti vavattheti, phoṭṭhabbā kammasambhūtāti vavattheti, phoṭṭhabbā āhārasambhūtāti vavattheti, phoṭṭhabbā uppannāti vavattheti. Phoṭṭhabbā samudāgatāti vavattheti…pe… evaṃ phoṭṭhabbe bahiddhā vavattheti.
ཀཐཾ དྷམྨེ བཧིདྡྷཱ ཝཝཏྠེཏི? དྷམྨཱ ཨཝིཛྫཱསམྦྷཱུཏཱཏི ཝཝཏྠེཏི, དྷམྨཱ ཏཎྷཱསམྦྷཱུཏཱཏི ཝཝཏྠེཏི, དྷམྨཱ ཀམྨསམྦྷཱུཏཱཏི ཝཝཏྠེཏི, དྷམྨཱ ཨཱཧཱརསམྦྷཱུཏཱཏི ཝཝཏྠེཏི, དྷམྨཱ ཨུཔྤནྣཱཏི ཝཝཏྠེཏི, དྷམྨཱ སམུདཱགཏཱཏི ཝཝཏྠེཏི། དྷམྨཱ ཨཧུཏྭཱ སམྦྷཱུཏཱ , ཧུཏྭཱ ན བྷཝིསྶནྟཱིཏི ཝཝཏྠེཏི། དྷམྨེ ཨནྟཝནྟཏོ ཝཝཏྠེཏི, དྷམྨཱ ཨདྡྷུཝཱ ཨསསྶཏཱ ཝིཔརིཎཱམདྷམྨཱཏི ཝཝཏྠེཏི, དྷམྨཱ ཨནིཙྩཱ སངྑཏཱ པཊིཙྩསམུཔྤནྣཱ ཁཡདྷམྨཱ ཝཡདྷམྨཱ ཝིརཱགདྷམྨཱ ནིརོདྷདྷམྨཱཏི ཝཝཏྠེཏི། དྷམྨེ ཨནིཙྩཏོ ཝཝཏྠེཏི, ནོ ནིཙྩཏོ; དུཀྑཏོ ཝཝཏྠེཏི, ནོ སུཁཏོ; ཨནཏྟཏོ ཝཝཏྠེཏི, ནོ ཨཏྟཏོ; ནིབྦིནྡཏི, ནོ ནནྡཏི; ཝིརཛྫཏི, ནོ རཛྫཏི; ནིརོདྷེཏི, ནོ སམུདེཏི; པཊིནིསྶཛྫཏི, ནོ ཨཱདིཡཏི…པེ॰… ཨནིཙྩཏོ ཝཝཏྠེནྟོ ནིཙྩསཉྙཾ པཛཧཏི, དུཀྑཏོ ཝཝཏྠེནྟོ སུཁསཉྙཾ པཛཧཏི, ཨནཏྟཏོ ཝཝཏྠེནྟོ ཨཏྟསཉྙཾ པཛཧཏི, ནིབྦིནྡནྟོ ནནྡིཾ པཛཧཏི, ཝིརཛྫནྟོ རཱགཾ པཛཧཏི, ནིརོདྷེནྟོ སམུདཡཾ པཛཧཏི, པཊིནིསྶཛྫནྟོ ཨཱདཱནཾ པཛཧཏི། ཨེཝཾ དྷམྨེ བཧིདྡྷཱ ཝཝཏྠེཏི། ཏཾ ཉཱཏཊྛེན ཉཱཎཾ, པཛཱནནཊྛེན པཉྙཱ། ཏེན ཝུཙྩཏི – ‘‘བཧིདྡྷཱ ཝཝཏྠཱནེ པཉྙཱ གོཙརནཱནཏྟེ ཉཱཎཾ’’།
Kathaṃ dhamme bahiddhā vavattheti? Dhammā avijjāsambhūtāti vavattheti, dhammā taṇhāsambhūtāti vavattheti, dhammā kammasambhūtāti vavattheti, dhammā āhārasambhūtāti vavattheti, dhammā uppannāti vavattheti, dhammā samudāgatāti vavattheti. Dhammā ahutvā sambhūtā , hutvā na bhavissantīti vavattheti. Dhamme antavantato vavattheti, dhammā addhuvā asassatā vipariṇāmadhammāti vavattheti, dhammā aniccā saṅkhatā paṭiccasamuppannā khayadhammā vayadhammā virāgadhammā nirodhadhammāti vavattheti. Dhamme aniccato vavattheti, no niccato; dukkhato vavattheti, no sukhato; anattato vavattheti, no attato; nibbindati, no nandati; virajjati, no rajjati; nirodheti, no samudeti; paṭinissajjati, no ādiyati…pe… aniccato vavatthento niccasaññaṃ pajahati, dukkhato vavatthento sukhasaññaṃ pajahati, anattato vavatthento attasaññaṃ pajahati, nibbindanto nandiṃ pajahati, virajjanto rāgaṃ pajahati, nirodhento samudayaṃ pajahati, paṭinissajjanto ādānaṃ pajahati. Evaṃ dhamme bahiddhā vavattheti. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘bahiddhā vavatthāne paññā gocaranānatte ñāṇaṃ’’.
གོཙརནཱནཏྟཉཱཎནིདྡེསོ སོལ༹སམོ།
Gocaranānattañāṇaniddeso soḷasamo.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༡༦. གོཙརནཱནཏྟཉཱཎནིདྡེསཝཎྞནཱ • 16. Gocaranānattañāṇaniddesavaṇṇanā
