| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
9. கோ³லியானிஸுத்தவண்ணனா
9. Goliyānisuttavaṇṇanā
173. பத³ஸமாசாரோதி தங்தங்பச்சயபே⁴த³த³ஸ்ஸனாய விக³தத்தா பகாரேஹி த³லித்³த³ஸமாசாரோ ஸிதி²லஸமாசாரோதி அத்தோ². யஸ்மா பன தாதி³ஸோ ஸமாசாரோ தி²ரோ த³ள்ஹோ நாம ந ஹோதி, தஸ்மா வுத்தங் ‘‘து³ப்³ப³லஸமாசாரோ’’தி. ‘‘ஸாக²ஸமாசாரோ’’தி வா பாடோ², தத்த² தத்த² லக்³க³னட்டே²ன ஸாகா²ஸதி³ஸஸீலோதி அத்தோ². தேனாஹ ‘‘ஓளாரிகாசாரோ’’தி. பச்சயேஸு ஸாபெக்கோ²தி பச்சயேஸு ஸாபெக்க²தாய ஏவ ஹிஸ்ஸ ஓளாரிகாசாரதா வேதி³தப்³பா³. க³ருனா கிஸ்மிஞ்சி வுத்தே கா³ரவவஸேன பதிஸ்ஸவனங் பதிஸ்ஸோ, பதிஸ்ஸவசனபூ⁴தங் தங்ஸபா⁴க³ஞ்ச யங் கிஞ்சி கா³ரவந்தி அத்தோ². ஸஹ பதிஸ்ஸேனாதி ஸப்பதிஸ்ஸேன, ஸப்பதிஸ்ஸவேன ஓவாத³ஸம்படிச்ச²னேன. பதிஸ்ஸீயதீதி வா பதிஸ்ஸோ, க³ருகாதப்³போ³, தேன ஸஹ பதிஸ்ஸேனாதி ஸப்³ப³ங் புப்³பே³ விய. தேனாஹ ‘‘ஸஜெட்ட²கேனா’’தி. ஸேரிவிஹாரோ நாம அத்தப்பதா⁴னவாஸோ. தேனாஹ ‘‘நிரங்குஸவிஹாரேனா’’தி.
173.Padasamācāroti taṃtaṃpaccayabhedadassanāya vigatattā pakārehi daliddasamācāro sithilasamācāroti attho. Yasmā pana tādiso samācāro thiro daḷho nāma na hoti, tasmā vuttaṃ ‘‘dubbalasamācāro’’ti. ‘‘Sākhasamācāro’’ti vā pāṭho, tattha tattha lagganaṭṭhena sākhāsadisasīloti attho. Tenāha ‘‘oḷārikācāro’’ti. Paccayesu sāpekkhoti paccayesu sāpekkhatāya eva hissa oḷārikācāratā veditabbā. Garunā kismiñci vutte gāravavasena patissavanaṃ patisso, patissavacanabhūtaṃ taṃsabhāgañca yaṃ kiñci gāravanti attho. Saha patissenāti sappatissena, sappatissavena ovādasampaṭicchanena. Patissīyatīti vā patisso, garukātabbo, tena saha patissenāti sabbaṃ pubbe viya. Tenāha ‘‘sajeṭṭhakenā’’ti. Serivihāro nāma attappadhānavāso. Tenāha ‘‘niraṅkusavihārenā’’ti.
அனுபக²ஜ்ஜாதி அனுபகட்³டி⁴த்வா. க³ருட்டா²னியானங் அந்தரங் அனாபுச்சா² அனுபவிஸித்வாதி இமமத்த²ங் த³ஸ்ஸேதுங் ‘‘தத்த² யோ’’திஆதி³ வுத்தங்.
Anupakhajjāti anupakaḍḍhitvā. Garuṭṭhāniyānaṃ antaraṃ anāpucchā anupavisitvāti imamatthaṃ dassetuṃ ‘‘tattha yo’’tiādi vuttaṃ.
ஆபி⁴ஸமாசாரிகந்தி அபி⁴ஸமாசாரே ப⁴வங். கிங் பன தந்தி ஆஹ ‘‘வத்தபடிபத்திமத்தம்பீ’’தி. நாதிகாலஸ்ஸேவ ஸங்க⁴ஸ்ஸ புரதோ பவிஸிதப்³ப³ங், ந பச்சா² படிக்கமிதப்³ப³ந்தி அதி⁴ப்பாயேன அதிகாலே ச கா³மப்பவேஸோ அதிதி³வா படிக்கமனஞ்ச நிவாரிதங், தங் த³ஸ்ஸேதுங் ‘‘ந அதிபாதோ’’திஆதி³ வுத்தங். உத்³த⁴ச்சபகதிகோதி விப்³ப⁴ந்தசித்தோ. அவசாபல்யேனாதி த³ள்ஹவாதாபஹதபல்லவஸதி³ஸேன லோலபா⁴வேன.
Ābhisamācārikanti abhisamācāre bhavaṃ. Kiṃ pana tanti āha ‘‘vattapaṭipattimattampī’’ti. Nātikālasseva saṅghassa purato pavisitabbaṃ, na pacchā paṭikkamitabbanti adhippāyena atikāle ca gāmappaveso atidivā paṭikkamanañca nivāritaṃ, taṃ dassetuṃ ‘‘na atipāto’’tiādi vuttaṃ. Uddhaccapakatikoti vibbhantacitto. Avacāpalyenāti daḷhavātāpahatapallavasadisena lolabhāvena.
பஞ்ஞவதாதி இமினா பி⁴க்கு²ஸாருப்பேஸு இதிகத்தப்³பே³ஸு உபாயபஞ்ஞா அதி⁴ப்பேதா, ந ஸுதமயபஞ்ஞா. அபி⁴த⁴ம்மே அபி⁴வினயே யோகோ³தி இமினா பா⁴வனாபஞ்ஞாஉத்தரிமனுஸ்ஸத⁴ம்மே யோகோ³ பகாஸிதோ. யோகோ³தி ச பரிசயோ உக்³க³ண்ஹவஸேன.
Paññavatāti iminā bhikkhusāruppesu itikattabbesu upāyapaññā adhippetā, na sutamayapaññā. Abhidhamme abhivinaye yogoti iminā bhāvanāpaññāuttarimanussadhamme yogo pakāsito. Yogoti ca paricayo uggaṇhavasena.
ஆருப்பாதி இமினா சதஸ்ஸோபி அரூபஸமாபத்தியோ க³ஹிதா, தா பன சதூஹி ரூபஸமாபத்தீஹி வினா ந ஸம்பஜ்ஜந்தீதி ஆஹ – ‘‘ஆருப்பாதி எத்தாவதா அட்ட²பி ஸமாபத்தியோ வுத்தா ஹொந்தீ’’தி. கஸிணேதி த³ஸவிதே⁴ கஸிணே. ஏகங் பரிகம்மகம்மட்டா²னந்தி யங் கிஞ்சி ஏகபா⁴வனா பரிகம்மதீ³பனங் க²ந்த⁴கம்மட்டா²னங். தேனாஹ ‘‘பகு³ணங் கத்வா’’தி. கஸிணபரிகம்மங் பன தக்³க³ஹணேனேவ க³ஹிதங் ஹோதி, லோகியா உத்தரிமனுஸ்ஸத⁴ம்மா ஹெட்டா² க³ஹிதாதி ஆஹ ‘‘உத்தரிமனுஸ்ஸத⁴ம்மேதி இமினா ஸப்³பே³பி லோகுத்தரத⁴ம்மே த³ஸ்ஸேதீ’’தி. நெய்யபுக்³க³லஸ்ஸ வஸேனாதி ஜானித்வா வித்தா²ரெத்வா ஞாதப்³ப³புக்³க³லஸ்ஸ வஸேனாதி.
Āruppāti iminā catassopi arūpasamāpattiyo gahitā, tā pana catūhi rūpasamāpattīhi vinā na sampajjantīti āha – ‘‘āruppāti ettāvatā aṭṭhapi samāpattiyo vuttā hontī’’ti. Kasiṇeti dasavidhe kasiṇe. Ekaṃ parikammakammaṭṭhānanti yaṃ kiñci ekabhāvanā parikammadīpanaṃ khandhakammaṭṭhānaṃ. Tenāha ‘‘paguṇaṃ katvā’’ti. Kasiṇaparikammaṃ pana taggahaṇeneva gahitaṃ hoti, lokiyā uttarimanussadhammā heṭṭhā gahitāti āha ‘‘uttarimanussadhammeti iminā sabbepi lokuttaradhamme dassetī’’ti. Neyyapuggalassa vasenāti jānitvā vitthāretvā ñātabbapuggalassa vasenāti.
கோ³லியானிஸுத்தவண்ணனாய லீனத்த²ப்பகாஸனா ஸமத்தா.
Goliyānisuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 9. கோ³லியானிஸுத்தங் • 9. Goliyānisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 9. கோ³லியானிஸுத்தவண்ணனா • 9. Goliyānisuttavaṇṇanā
