| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
7. கோ³த³த்தஸுத்தவண்ணனா
7. Godattasuttavaṇṇanā
349. ஸத்தமே நானத்தா² சேவ நானாப்³யஞ்ஜனா சாதி ப்³யஞ்ஜனம்பி நேஸங் நானங், அத்தோ²பி. தத்த² ப்³யஞ்ஜனஸ்ஸ நானதா பாகடா. அத்தோ² பன அப்பமாணா சேதோவிமுத்தி பூ⁴மந்தரதோ மஹக்³க³தா ஹோதி ரூபாவசரா, ஆரம்மணதோ ஸத்தபண்ணத்திஆரம்மணா. ஆகிஞ்சஞ்ஞா பூ⁴மந்தரதோ மஹக்³க³தா அரூபாவசரா, ஆரம்மணதோ நவத்தப்³பா³ரம்மணா. ஸுஞ்ஞதா பூ⁴மந்தரதோ காமாவசரா, ஆரம்மணதோ ஸங்கா²ராரம்மணா. விபஸ்ஸனா ஹி எத்த² ஸுஞ்ஞதாதி அதி⁴ப்பேதா. அனிமித்தா பூ⁴மந்தரதோ லோகுத்தரா, ஆரம்மணதோ நிப்³பா³னாரம்மணா.
349. Sattame nānatthā ceva nānābyañjanā cāti byañjanampi nesaṃ nānaṃ, atthopi. Tattha byañjanassa nānatā pākaṭā. Attho pana appamāṇā cetovimutti bhūmantarato mahaggatā hoti rūpāvacarā, ārammaṇato sattapaṇṇattiārammaṇā. Ākiñcaññā bhūmantarato mahaggatā arūpāvacarā, ārammaṇato navattabbārammaṇā. Suññatā bhūmantarato kāmāvacarā, ārammaṇato saṅkhārārammaṇā. Vipassanā hi ettha suññatāti adhippetā. Animittā bhūmantarato lokuttarā, ārammaṇato nibbānārammaṇā.
ராகோ³ கோ² ப⁴ந்தே பமாணகரணோதிஆதீ³ஸு யதா² பப்³ப³தபாதே³ பூதிபண்ணகஸடஉத³கங் நாம ஹோதி காளவண்ணங், ஓலோகெந்தானங் ப்³யாமஸதக³ம்பீ⁴ரங் விய கா²யதி, யட்டி²ங் வா ரஜ்ஜுங் வா க³ஹெத்வா மினந்தஸ்ஸ பிட்டி²பாதொ³த்த²ரணமத்தம்பி ந ஹோதி; ஏவமேவ யாவ ராகா³த³யோ நுப்பஜ்ஜந்தி, தாவ புக்³க³லங் ஸஞ்ஜானிதுங் ந ஸக்கா ஹோதி, ஸோதாபன்னோ விய ஸகதா³கா³மீ விய அனாகா³மீ விய ச கா²யதி. யதா³ பனஸ்ஸ ராகா³த³யோ உப்பஜ்ஜந்தி, ததா³ ரத்தோ து³ட்டோ² மூள்ஹோதி பஞ்ஞாயதி. இதி தே ‘‘எத்தகோ அய’’ந்தி புக்³க³லஸ்ஸ பமாணங் த³ஸ்ஸெந்தாவ உப்பஜ்ஜந்தீதி பமாணகரணா நாம வுத்தா.
Rāgo kho bhante pamāṇakaraṇotiādīsu yathā pabbatapāde pūtipaṇṇakasaṭaudakaṃ nāma hoti kāḷavaṇṇaṃ, olokentānaṃ byāmasatagambhīraṃ viya khāyati, yaṭṭhiṃ vā rajjuṃ vā gahetvā minantassa piṭṭhipādottharaṇamattampi na hoti; evameva yāva rāgādayo nuppajjanti, tāva puggalaṃ sañjānituṃ na sakkā hoti, sotāpanno viya sakadāgāmī viya anāgāmī viya ca khāyati. Yadā panassa rāgādayo uppajjanti, tadā ratto duṭṭho mūḷhoti paññāyati. Iti te ‘‘ettako aya’’nti puggalassa pamāṇaṃ dassentāva uppajjantīti pamāṇakaraṇā nāma vuttā.
யாவதா கோ² ப⁴ந்தே அப்பமாணா சேதோவிமுத்தியோதி யத்தகா அப்பமாணா சேதோவிமுத்தியோ. கித்தகா பன தா? சத்தாரோ ப்³ரஹ்மவிஹாரா, சத்தாரோ மக்³கா³, சத்தாரி ப²லானீதி த்³வாத³ஸ. தத்ர ப்³ரஹ்மவிஹாரா ப²ரணஅப்பமாணதாய அப்பமாணா, ஸேஸா பமாணகாரகானங் கிலேஸானங் அபா⁴வேன நிப்³பா³னம்பி அப்பமாணமேவ, சேதோவிமுத்தி பன ந ஹோதி, தஸ்மா ந க³ஹிதங். அகுப்பாதி அரஹத்தப²லசேதோவிமுத்தி. ஸா ஹி தாஸங் ஸப்³ப³ஜெட்டி²கா, தஸ்மா ‘‘அக்³க³மக்கா²யதீ’’தி வுத்தா. ராகோ³ கோ² ப⁴ந்தே கிஞ்சனந்தி ராகோ³ உப்பஜ்ஜித்வா புக்³க³லங் கிஞ்சதி மத்³த³தி பலிபு³ந்த⁴தி, தஸ்மா கிஞ்சனந்தி வுத்தோ. மனுஸ்ஸா கிர கோ³ணேஹி க²லங் மத்³தா³பெந்தா ‘‘கிஞ்சேஹி கபில கிஞ்சேஹி காளகா’’தி வத³ந்தி. ஏவங் மத்³த³னட்டோ² கிஞ்சனட்டோ²தி வேதி³தப்³போ³. தோ³ஸமோஹேஸுபிஏஸேவ நயோ.
Yāvatā kho bhante appamāṇā cetovimuttiyoti yattakā appamāṇā cetovimuttiyo. Kittakā pana tā? Cattāro brahmavihārā, cattāro maggā, cattāri phalānīti dvādasa. Tatra brahmavihārā pharaṇaappamāṇatāya appamāṇā, sesā pamāṇakārakānaṃ kilesānaṃ abhāvena nibbānampi appamāṇameva, cetovimutti pana na hoti, tasmā na gahitaṃ. Akuppāti arahattaphalacetovimutti. Sā hi tāsaṃ sabbajeṭṭhikā, tasmā ‘‘aggamakkhāyatī’’ti vuttā. Rāgokho bhante kiñcananti rāgo uppajjitvā puggalaṃ kiñcati maddati palibundhati, tasmā kiñcananti vutto. Manussā kira goṇehi khalaṃ maddāpentā ‘‘kiñcehi kapila kiñcehi kāḷakā’’ti vadanti. Evaṃ maddanaṭṭho kiñcanaṭṭhoti veditabbo. Dosamohesupieseva nayo.
ஆகிஞ்சஞ்ஞா சேதோவிமுத்தியோ நாம நவ த⁴ம்மா ஆகிஞ்சஞ்ஞாயதனங் மக்³க³ப²லானி ச. தத்த² ஆகிஞ்சஞ்ஞாயதனங் கிஞ்சனங் ஆரம்மணங் அஸ்ஸ நத்தீ²தி ஆகிஞ்சஞ்ஞங். மக்³க³ப²லானி கிஞ்சனானங் மத்³த³னபலிபு³ந்த⁴னகிலேஸானங் நத்தி²தாய ஆகிஞ்சஞ்ஞானி, நிப்³பா³னம்பி ஆகிஞ்சஞ்ஞங், சேதோவிமுத்தி பன ந ஹோதி, தஸ்மா ந க³ஹிதங்.
Ākiñcaññā cetovimuttiyo nāma nava dhammā ākiñcaññāyatanaṃ maggaphalāni ca. Tattha ākiñcaññāyatanaṃ kiñcanaṃ ārammaṇaṃ assa natthīti ākiñcaññaṃ. Maggaphalāni kiñcanānaṃ maddanapalibundhanakilesānaṃ natthitāya ākiñcaññāni, nibbānampi ākiñcaññaṃ, cetovimutti pana na hoti, tasmā na gahitaṃ.
ராகோ³ கோ² ப⁴ந்தே நிமித்தகரணோதிஆதீ³ஸு யதா² நாம த்³வின்னங் குலானங் ஸதி³ஸா த்³வே வச்ச²கா ஹொந்தி. யாவ தேஸங் லக்க²ணங் ந கதங் ஹோதி, தாவ ‘‘அயங் அஸுககுலஸ்ஸ வச்ச²கோ, அயங் அஸுககுலஸ்ஸா’’தி ந ஸக்கா ஹோதி ஜானிதுங். யதா³ பன தேஸங் திஸூலாதீ³ஸு அஞ்ஞதரங் லக்க²ணங் கதங் ஹோதி, ததா³ ஸக்கா ஹோதி ஜானிதுங். ஏவமேவ யாவ புக்³க³லஸ்ஸ ராகோ³ நுப்பஜ்ஜதி, தாவ ந ஸக்கா ஹோதி ஜானிதுங் ‘‘அரியோ வா புது²ஜ்ஜனோ வா’’தி. ராகோ³ பனஸ்ஸ உப்பஜ்ஜமானோவ ‘‘ஸராகோ³ நாம அயங் புக்³க³லோ’’தி ஸஞ்ஜானநனிமித்தங் கரொந்தோ விய உப்பஜ்ஜதி, தஸ்மா நிமித்தகரணோதி வுத்தோ. தோ³ஸமோஹேஸுபி ஏஸேவ நயோ.
Rāgo kho bhante nimittakaraṇotiādīsu yathā nāma dvinnaṃ kulānaṃ sadisā dve vacchakā honti. Yāva tesaṃ lakkhaṇaṃ na kataṃ hoti, tāva ‘‘ayaṃ asukakulassa vacchako, ayaṃ asukakulassā’’ti na sakkā hoti jānituṃ. Yadā pana tesaṃ tisūlādīsu aññataraṃ lakkhaṇaṃ kataṃ hoti, tadā sakkā hoti jānituṃ. Evameva yāva puggalassa rāgo nuppajjati, tāva na sakkā hoti jānituṃ ‘‘ariyo vā puthujjano vā’’ti. Rāgo panassa uppajjamānova ‘‘sarāgo nāma ayaṃ puggalo’’ti sañjānananimittaṃ karonto viya uppajjati, tasmā nimittakaraṇoti vutto. Dosamohesupi eseva nayo.
அனிமித்தா சேதோவிமுத்தியோ நாம தேரஸ த⁴ம்மா விபஸ்ஸனா, சத்தாரோ ஆருப்பா, சத்தாரோ மக்³கா³, சத்தாரி ப²லானி. தத்த² விபஸ்ஸனா நிச்சனிமித்தங் ஸுக²னிமித்தங் அத்தனிமித்தங் உக்³கா⁴டேதீதி அனிமித்தா நாம. சத்தாரோ ஆருப்பா ரூபனிமித்தஸ்ஸ அபா⁴வா அனிமித்தா நாம. மக்³க³ப²லானி நிமித்தகரானங் கிலேஸானங் அபா⁴வேன அனிமித்தானி, நிப்³பா³னம்பி அனிமித்தமேவ, தங் பன சேதோவிமுத்தி ந ஹோதி, தஸ்மா ந க³ஹிதங். அத² கஸ்மா ஸுஞ்ஞதா சேதோவிமுத்தி ந க³ஹிதாதி? ஸா ‘‘ஸுஞ்ஞா ராகே³னா’’திஆதி³வசனதோ ஸப்³ப³த்த² அனுபவிட்டா²வ, தஸ்மா விஸுங் ந க³ஹிதாதி.
Animittā cetovimuttiyo nāma terasa dhammā vipassanā, cattāro āruppā, cattāro maggā, cattāri phalāni. Tattha vipassanā niccanimittaṃ sukhanimittaṃ attanimittaṃ ugghāṭetīti animittā nāma. Cattāro āruppā rūpanimittassa abhāvā animittā nāma. Maggaphalāni nimittakarānaṃ kilesānaṃ abhāvena animittāni, nibbānampi animittameva, taṃ pana cetovimutti na hoti, tasmā na gahitaṃ. Atha kasmā suññatā cetovimutti na gahitāti? Sā ‘‘suññā rāgenā’’tiādivacanato sabbattha anupaviṭṭhāva, tasmā visuṃ na gahitāti.
ஏகத்தா²தி ஆரம்மணவஸேன ஏகத்தா² ‘‘அப்பமாணங் ஆகிஞ்சஞ்ஞங் ஸுஞ்ஞதங் அனிமித்த’’ந்தி ஹி ஸப்³பா³னேதானி நிப்³பா³னஸ்ஸேவ நாமானி. இதி இமினா பரியாயேன ஏகத்தா². அஞ்ஞஸ்மிங் பன டா²னே அப்பமாணாபி ஹோதி, அஞ்ஞஸ்மிங் ஆகிஞ்சஞ்ஞா, அஞ்ஞஸ்மிங் ஸுஞ்ஞதா, அஞ்ஞஸ்மிங் அனிமித்தாதி இமினா பரியாயேன நானாப்³யஞ்ஜனாதி.
Ekatthāti ārammaṇavasena ekatthā ‘‘appamāṇaṃ ākiñcaññaṃ suññataṃ animitta’’nti hi sabbānetāni nibbānasseva nāmāni. Iti iminā pariyāyena ekatthā. Aññasmiṃ pana ṭhāne appamāṇāpi hoti, aññasmiṃ ākiñcaññā, aññasmiṃ suññatā, aññasmiṃ animittāti iminā pariyāyena nānābyañjanāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. கோ³த³த்தஸுத்தங் • 7. Godattasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7. கோ³த³த்தஸுத்தவண்ணனா • 7. Godattasuttavaṇṇanā
