| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. கோ³தி⁴கஸுத்தவண்ணனா
3. Godhikasuttavaṇṇanā
159. ததியே இஸிகி³லிபஸ்ஸேதி இஸிகி³லிஸ்ஸ நாம பப்³ப³தஸ்ஸ பஸ்ஸே. காளஸிலாயந்தி காளவண்ணாய ஸிலாயங். ஸாமயிகங் சேதோவிமுத்திந்தி அப்பிதப்பிதக்க²ணே பச்சனீகத⁴ம்மேஹி விமுச்சதி, ஆரம்மணே ச அதி⁴முச்சதீதி லோகியஸமாபத்தி ஸாமயிகா சேதோவிமுத்தி நாம. பு²ஸீதி படிலபி⁴. பரிஹாயீதி கஸ்மா யாவ ச²ட்ட²ங் பரிஹாயி? ஸாபா³த⁴த்தா. தே²ரஸ்ஸ கிர வாதபித்தஸெம்ஹவஸேன அனுஸாயிகோ ஆபா³தோ⁴ அத்தி², தேன ஸமாதி⁴ஸ்ஸ ஸப்பாயே உபகாரகத⁴ம்மே பூரேதுங் ந ஸக்கோதி, அப்பிதப்பிதாய ஸமாபத்தியா பரிஹாயதி.
159. Tatiye isigilipasseti isigilissa nāma pabbatassa passe. Kāḷasilāyanti kāḷavaṇṇāya silāyaṃ. Sāmayikaṃ cetovimuttinti appitappitakkhaṇe paccanīkadhammehi vimuccati, ārammaṇe ca adhimuccatīti lokiyasamāpatti sāmayikā cetovimutti nāma. Phusīti paṭilabhi. Parihāyīti kasmā yāva chaṭṭhaṃ parihāyi? Sābādhattā. Therassa kira vātapittasemhavasena anusāyiko ābādho atthi, tena samādhissa sappāye upakārakadhamme pūretuṃ na sakkoti, appitappitāya samāpattiyā parihāyati.
யங்னூனாஹங் ஸத்த²ங் ஆஹரெய்யந்தி ஸோ கிர சிந்தேஸி, யஸ்மா பரிஹீனஜ்ஜா²னஸ்ஸ காலங்கரோதோ அனிப³த்³தா⁴ க³தி ஹோதி, அபரிஹீனஜ்ஜா²னஸ்ஸ நிப³த்³தா⁴ க³தி ஹோதி, ப்³ரஹ்மலோகே நிப்³ப³த்ததி, தஸ்மா ஸத்த²ங் ஆஹரிதுகாமோ அஹோஸி. உபஸங்கமீதி – ‘‘அயங் ஸமணோ ஸத்த²ங் ஆஹரிதுகாமோ, ஸத்தா²ஹரணஞ்ச நாமேதங் காயே ச ஜீவிதே ச அனபெக்க²ஸ்ஸ ஹோதி. யோ ஏவங் காயே ச ஜீவிதே ச அனபெக்கோ² ஹோதி, ஸோ மூலகம்மட்டா²னங் ஸம்மஸித்வா அரஹத்தம்பி க³ஹேதுங் ஸமத்தோ² ஹோதி, மயா பன படிபா³ஹிதோபி ஏஸ ந ஓரமிஸ்ஸதி, ஸத்தா²ரா படிபா³ஹிதோ ஓரமிஸ்ஸதீ’’தி தே²ரஸ்ஸ அத்த²காமோ விய ஹுத்வா யேன ப⁴க³வா தேனுபஸங்கமி.
Yaṃnūnāhaṃ satthaṃ āhareyyanti so kira cintesi, yasmā parihīnajjhānassa kālaṅkaroto anibaddhā gati hoti, aparihīnajjhānassa nibaddhā gati hoti, brahmaloke nibbattati, tasmā satthaṃ āharitukāmo ahosi. Upasaṅkamīti – ‘‘ayaṃ samaṇo satthaṃ āharitukāmo, satthāharaṇañca nāmetaṃ kāye ca jīvite ca anapekkhassa hoti. Yo evaṃ kāye ca jīvite ca anapekkho hoti, so mūlakammaṭṭhānaṃ sammasitvā arahattampi gahetuṃ samattho hoti, mayā pana paṭibāhitopi esa na oramissati, satthārā paṭibāhito oramissatī’’ti therassa atthakāmo viya hutvā yena bhagavā tenupasaṅkami.
ஜலாதி ஜலமானா. பாதே³ வந்தா³மி சக்கு²மாதி பஞ்சஹி சக்கூ²ஹி சக்கு²மா தவ பாதே³ வந்தா³மி. ஜுதிந்த⁴ராதி ஆனுபா⁴வத⁴ரா. அப்பத்தமானஸோதி அப்பத்தஅரஹத்தோ. ஸேகோ²தி ஸீலாதீ³னி ஸிக்க²மானோ ஸகரணீயோ. ஜனே ஸுதாதி ஜனே விஸ்ஸுதா. ஸத்த²ங் ஆஹரிதங் ஹோதீதி தே²ரோ கிர ‘‘கிங் மய்ஹங் இமினா ஜீவிதேனா’’தி? உத்தானோ நிபஜ்ஜித்வா ஸத்தே²ன க³லனாளிங் சி²ந்தி³, து³க்கா² வேத³னா உப்பஜ்ஜிங்ஸு. தே²ரோ வேத³னங் விக்க²ம்பெ⁴த்வா தங்யேவ வேத³னங் பரிக்³க³ஹெத்வா ஸதிங் உபட்ட²பெத்வா மூலகம்மட்டா²னங் ஸம்மஸந்தோ அரஹத்தங் பத்வா ஸமஸீஸீ ஹுத்வா பரினிப்³பா³யி. ஸமஸீஸீ நாம திவிதோ⁴ ஹோதி இரியாபத²ஸமஸீஸீ, ரோக³ஸமஸீஸீ, ஜீவிதஸமஸீஸீதி.
Jalāti jalamānā. Pāde vandāmi cakkhumāti pañcahi cakkhūhi cakkhumā tava pāde vandāmi. Jutindharāti ānubhāvadharā. Appattamānasoti appattaarahatto. Sekhoti sīlādīni sikkhamāno sakaraṇīyo. Jane sutāti jane vissutā. Satthaṃ āharitaṃ hotīti thero kira ‘‘kiṃ mayhaṃ iminā jīvitenā’’ti? Uttāno nipajjitvā satthena galanāḷiṃ chindi, dukkhā vedanā uppajjiṃsu. Thero vedanaṃ vikkhambhetvā taṃyeva vedanaṃ pariggahetvā satiṃ upaṭṭhapetvā mūlakammaṭṭhānaṃ sammasanto arahattaṃ patvā samasīsī hutvā parinibbāyi. Samasīsī nāma tividho hoti iriyāpathasamasīsī, rogasamasīsī, jīvitasamasīsīti.
தத்த² யோ டா²னாதீ³ஸு இரியாபதே²ஸு அஞ்ஞதரங் அதி⁴ட்டா²ய – ‘‘இமங் அகோபெத்வாவ அரஹத்தங் பாபுணிஸ்ஸாமீ’’தி விபஸ்ஸனங் பட்ட²பேதி, அத²ஸ்ஸ அரஹத்தப்பத்தி ச இரியாபத²கோபனஞ்ச ஏகப்பஹாரேனேவ ஹோதி. அயங் இரியாபத²ஸமஸீஸீ நாம. யோ பன சக்கு²ரோகா³தீ³ஸு அஞ்ஞதரஸ்மிங் ஸதி – ‘‘இதோ அனுட்டி²தோவ அரஹத்தங் பாபுணிஸ்ஸாமீ’’தி விபஸ்ஸனங் பட்ட²பேதி, அத²ஸ்ஸ அரஹத்தப்பத்தி ச ரோக³தோ வுட்டா²னஞ்ச ஏகப்பஹாரேனேவ ஹோதி. அயங் ரோக³ஸமஸீஸீ நாம. கேசி பன தஸ்மிங்யேவ இரியாபதே² தஸ்மிஞ்ச ரோகே³ பரினிப்³பா³னவஸேனெத்த² ஸமஸீஸிதங் பஞ்ஞாபெந்தி. யஸ்ஸ பன ஆஸவக்க²யோ ச ஜீவிதக்க²யோ ச ஏகப்பஹாரேனேவ ஹோதி. அயங் ஜீவிதஸமஸீஸீ நாம. வுத்தம்பி சேதங் – ‘‘யஸ்ஸ புக்³க³லஸ்ஸ அபுப்³ப³ங் அசரிமங் ஆஸவபரியாதா³னஞ்ச ஹோதி ஜீவிதபரியாதா³னஞ்ச, அயங் வுச்சதி புக்³க³லோ ஸமஸீஸீ’’தி (பு॰ ப॰ 16).
Tattha yo ṭhānādīsu iriyāpathesu aññataraṃ adhiṭṭhāya – ‘‘imaṃ akopetvāva arahattaṃ pāpuṇissāmī’’ti vipassanaṃ paṭṭhapeti, athassa arahattappatti ca iriyāpathakopanañca ekappahāreneva hoti. Ayaṃ iriyāpathasamasīsī nāma. Yo pana cakkhurogādīsu aññatarasmiṃ sati – ‘‘ito anuṭṭhitova arahattaṃ pāpuṇissāmī’’ti vipassanaṃ paṭṭhapeti, athassa arahattappatti ca rogato vuṭṭhānañca ekappahāreneva hoti. Ayaṃ rogasamasīsī nāma. Keci pana tasmiṃyeva iriyāpathe tasmiñca roge parinibbānavasenettha samasīsitaṃ paññāpenti. Yassa pana āsavakkhayo ca jīvitakkhayo ca ekappahāreneva hoti. Ayaṃ jīvitasamasīsī nāma. Vuttampi cetaṃ – ‘‘yassa puggalassa apubbaṃ acarimaṃ āsavapariyādānañca hoti jīvitapariyādānañca, ayaṃ vuccati puggalo samasīsī’’ti (pu. pa. 16).
எத்த² ச பவத்திஸீஸங் கிலேஸஸீஸந்தி த்³வே ஸீஸானி. தத்த² பவத்திஸீஸங் நாம ஜீவிதிந்த்³ரியங், கிலேஸஸீஸங் நாம அவிஜ்ஜா. தேஸு ஜீவிதிந்த்³ரியங் சுதிசித்தங் கே²பேதி, அவிஜ்ஜா மக்³க³சித்தங். த்³வின்னங் சித்தானங் ஏகதோ உப்பாதோ³ நத்தி². மக்³கா³னந்தரங் பன ப²லங், ப²லானந்தரங் ப⁴வங்க³ங், ப⁴வங்க³தோ வுட்டா²ய பச்சவெக்க²ணங், தங் பரிபுண்ணங் வா ஹோதி அபரிபுண்ணங் வா. திகி²ணேன அஸினா ஸீஸே சி²ஜ்ஜந்தேபி ஹி ஏகோ வா த்³வே வா பச்சவெக்க²ணவாரா அவஸ்ஸங் உப்பஜ்ஜந்தியேவ, சித்தானங் பன லஹுபரிவத்திதாய ஆஸவக்க²யோ ச ஜீவிதபரியாதா³னஞ்ச ஏகக்க²ணே விய பஞ்ஞாயதி.
Ettha ca pavattisīsaṃ kilesasīsanti dve sīsāni. Tattha pavattisīsaṃ nāma jīvitindriyaṃ, kilesasīsaṃ nāma avijjā. Tesu jīvitindriyaṃ cuticittaṃ khepeti, avijjā maggacittaṃ. Dvinnaṃ cittānaṃ ekato uppādo natthi. Maggānantaraṃ pana phalaṃ, phalānantaraṃ bhavaṅgaṃ, bhavaṅgato vuṭṭhāya paccavekkhaṇaṃ, taṃ paripuṇṇaṃ vā hoti aparipuṇṇaṃ vā. Tikhiṇena asinā sīse chijjantepi hi eko vā dve vā paccavekkhaṇavārā avassaṃ uppajjantiyeva, cittānaṃ pana lahuparivattitāya āsavakkhayo ca jīvitapariyādānañca ekakkhaṇe viya paññāyati.
ஸமூலங் தண்ஹமப்³பு³ய்ஹாதி அவிஜ்ஜாமூலேன ஸமூலகங் தண்ஹங் அரஹத்தமக்³கே³ன உப்பாடெத்வா. பரினிப்³பு³தோதி அனுபாதி³ஸேஸனிப்³பா³னேன பரினிப்³பு³தோ.
Samūlaṃ taṇhamabbuyhāti avijjāmūlena samūlakaṃ taṇhaṃ arahattamaggena uppāṭetvā. Parinibbutoti anupādisesanibbānena parinibbuto.
விவத்தக்க²ந்த⁴ந்தி பரிவத்தக்க²ந்த⁴ங். ஸேமானந்தி உத்தானங் ஹுத்வா ஸயிதங் ஹோதி. தே²ரோ பன கிஞ்சாபி உத்தானகோ ஸயிதோ, ததா²பிஸ்ஸ த³க்கி²ணேன பஸ்ஸேன பரிசிதஸயனத்தா ஸீஸங் த³க்கி²ணதோவ பரிவத்தித்வா டி²தங். தூ⁴மாயிதத்தந்தி தூ⁴மாயிதபா⁴வங். தஸ்மிங் ஹி க²ணே தூ⁴மவலாஹகா விய திமிரவலாஹகா விய ச உட்ட²ஹிங்ஸு. விஞ்ஞாணங் ஸமன்வேஸதீதி படிஸந்தி⁴சித்தங் பரியேஸதி. அப்பதிட்டி²தேனாதி படிஸந்தி⁴விஞ்ஞாணேன அப்பதிட்டி²தேன, அப்பதிட்டி²தகாரணாதி அத்தோ². பே³லுவபண்டு³வீணந்தி பே³லுவபக்கங் விய பண்டு³வண்ணங் ஸுவண்ணமஹாவீணங். ஆதா³யாதி கச்சே² ட²பெத்வா. உபஸங்கமீதி ‘‘கோ³தி⁴கத்தே²ரஸ்ஸ நிப்³ப³த்தட்டா²னங் ந ஜானாமி, ஸமணங் கோ³தமங் புச்சி²த்வா நிக்கங்கோ² ப⁴விஸ்ஸாமீ’’தி கு²த்³த³கதா³ரகவண்ணீ ஹுத்வா உபஸங்கமி. நாதி⁴க³ச்சா²மீதி ந பஸ்ஸாமி. ஸோகபரேதஸ்ஸாதி ஸோகேன பு²ட்ட²ஸ்ஸ. அப⁴ஸ்ஸதா²தி பாத³பிட்டி²யங் பதிதா. ததியங்.
Vivattakkhandhanti parivattakkhandhaṃ. Semānanti uttānaṃ hutvā sayitaṃ hoti. Thero pana kiñcāpi uttānako sayito, tathāpissa dakkhiṇena passena paricitasayanattā sīsaṃ dakkhiṇatova parivattitvā ṭhitaṃ. Dhūmāyitattanti dhūmāyitabhāvaṃ. Tasmiṃ hi khaṇe dhūmavalāhakā viya timiravalāhakā viya ca uṭṭhahiṃsu. Viññāṇaṃ samanvesatīti paṭisandhicittaṃ pariyesati. Appatiṭṭhitenāti paṭisandhiviññāṇena appatiṭṭhitena, appatiṭṭhitakāraṇāti attho. Beluvapaṇḍuvīṇanti beluvapakkaṃ viya paṇḍuvaṇṇaṃ suvaṇṇamahāvīṇaṃ. Ādāyāti kacche ṭhapetvā. Upasaṅkamīti ‘‘godhikattherassa nibbattaṭṭhānaṃ na jānāmi, samaṇaṃ gotamaṃ pucchitvā nikkaṅkho bhavissāmī’’ti khuddakadārakavaṇṇī hutvā upasaṅkami. Nādhigacchāmīti na passāmi. Sokaparetassāti sokena phuṭṭhassa. Abhassathāti pādapiṭṭhiyaṃ patitā. Tatiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. கோ³தி⁴கஸுத்தங் • 3. Godhikasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. கோ³தி⁴கஸுத்தவண்ணனா • 3. Godhikasuttavaṇṇanā
