| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
7. கோ³த³த்தஸுத்தங்
7. Godattasuttaṃ
349. ஏகங் ஸமயங் ஆயஸ்மா கோ³த³த்தோ மச்சி²காஸண்டே³ விஹரதி அம்பா³டகவனே. அத² கோ² சித்தோ க³ஹபதி யேனாயஸ்மா கோ³த³த்தோ தேனுபஸங்கமி; உபஸங்கமித்வா ஆயஸ்மந்தங் கோ³த³த்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² சித்தங் க³ஹபதிங் ஆயஸ்மா கோ³த³த்தோ ஏதத³வோச – ‘‘யா சாயங், க³ஹபதி, அப்பமாணா சேதோவிமுத்தி, யா ச ஆகிஞ்சஞ்ஞா சேதோவிமுத்தி, யா ச ஸுஞ்ஞதா சேதோவிமுத்தி, யா ச அனிமித்தா சேதோவிமுத்தி, இமே த⁴ம்மா நானத்தா² நானாப்³யஞ்ஜனா உதா³ஹு ஏகத்தா² ப்³யஞ்ஜனமேவ நான’’ந்தி? ‘‘அத்தி², ப⁴ந்தே, பரியாயோ யங் பரியாயங் ஆக³ம்ம இமே த⁴ம்மா நானத்தா² சேவ நானாப்³யஞ்ஜனா ச. அத்தி² பன, ப⁴ந்தே, பரியாயோ யங் பரியாயங் ஆக³ம்ம இமே த⁴ம்மா ஏகத்தா² ப்³யஞ்ஜனமேவ நான’’ந்தி.
349. Ekaṃ samayaṃ āyasmā godatto macchikāsaṇḍe viharati ambāṭakavane. Atha kho citto gahapati yenāyasmā godatto tenupasaṅkami; upasaṅkamitvā āyasmantaṃ godattaṃ abhivādetvā ekamantaṃ nisīdi. Ekamantaṃ nisinnaṃ kho cittaṃ gahapatiṃ āyasmā godatto etadavoca – ‘‘yā cāyaṃ, gahapati, appamāṇā cetovimutti, yā ca ākiñcaññā cetovimutti, yā ca suññatā cetovimutti, yā ca animittā cetovimutti, ime dhammā nānatthā nānābyañjanā udāhu ekatthā byañjanameva nāna’’nti? ‘‘Atthi, bhante, pariyāyo yaṃ pariyāyaṃ āgamma ime dhammā nānatthā ceva nānābyañjanā ca. Atthi pana, bhante, pariyāyo yaṃ pariyāyaṃ āgamma ime dhammā ekatthā byañjanameva nāna’’nti.
‘‘கதமோ ச, ப⁴ந்தே, பரியாயோ யங் பரியாயங் ஆக³ம்ம இமே த⁴ம்மா நானத்தா² சேவ நானாப்³யஞ்ஜனா ச? இத⁴, ப⁴ந்தே, பி⁴க்கு² மெத்தாஸஹக³தேன சேதஸா ஏகங் தி³ஸங் ப²ரித்வா விஹரதி, ததா² து³தியங், ததா² ததியங், ததா² சதுத்த²ங் 1. இதி உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங் மெத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன 2 ப²ரித்வா விஹரதி. கருணாஸஹக³தேன சேதஸா…பே॰… முதி³தாஸஹக³தேன சேதஸா…பே॰… உபெக்கா²ஸஹக³தேன சேதஸா ஏகங் தி³ஸங் ப²ரித்வா விஹரதி, ததா² து³தியங், ததா² ததியங், ததா² சதுத்த²ங். இதி உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங் உபெக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி. அயங் வுச்சதி, ப⁴ந்தே, அப்பமாணா சேதோவிமுத்தி.
‘‘Katamo ca, bhante, pariyāyo yaṃ pariyāyaṃ āgamma ime dhammā nānatthā ceva nānābyañjanā ca? Idha, bhante, bhikkhu mettāsahagatena cetasā ekaṃ disaṃ pharitvā viharati, tathā dutiyaṃ, tathā tatiyaṃ, tathā catutthaṃ 3. Iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyāpajjena 4 pharitvā viharati. Karuṇāsahagatena cetasā…pe… muditāsahagatena cetasā…pe… upekkhāsahagatena cetasā ekaṃ disaṃ pharitvā viharati, tathā dutiyaṃ, tathā tatiyaṃ, tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyāpajjena pharitvā viharati. Ayaṃ vuccati, bhante, appamāṇā cetovimutti.
‘‘கதமா ச, ப⁴ந்தே, ஆகிஞ்சஞ்ஞா சேதோவிமுத்தி? இத⁴, ப⁴ந்தே, பி⁴க்கு² ஸப்³ப³ஸோ விஞ்ஞாணஞ்சாயதனங் ஸமதிக்கம்ம, ‘நத்தி² கிஞ்சீ’தி ஆகிஞ்சஞ்ஞாயதனங் உபஸம்பஜ்ஜ விஹரதி. அயங் வுச்சதி, ப⁴ந்தே, ஆகிஞ்சஞ்ஞா சேதோவிமுத்தி.
‘‘Katamā ca, bhante, ākiñcaññā cetovimutti? Idha, bhante, bhikkhu sabbaso viññāṇañcāyatanaṃ samatikkamma, ‘natthi kiñcī’ti ākiñcaññāyatanaṃ upasampajja viharati. Ayaṃ vuccati, bhante, ākiñcaññā cetovimutti.
‘‘கதமா ச, ப⁴ந்தே, ஸுஞ்ஞதா சேதோவிமுத்தி? இத⁴, ப⁴ந்தே, பி⁴க்கு² அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா இதி படிஸஞ்சிக்க²தி – ‘ஸுஞ்ஞமித³ங் அத்தேன வா அத்தனியேன வா’தி. அயங் வுச்சதி, ப⁴ந்தே, ஸுஞ்ஞதா சேதோவிமுத்தி.
‘‘Katamā ca, bhante, suññatā cetovimutti? Idha, bhante, bhikkhu araññagato vā rukkhamūlagato vā suññāgāragato vā iti paṭisañcikkhati – ‘suññamidaṃ attena vā attaniyena vā’ti. Ayaṃ vuccati, bhante, suññatā cetovimutti.
‘‘கதமா ச, ப⁴ந்தே, அனிமித்தா சேதோவிமுத்தி? இத⁴, ப⁴ந்தே, பி⁴க்கு² ஸப்³ப³னிமித்தானங் அமனஸிகாரா அனிமித்தங் சேதோஸமாதி⁴ங் உபஸம்பஜ்ஜ விஹரதி. அயங் வுச்சதி, ப⁴ந்தே, அனிமித்தா சேதோவிமுத்தி. அயங் கோ², ப⁴ந்தே, பரியாயோ யங் பரியாயங் ஆக³ம்ம இமே த⁴ம்மா நானத்தா² சேவ நானாப்³யஞ்ஜனா ச.
‘‘Katamā ca, bhante, animittā cetovimutti? Idha, bhante, bhikkhu sabbanimittānaṃ amanasikārā animittaṃ cetosamādhiṃ upasampajja viharati. Ayaṃ vuccati, bhante, animittā cetovimutti. Ayaṃ kho, bhante, pariyāyo yaṃ pariyāyaṃ āgamma ime dhammā nānatthā ceva nānābyañjanā ca.
‘‘கதமோ ச, ப⁴ந்தே, பரியாயோ யங் பரியாயங் ஆக³ம்ம இமே த⁴ம்மா ஏகத்தா² ப்³யஞ்ஜனமேவ நானங்? ராகோ³, ப⁴ந்தே, பமாணகரணோ, தோ³ஸோ பமாணகரணோ, மோஹோ பமாணகரணோ. தே கீ²ணாஸவஸ்ஸ பி⁴க்கு²னோ பஹீனா உச்சி²ன்னமூலா தாலாவத்து²கதா அனபா⁴வங்கதா ஆயதிங் அனுப்பாத³த⁴ம்மா. யாவதா கோ², ப⁴ந்தே, அப்பமாணா சேதோவிமுத்தியோ, அகுப்பா தாஸங் சேதோவிமுத்தி அக்³க³மக்கா²யதி. ஸா கோ² பன அகுப்பா சேதோவிமுத்தி ஸுஞ்ஞா ராகே³ன, ஸுஞ்ஞா தோ³ஸேன, ஸுஞ்ஞா மோஹேன. ராகோ³ கோ², ப⁴ந்தே, கிஞ்சனங், தோ³ஸோ கிஞ்சனங், மோஹோ கிஞ்சனங். தே கீ²ணாஸவஸ்ஸ பி⁴க்கு²னோ பஹீனா உச்சி²ன்னமூலா தாலாவத்து²கதா அனபா⁴வங்கதா ஆயதிங் அனுப்பாத³த⁴ம்மா. யாவதா கோ² , ப⁴ந்தே, ஆகிஞ்சஞ்ஞா சேதோவிமுத்தியோ, அகுப்பா தாஸங் சேதோவிமுத்தி அக்³க³மக்கா²யதி. ஸா கோ² பன அகுப்பா சேதோவிமுத்தி ஸுஞ்ஞா ராகே³ன, ஸுஞ்ஞா தோ³ஸேன, ஸுஞ்ஞா மோஹேன. ராகோ³ கோ², ப⁴ந்தே, நிமித்தகரணோ, தோ³ஸோ நிமித்தகரணோ, மோஹோ நிமித்தகரணோ. தே கீ²ணாஸவஸ்ஸ பி⁴க்கு²னோ பஹீனா உச்சி²ன்னமூலா தாலாவத்து²கதா அனபா⁴வங்கதா ஆயதிங் அனுப்பாத³த⁴ம்மா. யாவதா கோ², ப⁴ந்தே, அனிமித்தா சேதோவிமுத்தியோ, அகுப்பா தாஸங் சேதோவிமுத்தி அக்³க³மக்கா²யதி. ஸா கோ² பன அகுப்பா சேதோவிமுத்தி ஸுஞ்ஞா ராகே³ன, ஸுஞ்ஞா தோ³ஸேன, ஸுஞ்ஞா மோஹேன. அயங் கோ², ப⁴ந்தே, பரியாயோ யங் பரியாயங் ஆக³ம்ம இமே த⁴ம்மா ஏகத்தா² ப்³யஞ்ஜனமேவ நான’’ந்தி. ‘‘லாபா⁴ தே, க³ஹபதி, ஸுலத்³த⁴ங் தே, க³ஹபதி! யஸ்ஸ தே க³ம்பீ⁴ரே பு³த்³த⁴வசனே பஞ்ஞாசக்கு² கமதீ’’தி. ஸத்தமங்.
‘‘Katamo ca, bhante, pariyāyo yaṃ pariyāyaṃ āgamma ime dhammā ekatthā byañjanameva nānaṃ? Rāgo, bhante, pamāṇakaraṇo, doso pamāṇakaraṇo, moho pamāṇakaraṇo. Te khīṇāsavassa bhikkhuno pahīnā ucchinnamūlā tālāvatthukatā anabhāvaṅkatā āyatiṃ anuppādadhammā. Yāvatā kho, bhante, appamāṇā cetovimuttiyo, akuppā tāsaṃ cetovimutti aggamakkhāyati. Sā kho pana akuppā cetovimutti suññā rāgena, suññā dosena, suññā mohena. Rāgo kho, bhante, kiñcanaṃ, doso kiñcanaṃ, moho kiñcanaṃ. Te khīṇāsavassa bhikkhuno pahīnā ucchinnamūlā tālāvatthukatā anabhāvaṅkatā āyatiṃ anuppādadhammā. Yāvatā kho , bhante, ākiñcaññā cetovimuttiyo, akuppā tāsaṃ cetovimutti aggamakkhāyati. Sā kho pana akuppā cetovimutti suññā rāgena, suññā dosena, suññā mohena. Rāgo kho, bhante, nimittakaraṇo, doso nimittakaraṇo, moho nimittakaraṇo. Te khīṇāsavassa bhikkhuno pahīnā ucchinnamūlā tālāvatthukatā anabhāvaṅkatā āyatiṃ anuppādadhammā. Yāvatā kho, bhante, animittā cetovimuttiyo, akuppā tāsaṃ cetovimutti aggamakkhāyati. Sā kho pana akuppā cetovimutti suññā rāgena, suññā dosena, suññā mohena. Ayaṃ kho, bhante, pariyāyo yaṃ pariyāyaṃ āgamma ime dhammā ekatthā byañjanameva nāna’’nti. ‘‘Lābhā te, gahapati, suladdhaṃ te, gahapati! Yassa te gambhīre buddhavacane paññācakkhu kamatī’’ti. Sattamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7. கோ³த³த்தஸுத்தவண்ணனா • 7. Godattasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7. கோ³த³த்தஸுத்தவண்ணனா • 7. Godattasuttavaṇṇanā
