Library / Tipiṭaka / തിപിടക • Tipiṭaka / മജ്ഝിമനികായ • Majjhimanikāya

    ൯. ഗോലിയാനിസുത്തം

    9. Goliyānisuttaṃ

    ൧൭൩. ഏവം മേ സുതം – ഏകം സമയം ഭഗവാ രാജഗഹേ വിഹരതി വേളുവനേ കലന്ദകനിവാപേ. തേന ഖോ പന സമയേന ഗോലിയാനി 1 നാമ ഭിക്ഖു ആരഞ്ഞികോ 2 പദസമാചാരോ 3 സങ്ഘമജ്ഝേ ഓസടോ ഹോതി കേനചിദേവ കരണീയേന. തത്ര ഖോ ആയസ്മാ സാരിപുത്തോ ഗോലിയാനിം ഭിക്ഖും ആരബ്ഭ ഭിക്ഖൂ ആമന്തേസി –

    173. Evaṃ me sutaṃ – ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena goliyāni 4 nāma bhikkhu āraññiko 5 padasamācāro 6 saṅghamajjhe osaṭo hoti kenacideva karaṇīyena. Tatra kho āyasmā sāriputto goliyāniṃ bhikkhuṃ ārabbha bhikkhū āmantesi –

    ‘‘ആരഞ്ഞികേനാവുസോ, ഭിക്ഖുനാ സങ്ഘഗതേന സങ്ഘേ വിഹരന്തേന സബ്രഹ്മചാരീസു സഗാരവേന ഭവിതബ്ബം സപ്പതിസ്സേന. സചേ, ആവുസോ, ആരഞ്ഞികോ ഭിക്ഖു സങ്ഘഗതോ സങ്ഘേ വിഹരന്തോ സബ്രഹ്മചാരീസു അഗാരവോ ഹോതി അപ്പതിസ്സോ, തസ്സ ഭവന്തി വത്താരോ. ‘കിം പനിമസ്സായസ്മതോ ആരഞ്ഞികസ്സ ഏകസ്സാരഞ്ഞേ സേരിവിഹാരേന, യോ അയമായസ്മാ സബ്രഹ്മചാരീസു അഗാരവോ ഹോതി അപ്പതിസ്സോ’തി – തസ്സ 7 ഭവന്തി വത്താരോ. തസ്മാ ആരഞ്ഞികേന ഭിക്ഖുനാ സങ്ഘഗതേന സങ്ഘേ വിഹരന്തേന സബ്രഹ്മചാരീസു സഗാരവേന ഭവിതബ്ബം സപ്പതിസ്സേന.

    ‘‘Āraññikenāvuso, bhikkhunā saṅghagatena saṅghe viharantena sabrahmacārīsu sagāravena bhavitabbaṃ sappatissena. Sace, āvuso, āraññiko bhikkhu saṅghagato saṅghe viharanto sabrahmacārīsu agāravo hoti appatisso, tassa bhavanti vattāro. ‘Kiṃ panimassāyasmato āraññikassa ekassāraññe serivihārena, yo ayamāyasmā sabrahmacārīsu agāravo hoti appatisso’ti – tassa 8 bhavanti vattāro. Tasmā āraññikena bhikkhunā saṅghagatena saṅghe viharantena sabrahmacārīsu sagāravena bhavitabbaṃ sappatissena.

    ‘‘ആരഞ്ഞികേനാവുസോ, ഭിക്ഖുനാ സങ്ഘഗതേന സങ്ഘേ വിഹരന്തേന ആസനകുസലേന ഭവിതബ്ബം – ‘ഇതി ഥേരേ ച ഭിക്ഖൂ നാനുപഖജ്ജ നിസീദിസ്സാമി നവേ ച ഭിക്ഖൂ ന ആസനേന പടിബാഹിസ്സാമീ’തി. സചേ, ആവുസോ, ആരഞ്ഞികോ ഭിക്ഖു സങ്ഘഗതോ സങ്ഘേ വിഹരന്തോ ന ആസനകുസലോ ഹോതി, തസ്സ ഭവന്തി വത്താരോ. ‘കിം പനിമസ്സായസ്മതോ ആരഞ്ഞികസ്സ ഏകസ്സാരഞ്ഞേ സേരിവിഹാരേന, യോ അയമായസ്മാ ആസനകുസലോ ന ഹോതീ’തി 9 – തസ്സ ഭവന്തി വത്താരോ. തസ്മാ ആരഞ്ഞികേന ഭിക്ഖുനാ സങ്ഘഗതേന സങ്ഘേ വിഹരന്തേന ആസനകുസലേന ഭവിതബ്ബം.

    ‘‘Āraññikenāvuso, bhikkhunā saṅghagatena saṅghe viharantena āsanakusalena bhavitabbaṃ – ‘iti there ca bhikkhū nānupakhajja nisīdissāmi nave ca bhikkhū na āsanena paṭibāhissāmī’ti. Sace, āvuso, āraññiko bhikkhu saṅghagato saṅghe viharanto na āsanakusalo hoti, tassa bhavanti vattāro. ‘Kiṃ panimassāyasmato āraññikassa ekassāraññe serivihārena, yo ayamāyasmā āsanakusalo na hotī’ti 10 – tassa bhavanti vattāro. Tasmā āraññikena bhikkhunā saṅghagatena saṅghe viharantena āsanakusalena bhavitabbaṃ.

    ‘‘ആരഞ്ഞികേനാവുസോ, ഭിക്ഖുനാ സങ്ഘഗതേന സങ്ഘേ വിഹരന്തേന ആഭിസമാചാരികോപി ധമ്മോ ജാനിതബ്ബോ. സചേ, ആവുസോ, ആരഞ്ഞികോ ഭിക്ഖു സങ്ഘഗതോ സങ്ഘേ വിഹരന്തോ ആഭിസമാചാരികമ്പി ധമ്മം ന ജാനാതി, തസ്സ ഭവന്തി വത്താരോ. ‘കിം പനിമസ്സായസ്മതോ ആരഞ്ഞികസ്സ ഏകസ്സാരഞ്ഞേ സേരിവിഹാരേന യോ അയമായസ്മാ ആഭിസമാചാരികമ്പി ധമ്മം ന ജാനാതീ’തി – തസ്സ ഭവന്തി വത്താരോ. തസ്മാ ആരഞ്ഞികേന ഭിക്ഖുനാ സങ്ഘഗതേന സങ്ഘേ വിഹരന്തേന ആഭിസമാചാരികോപി ധമ്മോ ജാനിതബ്ബോ 11.

    ‘‘Āraññikenāvuso, bhikkhunā saṅghagatena saṅghe viharantena ābhisamācārikopi dhammo jānitabbo. Sace, āvuso, āraññiko bhikkhu saṅghagato saṅghe viharanto ābhisamācārikampi dhammaṃ na jānāti, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā ābhisamācārikampi dhammaṃ na jānātī’ti – tassa bhavanti vattāro. Tasmā āraññikena bhikkhunā saṅghagatena saṅghe viharantena ābhisamācārikopi dhammo jānitabbo 12.

    ‘‘ആരഞ്ഞികേനാവുസോ, ഭിക്ഖുനാ സങ്ഘഗതേന സങ്ഘേ വിഹരന്തേന നാതികാലേന ഗാമോ പവിസിതബ്ബോ നാതിദിവാ 13 പടിക്കമിതബ്ബം. സചേ, ആവുസോ, ആരഞ്ഞികോ ഭിക്ഖു സങ്ഘഗതോ സങ്ഘേ വിഹരന്തോ അതികാലേന ഗാമം പവിസതി അതിദിവാ പടിക്കമതി, തസ്സ ഭവന്തി വത്താരോ. ‘കിം പനിമസ്സായസ്മതോ ആരഞ്ഞികസ്സ ഏകസ്സാരഞ്ഞേ സേരിവിഹാരേന യോ അയമായസ്മാ അതികാലേന ഗാമം പവിസതി അതിദിവാ പടിക്കമതീ’തി – തസ്സ ഭവന്തി വത്താരോ. തസ്മാ ആരഞ്ഞികേന ഭിക്ഖുനാ സങ്ഘഗതേന സങ്ഘേ വിഹരന്തേന നാതികാലേന ഗാമോ പവിസിതബ്ബോ, നാതിദിവാ പടിക്കമിതബ്ബം.

    ‘‘Āraññikenāvuso, bhikkhunā saṅghagatena saṅghe viharantena nātikālena gāmo pavisitabbo nātidivā 14 paṭikkamitabbaṃ. Sace, āvuso, āraññiko bhikkhu saṅghagato saṅghe viharanto atikālena gāmaṃ pavisati atidivā paṭikkamati, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā atikālena gāmaṃ pavisati atidivā paṭikkamatī’ti – tassa bhavanti vattāro. Tasmā āraññikena bhikkhunā saṅghagatena saṅghe viharantena nātikālena gāmo pavisitabbo, nātidivā paṭikkamitabbaṃ.

    ‘‘ആരഞ്ഞികേനാവുസോ, ഭിക്ഖുനാ സങ്ഘഗതേന സങ്ഘേ വിഹരന്തേന ന പുരേഭത്തം പച്ഛാഭത്തം കുലേസു ചാരിത്തം ആപജ്ജിതബ്ബം. സചേ, ആവുസോ, ആരഞ്ഞികോ ഭിക്ഖു സങ്ഘഗതോ സങ്ഘേ വിഹരന്തോ പുരേഭത്തം പച്ഛാഭത്തം കുലേസു ചാരിത്തം ആപജ്ജതി, തസ്സ ഭവന്തി വത്താരോ. ‘അയം നൂനിമസ്സായസ്മതോ ആരഞ്ഞികസ്സ ഏകസ്സാരഞ്ഞേ സേരിവിഹാരേന വിഹരതോ വികാലചരിയാ ബഹുലീകതാ, തമേനം സങ്ഘഗതമ്പി സമുദാചരതീ’തി – തസ്സ ഭവന്തി വത്താരോ. തസ്മാ ആരഞ്ഞികേന ഭിക്ഖുനാ സങ്ഘഗതേന സങ്ഘേ വിഹരന്തേന ന പുരേഭത്തം പച്ഛാഭത്തം കുലേസു ചാരിത്തം ആപജ്ജിതബ്ബം.

    ‘‘Āraññikenāvuso, bhikkhunā saṅghagatena saṅghe viharantena na purebhattaṃ pacchābhattaṃ kulesu cārittaṃ āpajjitabbaṃ. Sace, āvuso, āraññiko bhikkhu saṅghagato saṅghe viharanto purebhattaṃ pacchābhattaṃ kulesu cārittaṃ āpajjati, tassa bhavanti vattāro. ‘Ayaṃ nūnimassāyasmato āraññikassa ekassāraññe serivihārena viharato vikālacariyā bahulīkatā, tamenaṃ saṅghagatampi samudācaratī’ti – tassa bhavanti vattāro. Tasmā āraññikena bhikkhunā saṅghagatena saṅghe viharantena na purebhattaṃ pacchābhattaṃ kulesu cārittaṃ āpajjitabbaṃ.

    ‘‘ആരഞ്ഞികേനാവുസോ, ഭിക്ഖുനാ സങ്ഘഗതേന സങ്ഘേ വിഹരന്തേന അനുദ്ധതേന ഭവിതബ്ബം അചപലേന. സചേ, ആവുസോ, ആരഞ്ഞികോ ഭിക്ഖു സങ്ഘഗതോ സങ്ഘേ വിഹരന്തോ ഉദ്ധതോ ഹോതി ചപലോ, തസ്സ ഭവന്തി വത്താരോ. ‘ഇദം നൂനിമസ്സായസ്മതോ ആരഞ്ഞികസ്സ ഏകസ്സാരഞ്ഞേ സേരിവിഹാരേന വിഹരതോ ഉദ്ധച്ചം ചാപല്യം ബഹുലീകതം, തമേനം സങ്ഘഗതമ്പി സമുദാചരതീ’തി – തസ്സ ഭവന്തി വത്താരോ. തസ്മാ ആരഞ്ഞികേന ഭിക്ഖുനാ സങ്ഘഗതേന സങ്ഘേ വിഹരന്തേന അനുദ്ധതേന ഭവിതബ്ബം അചപലേന.

    ‘‘Āraññikenāvuso, bhikkhunā saṅghagatena saṅghe viharantena anuddhatena bhavitabbaṃ acapalena. Sace, āvuso, āraññiko bhikkhu saṅghagato saṅghe viharanto uddhato hoti capalo, tassa bhavanti vattāro. ‘Idaṃ nūnimassāyasmato āraññikassa ekassāraññe serivihārena viharato uddhaccaṃ cāpalyaṃ bahulīkataṃ, tamenaṃ saṅghagatampi samudācaratī’ti – tassa bhavanti vattāro. Tasmā āraññikena bhikkhunā saṅghagatena saṅghe viharantena anuddhatena bhavitabbaṃ acapalena.

    ‘‘ആരഞ്ഞികേനാവുസോ , ഭിക്ഖുനാ സങ്ഘഗതേന സങ്ഘേ വിഹരന്തേന അമുഖരേന ഭവിതബ്ബം അവികിണ്ണവാചേന. സചേ, ആവുസോ, ആരഞ്ഞികോ ഭിക്ഖു സങ്ഘഗതോ സങ്ഘേ വിഹരന്തോ മുഖരോ ഹോതി വികിണ്ണവാചോ, തസ്സ ഭവന്തി വത്താരോ. ‘കിം പനിമസ്സായസ്മതോ ആരഞ്ഞികസ്സ ഏകസ്സാരഞ്ഞേ സേരിവിഹാരേന യോ അയമായസ്മാ മുഖരോ വികിണ്ണവാചോ’തി – തസ്സ ഭവന്തി വത്താരോ. തസ്മാ ആരഞ്ഞികേന ഭിക്ഖുനാ സങ്ഘഗതേന സങ്ഘേ വിഹരന്തേന അമുഖരേന ഭവിതബ്ബം അവികിണ്ണവാചേന.

    ‘‘Āraññikenāvuso , bhikkhunā saṅghagatena saṅghe viharantena amukharena bhavitabbaṃ avikiṇṇavācena. Sace, āvuso, āraññiko bhikkhu saṅghagato saṅghe viharanto mukharo hoti vikiṇṇavāco, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā mukharo vikiṇṇavāco’ti – tassa bhavanti vattāro. Tasmā āraññikena bhikkhunā saṅghagatena saṅghe viharantena amukharena bhavitabbaṃ avikiṇṇavācena.

    ‘‘ആരഞ്ഞികേനാവുസോ, ഭിക്ഖുനാ സങ്ഘഗതേന സങ്ഘേ വിഹരന്തേന സുവചേന 15 ഭവിതബ്ബം കല്യാണമിത്തേന. സചേ, ആവുസോ, ആരഞ്ഞികോ ഭിക്ഖു സങ്ഘഗതോ സങ്ഘേ വിഹരന്തോ ദുബ്ബചോ ഹോതി പാപമിത്തോ, തസ്സ ഭവന്തി വത്താരോ. ‘കിം പനിമസ്സായസ്മതോ ആരഞ്ഞികസ്സ ഏകസ്സാരഞ്ഞേ സേരിവിഹാരേന യോ അയമായസ്മാ ദുബ്ബചോ പാപമിത്തോ’തി – തസ്സ ഭവന്തി വത്താരോ. തസ്മാ ആരഞ്ഞികേന ഭിക്ഖുനാ സങ്ഘഗതേന സങ്ഘേ വിഹരന്തേന സുവചേന ഭവിതബ്ബം കല്യാണമിത്തേന.

    ‘‘Āraññikenāvuso, bhikkhunā saṅghagatena saṅghe viharantena suvacena 16 bhavitabbaṃ kalyāṇamittena. Sace, āvuso, āraññiko bhikkhu saṅghagato saṅghe viharanto dubbaco hoti pāpamitto, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā dubbaco pāpamitto’ti – tassa bhavanti vattāro. Tasmā āraññikena bhikkhunā saṅghagatena saṅghe viharantena suvacena bhavitabbaṃ kalyāṇamittena.

    ‘‘ആരഞ്ഞികേനാവുസോ, ഭിക്ഖുനാ ഇന്ദ്രിയേസു ഗുത്തദ്വാരേന ഭവിതബ്ബം. സചേ, ആവുസോ, ആരഞ്ഞികോ ഭിക്ഖു ഇന്ദ്രിയേസു അഗുത്തദ്വാരോ ഹോതി, തസ്സ ഭവന്തി വത്താരോ. ‘കിം പനിമസ്സായസ്മതോ ആരഞ്ഞികസ്സ ഏകസ്സാരഞ്ഞേ സേരിവിഹാരേന യോ അയമായസ്മാ ഇന്ദ്രിയേസു അഗുത്തദ്വാരോ’തി – തസ്സ ഭവന്തി വത്താരോ. തസ്മാ ആരഞ്ഞികേന ഭിക്ഖുനാ ഇന്ദ്രിയേസു ഗുത്തദ്വാരേന ഭവിതബ്ബം.

    ‘‘Āraññikenāvuso, bhikkhunā indriyesu guttadvārena bhavitabbaṃ. Sace, āvuso, āraññiko bhikkhu indriyesu aguttadvāro hoti, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā indriyesu aguttadvāro’ti – tassa bhavanti vattāro. Tasmā āraññikena bhikkhunā indriyesu guttadvārena bhavitabbaṃ.

    ‘‘ആരഞ്ഞികേനാവുസോ, ഭിക്ഖുനാ ഭോജനേ മത്തഞ്ഞുനാ ഭവിതബ്ബം. സചേ, ആവുസോ, ആരഞ്ഞികോ ഭോജനേ അമത്തഞ്ഞൂ ഹോതി, തസ്സ ഭവന്തി വത്താരോ. ‘കിം പനിമസ്സായസ്മതോ ആരഞ്ഞികസ്സ ഏകസ്സാരഞ്ഞേ സേരിവിഹാരേന യോ അയമായസ്മാ ഭോജനേ അമത്തഞ്ഞൂ’തി – തസ്സ ഭവന്തി വത്താരോ. തസ്മാ ആരഞ്ഞികേന ഭിക്ഖുനാ ഭോജനേ മത്തഞ്ഞുനാ ഭവിതബ്ബം.

    ‘‘Āraññikenāvuso, bhikkhunā bhojane mattaññunā bhavitabbaṃ. Sace, āvuso, āraññiko bhojane amattaññū hoti, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā bhojane amattaññū’ti – tassa bhavanti vattāro. Tasmā āraññikena bhikkhunā bhojane mattaññunā bhavitabbaṃ.

    ‘‘ആരഞ്ഞികേനാവുസോ, ഭിക്ഖുനാ ജാഗരിയം അനുയുത്തേന ഭവിതബ്ബം. സചേ, ആവുസോ, ആരഞ്ഞികോ ഭിക്ഖു ജാഗരിയം അനനുയുത്തോ ഹോതി, തസ്സ ഭവന്തി വത്താരോ. ‘കിം പനിമസ്സായസ്മതോ ആരഞ്ഞികസ്സ ഏകസ്സാരഞ്ഞേ സേരിവിഹാരേന യോ അയമായസ്മാ ജാഗരിയം അനനുയുത്തോ’തി – തസ്സ ഭവന്തി വത്താരോ. തസ്മാ ആരഞ്ഞികേന ഭിക്ഖുനാ ജാഗരിയം അനുയുത്തേന ഭവിതബ്ബം.

    ‘‘Āraññikenāvuso, bhikkhunā jāgariyaṃ anuyuttena bhavitabbaṃ. Sace, āvuso, āraññiko bhikkhu jāgariyaṃ ananuyutto hoti, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā jāgariyaṃ ananuyutto’ti – tassa bhavanti vattāro. Tasmā āraññikena bhikkhunā jāgariyaṃ anuyuttena bhavitabbaṃ.

    ‘‘ആരഞ്ഞികേനാവുസോ , ഭിക്ഖുനാ ആരദ്ധവീരിയേന ഭവിതബ്ബം. സചേ, ആവുസോ, ആരഞ്ഞികോ ഭിക്ഖു കുസീതോ ഹോതി, തസ്സ ഭവന്തി വത്താരോ. ‘കിം പനിമസ്സായസ്മതോ ആരഞ്ഞികസ്സ ഏകസ്സാരഞ്ഞേ സേരിവിഹാരേന യോ അയമായസ്മാ കുസീതോ’തി – തസ്സ ഭവന്തി വത്താരോ. തസ്മാ ആരഞ്ഞികേന ഭിക്ഖുനാ ആരദ്ധവീരിയേന ഭവിതബ്ബം.

    ‘‘Āraññikenāvuso , bhikkhunā āraddhavīriyena bhavitabbaṃ. Sace, āvuso, āraññiko bhikkhu kusīto hoti, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā kusīto’ti – tassa bhavanti vattāro. Tasmā āraññikena bhikkhunā āraddhavīriyena bhavitabbaṃ.

    ‘‘ആരഞ്ഞികേനാവുസോ, ഭിക്ഖുനാ ഉപട്ഠിതസ്സതിനാ ഭവിതബ്ബം. സചേ, ആവുസോ, ആരഞ്ഞികോ ഭിക്ഖു മുട്ഠസ്സതീ ഹോതി, തസ്സ ഭവന്തി വത്താരോ. ‘കിം പനിമസ്സായസ്മതോ ആരഞ്ഞികസ്സ ഏകസ്സാരഞ്ഞേ സേരിവിഹാരേന യോ അയമായസ്മാ മുട്ഠസ്സതീ’തി – തസ്സ ഭവന്തി വത്താരോ. തസ്മാ ആരഞ്ഞികേന ഭിക്ഖുനാ ഉപട്ഠിതസ്സതിനാ ഭവിതബ്ബം.

    ‘‘Āraññikenāvuso, bhikkhunā upaṭṭhitassatinā bhavitabbaṃ. Sace, āvuso, āraññiko bhikkhu muṭṭhassatī hoti, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā muṭṭhassatī’ti – tassa bhavanti vattāro. Tasmā āraññikena bhikkhunā upaṭṭhitassatinā bhavitabbaṃ.

    ‘‘ആരഞ്ഞികേനാവുസോ, ഭിക്ഖുനാ സമാഹിതേന ഭവിതബ്ബം. സചേ, ആവുസോ, ആരഞ്ഞികോ ഭിക്ഖു അസമാഹിതോ ഹോതി, തസ്സ ഭവന്തി വത്താരോ. ‘കിം പനിമസ്സായസ്മതോ ആരഞ്ഞികസ്സ ഏകസ്സാരഞ്ഞേ സേരിവിഹാരേന യോ അയമായസ്മാ അസമാഹിതോ’തി – തസ്സ ഭവന്തി വത്താരോ. തസ്മാ ആരഞ്ഞികേന ഭിക്ഖുനാ സമാഹിതേന ഭവിതബ്ബം.

    ‘‘Āraññikenāvuso, bhikkhunā samāhitena bhavitabbaṃ. Sace, āvuso, āraññiko bhikkhu asamāhito hoti, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā asamāhito’ti – tassa bhavanti vattāro. Tasmā āraññikena bhikkhunā samāhitena bhavitabbaṃ.

    ‘‘ആരഞ്ഞികേനാവുസോ, ഭിക്ഖുനാ പഞ്ഞവതാ ഭവിതബ്ബം. സചേ, ആവുസോ, ആരഞ്ഞികോ ഭിക്ഖു ദുപ്പഞ്ഞോ ഹോതി, തസ്സ ഭവന്തി വത്താരോ . ‘കിം പനിമസ്സായസ്മതോ ആരഞ്ഞികസ്സ ഏകസ്സാരഞ്ഞേ സേരിവിഹാരേന യോ അയമായസ്മാ ദുപ്പഞ്ഞോ’തി – തസ്സ ഭവന്തി വത്താരോ. തസ്മാ ആരഞ്ഞികേന ഭിക്ഖുനാ പഞ്ഞവതാ ഭവിതബ്ബം.

    ‘‘Āraññikenāvuso, bhikkhunā paññavatā bhavitabbaṃ. Sace, āvuso, āraññiko bhikkhu duppañño hoti, tassa bhavanti vattāro . ‘Kiṃ panimassāyasmato āraññikassa ekassāraññe serivihārena yo ayamāyasmā duppañño’ti – tassa bhavanti vattāro. Tasmā āraññikena bhikkhunā paññavatā bhavitabbaṃ.

    ‘‘ആരഞ്ഞികേനാവുസോ, ഭിക്ഖുനാ അഭിധമ്മേ അഭിവിനയേ യോഗോ കരണീയോ. സന്താവുസോ, ആരഞ്ഞികം ഭിക്ഖും അഭിധമ്മേ അഭിവിനയേ പഞ്ഹം പുച്ഛിതാരോ. സചേ, ആവുസോ, ആരഞ്ഞികോ ഭിക്ഖു അഭിധമ്മേ അഭിവിനയേ പഞ്ഹം പുട്ഠോ ന സമ്പായതി, തസ്സ ഭവന്തി വത്താരോ. ‘കിം പനിമസ്സായസ്മതോ ആരഞ്ഞികസ്സ ഏകസ്സാരഞ്ഞേ സേരിവിഹാരേന യോ അയമായസ്മാ അഭിധമ്മേ അഭിവിനയേ പഞ്ഹം പുട്ഠോ ന സമ്പായതീ’തി – തസ്സ ഭവന്തി വത്താരോ. തസ്മാ ആരഞ്ഞികേന ഭിക്ഖുനാ അഭിധമ്മേ അഭിവിനയേ യോഗോ കരണീയോ.

    ‘‘Āraññikenāvuso, bhikkhunā abhidhamme abhivinaye yogo karaṇīyo. Santāvuso, āraññikaṃ bhikkhuṃ abhidhamme abhivinaye pañhaṃ pucchitāro. Sace, āvuso, āraññiko bhikkhu abhidhamme abhivinaye pañhaṃ puṭṭho na sampāyati, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā abhidhamme abhivinaye pañhaṃ puṭṭho na sampāyatī’ti – tassa bhavanti vattāro. Tasmā āraññikena bhikkhunā abhidhamme abhivinaye yogo karaṇīyo.

    ‘‘ആരഞ്ഞികേനാവുസോ , ഭിക്ഖുനാ യേ തേ സന്താ വിമോക്ഖാ അതിക്കമ്മ രൂപേ ആരുപ്പാ തത്ഥ യോഗോ കരണീയോ. സന്താവുസോ, ആരഞ്ഞികം ഭിക്ഖും യേ തേ സന്താ വിമോക്ഖാ അതിക്കമ്മ രൂപേ ആരുപ്പാ തത്ഥ പഞ്ഹം പുച്ഛിതാരോ. സചേ, ആവുസോ, ആരഞ്ഞികോ ഭിക്ഖു യേ തേ സന്താ വിമോക്ഖാ അതിക്കമ്മ രൂപേ ആരുപ്പാ തത്ഥ പഞ്ഹം പുട്ഠോ ന സമ്പായതി, തസ്സ ഭവന്തി വത്താരോ. ‘കിം പനിമസ്സായസ്മതോ ആരഞ്ഞികസ്സ ഏകസ്സാരഞ്ഞേ സേരിവിഹാരേന യോ അയമായസ്മാ യേ തേ സന്താ വിമോക്ഖാ അതിക്കമ്മ രൂപേ ആരുപ്പാ തത്ഥ പഞ്ഹം പുട്ഠോ ന സമ്പായതീ’തി – തസ്സ ഭവന്തി വത്താരോ. തസ്മാ ആരഞ്ഞികേന ഭിക്ഖുനാ യേ തേ സന്താ വിമോക്ഖാ അതിക്കമ്മ രൂപേ ആരുപ്പാ തത്ഥ യോഗോ കരണീയോ.

    ‘‘Āraññikenāvuso , bhikkhunā ye te santā vimokkhā atikkamma rūpe āruppā tattha yogo karaṇīyo. Santāvuso, āraññikaṃ bhikkhuṃ ye te santā vimokkhā atikkamma rūpe āruppā tattha pañhaṃ pucchitāro. Sace, āvuso, āraññiko bhikkhu ye te santā vimokkhā atikkamma rūpe āruppā tattha pañhaṃ puṭṭho na sampāyati, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā ye te santā vimokkhā atikkamma rūpe āruppā tattha pañhaṃ puṭṭho na sampāyatī’ti – tassa bhavanti vattāro. Tasmā āraññikena bhikkhunā ye te santā vimokkhā atikkamma rūpe āruppā tattha yogo karaṇīyo.

    ‘‘ആരഞ്ഞികേനാവുസോ, ഭിക്ഖുനാ ഉത്തരി മനുസ്സധമ്മേ യോഗോ കരണീയോ. സന്താവുസോ, ആരഞ്ഞികം ഭിക്ഖും ഉത്തരി മനുസ്സധമ്മേ പഞ്ഹം പുച്ഛിതാരോ. സചേ, ആവുസോ, ആരഞ്ഞികോ ഭിക്ഖു ഉത്തരി മനുസ്സധമ്മേ പഞ്ഹം പുട്ഠോ ന സമ്പായതി, തസ്സ ഭവന്തി വത്താരോ. ‘കിം പനിമസ്സായസ്മതോ ആരഞ്ഞികസ്സ ഏകസ്സാരഞ്ഞേ സേരിവിഹാരേന യോ അയമായസ്മാ യസ്സത്ഥായ പബ്ബജിതോ തമത്ഥം ന ജാനാതീ’തി – തസ്സ ഭവന്തി വത്താരോ. തസ്മാ ആരഞ്ഞികേന ഭിക്ഖുനാ ഉത്തരി മനുസ്സധമ്മേ യോഗോ കരണീയോ’’തി.

    ‘‘Āraññikenāvuso, bhikkhunā uttari manussadhamme yogo karaṇīyo. Santāvuso, āraññikaṃ bhikkhuṃ uttari manussadhamme pañhaṃ pucchitāro. Sace, āvuso, āraññiko bhikkhu uttari manussadhamme pañhaṃ puṭṭho na sampāyati, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā yassatthāya pabbajito tamatthaṃ na jānātī’ti – tassa bhavanti vattāro. Tasmā āraññikena bhikkhunā uttari manussadhamme yogo karaṇīyo’’ti.

    ഏവം വുത്തേ, ആയസ്മാ മഹാമോഗ്ഗല്ലാനോ 17 ആയസ്മന്തം സാരിപുത്തം ഏതദവോച – ‘‘ആരഞ്ഞികേനേവ നു ഖോ, ആവുസോ സാരിപുത്ത, ഭിക്ഖുനാ ഇമേ ധമ്മാ സമാദായ വത്തിതബ്ബാ ഉദാഹു ഗാമന്തവിഹാരിനാപീ’’തി ? ‘‘ആരഞ്ഞികേനാപി ഖോ, ആവുസോ മോഗ്ഗല്ലാന, ഭിക്ഖുനാ ഇമേ ധമ്മാ സമാദായ വത്തിതബ്ബാ പഗേവ ഗാമന്തവിഹാരിനാ’’തി.

    Evaṃ vutte, āyasmā mahāmoggallāno 18 āyasmantaṃ sāriputtaṃ etadavoca – ‘‘āraññikeneva nu kho, āvuso sāriputta, bhikkhunā ime dhammā samādāya vattitabbā udāhu gāmantavihārināpī’’ti ? ‘‘Āraññikenāpi kho, āvuso moggallāna, bhikkhunā ime dhammā samādāya vattitabbā pageva gāmantavihārinā’’ti.

    ഗോലിയാനിസുത്തം നിട്ഠിതം നവമം.

    Goliyānisuttaṃ niṭṭhitaṃ navamaṃ.




    Next: ൧൦. കീടാഗിരിസുത്തം • 10. Kīṭāgirisuttaṃ




    Footnotes:
    1. ഗുലിസ്സാനി (സീ॰ പീ॰), ഗോലിസ്സാനി (സ്യാ॰ കം॰)
    2. ആരഞ്ഞകോ (സബ്ബത്ഥ)
    3. പദരസമാചാരോ (സീ॰ സ്യാ॰ കം॰ പീ॰)
    4. gulissāni (sī. pī.), golissāni (syā. kaṃ.)
    5. āraññako (sabbattha)
    6. padarasamācāro (sī. syā. kaṃ. pī.)
    7. അപ്പതിസ്സോതിസ്സ (സീ॰ പീ॰)
    8. appatissotissa (sī. pī.)
    9. യോ അയമായസ്മാ ആഭിസമാചാരികമ്പി ധമ്മം ന ജാനാതീതി (സീ॰ സ്യാ॰ കം॰ പീ॰)
    10. yo ayamāyasmā ābhisamācārikampi dhammaṃ na jānātīti (sī. syā. kaṃ. pī.)
    11. അയം ആഭിസമാചാരികതതിയവാരോ സീ॰ സ്യാ॰ കം॰ പീ॰ പോത്ഥകേസു ന ദിസ്സതി
    12. ayaṃ ābhisamācārikatatiyavāro sī. syā. kaṃ. pī. potthakesu na dissati
    13. ന ദിവാ (സ്യാ॰ കം॰ പീ॰ ക॰)
    14. na divā (syā. kaṃ. pī. ka.)
    15. സുബ്ബചേന (സീ॰ ക॰)
    16. subbacena (sī. ka.)
    17. മഹാമോഗ്ഗലാനോ (ക॰)
    18. mahāmoggalāno (ka.)



    Related texts:



    അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / മജ്ഝിമനികായ (അട്ഠകഥാ) • Majjhimanikāya (aṭṭhakathā) / ൯. ഗോലിയാനിസുത്തവണ്ണനാ • 9. Goliyānisuttavaṇṇanā

    ടീകാ • Tīkā / സുത്തപിടക (ടീകാ) • Suttapiṭaka (ṭīkā) / മജ്ഝിമനികായ (ടീകാ) • Majjhimanikāya (ṭīkā) / ൯. ഗോലിയാനിസുത്തവണ്ണനാ • 9. Goliyānisuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact