| Library / Tipiṭaka / ತಿಪಿಟಕ • Tipiṭaka / ಮಜ್ಝಿಮನಿಕಾಯ (ಅಟ್ಠಕಥಾ) • Majjhimanikāya (aṭṭhakathā) |
೯. ಗೋಲಿಯಾನಿಸುತ್ತವಣ್ಣನಾ
9. Goliyānisuttavaṇṇanā
೧೭೩. ಏವಂ ಮೇ ಸುತನ್ತಿ ಗೋಲಿಯಾನಿಸುತ್ತಂ। ತತ್ಥ ಪದಸಮಾಚಾರೋತಿ ದುಬ್ಬಲಸಮಾಚಾರೋ ಓಳಾರಿಕಾಚಾರೋ, ಪಚ್ಚಯೇಸು ಸಾಪೇಕ್ಖೋ ಮಹಾರಕ್ಖಿತತ್ಥೇರೋ ವಿಯ। ತಂ ಕಿರ ಉಪಟ್ಠಾಕಕುಲೇ ನಿಸಿನ್ನಂ ಉಪಟ್ಠಾಕೋ ಆಹ ‘‘ಅಸುಕತ್ಥೇರಸ್ಸ ಮೇ, ಭನ್ತೇ, ಚೀವರಂ ದಿನ್ನ’’ನ್ತಿ। ಸಾಧು ತೇ ಕತಂ ತಂಯೇವ ತಕ್ಕೇತ್ವಾ ವಿಹರನ್ತಸ್ಸ ಚೀವರಂ ದೇನ್ತೇನಾತಿ। ತುಮ್ಹಾಕಮ್ಪಿ, ಭನ್ತೇ, ದಸ್ಸಾಮೀತಿ। ಸಾಧು ಕರಿಸ್ಸಸಿ ತಂಯೇವ ತಕ್ಕೇನ್ತಸ್ಸಾತಿ ಆಹ। ಅಯಮ್ಪಿ ಏವರೂಪೋ ಓಳಾರಿಕಾಚಾರೋ ಅಹೋಸಿ। ಸಪ್ಪತಿಸ್ಸೇನಾತಿ ಸಜೇಟ್ಠಕೇನ, ನ ಅತ್ತಾನಂ ಜೇಟ್ಠಕಂ ಕತ್ವಾ ವಿಹರಿತಬ್ಬಂ। ಸೇರಿವಿಹಾರೇನಾತಿ ಸಚ್ಛನ್ದವಿಹಾರೇನ ನಿರಙ್ಕುಸವಿಹಾರೇನ।
173.Evaṃme sutanti goliyānisuttaṃ. Tattha padasamācāroti dubbalasamācāro oḷārikācāro, paccayesu sāpekkho mahārakkhitatthero viya. Taṃ kira upaṭṭhākakule nisinnaṃ upaṭṭhāko āha ‘‘asukattherassa me, bhante, cīvaraṃ dinna’’nti. Sādhu te kataṃ taṃyeva takketvā viharantassa cīvaraṃ dentenāti. Tumhākampi, bhante, dassāmīti. Sādhu karissasi taṃyeva takkentassāti āha. Ayampi evarūpo oḷārikācāro ahosi. Sappatissenāti sajeṭṭhakena, na attānaṃ jeṭṭhakaṃ katvā viharitabbaṃ. Serivihārenāti sacchandavihārena niraṅkusavihārena.
ನಾನೂಪಖಜ್ಜಾತಿ ನ ಅನುಪಖಜ್ಜ ನ ಅನುಪವಿಸಿತ್ವಾ। ತತ್ಥ ಯೋ ದ್ವೀಸು ಮಹಾಥೇರೇಸು ಉಭತೋ ನಿಸಿನ್ನೇಸು ತೇ ಅನಾಪುಚ್ಛಿತ್ವಾವ ಚೀವರೇನ ವಾ ಜಾಣುನಾ ವಾ ಘಟ್ಟೇನ್ತೋ ನಿಸೀದತಿ, ಅಯಂ ಅನುಪಖಜ್ಜ ನಿಸೀದತಿ ನಾಮ। ಏವಂ ಅಕತ್ವಾ ಪನ ಅತ್ತನೋ ಪತ್ತಆಸನಸನ್ತಿಕೇ ಠತ್ವಾ ನಿಸೀದಾವುಸೋತಿ ವುತ್ತೇ ನಿಸೀದಿತಬ್ಬಂ। ಸಚೇ ನ ವದನ್ತಿ, ನಿಸೀದಾಮಿ, ಭನ್ತೇತಿ ಆಪುಚ್ಛಿತ್ವಾ ನಿಸೀದಿತಬ್ಬಂ ಆಪುಚ್ಛಿತಕಾಲತೋ ಪಟ್ಠಾಯ ನಿಸೀದಾತಿ ವುತ್ತೇಪಿ ಅವುತ್ತೇಪಿ ನಿಸೀದಿತುಂ ವಟ್ಟತಿಯೇವ। ನ ಪಟಿಬಾಹಿಸ್ಸಾಮೀತಿ ಏತ್ಥ ಯೋ ಅತ್ತನೋ ಪತ್ತಾಸನಂ ಅತಿಕ್ಕಮಿತ್ವಾ ನವಕಾನಂ ಪಾಪುಣನಟ್ಠಾನೇ ನಿಸೀದತಿ, ಅಯಂ ನವೇ ಭಿಕ್ಖೂ ಆಸನೇನ ಪಟಿಬಾಹತಿ ನಾಮ। ತಸ್ಮಿಞ್ಹಿ ತಥಾ ನಿಸಿನ್ನೇ ನವಾ ಭಿಕ್ಖೂ ‘‘ಅಮ್ಹಾಕಂ ನಿಸೀದಿತುಂ ನ ದೇತೀ’’ತಿ ಉಜ್ಝಾಯನ್ತಾ ತಿಟ್ಠನ್ತಿ ವಾ ಆಸನಂ ವಾ ಪರಿಯೇಸನ್ತಾ ಆಹಿಣ್ಡನ್ತಿ। ತಸ್ಮಾ ಅತ್ತನೋ ಪತ್ತಾಸನೇಯೇವ ನಿಸೀದಿತಬ್ಬಂ। ಏವಂ ನ ಪಟಿಬಾಹತಿ ನಾಮ।
Nānūpakhajjāti na anupakhajja na anupavisitvā. Tattha yo dvīsu mahātheresu ubhato nisinnesu te anāpucchitvāva cīvarena vā jāṇunā vā ghaṭṭento nisīdati, ayaṃ anupakhajja nisīdati nāma. Evaṃ akatvā pana attano pattaāsanasantike ṭhatvā nisīdāvusoti vutte nisīditabbaṃ. Sace na vadanti, nisīdāmi, bhanteti āpucchitvā nisīditabbaṃ āpucchitakālato paṭṭhāya nisīdāti vuttepi avuttepi nisīdituṃ vaṭṭatiyeva. Na paṭibāhissāmīti ettha yo attano pattāsanaṃ atikkamitvā navakānaṃ pāpuṇanaṭṭhāne nisīdati, ayaṃ nave bhikkhū āsanena paṭibāhati nāma. Tasmiñhi tathā nisinne navā bhikkhū ‘‘amhākaṃ nisīdituṃ na detī’’ti ujjhāyantā tiṭṭhanti vā āsanaṃ vā pariyesantā āhiṇḍanti. Tasmā attano pattāsaneyeva nisīditabbaṃ. Evaṃ na paṭibāhati nāma.
ಆಭಿಸಮಾಚಾರಿಕಮ್ಪಿ ಧಮ್ಮನ್ತಿ ಅಭಿಸಮಾಚಾರಿಕಂ ವತ್ತಪಟಿಪತ್ತಿಮತ್ತಮ್ಪಿ। ನಾತಿಕಾಲೇನಾತಿ ನ ಅತಿಪಾತೋ ಪವಿಸಿತಬ್ಬಂ, ನ ಅತಿದಿವಾ ಪಟಿಕ್ಕಮಿತಬ್ಬಂ, ಭಿಕ್ಖುಸಙ್ಘೇನ ಸದ್ಧಿಂಯೇವ ಪವಿಸಿತಬ್ಬಞ್ಚ ನಿಕ್ಖಮಿತಬ್ಬಞ್ಚ। ಅತಿಪಾತೋ ಪವಿಸಿತ್ವಾ ಅತಿದಿವಾ ನಿಕ್ಖಮನ್ತಸ್ಸ ಹಿ ಚೇತಿಯಙ್ಗಣಬೋಧಿಯಙ್ಗಣವತ್ತಾದೀನಿ ಪರಿಹಾಯನ್ತಿ। ಕಾಲಸ್ಸೇವ ಮುಖಂ ಧೋವಿತ್ವಾ ಮಕ್ಕಟಕಸುತ್ತಾನಿ ಛಿನ್ದನ್ತೇನ ಉಸ್ಸಾವಬಿನ್ದೂ ನಿಪಾತೇನ್ತೇನ ಗಾಮಂ ಪವಿಸಿತ್ವಾ ಯಾಗುಂ ಪರಿಯೇಸಿತ್ವಾ ಯಾವ ಭಿಕ್ಖಾಕಾಲಾ ಅನ್ತೋಗಾಮೇಯೇವ ನಾನಪ್ಪಕಾರಂ ತಿರಚ್ಛಾನಕಥಂ ಕಥೇನ್ತೇನ ನಿಸೀದಿತ್ವಾ ಭತ್ತಕಿಚ್ಚಂ ಕತ್ವಾ ದಿವಾ ನಿಕ್ಖಮ್ಮ ಭಿಕ್ಖೂನಂ ಪಾದಧೋವನವೇಲಾಯ ವಿಹಾರಂ ಪಚ್ಚಾಗನ್ತಬ್ಬಂ ಹೋತಿ। ನ ಪುರೇಭತ್ತಂ ಪಚ್ಛಾಭತ್ತಂ ಕುಲೇಸು ಚಾರಿತ್ತಂ ಆಪಜ್ಜಿತಬ್ಬನ್ತಿ ‘‘ಯೋ ಪನ ಭಿಕ್ಖು ನಿಮನ್ತಿತೋ ಸಭತ್ತೋ ಸಮಾನೋ ಸನ್ತಂ ಭಿಕ್ಖುಂ ಅನಾಪುಚ್ಛಾ ಪುರೇಭತ್ತಂ ವಾ ಪಚ್ಛಾಭತ್ತಂ ವಾ ಕುಲೇಸು ಚಾರಿತ್ತಂ ಆಪಜ್ಜೇಯ್ಯ, ಅಞ್ಞತ್ರ ಸಮಯಾ ಪಾಚಿತ್ತಿಯ’’ನ್ತಿ (ಪಾಚಿ॰ ೨೯೯) ಇಮಂ ಸಿಕ್ಖಾಪದಂ ರಕ್ಖನ್ತೇನ ತಸ್ಸ ವಿಭಙ್ಗೇ ವುತ್ತಂ ಪುರೇಭತ್ತಞ್ಚ ಪಚ್ಛಾಭತ್ತಞ್ಚ ಚಾರಿತ್ತಂ ನ ಆಪಜ್ಜಿತಬ್ಬಂ। ಉದ್ಧತೋ ಹೋತಿ ಚಪಲೋತಿ ಉದ್ಧಚ್ಚಪಕತಿಕೋ ಚೇವ ಹೋತಿ ಚೀವರಮಣ್ಡನ-ಪತ್ತಮಣ್ಡನ-ಸೇನಾಸನಮಣ್ಡನಾ ಇಮಸ್ಸ ವಾ ಪೂತಿಕಾಯಸ್ಸ ಕೇಲಾಯನಾ ಮಣ್ಡನಾತಿ ಏವಂ ವುತ್ತೇನ ಚ ತರುಣದಾರಕಾವಚಾಪಲ್ಯೇನ ಸಮನ್ನಾಗತೋ।
Ābhisamācārikampi dhammanti abhisamācārikaṃ vattapaṭipattimattampi. Nātikālenāti na atipāto pavisitabbaṃ, na atidivā paṭikkamitabbaṃ, bhikkhusaṅghena saddhiṃyeva pavisitabbañca nikkhamitabbañca. Atipāto pavisitvā atidivā nikkhamantassa hi cetiyaṅgaṇabodhiyaṅgaṇavattādīni parihāyanti. Kālasseva mukhaṃ dhovitvā makkaṭakasuttāni chindantena ussāvabindū nipātentena gāmaṃ pavisitvā yāguṃ pariyesitvā yāva bhikkhākālā antogāmeyeva nānappakāraṃ tiracchānakathaṃ kathentena nisīditvā bhattakiccaṃ katvā divā nikkhamma bhikkhūnaṃ pādadhovanavelāya vihāraṃ paccāgantabbaṃ hoti. Na purebhattaṃ pacchābhattaṃ kulesu cārittaṃ āpajjitabbanti ‘‘yo pana bhikkhu nimantito sabhatto samāno santaṃ bhikkhuṃ anāpucchā purebhattaṃ vā pacchābhattaṃ vā kulesu cārittaṃ āpajjeyya, aññatra samayā pācittiya’’nti (pāci. 299) imaṃ sikkhāpadaṃ rakkhantena tassa vibhaṅge vuttaṃ purebhattañca pacchābhattañca cārittaṃ na āpajjitabbaṃ. Uddhato hoti capaloti uddhaccapakatiko ceva hoti cīvaramaṇḍana-pattamaṇḍana-senāsanamaṇḍanā imassa vā pūtikāyassa kelāyanā maṇḍanāti evaṃ vuttena ca taruṇadārakāvacāpalyena samannāgato.
ಪಞ್ಞವತಾ ಭವಿತಬ್ಬನ್ತಿ ಚೀವರಕಮ್ಮಾದೀಸು ಇತಿಕತ್ತಬ್ಬೇಸು ಉಪಾಯಪಞ್ಞಾಯ ಸಮನ್ನಾಗತೇನ ಭವಿತಬ್ಬಂ। ಅಭಿಧಮ್ಮೇ ಅಭಿವಿನಯೇತಿ ಅಭಿಧಮ್ಮಪಿಟಕೇ ಚೇವ ವಿನಯಪಿಟಕೇ ಚ ಪಾಳಿವಸೇನ ಚೇವ ಅಟ್ಠಕಥಾವಸೇನ ಚ ಯೋಗೋ ಕರಣೀಯೋ। ಸಬ್ಬನ್ತಿಮೇನ ಹಿ ಪರಿಚ್ಛೇದೇನ ಅಭಿಧಮ್ಮೇ ದುಕತಿಕಮಾತಿಕಾಹಿ ಸದ್ಧಿಂ ಧಮ್ಮಹದಯವಿಭಙ್ಗಂ ವಿನಾ ನ ವಟ್ಟತಿ। ವಿನಯೇ ಪನ ಕಮ್ಮಾಕಮ್ಮವಿನಿಚ್ಛಯೇನ ಸದ್ಧಿಂ ಸುವಿನಿಚ್ಛಿತಾನಿ ದ್ವೇ ಪಾತಿಮೋಕ್ಖಾನಿ ವಿನಾ ನ ವಟ್ಟತಿ।
Paññavatābhavitabbanti cīvarakammādīsu itikattabbesu upāyapaññāya samannāgatena bhavitabbaṃ. Abhidhamme abhivinayeti abhidhammapiṭake ceva vinayapiṭake ca pāḷivasena ceva aṭṭhakathāvasena ca yogo karaṇīyo. Sabbantimena hi paricchedena abhidhamme dukatikamātikāhi saddhiṃ dhammahadayavibhaṅgaṃ vinā na vaṭṭati. Vinaye pana kammākammavinicchayena saddhiṃ suvinicchitāni dve pātimokkhāni vinā na vaṭṭati.
ಆರುಪ್ಪಾತಿ ಏತ್ತಾವತಾ ಅಟ್ಠಪಿ ಸಮಾಪತ್ತಿಯೋ ವುತ್ತಾ ಹೋನ್ತಿ। ತಾ ಪನ ಸಬ್ಬೇನ ಸಬ್ಬಂ ಅಸಕ್ಕೋನ್ತೇನ ಸತ್ತಸುಪಿ ಯೋಗೋ ಕರಣೀಯೋ, ಛಸುಪಿ…ಪೇ॰… ಪಞ್ಚಸುಪಿ। ಸಬ್ಬನ್ತಿಮೇನ ಪರಿಚ್ಛೇದೇನ ಏಕಂ ಕಸಿಣೇ ಪರಿಕಮ್ಮಕಮ್ಮಟ್ಠಾನಂ ಪಗುಣಂ ಕತ್ವಾ ಆದಾಯ ವಿಚರಿತಬ್ಬಂ, ಏತ್ತಕಂ ವಿನಾ ನ ವಟ್ಟತಿ। ಉತ್ತರಿಮನುಸ್ಸಧಮ್ಮೇತಿ ಇಮಿನಾ ಸಬ್ಬೇಪಿ ಲೋಕುತ್ತರಧಮ್ಮೇ ದಸ್ಸೇತಿ। ತಸ್ಮಾ ಅರಹನ್ತೇನ ಹುತ್ವಾ ವಿಹಾತಬ್ಬಂ, ಅರಹತ್ತಂ ಅನಭಿಸಮ್ಭುಣನ್ತೇನ ಅನಾಗಾಮಿಫಲೇ ಸಕದಾಗಾಮಿಫಲೇ ಸೋತಾಪತ್ತಿಫಲೇ ವಾ ಪತಿಟ್ಠಾತಬ್ಬಂ। ಸಬ್ಬನ್ತಿಮೇನ ಪರಿಯಾಯೇನ ಏಕಂ ವಿಪಸ್ಸನಾಮುಖಂ ಯಾವ ಅರಹತ್ತಾ ಪಗುಣಂ ಕತ್ವಾ ಆದಾಯ ವಿಚರಿತಬ್ಬಂ। ಸೇಸಂ ಸಬ್ಬತ್ಥ ಉತ್ತಾನಮೇವ। ಇಮಂ ಪನ ದೇಸನಂ ಆಯಸ್ಮಾ ಸಾರಿಪುತ್ತೋ ನೇಯ್ಯಪುಗ್ಗಲಸ್ಸ ವಸೇನ ಆಭಿಸಮಾಚಾರಿಕವತ್ತತೋ ಪಟ್ಠಾಯ ಅನುಪುಬ್ಬೇನ ಅರಹತ್ತಂ ಪಾಪೇತ್ವಾ ನಿಟ್ಠಾಪೇಸೀತಿ।
Āruppāti ettāvatā aṭṭhapi samāpattiyo vuttā honti. Tā pana sabbena sabbaṃ asakkontena sattasupi yogo karaṇīyo, chasupi…pe… pañcasupi. Sabbantimena paricchedena ekaṃ kasiṇe parikammakammaṭṭhānaṃ paguṇaṃ katvā ādāya vicaritabbaṃ, ettakaṃ vinā na vaṭṭati. Uttarimanussadhammeti iminā sabbepi lokuttaradhamme dasseti. Tasmā arahantena hutvā vihātabbaṃ, arahattaṃ anabhisambhuṇantena anāgāmiphale sakadāgāmiphale sotāpattiphale vā patiṭṭhātabbaṃ. Sabbantimena pariyāyena ekaṃ vipassanāmukhaṃ yāva arahattā paguṇaṃ katvā ādāya vicaritabbaṃ. Sesaṃ sabbattha uttānameva. Imaṃ pana desanaṃ āyasmā sāriputto neyyapuggalassa vasena ābhisamācārikavattato paṭṭhāya anupubbena arahattaṃ pāpetvā niṭṭhāpesīti.
ಪಪಞ್ಚಸೂದನಿಯಾ ಮಜ್ಝಿಮನಿಕಾಯಟ್ಠಕಥಾಯ
Papañcasūdaniyā majjhimanikāyaṭṭhakathāya
ಗೋಲಿಯಾನಿಸುತ್ತವಣ್ಣನಾ ನಿಟ್ಠಿತಾ।
Goliyānisuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಮಜ್ಝಿಮನಿಕಾಯ • Majjhimanikāya / ೯. ಗೋಲಿಯಾನಿಸುತ್ತಂ • 9. Goliyānisuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಮಜ್ಝಿಮನಿಕಾಯ (ಟೀಕಾ) • Majjhimanikāya (ṭīkā) / ೯. ಗೋಲಿಯಾನಿಸುತ್ತವಣ್ಣನಾ • 9. Goliyānisuttavaṇṇanā
