| Library / Tipiṭaka / ਤਿਪਿਟਕ • Tipiṭaka / ਮਜ੍ਝਿਮਨਿਕਾਯ (ਟੀਕਾ) • Majjhimanikāya (ṭīkā) |
੯. ਗੋਲਿਯਾਨਿਸੁਤ੍ਤવਣ੍ਣਨਾ
9. Goliyānisuttavaṇṇanā
੧੭੩. ਪਦਸਮਾਚਾਰੋਤਿ ਤਂਤਂਪਚ੍ਚਯਭੇਦਦਸ੍ਸਨਾਯ વਿਗਤਤ੍ਤਾ ਪਕਾਰੇਹਿ ਦਲਿਦ੍ਦਸਮਾਚਾਰੋ ਸਿਥਿਲਸਮਾਚਾਰੋਤਿ ਅਤ੍ਥੋ। ਯਸ੍ਮਾ ਪਨ ਤਾਦਿਸੋ ਸਮਾਚਾਰੋ ਥਿਰੋ ਦਲ਼੍ਹੋ ਨਾਮ ਨ ਹੋਤਿ, ਤਸ੍ਮਾ વੁਤ੍ਤਂ ‘‘ਦੁਬ੍ਬਲਸਮਾਚਾਰੋ’’ਤਿ। ‘‘ਸਾਖਸਮਾਚਾਰੋ’’ਤਿ વਾ ਪਾਠੋ, ਤਤ੍ਥ ਤਤ੍ਥ ਲਗ੍ਗਨਟ੍ਠੇਨ ਸਾਖਾਸਦਿਸਸੀਲੋਤਿ ਅਤ੍ਥੋ। ਤੇਨਾਹ ‘‘ਓਲ਼ਾਰਿਕਾਚਾਰੋ’’ਤਿ। ਪਚ੍ਚਯੇਸੁ ਸਾਪੇਕ੍ਖੋਤਿ ਪਚ੍ਚਯੇਸੁ ਸਾਪੇਕ੍ਖਤਾਯ ਏવ ਹਿਸ੍ਸ ਓਲ਼ਾਰਿਕਾਚਾਰਤਾ વੇਦਿਤਬ੍ਬਾ। ਗਰੁਨਾ ਕਿਸ੍ਮਿਞ੍ਚਿ વੁਤ੍ਤੇ ਗਾਰવવਸੇਨ ਪਤਿਸ੍ਸવਨਂ ਪਤਿਸ੍ਸੋ, ਪਤਿਸ੍ਸવਚਨਭੂਤਂ ਤਂਸਭਾਗਞ੍ਚ ਯਂ ਕਿਞ੍ਚਿ ਗਾਰવਨ੍ਤਿ ਅਤ੍ਥੋ। ਸਹ ਪਤਿਸ੍ਸੇਨਾਤਿ ਸਪ੍ਪਤਿਸ੍ਸੇਨ, ਸਪ੍ਪਤਿਸ੍ਸવੇਨ ਓવਾਦਸਮ੍ਪਟਿਚ੍ਛਨੇਨ। ਪਤਿਸ੍ਸੀਯਤੀਤਿ વਾ ਪਤਿਸ੍ਸੋ, ਗਰੁਕਾਤਬ੍ਬੋ, ਤੇਨ ਸਹ ਪਤਿਸ੍ਸੇਨਾਤਿ ਸਬ੍ਬਂ ਪੁਬ੍ਬੇ વਿਯ। ਤੇਨਾਹ ‘‘ਸਜੇਟ੍ਠਕੇਨਾ’’ਤਿ। ਸੇਰਿવਿਹਾਰੋ ਨਾਮ ਅਤ੍ਤਪ੍ਪਧਾਨવਾਸੋ। ਤੇਨਾਹ ‘‘ਨਿਰਙ੍ਕੁਸવਿਹਾਰੇਨਾ’’ਤਿ।
173.Padasamācāroti taṃtaṃpaccayabhedadassanāya vigatattā pakārehi daliddasamācāro sithilasamācāroti attho. Yasmā pana tādiso samācāro thiro daḷho nāma na hoti, tasmā vuttaṃ ‘‘dubbalasamācāro’’ti. ‘‘Sākhasamācāro’’ti vā pāṭho, tattha tattha lagganaṭṭhena sākhāsadisasīloti attho. Tenāha ‘‘oḷārikācāro’’ti. Paccayesu sāpekkhoti paccayesu sāpekkhatāya eva hissa oḷārikācāratā veditabbā. Garunā kismiñci vutte gāravavasena patissavanaṃ patisso, patissavacanabhūtaṃ taṃsabhāgañca yaṃ kiñci gāravanti attho. Saha patissenāti sappatissena, sappatissavena ovādasampaṭicchanena. Patissīyatīti vā patisso, garukātabbo, tena saha patissenāti sabbaṃ pubbe viya. Tenāha ‘‘sajeṭṭhakenā’’ti. Serivihāro nāma attappadhānavāso. Tenāha ‘‘niraṅkusavihārenā’’ti.
ਅਨੁਪਖਜ੍ਜਾਤਿ ਅਨੁਪਕਡ੍ਢਿਤ੍વਾ। ਗਰੁਟ੍ਠਾਨਿਯਾਨਂ ਅਨ੍ਤਰਂ ਅਨਾਪੁਚ੍ਛਾ ਅਨੁਪવਿਸਿਤ੍વਾਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਤਤ੍ਥ ਯੋ’’ਤਿਆਦਿ વੁਤ੍ਤਂ।
Anupakhajjāti anupakaḍḍhitvā. Garuṭṭhāniyānaṃ antaraṃ anāpucchā anupavisitvāti imamatthaṃ dassetuṃ ‘‘tattha yo’’tiādi vuttaṃ.
ਆਭਿਸਮਾਚਾਰਿਕਨ੍ਤਿ ਅਭਿਸਮਾਚਾਰੇ ਭવਂ। ਕਿਂ ਪਨ ਤਨ੍ਤਿ ਆਹ ‘‘વਤ੍ਤਪਟਿਪਤ੍ਤਿਮਤ੍ਤਮ੍ਪੀ’’ਤਿ। ਨਾਤਿਕਾਲਸ੍ਸੇવ ਸਙ੍ਘਸ੍ਸ ਪੁਰਤੋ ਪવਿਸਿਤਬ੍ਬਂ, ਨ ਪਚ੍ਛਾ ਪਟਿਕ੍ਕਮਿਤਬ੍ਬਨ੍ਤਿ ਅਧਿਪ੍ਪਾਯੇਨ ਅਤਿਕਾਲੇ ਚ ਗਾਮਪ੍ਪવੇਸੋ ਅਤਿਦਿવਾ ਪਟਿਕ੍ਕਮਨਞ੍ਚ ਨਿવਾਰਿਤਂ, ਤਂ ਦਸ੍ਸੇਤੁਂ ‘‘ਨ ਅਤਿਪਾਤੋ’’ਤਿਆਦਿ વੁਤ੍ਤਂ। ਉਦ੍ਧਚ੍ਚਪਕਤਿਕੋਤਿ વਿਬ੍ਭਨ੍ਤਚਿਤ੍ਤੋ। ਅવਚਾਪਲ੍ਯੇਨਾਤਿ ਦਲ਼੍ਹવਾਤਾਪਹਤਪਲ੍ਲવਸਦਿਸੇਨ ਲੋਲਭਾવੇਨ।
Ābhisamācārikanti abhisamācāre bhavaṃ. Kiṃ pana tanti āha ‘‘vattapaṭipattimattampī’’ti. Nātikālasseva saṅghassa purato pavisitabbaṃ, na pacchā paṭikkamitabbanti adhippāyena atikāle ca gāmappaveso atidivā paṭikkamanañca nivāritaṃ, taṃ dassetuṃ ‘‘na atipāto’’tiādi vuttaṃ. Uddhaccapakatikoti vibbhantacitto. Avacāpalyenāti daḷhavātāpahatapallavasadisena lolabhāvena.
ਪਞ੍ਞવਤਾਤਿ ਇਮਿਨਾ ਭਿਕ੍ਖੁਸਾਰੁਪ੍ਪੇਸੁ ਇਤਿਕਤ੍ਤਬ੍ਬੇਸੁ ਉਪਾਯਪਞ੍ਞਾ ਅਧਿਪ੍ਪੇਤਾ, ਨ ਸੁਤਮਯਪਞ੍ਞਾ। ਅਭਿਧਮ੍ਮੇ ਅਭਿવਿਨਯੇ ਯੋਗੋਤਿ ਇਮਿਨਾ ਭਾવਨਾਪਞ੍ਞਾਉਤ੍ਤਰਿਮਨੁਸ੍ਸਧਮ੍ਮੇ ਯੋਗੋ ਪਕਾਸਿਤੋ। ਯੋਗੋਤਿ ਚ ਪਰਿਚਯੋ ਉਗ੍ਗਣ੍ਹવਸੇਨ।
Paññavatāti iminā bhikkhusāruppesu itikattabbesu upāyapaññā adhippetā, na sutamayapaññā. Abhidhamme abhivinaye yogoti iminā bhāvanāpaññāuttarimanussadhamme yogo pakāsito. Yogoti ca paricayo uggaṇhavasena.
ਆਰੁਪ੍ਪਾਤਿ ਇਮਿਨਾ ਚਤਸ੍ਸੋਪਿ ਅਰੂਪਸਮਾਪਤ੍ਤਿਯੋ ਗਹਿਤਾ, ਤਾ ਪਨ ਚਤੂਹਿ ਰੂਪਸਮਾਪਤ੍ਤੀਹਿ વਿਨਾ ਨ ਸਮ੍ਪਜ੍ਜਨ੍ਤੀਤਿ ਆਹ – ‘‘ਆਰੁਪ੍ਪਾਤਿ ਏਤ੍ਤਾવਤਾ ਅਟ੍ਠਪਿ ਸਮਾਪਤ੍ਤਿਯੋ વੁਤ੍ਤਾ ਹੋਨ੍ਤੀ’’ਤਿ। ਕਸਿਣੇਤਿ ਦਸવਿਧੇ ਕਸਿਣੇ। ਏਕਂ ਪਰਿਕਮ੍ਮਕਮ੍ਮਟ੍ਠਾਨਨ੍ਤਿ ਯਂ ਕਿਞ੍ਚਿ ਏਕਭਾવਨਾ ਪਰਿਕਮ੍ਮਦੀਪਨਂ ਖਨ੍ਧਕਮ੍ਮਟ੍ਠਾਨਂ। ਤੇਨਾਹ ‘‘ਪਗੁਣਂ ਕਤ੍વਾ’’ਤਿ। ਕਸਿਣਪਰਿਕਮ੍ਮਂ ਪਨ ਤਗ੍ਗਹਣੇਨੇવ ਗਹਿਤਂ ਹੋਤਿ, ਲੋਕਿਯਾ ਉਤ੍ਤਰਿਮਨੁਸ੍ਸਧਮ੍ਮਾ ਹੇਟ੍ਠਾ ਗਹਿਤਾਤਿ ਆਹ ‘‘ਉਤ੍ਤਰਿਮਨੁਸ੍ਸਧਮ੍ਮੇਤਿ ਇਮਿਨਾ ਸਬ੍ਬੇਪਿ ਲੋਕੁਤ੍ਤਰਧਮ੍ਮੇ ਦਸ੍ਸੇਤੀ’’ਤਿ। ਨੇਯ੍ਯਪੁਗ੍ਗਲਸ੍ਸ વਸੇਨਾਤਿ ਜਾਨਿਤ੍વਾ વਿਤ੍ਥਾਰੇਤ੍વਾ ਞਾਤਬ੍ਬਪੁਗ੍ਗਲਸ੍ਸ વਸੇਨਾਤਿ।
Āruppāti iminā catassopi arūpasamāpattiyo gahitā, tā pana catūhi rūpasamāpattīhi vinā na sampajjantīti āha – ‘‘āruppāti ettāvatā aṭṭhapi samāpattiyo vuttā hontī’’ti. Kasiṇeti dasavidhe kasiṇe. Ekaṃ parikammakammaṭṭhānanti yaṃ kiñci ekabhāvanā parikammadīpanaṃ khandhakammaṭṭhānaṃ. Tenāha ‘‘paguṇaṃ katvā’’ti. Kasiṇaparikammaṃ pana taggahaṇeneva gahitaṃ hoti, lokiyā uttarimanussadhammā heṭṭhā gahitāti āha ‘‘uttarimanussadhammeti iminā sabbepi lokuttaradhamme dassetī’’ti. Neyyapuggalassa vasenāti jānitvā vitthāretvā ñātabbapuggalassa vasenāti.
ਗੋਲਿਯਾਨਿਸੁਤ੍ਤવਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ।
Goliyānisuttavaṇṇanāya līnatthappakāsanā samattā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਮਜ੍ਝਿਮਨਿਕਾਯ • Majjhimanikāya / ੯. ਗੋਲਿਯਾਨਿਸੁਤ੍ਤਂ • 9. Goliyānisuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਮਜ੍ਝਿਮਨਿਕਾਯ (ਅਟ੍ਠਕਥਾ) • Majjhimanikāya (aṭṭhakathā) / ੯. ਗੋਲਿਯਾਨਿਸੁਤ੍ਤવਣ੍ਣਨਾ • 9. Goliyānisuttavaṇṇanā
