| Library / Tipiṭaka / திபிடக • Tipiṭaka / தே²ரகா³தா²-அட்ட²கதா² • Theragāthā-aṭṭhakathā |
2. கோ³த³த்தத்தே²ரகா³தா²வண்ணனா
2. Godattattheragāthāvaṇṇanā
யதா²பி ப⁴த்³தோ³திஆதி³கா ஆயஸ்மதோ கோ³த³த்தத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயங் குஸலங் உபசினித்வா தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ ஸாவத்தி²யங் ஸத்த²வாஹகுலே நிப்³ப³த்தோ. கோ³த³த்தோதி நாமேன வயப்பத்தோ பிதரி காலங்கதே குடும்ப³ங் ஸண்ட²பெந்தோ பஞ்சஹி ஸகடஸதேஹி ப⁴ண்ட³ங் ஆதா³ய அபராபரங் ஸஞ்சரித்வா வாணிஜ்ஜேன ஜீவிகங் கப்பேதி யதா²விப⁴வங் புஞ்ஞானிபி கரோதி. ஸோ ஏகதி³வஸங் அந்தராமக்³கே³ து⁴ரே யுத்தகோ³ணே வஹிதுங் அஸக்கொந்தே பதிதே மனுஸ்ஸேஸு தங் வுட்டா²பேதுங் அஸக்கொந்தேஸு ஸயமேவ க³ந்த்வா தங் நங்கு³ட்டே² கா³ள்ஹங் விஜ்ஜி². கோ³ணோ ‘‘அயங் அஸப்புரிஸோ மம ப³லாப³லங் அஜானந்தோ கா³ள்ஹங் விஜ்ஜ²தீ’’தி குத்³தோ⁴ மனுஸ்ஸவாசாய, ‘‘போ⁴ கோ³த³த்த, அஹங் எத்தகங் காலங் அத்தனோ ப³லங் அனிகு³ஹந்தோ துய்ஹங் பா⁴ரங் வஹிங், அஜ்ஜ பன அஸமத்த²பா⁴வேன பதிதங் மங் அதிவிய பா³த⁴ஸி, ஹோது, இதோ சவித்வா நிப்³ப³த்தனிப்³ப³த்தட்டா²னே தங் பா³தே⁴துங் ஸமத்தோ² படிஸத்து ப⁴வெய்ய’’ந்தி பத்த²னானுரூபேன அக்கோஸி. தங் ஸுத்வா கோ³த³த்தோ ‘‘ஏவங் நாம ஸத்தே பா³தெ⁴த்வா கிங் இமாய ஜீவிகாயா’’தி ஸங்வேக³ஜாதோ ஸப்³ப³ங் விப⁴வங் பஹாய அஞ்ஞதரஸ்ஸ மஹாதே²ரஸ்ஸ ஸந்திகே பப்³ப³ஜித்வா விபஸ்ஸனாய கம்மங் கரொந்தோ நசிரஸ்ஸேவ அரஹத்தங் பத்வா ஸமாபத்திஸுகே²ன வீதினாமெந்தோ ஏகதி³வஸங் அத்தனோ ஸந்திகங் உபக³தானங் க³ஹட்ட²பப்³ப³ஜிதானங் அரியக³ணானங் லோகத⁴ம்மே ஆரப்³ப⁴ த⁴ம்மங் கதெ²ந்தோ –
Yathāpi bhaddotiādikā āyasmato godattattherassa gāthā. Kā uppatti? Ayampi purimabuddhesu katādhikāro tattha tattha bhave vivaṭṭūpanissayaṃ kusalaṃ upacinitvā devamanussesu saṃsaranto imasmiṃ buddhuppāde sāvatthiyaṃ satthavāhakule nibbatto. Godattoti nāmena vayappatto pitari kālaṅkate kuṭumbaṃ saṇṭhapento pañcahi sakaṭasatehi bhaṇḍaṃ ādāya aparāparaṃ sañcaritvā vāṇijjena jīvikaṃ kappeti yathāvibhavaṃ puññānipi karoti. So ekadivasaṃ antarāmagge dhure yuttagoṇe vahituṃ asakkonte patite manussesu taṃ vuṭṭhāpetuṃ asakkontesu sayameva gantvā taṃ naṅguṭṭhe gāḷhaṃ vijjhi. Goṇo ‘‘ayaṃ asappuriso mama balābalaṃ ajānanto gāḷhaṃ vijjhatī’’ti kuddho manussavācāya, ‘‘bho godatta, ahaṃ ettakaṃ kālaṃ attano balaṃ aniguhanto tuyhaṃ bhāraṃ vahiṃ, ajja pana asamatthabhāvena patitaṃ maṃ ativiya bādhasi, hotu, ito cavitvā nibbattanibbattaṭṭhāne taṃ bādhetuṃ samattho paṭisattu bhaveyya’’nti patthanānurūpena akkosi. Taṃ sutvā godatto ‘‘evaṃ nāma satte bādhetvā kiṃ imāya jīvikāyā’’ti saṃvegajāto sabbaṃ vibhavaṃ pahāya aññatarassa mahātherassa santike pabbajitvā vipassanāya kammaṃ karonto nacirasseva arahattaṃ patvā samāpattisukhena vītināmento ekadivasaṃ attano santikaṃ upagatānaṃ gahaṭṭhapabbajitānaṃ ariyagaṇānaṃ lokadhamme ārabbha dhammaṃ kathento –
659.
659.
‘‘யதா²பி ப⁴த்³தோ³ ஆஜஞ்ஞோ, து⁴ரே யுத்தோ து⁴ரஸ்ஸஹோ;
‘‘Yathāpi bhaddo ājañño, dhure yutto dhurassaho;
மதி²தோ அதிபா⁴ரேன, ஸங்யுக³ங் நாதிவத்ததி.
Mathito atibhārena, saṃyugaṃ nātivattati.
660.
660.
‘‘ஏவங் பஞ்ஞாய யே தித்தா, ஸமுத்³தோ³ வாரினா யதா²;
‘‘Evaṃ paññāya ye tittā, samuddo vārinā yathā;
ந பரே அதிமஞ்ஞந்தி, அரியத⁴ம்மோவ பாணினங்.
Na pare atimaññanti, ariyadhammova pāṇinaṃ.
661.
661.
‘‘காலே காலவஸங் பத்தா, ப⁴வாப⁴வவஸங் க³தா;
‘‘Kāle kālavasaṃ pattā, bhavābhavavasaṃ gatā;
நரா து³க்க²ங் நிக³ச்ச²ந்தி, தேத⁴ ஸோசந்தி மாணவா.
Narā dukkhaṃ nigacchanti, tedha socanti māṇavā.
662.
662.
‘‘உன்னதா ஸுக²த⁴ம்மேன, து³க்க²த⁴ம்மேன சோனதா;
‘‘Unnatā sukhadhammena, dukkhadhammena conatā;
த்³வயேன பா³லா ஹஞ்ஞந்தி, யதா²பூ⁴தங் அத³ஸ்ஸினோ.
Dvayena bālā haññanti, yathābhūtaṃ adassino.
663.
663.
‘‘யே ச து³க்கே² ஸுக²ஸ்மிஞ்ச, மஜ்ஜே² ஸிப்³பி³னிமச்சகூ³;
‘‘Ye ca dukkhe sukhasmiñca, majjhe sibbinimaccagū;
டி²தா தே இந்த³கீ²லோவ, ந தே உன்னதஓனதா.
Ṭhitā te indakhīlova, na te unnataonatā.
664.
664.
‘‘ந ஹேவ லாபே⁴ நாலாபே⁴, ந யஸே ந ச கித்தியா;
‘‘Na heva lābhe nālābhe, na yase na ca kittiyā;
ந நிந்தா³யங் பஸங்ஸாய, ந தே து³க்கே² ஸுக²ம்ஹி ச.
Na nindāyaṃ pasaṃsāya, na te dukkhe sukhamhi ca.
665.
665.
‘‘ஸப்³ப³த்த² தே ந லிம்பந்தி, உத³பி³ந்து³வ பொக்க²ரே;
‘‘Sabbattha te na limpanti, udabinduva pokkhare;
ஸப்³ப³த்த² ஸுகி²தா தீ⁴ரா, ஸப்³ப³த்த² அபராஜிதா.
Sabbattha sukhitā dhīrā, sabbattha aparājitā.
666.
666.
‘‘த⁴ம்மேன ச அலாபோ⁴ யோ, யோ ச லாபோ⁴ அத⁴ம்மிகோ;
‘‘Dhammena ca alābho yo, yo ca lābho adhammiko;
அலாபோ⁴ த⁴ம்மிகோ ஸெய்யோ, யஞ்சே லாபோ⁴ அத⁴ம்மிகோ.
Alābho dhammiko seyyo, yañce lābho adhammiko.
667.
667.
‘‘யஸோ ச அப்பபு³த்³தீ⁴னங், விஞ்ஞூனங் அயஸோ ச யோ;
‘‘Yaso ca appabuddhīnaṃ, viññūnaṃ ayaso ca yo;
அயஸோவ ஸெய்யோ விஞ்ஞூனங், ந யஸோ அப்பபு³த்³தி⁴னங்.
Ayasova seyyo viññūnaṃ, na yaso appabuddhinaṃ.
668.
668.
‘‘து³ம்மேதே⁴ஹி பஸங்ஸா ச, விஞ்ஞூஹி க³ரஹா ச யா;
‘‘Dummedhehi pasaṃsā ca, viññūhi garahā ca yā;
க³ரஹாவ ஸெய்யோ விஞ்ஞூஹி, யஞ்சே பா³லப்பஸங்ஸனா.
Garahāva seyyo viññūhi, yañce bālappasaṃsanā.
669.
669.
‘‘ஸுக²ஞ்ச காமமயிகங், து³க்க²ஞ்ச பவிவேகியங்;
‘‘Sukhañca kāmamayikaṃ, dukkhañca pavivekiyaṃ;
பவிவேகது³க்க²ங் ஸெய்யோ, யஞ்சே காமமயங் ஸுக²ங்.
Pavivekadukkhaṃ seyyo, yañce kāmamayaṃ sukhaṃ.
670.
670.
‘‘ஜீவிதஞ்ச அத⁴ம்மேன, த⁴ம்மேன மரணஞ்ச யங்;
‘‘Jīvitañca adhammena, dhammena maraṇañca yaṃ;
மரணங் த⁴ம்மிகங் ஸெய்யோ, யஞ்சே ஜீவே அத⁴ம்மிகங்.
Maraṇaṃ dhammikaṃ seyyo, yañce jīve adhammikaṃ.
671.
671.
‘‘காமகோபப்பஹீனா யே, ஸந்தசித்தா ப⁴வாப⁴வே;
‘‘Kāmakopappahīnā ye, santacittā bhavābhave;
சரந்தி லோகே அஸிதா, நத்தி² தேஸங் பியாபியங்.
Caranti loke asitā, natthi tesaṃ piyāpiyaṃ.
672.
672.
‘‘பா⁴வயித்வான பொ³ஜ்ஜ²ங்கே³, இந்த்³ரியானி ப³லானி ச;
‘‘Bhāvayitvāna bojjhaṅge, indriyāni balāni ca;
பப்புய்ய பரமங் ஸந்திங், பரினிப்³ப³ந்தினாஸவா’’தி. – இமா கா³தா² அபா⁴ஸி;
Pappuyya paramaṃ santiṃ, parinibbantināsavā’’ti. – imā gāthā abhāsi;
தத்த² ஆஜஞ்ஞோதி, உஸபா⁴ஜானீயோ. து⁴ரே யுத்தோதி, ஸகடது⁴ரே யோஜிதோ. து⁴ரஸ்ஸஹோதி, து⁴ரவாஹோ. கா³தா²ஸுக²த்த²ஞ்செத்த² த்³விஸகாரதோ நித்³தே³ஸோ கதோ, ஸகடபா⁴ரங் வஹிதுங் ஸமத்தோ²தி அத்தோ². மதி²தோ அதிபா⁴ரேனாதி, அதிபா⁴ரேன க³ருபா⁴ரேன பீளிதோ. ‘‘மத்³தி³தோ’’திபி பாளி, ஸோ ஏவத்தோ². ஸங்யுக³ந்தி, அத்தனோ க²ந்தே⁴ ட²பிதங் யுக³ங் நாதிவத்ததி ந அதிக்காமேதி, ஸம்மா யோ உத்³த⁴ரித்வா து⁴ரங் ச²ட்³டெ³த்வா ந திட்ட²தி. ஏவந்தி யதா² ஸோ தோ⁴ரய்ஹோ அத்தனோ ப⁴த்³ராஜானீயதாய அத்தனோ தீ⁴ரவீரதாய அத்தனோ பா⁴ரங் நாதிவத்ததி ந பரிச்சஜதி, ஏவங் யே வாரினா விய மஹாஸமுத்³தோ³ லோகியலோகுத்தராய பஞ்ஞாய தித்தா தா⁴தா பரிபுண்ணா, தே பரே நிஹீனபஞ்ஞே ந அதிமஞ்ஞந்தி, ந பரிப⁴வந்தி. தத்த² காரணமாஹ ‘‘அரியத⁴ம்மோவ பாணின’’ந்தி, பாணினங் ஸத்தேஸு அயங் அரியானங் த⁴ம்மோ யதி³த³ங் தேஸங் பஞ்ஞாய பாரிபூரிங் க³தத்தா லாபா⁴தி³னா அத்தானுக்கங்ஸனங் விய அலாபா⁴தி³னா பரேஸங் அவம்ப⁴னங்.
Tattha ājaññoti, usabhājānīyo. Dhure yuttoti, sakaṭadhure yojito. Dhurassahoti, dhuravāho. Gāthāsukhatthañcettha dvisakārato niddeso kato, sakaṭabhāraṃ vahituṃ samatthoti attho. Mathito atibhārenāti, atibhārena garubhārena pīḷito. ‘‘Maddito’’tipi pāḷi, so evattho. Saṃyuganti, attano khandhe ṭhapitaṃ yugaṃ nātivattati na atikkāmeti, sammā yo uddharitvā dhuraṃ chaḍḍetvā na tiṭṭhati. Evanti yathā so dhorayho attano bhadrājānīyatāya attano dhīravīratāya attano bhāraṃ nātivattati na pariccajati, evaṃ ye vārinā viya mahāsamuddo lokiyalokuttarāya paññāya tittā dhātā paripuṇṇā, te pare nihīnapaññe na atimaññanti, na paribhavanti. Tattha kāraṇamāha ‘‘ariyadhammova pāṇina’’nti, pāṇinaṃ sattesu ayaṃ ariyānaṃ dhammo yadidaṃ tesaṃ paññāya pāripūriṃ gatattā lābhādinā attānukkaṃsanaṃ viya alābhādinā paresaṃ avambhanaṃ.
ஏவங் பஞ்ஞாபாரிபூரியா அரியானங் ஸுக²விஹாரங் த³ஸ்ஸெத்வா தத³பா⁴வதோ அனரியானங் து³க்க²விஹாரங் த³ஸ்ஸேதுங் ‘‘காலே’’திஆதி³ வுத்தங். தத்த² காலேதி லாபா⁴லாபா⁴தி³னா ஸமங்கீ³பூ⁴தகாலே. காலவஸங் பத்தாதி லாபா⁴தி³காலஸ்ஸ ச வஸங் உபக³தா, லாபா⁴தி³னா ஸோமனஸ்ஸிதா அலாபா⁴தி³னா ச தோ³மனஸ்ஸிதாதி அத்தோ². ப⁴வாப⁴வவஸங் க³தாதி ப⁴வஸ்ஸ அப⁴வஸ்ஸ ச வஸங் உபக³தா வுத்³தி⁴ஹானியோ அனுவத்தந்தா தே. நரா து³க்க²ங் நிக³ச்ச²ந்தி, தேத⁴ ஸோசந்தி மாணவாதி தே நரா ‘‘மாணவா’’தி லத்³த⁴னாமா ஸத்தா லாபா⁴லாபா⁴தி³வஸேன வுத்³தி⁴ஹானிவஸேன அனுரோத⁴படிவிரோத⁴ங் ஆபன்னா இத⁴லோகே ஸோசந்தி, பரலோகே ச நிரயாதி³து³க்க²ங் க³ச்ச²ந்தி பாபுணந்தீதி அத்தோ².
Evaṃ paññāpāripūriyā ariyānaṃ sukhavihāraṃ dassetvā tadabhāvato anariyānaṃ dukkhavihāraṃ dassetuṃ ‘‘kāle’’tiādi vuttaṃ. Tattha kāleti lābhālābhādinā samaṅgībhūtakāle. Kālavasaṃ pattāti lābhādikālassa ca vasaṃ upagatā, lābhādinā somanassitā alābhādinā ca domanassitāti attho. Bhavābhavavasaṃ gatāti bhavassa abhavassa ca vasaṃ upagatā vuddhihāniyo anuvattantā te. Narā dukkhaṃ nigacchanti, tedha socanti māṇavāti te narā ‘‘māṇavā’’ti laddhanāmā sattā lābhālābhādivasena vuddhihānivasena anurodhapaṭivirodhaṃ āpannā idhaloke socanti, paraloke ca nirayādidukkhaṃ gacchanti pāpuṇantīti attho.
‘‘உன்னதா’’திஆதி³னாபி லோகத⁴ம்மவஸேன ஸத்தானங் அனத்த²ப்பத்திமேவ த³ஸ்ஸேதி. தத்த² உன்னதா ஸுக²த⁴ம்மேனாதி ஸுக²ஹேதுனா ஸுக²பச்சயேன போ⁴க³ஸம்பத்திஆதி³னா உன்னதிங் க³தா, போ⁴க³மதா³தி³னா மத்தாதி அத்தோ². து³க்க²த⁴ம்மேன சோனதாதி து³க்க²ஹேதுனா து³க்க²பச்சயேன போ⁴க³விபத்திஆதி³னா நிஹீனதங் க³தா தா³லித்³தி³யாதி³னா காபஞ்ஞதங் பத்தா. த்³வயேனாதி யதா²வுத்தேன உன்னதிஓனதித்³வயேன லாபா⁴லாபா⁴தி³த்³வயேன வா பா³லபுது²ஜ்ஜனா ஹஞ்ஞந்தி, அனுரோத⁴படிவிரோத⁴வஸேன விபா³தீ⁴யந்தி பீளியந்தி. கஸ்மா? யதா²பூ⁴தங் அத³ஸ்ஸினோ யஸ்மா தே த⁴ம்மஸபா⁴வங் யாதா²வதோ நப்³ப⁴ஞ்ஞங்ஸு, பரிஞ்ஞாதக்க²ந்தா⁴ பஹீனகிலேஸா ச ந ஹொந்தி, தஸ்மாதி அத்தோ². ‘‘யதா²பூ⁴தங் அத³ஸ்ஸனா’’திபி பட²ந்தி, அத³ஸ்ஸனஹேதூதி அத்தோ². யே ச து³க்கே² ஸுக²ஸ்மிஞ்ச, மஜ்ஜே² ஸிப்³பி³னிமச்சகூ³தி யே பன அரியா து³க்க²வேத³னாய ஸுக²வேத³னாய மஜ்ஜ²த்ததாவேத³னாய ச தப்படிப³த்³த⁴ங் ச²ந்த³ராக³பூ⁴தங் ஸிப்³பி³னிங் தண்ஹங் அக்³க³மக்³கா³தி⁴க³மேன அச்சகூ³ அதிக்கமிங்ஸு, தே இந்த³கீ²லோ விய வாதேஹி லோகத⁴ம்மேஹி அஸம்பகம்பியா டி²தா, ந தே உன்னதஓனதா, கதா³சிபி உன்னதா வா ஓனதா வா ந ஹொந்தி ஸப்³ப³ஸோ அனுனயபடிகா⁴பா⁴வதோ.
‘‘Unnatā’’tiādināpi lokadhammavasena sattānaṃ anatthappattimeva dasseti. Tattha unnatā sukhadhammenāti sukhahetunā sukhapaccayena bhogasampattiādinā unnatiṃ gatā, bhogamadādinā mattāti attho. Dukkhadhammena conatāti dukkhahetunā dukkhapaccayena bhogavipattiādinā nihīnataṃ gatā dāliddiyādinā kāpaññataṃ pattā. Dvayenāti yathāvuttena unnationatidvayena lābhālābhādidvayena vā bālaputhujjanā haññanti, anurodhapaṭivirodhavasena vibādhīyanti pīḷiyanti. Kasmā? Yathābhūtaṃ adassino yasmā te dhammasabhāvaṃ yāthāvato nabbhaññaṃsu, pariññātakkhandhā pahīnakilesā ca na honti, tasmāti attho. ‘‘Yathābhūtaṃ adassanā’’tipi paṭhanti, adassanahetūti attho. Ye ca dukkhe sukhasmiñca, majjhe sibbinimaccagūti ye pana ariyā dukkhavedanāya sukhavedanāya majjhattatāvedanāya ca tappaṭibaddhaṃ chandarāgabhūtaṃ sibbiniṃ taṇhaṃ aggamaggādhigamena accagū atikkamiṃsu, te indakhīlo viya vātehi lokadhammehi asampakampiyā ṭhitā, na te unnataonatā, kadācipi unnatā vā onatā vā na honti sabbaso anunayapaṭighābhāvato.
ஏவங் வேத³னாதி⁴ட்டா²னங் அரஹதோ அனுபலேபங் த³ஸ்ஸெத்வா இதா³னி லோகத⁴ம்மே விப⁴ஜித்வா ஸப்³ப³த்த²கமேவஸ்ஸ அனுபலேபங் த³ஸ்ஸெந்தோ ‘‘ந ஹேவா’’திஆதி³மாஹ. தத்த² லாபே⁴தி சீவராதீ³னங் பச்சயானங் படிலாபே⁴. அலாபே⁴தி தேஸங்யேவ அப்படிலாபே⁴ அபக³மே. ந யஸேதி பரிவாரஹானியங் அகித்தியஞ்ச. கித்தியாதி பரம்முகா² கித்தனே பத்த²டயஸதாயங். நிந்தா³யந்தி ஸம்முகா² க³ரஹாயங். பஸங்ஸாயந்தி, பச்சக்க²தோ கு³ணாபி⁴த்த²வனே. து³க்கே²தி து³க்கே² உப்பன்னே. ஸுகே²தி எத்தா²பி ஏஸேவ நயோ.
Evaṃ vedanādhiṭṭhānaṃ arahato anupalepaṃ dassetvā idāni lokadhamme vibhajitvā sabbatthakamevassa anupalepaṃ dassento ‘‘na hevā’’tiādimāha. Tattha lābheti cīvarādīnaṃ paccayānaṃ paṭilābhe. Alābheti tesaṃyeva appaṭilābhe apagame. Na yaseti parivārahāniyaṃ akittiyañca. Kittiyāti parammukhā kittane patthaṭayasatāyaṃ. Nindāyanti sammukhā garahāyaṃ. Pasaṃsāyanti, paccakkhato guṇābhitthavane. Dukkheti dukkhe uppanne. Sukheti etthāpi eseva nayo.
ஸப்³ப³த்தா²தி ஸப்³ப³ஸ்மிங் யதா²வுத்தே அட்ட²விதே⁴பி லோகத⁴ம்மே, ஸப்³ப³த்த² வா ரூபாதி³கே விஸயே தே கீ²ணாஸவா ந லிம்பந்தி ஸப்³ப³ஸோ பஹீனகிலேஸத்தா. யதா² கிங்? உத³பி³ந்து³வ பொக்க²ரே யதா² கமலத³லே ஜலபி³ந்து³ அல்லீயித்வா டி²தம்பி தேன ந லிம்பதி, ஜலபி³ந்து³னா ச கமலத³லங், அஞ்ஞத³த்து² விஸங்ஸட்ட²மேவ, ஏவமேதேபி உபட்டி²தே லாபா⁴தி³கே, ஆபாத²க³தே ரூபாதி³ஆரம்மணே ச விஸங்ஸட்டா² ஏவங். ததோ ஏவ தீ⁴ரா பண்டி³தா ஸப்³ப³த்த² லாபா⁴தீ³ஸு ஞாணமுகே²ன பியனிமித்தானங் ஸோகாதீ³னஞ்ச அபா⁴வதோ ஸுகி²தா லாபா⁴தீ³ஹி ச அனபி⁴ப⁴வனீயதோ ஸப்³ப³த்த² அபராஜிதாவ ஹொந்தி.
Sabbatthāti sabbasmiṃ yathāvutte aṭṭhavidhepi lokadhamme, sabbattha vā rūpādike visaye te khīṇāsavā na limpanti sabbaso pahīnakilesattā. Yathā kiṃ? Udabinduva pokkhare yathā kamaladale jalabindu allīyitvā ṭhitampi tena na limpati, jalabindunā ca kamaladalaṃ, aññadatthu visaṃsaṭṭhameva, evametepi upaṭṭhite lābhādike, āpāthagate rūpādiārammaṇe ca visaṃsaṭṭhā evaṃ. Tato eva dhīrā paṇḍitā sabbattha lābhādīsu ñāṇamukhena piyanimittānaṃ sokādīnañca abhāvato sukhitā lābhādīhi ca anabhibhavanīyato sabbattha aparājitāva honti.
இதா³னி லாபா⁴லாபா⁴தீ³ஸு ஸெய்யங் நித்³தா⁴ரெத்வா த³ஸ்ஸெந்தோ ‘‘த⁴ம்மேனா’’திஆதி³மாஹ. தத்த² த⁴ம்மேன ச அலாபோ⁴ யோதி யோ த⁴ம்மங் ரக்க²ந்தஸ்ஸ தங்னிமித்தங் அலாபோ⁴ லாபா⁴பா⁴வோ, லாப⁴ஹானி. யோ ச லாபோ⁴ அத⁴ம்மிகோ அத⁴ம்மேன அஞ்ஞாயேன பு³த்³த⁴படிகுட்டே²ன விதி⁴னா உப்பன்னோ, தேஸு த்³வீஸு அலாபோ⁴ த⁴ம்மிகோ த⁴ம்மாவஹோ ஸெய்யோ, யாதி³ஸங் லாப⁴ங் பரிவஜ்ஜந்தஸ்ஸ அகுஸலா த⁴ம்மா பரிஹாயந்தி, குஸலா த⁴ம்மா அபி⁴வட்³ட⁴ந்தி, தாதி³ஸோ அலாபோ⁴ பாஸங்ஸதரோ அத்தா²வஹோ. யஞ்சே லாபோ⁴ அத⁴ம்மிகோதி யோ லாபோ⁴ அத⁴ம்மேன உப்பன்னோ, ஸோ ந ஸெய்யோதி அதி⁴ப்பாயோ.
Idāni lābhālābhādīsu seyyaṃ niddhāretvā dassento ‘‘dhammenā’’tiādimāha. Tattha dhammena ca alābho yoti yo dhammaṃ rakkhantassa taṃnimittaṃ alābho lābhābhāvo, lābhahāni. Yo ca lābho adhammiko adhammena aññāyena buddhapaṭikuṭṭhena vidhinā uppanno, tesu dvīsu alābho dhammiko dhammāvaho seyyo, yādisaṃ lābhaṃ parivajjantassa akusalā dhammā parihāyanti, kusalā dhammā abhivaḍḍhanti, tādiso alābho pāsaṃsataro atthāvaho. Yañce lābho adhammikoti yo lābho adhammena uppanno, so na seyyoti adhippāyo.
யஸோ ச அப்பபு³த்³தீ⁴னங், விஞ்ஞூனங் அயஸோ ச யோதி யோ அப்பபு³த்³தீ⁴னங் து³ப்பஞ்ஞானங் வஸேன புக்³க³லஸ்ஸ யஸோ லப்³ப⁴தி, யோ ச விஞ்ஞூனங் பண்டி³தானங் வஸேன அயஸோ யஸஹானி. இமேஸு த்³வீஸு அயஸோவ ஸெய்யோ விஞ்ஞூனங். தே ஹிஸ்ஸ யதா² அகுஸலா த⁴ம்மா பரிஹாயந்தி, குஸலா த⁴ம்மா அபி⁴வட்³ட⁴ந்தி, ஏவங் யஸஹானிங் இச்செ²ய்யுங், ததா² ச ப⁴ப்³ப³ஜாதிகோ தங் அகு³ணங் பஹாய கு³ணே பதிட்டெ²ய்ய. ந யஸோ அப்பபு³த்³தீ⁴னந்தி து³ப்பஞ்ஞானங் வஸேன யஸோ ஸெய்யோ ஹோதி, தே ஹி அபூ⁴தகு³ணாபி⁴ப்³யாஹாரவஸேனாபி நங் உப்பாதெ³ய்யுங், ஸோ சஸ்ஸ இத⁴ சேவ விஞ்ஞூக³ரஹாதி³னா ஸம்பராயே ச து³க்³க³தியங் து³க்க²பரிக்கிலேஸாதி³னா அனத்தா²வஹோ. தேனாஹ ப⁴க³வா – ‘‘லாபோ⁴ ஸிலோகோ ஸக்காரோ, மிச்சா²லத்³தோ⁴ ச யோ யஸோ’’தி (ஸு॰ நி॰ 440) ‘‘ஸக்காரோ காபுரிஸங் ஹந்தீ’’தி (சூளவ॰ 335; அ॰ நி॰ 4.68) ச.
Yasoca appabuddhīnaṃ, viññūnaṃ ayaso ca yoti yo appabuddhīnaṃ duppaññānaṃ vasena puggalassa yaso labbhati, yo ca viññūnaṃ paṇḍitānaṃ vasena ayaso yasahāni. Imesu dvīsu ayasova seyyo viññūnaṃ. Te hissa yathā akusalā dhammā parihāyanti, kusalā dhammā abhivaḍḍhanti, evaṃ yasahāniṃ iccheyyuṃ, tathā ca bhabbajātiko taṃ aguṇaṃ pahāya guṇe patiṭṭheyya. Na yaso appabuddhīnanti duppaññānaṃ vasena yaso seyyo hoti, te hi abhūtaguṇābhibyāhāravasenāpi naṃ uppādeyyuṃ, so cassa idha ceva viññūgarahādinā samparāye ca duggatiyaṃ dukkhaparikkilesādinā anatthāvaho. Tenāha bhagavā – ‘‘lābho siloko sakkāro, micchāladdho ca yo yaso’’ti (su. ni. 440) ‘‘sakkāro kāpurisaṃ hantī’’ti (cūḷava. 335; a. ni. 4.68) ca.
து³ம்மேதே⁴ஹீதி, நிப்பஞ்ஞேஹி. யஞ்சே பா³லப்பஸங்ஸனாதி பா³லேஹி அவித்³த³ஸூஹி யா நாம பஸங்ஸனா.
Dummedhehīti, nippaññehi. Yañce bālappasaṃsanāti bālehi aviddasūhi yā nāma pasaṃsanā.
காமமயிகந்தி வத்து²காமமயங், காமகு³ணே படிச்ச உப்பன்னங். து³க்க²ஞ்ச பவிவேகியந்தி பவிவேகதோ நிப்³ப³த்தங் காயகிலமத²வஸேன பவத்தங் விஸமாஸனுபதாபாதி³ஹேதுகங் காயிகங் து³க்க²ங், தங் பன நிராமிஸவிவட்டூபனிஸ்ஸயதாய விஞ்ஞூனங் பாஸங்ஸா. தேன வுத்தங் ‘‘பவிவேகது³க்க²ங் ஸெய்யோ’’தி.
Kāmamayikanti vatthukāmamayaṃ, kāmaguṇe paṭicca uppannaṃ. Dukkhañca pavivekiyanti pavivekato nibbattaṃ kāyakilamathavasena pavattaṃ visamāsanupatāpādihetukaṃ kāyikaṃ dukkhaṃ, taṃ pana nirāmisavivaṭṭūpanissayatāya viññūnaṃ pāsaṃsā. Tena vuttaṃ ‘‘pavivekadukkhaṃ seyyo’’ti.
ஜீவிதஞ்ச அத⁴ம்மேனாதி அத⁴ம்மேன ஜீவிககப்பனங் ஜீவிதஹேது அத⁴ம்மசரணங். த⁴ம்மேன மரணங் நாம ‘‘இமங் நாம பாபங் அகரொந்தங் தங் மாரெஸ்ஸாமீ’’தி கேனசி வுத்தே மாரெந்தேபி தஸ்மிங் பாபங் அகத்வா த⁴ம்மங் அவிகோபெந்தஸ்ஸ த⁴ம்மஹேதுமரணங் த⁴ம்மிகங் ஸெய்யோதி தாதி³ஸங் மரணங் த⁴ம்மதோ அனபேதத்தா த⁴ம்மிகங் ஸக்³க³ஸம்பாபனதோ நிப்³பா³னுபனிஸ்ஸயதோ ச விஞ்ஞூனங் பாஸங்ஸதரங். ததா² ஹி வுத்தங் –
Jīvitañcaadhammenāti adhammena jīvikakappanaṃ jīvitahetu adhammacaraṇaṃ. Dhammena maraṇaṃ nāma ‘‘imaṃ nāma pāpaṃ akarontaṃ taṃ māressāmī’’ti kenaci vutte mārentepi tasmiṃ pāpaṃ akatvā dhammaṃ avikopentassa dhammahetumaraṇaṃ dhammikaṃ seyyoti tādisaṃ maraṇaṃ dhammato anapetattā dhammikaṃ saggasampāpanato nibbānupanissayato ca viññūnaṃ pāsaṃsataraṃ. Tathā hi vuttaṃ –
‘‘சஜே த⁴னங் அங்க³வரஸ்ஸ ஹேது, அங்க³ங் சஜே ஜீவிதங் ரக்க²மானோ;
‘‘Caje dhanaṃ aṅgavarassa hetu, aṅgaṃ caje jīvitaṃ rakkhamāno;
அங்க³ங் த⁴னங் ஜீவிதஞ்சாபி ஸப்³ப³ங், சஜே நரோ த⁴ம்மமனுஸ்ஸரந்தோ’’தி. (ஜா॰ 2.21.470);
Aṅgaṃ dhanaṃ jīvitañcāpi sabbaṃ, caje naro dhammamanussaranto’’ti. (jā. 2.21.470);
யஞ்சே ஜீவே அத⁴ம்மிகந்தி புரிஸோ யங் த⁴ம்மதோ அபேதங் ஜீவிகங் ஜீவெய்ய, தங் ந ஸேவெய்ய விஞ்ஞூஹி க³ரஹிதத்தா அபாயஸம்பாபனதோ சாதி அதி⁴ப்பாயோ.
Yañce jīve adhammikanti puriso yaṃ dhammato apetaṃ jīvikaṃ jīveyya, taṃ na seveyya viññūhi garahitattā apāyasampāpanato cāti adhippāyo.
இதா³னி யதா²வுத்தங் கீ²ணாஸவானங் அனுபலேபங் காரணதோ த³ஸ்ஸெந்தோ ‘‘காமகோபபஹீனா’’திஆதி³கா³த²மாஹ.
Idāni yathāvuttaṃ khīṇāsavānaṃ anupalepaṃ kāraṇato dassento ‘‘kāmakopapahīnā’’tiādigāthamāha.
தத்த² காமகோபபஹீனாதி அரியமக்³கே³ன ஸப்³ப³ஸோவ பஹீனா அனுரோத⁴படிவிரோதா⁴. ஸந்தசித்தா ப⁴வாப⁴வேதி கு²த்³த³கே சேவ மஹந்தே ச ப⁴வே அனவஸேஸபஹீனகிலேஸபரிளாஹதாய வூபஸந்தசித்தா. லோகேதி க²ந்தா⁴தி³லோகே. அஸிதாதி தண்ஹாதி³ட்டி²னிஸ்ஸயவஸேன அனிஸ்ஸிதா. நத்தி² தேஸங் பியாபியந்தி தேஸங் கீ²ணாஸவானங் கத்த²சி லாபா⁴தி³கே ரூபாதி³விஸயே ச பியங் வா அபியங் வா நத்தி², தங்னிமித்தானங் கிலேஸானங் ஸப்³ப³ஸோ ஸமுச்சி²ன்னத்தா.
Tattha kāmakopapahīnāti ariyamaggena sabbasova pahīnā anurodhapaṭivirodhā. Santacittā bhavābhaveti khuddake ceva mahante ca bhave anavasesapahīnakilesapariḷāhatāya vūpasantacittā. Loketi khandhādiloke. Asitāti taṇhādiṭṭhinissayavasena anissitā. Natthi tesaṃ piyāpiyanti tesaṃ khīṇāsavānaṃ katthaci lābhādike rūpādivisaye ca piyaṃ vā apiyaṃ vā natthi, taṃnimittānaṃ kilesānaṃ sabbaso samucchinnattā.
இதா³னி யாய பா⁴வனாய தே ஏவரூபா ஜாதா, தங் த³ஸ்ஸெத்வா அனுபாதி³ஸேஸாய நிப்³பா³னதா⁴துயா தே³ஸனாய கூடங் க³ண்ஹந்தோ ‘‘பா⁴வயித்வானா’’தி ஓஸானகா³த²மாஹ. தத்த² பப்புய்யாதி, பாபுணித்வா. ஸேஸங் ஹெட்டா² வுத்தனயமேவ. இமா ஏவ ச கா³தா² தே²ரஸ்ஸ அஞ்ஞாப்³யாகரணாபி அஹேஸுங்.
Idāni yāya bhāvanāya te evarūpā jātā, taṃ dassetvā anupādisesāya nibbānadhātuyā desanāya kūṭaṃ gaṇhanto ‘‘bhāvayitvānā’’ti osānagāthamāha. Tattha pappuyyāti, pāpuṇitvā. Sesaṃ heṭṭhā vuttanayameva. Imā eva ca gāthā therassa aññābyākaraṇāpi ahesuṃ.
கோ³த³த்தத்தே²ரகா³தா²வண்ணனா நிட்டி²தா.
Godattattheragāthāvaṇṇanā niṭṭhitā.
சுத்³த³ஸகனிபாதவண்ணனா நிட்டி²தா.
Cuddasakanipātavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரகா³தா²பாளி • Theragāthāpāḷi / 2. கோ³த³த்தத்தே²ரகா³தா² • 2. Godattattheragāthā
