| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
3. ගොධසක්‌කසුත්‌තවණ්‌ණනා
3. Godhasakkasuttavaṇṇanā
1019. තතියෙ භගවාව එතං ජානෙය්‍ය එතෙහි ධම්‌මෙහි සමන්‌නාගතං වා අසමන්‌නාගතං වාති ඉදං සො සක්‌කො තීහි ධම්‌මෙහි සමන්‌නාගතස්‌ස පුග්‌ගලස්‌ස සොතාපන්‌නභාවං, චතූහි වා ධම්‌මෙහි සමන්‌නාගතස්‌ස සොතාපන්‌නභාවං භගවාව ජානාතීති අධිප්‌පායෙන ආහ.
1019. Tatiye bhagavāva etaṃ jāneyya etehi dhammehi samannāgataṃ vā asamannāgataṃ vāti idaṃ so sakko tīhi dhammehi samannāgatassa puggalassa sotāpannabhāvaṃ, catūhi vā dhammehi samannāgatassa sotāpannabhāvaṃ bhagavāva jānātīti adhippāyena āha.
කොචිදෙව ධම්‌මසමුප්‌පාදො උප්‌පජ්‌ජෙය්‍යාති කිඤ්‌චිදෙව කාරණං උප්‌පජ්‌ජෙය්‍ය. එකතො අස්‌ස භගවා, එකතො භික්‌ඛුසඞ්‌ඝොති යස්‌මිං කාරණෙ උප්‌පන්‌නෙ භගවා භික්‌ඛුසඞ්‌ඝෙන නානාලද්‌ධිකො හුත්‌වා එකං වාදං වදන්‌තො එකතො අස්‌ස, භික්‌ඛුසඞ්‌ඝොපි එකං වදන්‌තො එකතොති අත්‌ථො. තෙනෙවාහන්‌ති යං වාදං තුම්‌හෙ වදෙථ, තමෙවාහං ගණ්‌හෙය්‍යන්‌ති. නනු ච අරියසාවකස්‌ස රතනත්‌තයෙ පසාදනානත්‌තං නත්‌ථි, අථ කස්‌මා එස එවමාහාති? භගවතො සබ්‌බඤ්‌ඤුතාය. එවඤ්‌හිස්‌ස හොති ‘‘භික්‌ඛුසඞ්‌ඝො අත්‌තනො අසබ්‌බඤ්‌ඤුතාය අජානිත්‌වාපි කථෙය්‍ය, සත්‌ථු පන අඤ්‌ඤාණං නාම නත්‌ථී’’ති. තස්‌මා එවමාහ. අඤ්‌ඤත්‍ර කල්‍යාණා අඤ්‌ඤත්‍ර කුසලාති කල්‍යාණමෙව කුසලමෙව වදාමි, න කල්‍යාණකුසලවිමුත්‌තන්‌ති. අපිචස්‌ස අනවජ්‌ජනදොසො එසොති.
Kocideva dhammasamuppādo uppajjeyyāti kiñcideva kāraṇaṃ uppajjeyya. Ekato assa bhagavā, ekato bhikkhusaṅghoti yasmiṃ kāraṇe uppanne bhagavā bhikkhusaṅghena nānāladdhiko hutvā ekaṃ vādaṃ vadanto ekato assa, bhikkhusaṅghopi ekaṃ vadanto ekatoti attho. Tenevāhanti yaṃ vādaṃ tumhe vadetha, tamevāhaṃ gaṇheyyanti. Nanu ca ariyasāvakassa ratanattaye pasādanānattaṃ natthi, atha kasmā esa evamāhāti? Bhagavato sabbaññutāya. Evañhissa hoti ‘‘bhikkhusaṅgho attano asabbaññutāya ajānitvāpi katheyya, satthu pana aññāṇaṃ nāma natthī’’ti. Tasmā evamāha. Aññatra kalyāṇā aññatra kusalāti kalyāṇameva kusalameva vadāmi, na kalyāṇakusalavimuttanti. Apicassa anavajjanadoso esoti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 3. ගොධසක්‌කසුත්‌තං • 3. Godhasakkasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3. ගොධසක්‌කසුත්‌තවණ්‌ණනා • 3. Godhasakkasuttavaṇṇanā
