| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
७. गोदत्तसुत्तवण्णना
7. Godattasuttavaṇṇanā
३४९. नेसन्ति अप्पमाणचेतोविमुत्ति-आकिञ्चञ्ञचेतोविमुत्तिसञ्ञितानं झानानं। अत्थोपि नानाति आनेत्वा योजना। फरणअप्पमाणताय ‘‘अप्पमाणा चेतोविमुत्ती’’ति लद्धनामं ब्रह्मविहारज्झानन्ति आह ‘‘भूमन्तरतो’’तिआदि। आकिञ्चञ्ञा चेतोविमुत्तीति आकिञ्चञ्ञायतनज्झानन्ति आह ‘‘भूमन्तरतो’’तिआदि। विपस्सनाति अनिच्चानुपस्सना, सब्बापि वा। पमाणकरणो नाम यस्स सयं उप्पज्जति, तस्स गुणाभावदस्सनवसेन पमाणकरणतो।
349.Nesanti appamāṇacetovimutti-ākiñcaññacetovimuttisaññitānaṃ jhānānaṃ. Atthopi nānāti ānetvā yojanā. Pharaṇaappamāṇatāya ‘‘appamāṇā cetovimuttī’’ti laddhanāmaṃ brahmavihārajjhānanti āha ‘‘bhūmantarato’’tiādi. Ākiñcaññā cetovimuttīti ākiñcaññāyatanajjhānanti āha ‘‘bhūmantarato’’tiādi. Vipassanāti aniccānupassanā, sabbāpi vā. Pamāṇakaraṇo nāma yassa sayaṃ uppajjati, tassa guṇābhāvadassanavasena pamāṇakaraṇato.
फरणअप्पमाणतायाति फरणवसेन अप्पमाणगोचरताय। निब्बानम्पि अप्पमाणमेव पमाणगोचरानं किलेसानं आरम्मणभावस्सपि अनागमनतो। खलन्ति खले पसारितसालिसीसादिभण्डं। किञ्चेहीति मद्दस्सु। तेनाह ‘‘मद्दनट्ठो’’ति। आरम्मणभूतं, पलिबुद्धकं वा नत्थि एतस्स किञ्चनन्ति अकिञ्चनं, अकिञ्चनमेव आकिञ्चञ्ञं।
Pharaṇaappamāṇatāyāti pharaṇavasena appamāṇagocaratāya. Nibbānampi appamāṇameva pamāṇagocarānaṃ kilesānaṃ ārammaṇabhāvassapi anāgamanato. Khalanti khale pasāritasālisīsādibhaṇḍaṃ. Kiñcehīti maddassu. Tenāha ‘‘maddanaṭṭho’’ti. Ārammaṇabhūtaṃ, palibuddhakaṃ vā natthi etassa kiñcananti akiñcanaṃ, akiñcanameva ākiñcaññaṃ.
रूपनिमित्तस्साति कसिणरूपनिमित्तस्स। न गहिताति सरूपतो न गहिता, अत्थतो पन गहिता एव। तेनाह – ‘‘सा सुञ्ञा रागेनातिआदिवचनतो सब्बत्थ अनुपवित्थावा’’ति।
Rūpanimittassāti kasiṇarūpanimittassa. Na gahitāti sarūpato na gahitā, atthato pana gahitā eva. Tenāha – ‘‘sā suññā rāgenātiādivacanato sabbattha anupavitthāvā’’ti.
नानाति सद्दवसेन। एकत्थाति आरम्मणवसेन आरम्मणभावेन एकसभावा। तेनाह ‘‘अप्पमाणं…पे॰… एकत्था’’ति। आरम्मणवसेनाति आरम्मणस्स वसेन। चत्तारो हि मग्गा, चत्तारि फलानि आरम्मणवसेन निब्बानपविट्ठताय एकत्था एकारम्मणा। अञ्ञस्मिं पन ठानेति इदं विसुं विसुं गहेत्वा वुत्तं अप्पमाणादि परियायवुत्तं, निब्बानं आरब्भ पवत्तनतो। तस्मा ‘‘अञ्ञस्मि’’न्ति इदं तेन तेन परियायेन तत्थ तत्थ आगतभावं सन्धाय वुत्तं।
Nānāti saddavasena. Ekatthāti ārammaṇavasena ārammaṇabhāvena ekasabhāvā. Tenāha ‘‘appamāṇaṃ…pe… ekatthā’’ti. Ārammaṇavasenāti ārammaṇassa vasena. Cattāro hi maggā, cattāri phalāni ārammaṇavasena nibbānapaviṭṭhatāya ekatthā ekārammaṇā. Aññasmiṃ pana ṭhāneti idaṃ visuṃ visuṃ gahetvā vuttaṃ appamāṇādi pariyāyavuttaṃ, nibbānaṃ ārabbha pavattanato. Tasmā ‘‘aññasmi’’nti idaṃ tena tena pariyāyena tattha tattha āgatabhāvaṃ sandhāya vuttaṃ.
गोदत्तसुत्तवण्णना निट्ठिता।
Godattasuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / ७. गोदत्तसुत्तं • 7. Godattasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ७. गोदत्तसुत्तवण्णना • 7. Godattasuttavaṇṇanā
