| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៧. គោទត្តសុត្តវណ្ណនា
7. Godattasuttavaṇṇanā
៣៤៩. នេសន្តិ អប្បមាណចេតោវិមុត្តិ-អាកិញ្ចញ្ញចេតោវិមុត្តិសញ្ញិតានំ ឈានានំ។ អត្ថោបិ នានាតិ អានេត្វា យោជនា។ ផរណអប្បមាណតាយ ‘‘អប្បមាណា ចេតោវិមុត្តី’’តិ លទ្ធនាមំ ព្រហ្មវិហារជ្ឈានន្តិ អាហ ‘‘ភូមន្តរតោ’’តិអាទិ។ អាកិញ្ចញ្ញា ចេតោវិមុត្តីតិ អាកិញ្ចញ្ញាយតនជ្ឈានន្តិ អាហ ‘‘ភូមន្តរតោ’’តិអាទិ។ វិបស្សនាតិ អនិច្ចានុបស្សនា, សព្ពាបិ វា។ បមាណករណោ នាម យស្ស សយំ ឧប្បជ្ជតិ, តស្ស គុណាភាវទស្សនវសេន បមាណករណតោ។
349.Nesanti appamāṇacetovimutti-ākiñcaññacetovimuttisaññitānaṃ jhānānaṃ. Atthopi nānāti ānetvā yojanā. Pharaṇaappamāṇatāya ‘‘appamāṇā cetovimuttī’’ti laddhanāmaṃ brahmavihārajjhānanti āha ‘‘bhūmantarato’’tiādi. Ākiñcaññā cetovimuttīti ākiñcaññāyatanajjhānanti āha ‘‘bhūmantarato’’tiādi. Vipassanāti aniccānupassanā, sabbāpi vā. Pamāṇakaraṇo nāma yassa sayaṃ uppajjati, tassa guṇābhāvadassanavasena pamāṇakaraṇato.
ផរណអប្បមាណតាយាតិ ផរណវសេន អប្បមាណគោចរតាយ។ និព្ពានម្បិ អប្បមាណមេវ បមាណគោចរានំ កិលេសានំ អារម្មណភាវស្សបិ អនាគមនតោ។ ខលន្តិ ខលេ បសារិតសាលិសីសាទិភណ្ឌំ។ កិញ្ចេហីតិ មទ្ទស្សុ។ តេនាហ ‘‘មទ្ទនដ្ឋោ’’តិ។ អារម្មណភូតំ, បលិពុទ្ធកំ វា នត្ថិ ឯតស្ស កិញ្ចនន្តិ អកិញ្ចនំ, អកិញ្ចនមេវ អាកិញ្ចញ្ញំ។
Pharaṇaappamāṇatāyāti pharaṇavasena appamāṇagocaratāya. Nibbānampi appamāṇameva pamāṇagocarānaṃ kilesānaṃ ārammaṇabhāvassapi anāgamanato. Khalanti khale pasāritasālisīsādibhaṇḍaṃ. Kiñcehīti maddassu. Tenāha ‘‘maddanaṭṭho’’ti. Ārammaṇabhūtaṃ, palibuddhakaṃ vā natthi etassa kiñcananti akiñcanaṃ, akiñcanameva ākiñcaññaṃ.
រូបនិមិត្តស្សាតិ កសិណរូបនិមិត្តស្ស។ ន គហិតាតិ សរូបតោ ន គហិតា, អត្ថតោ បន គហិតា ឯវ។ តេនាហ – ‘‘សា សុញ្ញា រាគេនាតិអាទិវចនតោ សព្ពត្ថ អនុបវិត្ថាវា’’តិ។
Rūpanimittassāti kasiṇarūpanimittassa. Na gahitāti sarūpato na gahitā, atthato pana gahitā eva. Tenāha – ‘‘sā suññā rāgenātiādivacanato sabbattha anupavitthāvā’’ti.
នានាតិ សទ្ទវសេន។ ឯកត្ថាតិ អារម្មណវសេន អារម្មណភាវេន ឯកសភាវា។ តេនាហ ‘‘អប្បមាណំ…បេ.… ឯកត្ថា’’តិ។ អារម្មណវសេនាតិ អារម្មណស្ស វសេន។ ចត្តារោ ហិ មគ្គា, ចត្តារិ ផលានិ អារម្មណវសេន និព្ពានបវិដ្ឋតាយ ឯកត្ថា ឯការម្មណា។ អញ្ញស្មិំ បន ឋានេតិ ឥទំ វិសុំ វិសុំ គហេត្វា វុត្តំ អប្បមាណាទិ បរិយាយវុត្តំ, និព្ពានំ អារព្ភ បវត្តនតោ។ តស្មា ‘‘អញ្ញស្មិ’’ន្តិ ឥទំ តេន តេន បរិយាយេន តត្ថ តត្ថ អាគតភាវំ សន្ធាយ វុត្តំ។
Nānāti saddavasena. Ekatthāti ārammaṇavasena ārammaṇabhāvena ekasabhāvā. Tenāha ‘‘appamāṇaṃ…pe… ekatthā’’ti. Ārammaṇavasenāti ārammaṇassa vasena. Cattāro hi maggā, cattāri phalāni ārammaṇavasena nibbānapaviṭṭhatāya ekatthā ekārammaṇā. Aññasmiṃ pana ṭhāneti idaṃ visuṃ visuṃ gahetvā vuttaṃ appamāṇādi pariyāyavuttaṃ, nibbānaṃ ārabbha pavattanato. Tasmā ‘‘aññasmi’’nti idaṃ tena tena pariyāyena tattha tattha āgatabhāvaṃ sandhāya vuttaṃ.
គោទត្តសុត្តវណ្ណនា និដ្ឋិតា។
Godattasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៧. គោទត្តសុត្តំ • 7. Godattasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៧. គោទត្តសុត្តវណ្ណនា • 7. Godattasuttavaṇṇanā
