| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৩. গোধিকসুত্তৰণ্ণনা
3. Godhikasuttavaṇṇanā
১৫৯. ততিযে ইসিগিলিপস্সেতি ইসিগিলিস্স নাম পব্বতস্স পস্সে। কাল়সিলাযন্তি কাল়ৰণ্ণায সিলাযং। সামযিকং চেতোৰিমুত্তিন্তি অপ্পিতপ্পিতক্খণে পচ্চনীকধম্মেহি ৰিমুচ্চতি, আরম্মণে চ অধিমুচ্চতীতি লোকিযসমাপত্তি সামযিকা চেতোৰিমুত্তি নাম। ফুসীতি পটিলভি। পরিহাযীতি কস্মা যাৰ ছট্ঠং পরিহাযি? সাবাধত্তা। থেরস্স কির ৰাতপিত্তসেম্হৰসেন অনুসাযিকো আবাধো অত্থি, তেন সমাধিস্স সপ্পাযে উপকারকধম্মে পূরেতুং ন সক্কোতি, অপ্পিতপ্পিতায সমাপত্তিযা পরিহাযতি।
159. Tatiye isigilipasseti isigilissa nāma pabbatassa passe. Kāḷasilāyanti kāḷavaṇṇāya silāyaṃ. Sāmayikaṃ cetovimuttinti appitappitakkhaṇe paccanīkadhammehi vimuccati, ārammaṇe ca adhimuccatīti lokiyasamāpatti sāmayikā cetovimutti nāma. Phusīti paṭilabhi. Parihāyīti kasmā yāva chaṭṭhaṃ parihāyi? Sābādhattā. Therassa kira vātapittasemhavasena anusāyiko ābādho atthi, tena samādhissa sappāye upakārakadhamme pūretuṃ na sakkoti, appitappitāya samāpattiyā parihāyati.
যংনূনাহং সত্থং আহরেয্যন্তি সো কির চিন্তেসি, যস্মা পরিহীনজ্ঝানস্স কালঙ্করোতো অনিবদ্ধা গতি হোতি, অপরিহীনজ্ঝানস্স নিবদ্ধা গতি হোতি, ব্রহ্মলোকে নিব্বত্ততি, তস্মা সত্থং আহরিতুকামো অহোসি। উপসঙ্কমীতি – ‘‘অযং সমণো সত্থং আহরিতুকামো, সত্থাহরণঞ্চ নামেতং কাযে চ জীৰিতে চ অনপেক্খস্স হোতি। যো এৰং কাযে চ জীৰিতে চ অনপেক্খো হোতি, সো মূলকম্মট্ঠানং সম্মসিত্ৰা অরহত্তম্পি গহেতুং সমত্থো হোতি, মযা পন পটিবাহিতোপি এস ন ওরমিস্সতি, সত্থারা পটিবাহিতো ওরমিস্সতী’’তি থেরস্স অত্থকামো ৰিয হুত্ৰা যেন ভগৰা তেনুপসঙ্কমি।
Yaṃnūnāhaṃ satthaṃ āhareyyanti so kira cintesi, yasmā parihīnajjhānassa kālaṅkaroto anibaddhā gati hoti, aparihīnajjhānassa nibaddhā gati hoti, brahmaloke nibbattati, tasmā satthaṃ āharitukāmo ahosi. Upasaṅkamīti – ‘‘ayaṃ samaṇo satthaṃ āharitukāmo, satthāharaṇañca nāmetaṃ kāye ca jīvite ca anapekkhassa hoti. Yo evaṃ kāye ca jīvite ca anapekkho hoti, so mūlakammaṭṭhānaṃ sammasitvā arahattampi gahetuṃ samattho hoti, mayā pana paṭibāhitopi esa na oramissati, satthārā paṭibāhito oramissatī’’ti therassa atthakāmo viya hutvā yena bhagavā tenupasaṅkami.
জলাতি জলমানা। পাদে ৰন্দামি চক্খুমাতি পঞ্চহি চক্খূহি চক্খুমা তৰ পাদে ৰন্দামি। জুতিন্ধরাতি আনুভাৰধরা। অপ্পত্তমানসোতি অপ্পত্তঅরহত্তো। সেখোতি সীলাদীনি সিক্খমানো সকরণীযো। জনে সুতাতি জনে ৰিস্সুতা। সত্থং আহরিতং হোতীতি থেরো কির ‘‘কিং ময্হং ইমিনা জীৰিতেনা’’তি? উত্তানো নিপজ্জিত্ৰা সত্থেন গলনাল়িং ছিন্দি, দুক্খা ৰেদনা উপ্পজ্জিংসু। থেরো ৰেদনং ৰিক্খম্ভেত্ৰা তংযেৰ ৰেদনং পরিগ্গহেত্ৰা সতিং উপট্ঠপেত্ৰা মূলকম্মট্ঠানং সম্মসন্তো অরহত্তং পত্ৰা সমসীসী হুত্ৰা পরিনিব্বাযি। সমসীসী নাম তিৰিধো হোতি ইরিযাপথসমসীসী, রোগসমসীসী, জীৰিতসমসীসীতি।
Jalāti jalamānā. Pāde vandāmi cakkhumāti pañcahi cakkhūhi cakkhumā tava pāde vandāmi. Jutindharāti ānubhāvadharā. Appattamānasoti appattaarahatto. Sekhoti sīlādīni sikkhamāno sakaraṇīyo. Jane sutāti jane vissutā. Satthaṃ āharitaṃ hotīti thero kira ‘‘kiṃ mayhaṃ iminā jīvitenā’’ti? Uttāno nipajjitvā satthena galanāḷiṃ chindi, dukkhā vedanā uppajjiṃsu. Thero vedanaṃ vikkhambhetvā taṃyeva vedanaṃ pariggahetvā satiṃ upaṭṭhapetvā mūlakammaṭṭhānaṃ sammasanto arahattaṃ patvā samasīsī hutvā parinibbāyi. Samasīsī nāma tividho hoti iriyāpathasamasīsī, rogasamasīsī, jīvitasamasīsīti.
তত্থ যো ঠানাদীসু ইরিযাপথেসু অঞ্ঞতরং অধিট্ঠায – ‘‘ইমং অকোপেত্ৰাৰ অরহত্তং পাপুণিস্সামী’’তি ৰিপস্সনং পট্ঠপেতি, অথস্স অরহত্তপ্পত্তি চ ইরিযাপথকোপনঞ্চ একপ্পহারেনেৰ হোতি। অযং ইরিযাপথসমসীসী নাম। যো পন চক্খুরোগাদীসু অঞ্ঞতরস্মিং সতি – ‘‘ইতো অনুট্ঠিতোৰ অরহত্তং পাপুণিস্সামী’’তি ৰিপস্সনং পট্ঠপেতি, অথস্স অরহত্তপ্পত্তি চ রোগতো ৰুট্ঠানঞ্চ একপ্পহারেনেৰ হোতি। অযং রোগসমসীসী নাম। কেচি পন তস্মিংযেৰ ইরিযাপথে তস্মিঞ্চ রোগে পরিনিব্বানৰসেনেত্থ সমসীসিতং পঞ্ঞাপেন্তি। যস্স পন আসৰক্খযো চ জীৰিতক্খযো চ একপ্পহারেনেৰ হোতি। অযং জীৰিতসমসীসী নাম। ৰুত্তম্পি চেতং – ‘‘যস্স পুগ্গলস্স অপুব্বং অচরিমং আসৰপরিযাদানঞ্চ হোতি জীৰিতপরিযাদানঞ্চ, অযং ৰুচ্চতি পুগ্গলো সমসীসী’’তি (পু॰ প॰ ১৬)।
Tattha yo ṭhānādīsu iriyāpathesu aññataraṃ adhiṭṭhāya – ‘‘imaṃ akopetvāva arahattaṃ pāpuṇissāmī’’ti vipassanaṃ paṭṭhapeti, athassa arahattappatti ca iriyāpathakopanañca ekappahāreneva hoti. Ayaṃ iriyāpathasamasīsī nāma. Yo pana cakkhurogādīsu aññatarasmiṃ sati – ‘‘ito anuṭṭhitova arahattaṃ pāpuṇissāmī’’ti vipassanaṃ paṭṭhapeti, athassa arahattappatti ca rogato vuṭṭhānañca ekappahāreneva hoti. Ayaṃ rogasamasīsī nāma. Keci pana tasmiṃyeva iriyāpathe tasmiñca roge parinibbānavasenettha samasīsitaṃ paññāpenti. Yassa pana āsavakkhayo ca jīvitakkhayo ca ekappahāreneva hoti. Ayaṃ jīvitasamasīsī nāma. Vuttampi cetaṃ – ‘‘yassa puggalassa apubbaṃ acarimaṃ āsavapariyādānañca hoti jīvitapariyādānañca, ayaṃ vuccati puggalo samasīsī’’ti (pu. pa. 16).
এত্থ চ পৰত্তিসীসং কিলেসসীসন্তি দ্ৰে সীসানি। তত্থ পৰত্তিসীসং নাম জীৰিতিন্দ্রিযং, কিলেসসীসং নাম অৰিজ্জা। তেসু জীৰিতিন্দ্রিযং চুতিচিত্তং খেপেতি, অৰিজ্জা মগ্গচিত্তং। দ্ৰিন্নং চিত্তানং একতো উপ্পাদো নত্থি। মগ্গানন্তরং পন ফলং, ফলানন্তরং ভৰঙ্গং, ভৰঙ্গতো ৰুট্ঠায পচ্চৰেক্খণং, তং পরিপুণ্ণং ৰা হোতি অপরিপুণ্ণং ৰা। তিখিণেন অসিনা সীসে ছিজ্জন্তেপি হি একো ৰা দ্ৰে ৰা পচ্চৰেক্খণৰারা অৰস্সং উপ্পজ্জন্তিযেৰ, চিত্তানং পন লহুপরিৰত্তিতায আসৰক্খযো চ জীৰিতপরিযাদানঞ্চ একক্খণে ৰিয পঞ্ঞাযতি।
Ettha ca pavattisīsaṃ kilesasīsanti dve sīsāni. Tattha pavattisīsaṃ nāma jīvitindriyaṃ, kilesasīsaṃ nāma avijjā. Tesu jīvitindriyaṃ cuticittaṃ khepeti, avijjā maggacittaṃ. Dvinnaṃ cittānaṃ ekato uppādo natthi. Maggānantaraṃ pana phalaṃ, phalānantaraṃ bhavaṅgaṃ, bhavaṅgato vuṭṭhāya paccavekkhaṇaṃ, taṃ paripuṇṇaṃ vā hoti aparipuṇṇaṃ vā. Tikhiṇena asinā sīse chijjantepi hi eko vā dve vā paccavekkhaṇavārā avassaṃ uppajjantiyeva, cittānaṃ pana lahuparivattitāya āsavakkhayo ca jīvitapariyādānañca ekakkhaṇe viya paññāyati.
সমূলং তণ্হমব্বুয্হাতি অৰিজ্জামূলেন সমূলকং তণ্হং অরহত্তমগ্গেন উপ্পাটেত্ৰা। পরিনিব্বুতোতি অনুপাদিসেসনিব্বানেন পরিনিব্বুতো।
Samūlaṃ taṇhamabbuyhāti avijjāmūlena samūlakaṃ taṇhaṃ arahattamaggena uppāṭetvā. Parinibbutoti anupādisesanibbānena parinibbuto.
ৰিৰত্তক্খন্ধন্তি পরিৰত্তক্খন্ধং। সেমানন্তি উত্তানং হুত্ৰা সযিতং হোতি। থেরো পন কিঞ্চাপি উত্তানকো সযিতো, তথাপিস্স দক্খিণেন পস্সেন পরিচিতসযনত্তা সীসং দক্খিণতোৰ পরিৰত্তিত্ৰা ঠিতং। ধূমাযিতত্তন্তি ধূমাযিতভাৰং। তস্মিং হি খণে ধূমৰলাহকা ৰিয তিমিরৰলাহকা ৰিয চ উট্ঠহিংসু। ৰিঞ্ঞাণং সমন্ৰেসতীতি পটিসন্ধিচিত্তং পরিযেসতি। অপ্পতিট্ঠিতেনাতি পটিসন্ধিৰিঞ্ঞাণেন অপ্পতিট্ঠিতেন, অপ্পতিট্ঠিতকারণাতি অত্থো। বেলুৰপণ্ডুৰীণন্তি বেলুৰপক্কং ৰিয পণ্ডুৰণ্ণং সুৰণ্ণমহাৰীণং। আদাযাতি কচ্ছে ঠপেত্ৰা। উপসঙ্কমীতি ‘‘গোধিকত্থেরস্স নিব্বত্তট্ঠানং ন জানামি, সমণং গোতমং পুচ্ছিত্ৰা নিক্কঙ্খো ভৰিস্সামী’’তি খুদ্দকদারকৰণ্ণী হুত্ৰা উপসঙ্কমি। নাধিগচ্ছামীতি ন পস্সামি। সোকপরেতস্সাতি সোকেন ফুট্ঠস্স। অভস্সথাতি পাদপিট্ঠিযং পতিতা। ততিযং।
Vivattakkhandhanti parivattakkhandhaṃ. Semānanti uttānaṃ hutvā sayitaṃ hoti. Thero pana kiñcāpi uttānako sayito, tathāpissa dakkhiṇena passena paricitasayanattā sīsaṃ dakkhiṇatova parivattitvā ṭhitaṃ. Dhūmāyitattanti dhūmāyitabhāvaṃ. Tasmiṃ hi khaṇe dhūmavalāhakā viya timiravalāhakā viya ca uṭṭhahiṃsu. Viññāṇaṃ samanvesatīti paṭisandhicittaṃ pariyesati. Appatiṭṭhitenāti paṭisandhiviññāṇena appatiṭṭhitena, appatiṭṭhitakāraṇāti attho. Beluvapaṇḍuvīṇanti beluvapakkaṃ viya paṇḍuvaṇṇaṃ suvaṇṇamahāvīṇaṃ. Ādāyāti kacche ṭhapetvā. Upasaṅkamīti ‘‘godhikattherassa nibbattaṭṭhānaṃ na jānāmi, samaṇaṃ gotamaṃ pucchitvā nikkaṅkho bhavissāmī’’ti khuddakadārakavaṇṇī hutvā upasaṅkami. Nādhigacchāmīti na passāmi. Sokaparetassāti sokena phuṭṭhassa. Abhassathāti pādapiṭṭhiyaṃ patitā. Tatiyaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৩. গোধিকসুত্তং • 3. Godhikasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩. গোধিকসুত্তৰণ্ণনা • 3. Godhikasuttavaṇṇanā
