| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৭. গোদত্তসুত্তৰণ্ণনা
7. Godattasuttavaṇṇanā
৩৪৯. নেসন্তি অপ্পমাণচেতোৰিমুত্তি-আকিঞ্চঞ্ঞচেতোৰিমুত্তিসঞ্ঞিতানং ঝানানং। অত্থোপি নানাতি আনেত্ৰা যোজনা। ফরণঅপ্পমাণতায ‘‘অপ্পমাণা চেতোৰিমুত্তী’’তি লদ্ধনামং ব্রহ্মৰিহারজ্ঝানন্তি আহ ‘‘ভূমন্তরতো’’তিআদি। আকিঞ্চঞ্ঞা চেতোৰিমুত্তীতি আকিঞ্চঞ্ঞাযতনজ্ঝানন্তি আহ ‘‘ভূমন্তরতো’’তিআদি। ৰিপস্সনাতি অনিচ্চানুপস্সনা, সব্বাপি ৰা। পমাণকরণো নাম যস্স সযং উপ্পজ্জতি, তস্স গুণাভাৰদস্সনৰসেন পমাণকরণতো।
349.Nesanti appamāṇacetovimutti-ākiñcaññacetovimuttisaññitānaṃ jhānānaṃ. Atthopi nānāti ānetvā yojanā. Pharaṇaappamāṇatāya ‘‘appamāṇā cetovimuttī’’ti laddhanāmaṃ brahmavihārajjhānanti āha ‘‘bhūmantarato’’tiādi. Ākiñcaññā cetovimuttīti ākiñcaññāyatanajjhānanti āha ‘‘bhūmantarato’’tiādi. Vipassanāti aniccānupassanā, sabbāpi vā. Pamāṇakaraṇo nāma yassa sayaṃ uppajjati, tassa guṇābhāvadassanavasena pamāṇakaraṇato.
ফরণঅপ্পমাণতাযাতি ফরণৰসেন অপ্পমাণগোচরতায। নিব্বানম্পি অপ্পমাণমেৰ পমাণগোচরানং কিলেসানং আরম্মণভাৰস্সপি অনাগমনতো। খলন্তি খলে পসারিতসালিসীসাদিভণ্ডং। কিঞ্চেহীতি মদ্দস্সু। তেনাহ ‘‘মদ্দনট্ঠো’’তি। আরম্মণভূতং, পলিবুদ্ধকং ৰা নত্থি এতস্স কিঞ্চনন্তি অকিঞ্চনং, অকিঞ্চনমেৰ আকিঞ্চঞ্ঞং।
Pharaṇaappamāṇatāyāti pharaṇavasena appamāṇagocaratāya. Nibbānampi appamāṇameva pamāṇagocarānaṃ kilesānaṃ ārammaṇabhāvassapi anāgamanato. Khalanti khale pasāritasālisīsādibhaṇḍaṃ. Kiñcehīti maddassu. Tenāha ‘‘maddanaṭṭho’’ti. Ārammaṇabhūtaṃ, palibuddhakaṃ vā natthi etassa kiñcananti akiñcanaṃ, akiñcanameva ākiñcaññaṃ.
রূপনিমিত্তস্সাতি কসিণরূপনিমিত্তস্স। ন গহিতাতি সরূপতো ন গহিতা, অত্থতো পন গহিতা এৰ। তেনাহ – ‘‘সা সুঞ্ঞা রাগেনাতিআদিৰচনতো সব্বত্থ অনুপৰিত্থাৰা’’তি।
Rūpanimittassāti kasiṇarūpanimittassa. Na gahitāti sarūpato na gahitā, atthato pana gahitā eva. Tenāha – ‘‘sā suññā rāgenātiādivacanato sabbattha anupavitthāvā’’ti.
নানাতি সদ্দৰসেন। একত্থাতি আরম্মণৰসেন আরম্মণভাৰেন একসভাৰা। তেনাহ ‘‘অপ্পমাণং…পে॰… একত্থা’’তি। আরম্মণৰসেনাতি আরম্মণস্স ৰসেন। চত্তারো হি মগ্গা, চত্তারি ফলানি আরম্মণৰসেন নিব্বানপৰিট্ঠতায একত্থা একারম্মণা। অঞ্ঞস্মিং পন ঠানেতি ইদং ৰিসুং ৰিসুং গহেত্ৰা ৰুত্তং অপ্পমাণাদি পরিযাযৰুত্তং, নিব্বানং আরব্ভ পৰত্তনতো। তস্মা ‘‘অঞ্ঞস্মি’’ন্তি ইদং তেন তেন পরিযাযেন তত্থ তত্থ আগতভাৰং সন্ধায ৰুত্তং।
Nānāti saddavasena. Ekatthāti ārammaṇavasena ārammaṇabhāvena ekasabhāvā. Tenāha ‘‘appamāṇaṃ…pe… ekatthā’’ti. Ārammaṇavasenāti ārammaṇassa vasena. Cattāro hi maggā, cattāri phalāni ārammaṇavasena nibbānapaviṭṭhatāya ekatthā ekārammaṇā. Aññasmiṃ pana ṭhāneti idaṃ visuṃ visuṃ gahetvā vuttaṃ appamāṇādi pariyāyavuttaṃ, nibbānaṃ ārabbha pavattanato. Tasmā ‘‘aññasmi’’nti idaṃ tena tena pariyāyena tattha tattha āgatabhāvaṃ sandhāya vuttaṃ.
গোদত্তসুত্তৰণ্ণনা নিট্ঠিতা।
Godattasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৭. গোদত্তসুত্তং • 7. Godattasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭. গোদত্তসুত্তৰণ্ণনা • 7. Godattasuttavaṇṇanā
