| Library / Tipiṭaka / තිපිටක • Tipiṭaka / මජ්‌ඣිමනිකාය (ටීකා) • Majjhimanikāya (ṭīkā) |
9. ගොලියානිසුත්‌තවණ්‌ණනා
9. Goliyānisuttavaṇṇanā
173. පදසමාචාරොති තංතංපච්‌චයභෙදදස්‌සනාය විගතත්‌තා පකාරෙහි දලිද්‌දසමාචාරො සිථිලසමාචාරොති අත්‌ථො. යස්‌මා පන තාදිසො සමාචාරො ථිරො දළ්‌හො නාම න හොති, තස්‌මා වුත්‌තං ‘‘දුබ්‌බලසමාචාරො’’ති. ‘‘සාඛසමාචාරො’’ති වා පාඨො, තත්‌ථ තත්‌ථ ලග්‌ගනට්‌ඨෙන සාඛාසදිසසීලොති අත්‌ථො. තෙනාහ ‘‘ඔළාරිකාචාරො’’ති. පච්‌චයෙසු සාපෙක්‌ඛොති පච්‌චයෙසු සාපෙක්‌ඛතාය එව හිස්‌ස ඔළාරිකාචාරතා වෙදිතබ්‌බා. ගරුනා කිස්‌මිඤ්‌චි වුත්‌තෙ ගාරවවසෙන පතිස්‌සවනං පතිස්‌සො, පතිස්‌සවචනභූතං තංසභාගඤ්‌ච යං කිඤ්‌චි ගාරවන්‌ති අත්‌ථො. සහ පතිස්‌සෙනාති සප්‌පතිස්‌සෙන, සප්‌පතිස්‌සවෙන ඔවාදසම්‌පටිච්‌ඡනෙන. පතිස්‌සීයතීති වා පතිස්‌සො, ගරුකාතබ්‌බො, තෙන සහ පතිස්‌සෙනාති සබ්‌බං පුබ්‌බෙ විය. තෙනාහ ‘‘සජෙට්‌ඨකෙනා’’ති. සෙරිවිහාරො නාම අත්‌තප්‌පධානවාසො. තෙනාහ ‘‘නිරඞ්‌කුසවිහාරෙනා’’ති.
173.Padasamācāroti taṃtaṃpaccayabhedadassanāya vigatattā pakārehi daliddasamācāro sithilasamācāroti attho. Yasmā pana tādiso samācāro thiro daḷho nāma na hoti, tasmā vuttaṃ ‘‘dubbalasamācāro’’ti. ‘‘Sākhasamācāro’’ti vā pāṭho, tattha tattha lagganaṭṭhena sākhāsadisasīloti attho. Tenāha ‘‘oḷārikācāro’’ti. Paccayesu sāpekkhoti paccayesu sāpekkhatāya eva hissa oḷārikācāratā veditabbā. Garunā kismiñci vutte gāravavasena patissavanaṃ patisso, patissavacanabhūtaṃ taṃsabhāgañca yaṃ kiñci gāravanti attho. Saha patissenāti sappatissena, sappatissavena ovādasampaṭicchanena. Patissīyatīti vā patisso, garukātabbo, tena saha patissenāti sabbaṃ pubbe viya. Tenāha ‘‘sajeṭṭhakenā’’ti. Serivihāro nāma attappadhānavāso. Tenāha ‘‘niraṅkusavihārenā’’ti.
අනුපඛජ්‌ජාති අනුපකඩ්‌ඪිත්‌වා. ගරුට්‌ඨානියානං අන්‌තරං අනාපුච්‌ඡා අනුපවිසිත්‌වාති ඉමමත්‌ථං දස්‌සෙතුං ‘‘තත්‌ථ යො’’තිආදි වුත්‌තං.
Anupakhajjāti anupakaḍḍhitvā. Garuṭṭhāniyānaṃ antaraṃ anāpucchā anupavisitvāti imamatthaṃ dassetuṃ ‘‘tattha yo’’tiādi vuttaṃ.
ආභිසමාචාරිකන්‌ති අභිසමාචාරෙ භවං. කිං පන තන්‌ති ආහ ‘‘වත්‌තපටිපත්‌තිමත්‌තම්‌පී’’ති. නාතිකාලස්‌සෙව සඞ්‌ඝස්‌ස පුරතො පවිසිතබ්‌බං, න පච්‌ඡා පටික්‌කමිතබ්‌බන්‌ති අධිප්‌පායෙන අතිකාලෙ ච ගාමප්‌පවෙසො අතිදිවා පටික්‌කමනඤ්‌ච නිවාරිතං, තං දස්‌සෙතුං ‘‘න අතිපාතො’’තිආදි වුත්‌තං. උද්‌ධච්‌චපකතිකොති විබ්‌භන්‌තචිත්‌තො. අවචාපල්‍යෙනාති දළ්‌හවාතාපහතපල්‌ලවසදිසෙන ලොලභාවෙන.
Ābhisamācārikanti abhisamācāre bhavaṃ. Kiṃ pana tanti āha ‘‘vattapaṭipattimattampī’’ti. Nātikālasseva saṅghassa purato pavisitabbaṃ, na pacchā paṭikkamitabbanti adhippāyena atikāle ca gāmappaveso atidivā paṭikkamanañca nivāritaṃ, taṃ dassetuṃ ‘‘na atipāto’’tiādi vuttaṃ. Uddhaccapakatikoti vibbhantacitto. Avacāpalyenāti daḷhavātāpahatapallavasadisena lolabhāvena.
පඤ්‌ඤවතාති ඉමිනා භික්‌ඛුසාරුප්‌පෙසු ඉතිකත්‌තබ්‌බෙසු උපායපඤ්‌ඤා අධිප්‌පෙතා, න සුතමයපඤ්‌ඤා. අභිධම්‌මෙ අභිවිනයෙ යොගොති ඉමිනා භාවනාපඤ්‌ඤාඋත්‌තරිමනුස්‌සධම්‌මෙ යොගො පකාසිතො. යොගොති ච පරිචයො උග්‌ගණ්‌හවසෙන.
Paññavatāti iminā bhikkhusāruppesu itikattabbesu upāyapaññā adhippetā, na sutamayapaññā. Abhidhamme abhivinaye yogoti iminā bhāvanāpaññāuttarimanussadhamme yogo pakāsito. Yogoti ca paricayo uggaṇhavasena.
ආරුප්‌පාති ඉමිනා චතස්‌සොපි අරූපසමාපත්‌තියො ගහිතා, තා පන චතූහි රූපසමාපත්‌තීහි විනා න සම්‌පජ්‌ජන්‌තීති ආහ – ‘‘ආරුප්‌පාති එත්‌තාවතා අට්‌ඨපි සමාපත්‌තියො වුත්‌තා හොන්‌තී’’ති. කසිණෙති දසවිධෙ කසිණෙ. එකං පරිකම්‌මකම්‌මට්‌ඨානන්‌ති යං කිඤ්‌චි එකභාවනා පරිකම්‌මදීපනං ඛන්‌ධකම්‌මට්‌ඨානං. තෙනාහ ‘‘පගුණං කත්‌වා’’ති. කසිණපරිකම්‌මං පන තග්‌ගහණෙනෙව ගහිතං හොති, ලොකියා උත්‌තරිමනුස්‌සධම්‌මා හෙට්‌ඨා ගහිතාති ආහ ‘‘උත්‌තරිමනුස්‌සධම්‌මෙති ඉමිනා සබ්‌බෙපි ලොකුත්‌තරධම්‌මෙ දස්‌සෙතී’’ති. නෙය්‍යපුග්‌ගලස්‌ස වසෙනාති ජානිත්‌වා විත්‌ථාරෙත්‌වා ඤාතබ්‌බපුග්‌ගලස්‌ස වසෙනාති.
Āruppāti iminā catassopi arūpasamāpattiyo gahitā, tā pana catūhi rūpasamāpattīhi vinā na sampajjantīti āha – ‘‘āruppāti ettāvatā aṭṭhapi samāpattiyo vuttā hontī’’ti. Kasiṇeti dasavidhe kasiṇe. Ekaṃ parikammakammaṭṭhānanti yaṃ kiñci ekabhāvanā parikammadīpanaṃ khandhakammaṭṭhānaṃ. Tenāha ‘‘paguṇaṃ katvā’’ti. Kasiṇaparikammaṃ pana taggahaṇeneva gahitaṃ hoti, lokiyā uttarimanussadhammā heṭṭhā gahitāti āha ‘‘uttarimanussadhammeti iminā sabbepi lokuttaradhamme dassetī’’ti. Neyyapuggalassa vasenāti jānitvā vitthāretvā ñātabbapuggalassa vasenāti.
ගොලියානිසුත්‌තවණ්‌ණනාය ලීනත්‌ථප්‌පකාසනා සමත්‌තා.
Goliyānisuttavaṇṇanāya līnatthappakāsanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / මජ්‌ඣිමනිකාය • Majjhimanikāya / 9. ගොලියානිසුත්‌තං • 9. Goliyānisuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / මජ්‌ඣිමනිකාය (අට්‌ඨකථා) • Majjhimanikāya (aṭṭhakathā) / 9. ගොලියානිසුත්‌තවණ්‌ණනා • 9. Goliyānisuttavaṇṇanā
