| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
4. கோ³மயபிண்ட³ஸுத்தங்
4. Gomayapiṇḍasuttaṃ
96. ஸாவத்தி²னிதா³னங் . ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘அத்தி² நு கோ², ப⁴ந்தே, கிஞ்சி ரூபங் யங் ரூபங் நிச்சங் து⁴வங் ஸஸ்ஸதங் அவிபரிணாமத⁴ம்மங் ஸஸ்ஸதிஸமங் ததே²வ ட²ஸ்ஸதி? அத்தி² நு கோ², ப⁴ந்தே, காசி வேத³னா யா வேத³னா நிச்சா து⁴வா ஸஸ்ஸதா அவிபரிணாமத⁴ம்மா ஸஸ்ஸதிஸமங் ததே²வ ட²ஸ்ஸதி? அத்தி² நு கோ², ப⁴ந்தே, காசி ஸஞ்ஞா யா ஸஞ்ஞா…பே॰… அத்தி² நு கோ², ப⁴ந்தே, கேசி ஸங்கா²ரா யே ஸங்கா²ரா நிச்சா து⁴வா ஸஸ்ஸதா அவிபரிணாமத⁴ம்மா ஸஸ்ஸதிஸமங் ததே²வ ட²ஸ்ஸந்தி? அத்தி² நு கோ², ப⁴ந்தே, கிஞ்சி விஞ்ஞாணங், யங் விஞ்ஞாணங் நிச்சங் து⁴வங் ஸஸ்ஸதங் அவிபரிணாமத⁴ம்மங் ஸஸ்ஸதிஸமங் ததே²வ ட²ஸ்ஸதீ’’தி? ‘‘நத்தி² கோ², பி⁴க்கு², கிஞ்சி ரூபங், யங் ரூபங் நிச்சங் து⁴வங் ஸஸ்ஸதங் அவிபரிணாமத⁴ம்மங் ஸஸ்ஸதிஸமங் ததே²வ ட²ஸ்ஸதி. நத்தி² கோ², பி⁴க்கு², காசி வேத³னா… காசி ஸஞ்ஞா… கேசி ஸங்கா²ரா… கிஞ்சி விஞ்ஞாணங் , யங் விஞ்ஞாணங் நிச்சங் து⁴வங் ஸஸ்ஸதங் அவிபரிணாமத⁴ம்மங் ஸஸ்ஸதிஸமங் ததே²வ ட²ஸ்ஸதீ’’தி.
96. Sāvatthinidānaṃ . Ekamantaṃ nisinno kho so bhikkhu bhagavantaṃ etadavoca – ‘‘atthi nu kho, bhante, kiñci rūpaṃ yaṃ rūpaṃ niccaṃ dhuvaṃ sassataṃ avipariṇāmadhammaṃ sassatisamaṃ tatheva ṭhassati? Atthi nu kho, bhante, kāci vedanā yā vedanā niccā dhuvā sassatā avipariṇāmadhammā sassatisamaṃ tatheva ṭhassati? Atthi nu kho, bhante, kāci saññā yā saññā…pe… atthi nu kho, bhante, keci saṅkhārā ye saṅkhārā niccā dhuvā sassatā avipariṇāmadhammā sassatisamaṃ tatheva ṭhassanti? Atthi nu kho, bhante, kiñci viññāṇaṃ, yaṃ viññāṇaṃ niccaṃ dhuvaṃ sassataṃ avipariṇāmadhammaṃ sassatisamaṃ tatheva ṭhassatī’’ti? ‘‘Natthi kho, bhikkhu, kiñci rūpaṃ, yaṃ rūpaṃ niccaṃ dhuvaṃ sassataṃ avipariṇāmadhammaṃ sassatisamaṃ tatheva ṭhassati. Natthi kho, bhikkhu, kāci vedanā… kāci saññā… keci saṅkhārā… kiñci viññāṇaṃ , yaṃ viññāṇaṃ niccaṃ dhuvaṃ sassataṃ avipariṇāmadhammaṃ sassatisamaṃ tatheva ṭhassatī’’ti.
அத² கோ² ப⁴க³வா பரித்தங் கோ³மயபிண்ட³ங் பாணினா க³ஹெத்வா தங் பி⁴க்கு²ங் ஏதத³வோச – ‘‘எத்தகோபி கோ², பி⁴க்கு², அத்தபா⁴வபடிலாபோ⁴ நத்தி² நிச்சோ து⁴வோ ஸஸ்ஸதோ அவிபரிணாமத⁴ம்மோ ஸஸ்ஸதிஸமங் ததே²வ ட²ஸ்ஸதி. எத்தகோ சேபி, பி⁴க்கு², அத்தபா⁴வபடிலாபோ⁴ அப⁴விஸ்ஸ நிச்சோ து⁴வோ ஸஸ்ஸதோ அவிபரிணாமத⁴ம்மோ, நயித³ங் ப்³ரஹ்மசரியவாஸோ பஞ்ஞாயேத² ஸம்மா து³க்க²க்க²யாய. யஸ்மா ச கோ², பி⁴க்கு², எத்தகோபி அத்தபா⁴வபடிலாபோ⁴ நத்தி² நிச்சோ து⁴வோ ஸஸ்ஸதோ அவிபரிணாமத⁴ம்மோ, தஸ்மா ப்³ரஹ்மசரியவாஸோ பஞ்ஞாயதி ஸம்மா து³க்க²க்க²யாய.
Atha kho bhagavā parittaṃ gomayapiṇḍaṃ pāṇinā gahetvā taṃ bhikkhuṃ etadavoca – ‘‘ettakopi kho, bhikkhu, attabhāvapaṭilābho natthi nicco dhuvo sassato avipariṇāmadhammo sassatisamaṃ tatheva ṭhassati. Ettako cepi, bhikkhu, attabhāvapaṭilābho abhavissa nicco dhuvo sassato avipariṇāmadhammo, nayidaṃ brahmacariyavāso paññāyetha sammā dukkhakkhayāya. Yasmā ca kho, bhikkhu, ettakopi attabhāvapaṭilābho natthi nicco dhuvo sassato avipariṇāmadhammo, tasmā brahmacariyavāso paññāyati sammā dukkhakkhayāya.
‘‘பூ⁴தபுப்³பா³ஹங், பி⁴க்கு², ராஜா அஹோஸிங் க²த்தியோ முத்³தா⁴வஸித்தோ. தஸ்ஸ மய்ஹங், பி⁴க்கு², ரஞ்ஞோ ஸதோ க²த்தியஸ்ஸ முத்³தா⁴வஸித்தஸ்ஸ சதுராஸீதினக³ரஸஹஸ்ஸானி அஹேஸுங் குஸாவதீ ராஜதா⁴னிப்பமுகா²னி. தஸ்ஸ மய்ஹங், பி⁴க்கு², ரஞ்ஞோ ஸதோ க²த்தியஸ்ஸ முத்³தா⁴வஸித்தஸ்ஸ சதுராஸீதிபாஸாத³ஸஹஸ்ஸானி அஹேஸுங் த⁴ம்மபாஸாத³ப்பமுகா²னி. தஸ்ஸ மய்ஹங், பி⁴க்கு², ரஞ்ஞோ ஸதோ க²த்தியஸ்ஸ முத்³தா⁴வஸித்தஸ்ஸ சதுராஸீதிகூடாகா³ரஸஹஸ்ஸானி அஹேஸுங் மஹாப்³யூஹகூடாகா³ரப்பமுகா²னி 1. தஸ்ஸ மய்ஹங், பி⁴க்கு², ரஞ்ஞோ ஸதோ க²த்தியஸ்ஸ முத்³தா⁴வஸித்தஸ்ஸ சதுராஸீதிபல்லங்கஸஹஸ்ஸானி அஹேஸுங் த³ந்தமயானி ஸாரமயானி ஸோவண்ணமயானி கோ³ணகத்த²தானி படிகத்த²தானி படலிகத்த²தானி கத³லிமிக³பவரபச்சத்த²ரணானி 2 ஸஉத்தரச்ச²தா³னி உப⁴தோலோஹிதகூபதா⁴னானி. தஸ்ஸ மய்ஹங், பி⁴க்கு², ரஞ்ஞோ ஸதோ க²த்தியஸ்ஸ முத்³தா⁴வஸித்தஸ்ஸ சதுராஸீதினாக³ஸஹஸ்ஸானி அஹேஸுங் ஸோவண்ணாலங்காரானி ஸோவண்ணத்³த⁴ஜானி ஹேமஜாலபடிச்ச²ன்னானி உபோஸத²னாக³ராஜப்பமுகா²னி. தஸ்ஸ மய்ஹங், பி⁴க்கு², ரஞ்ஞோ ஸதோ க²த்தியஸ்ஸ முத்³தா⁴வஸித்தஸ்ஸ சதுராஸீதிஅஸ்ஸஸஹஸ்ஸானி அஹேஸுங் ஸோவண்ணாலங்காரானி ஸோவண்ணத்³த⁴ஜானி ஹேமஜாலபடிச்ச²ன்னானி வலாஹகஅஸ்ஸராஜப்பமுகா²னி. தஸ்ஸ மய்ஹங், பி⁴க்கு², ரஞ்ஞோ ஸதோ க²த்தியஸ்ஸ முத்³தா⁴வஸித்தஸ்ஸ சதுராஸீதிரத²ஸஹஸ்ஸானி அஹேஸுங் ஸோவண்ணாலங்காரானி ஸோவண்ணத்³த⁴ஜானி ஹேமஜாலபடிச்ச²ன்னானி வேஜயந்தரத²ப்பமுகா²னி. தஸ்ஸ மய்ஹங், பி⁴க்கு², ரஞ்ஞோ ஸதோ க²த்தியஸ்ஸ முத்³தா⁴வஸித்தஸ்ஸ சதுராஸீதிமணிஸஹஸ்ஸானி அஹேஸுங் மணிரதனப்பமுகா²னி. தஸ்ஸ மய்ஹங், பி⁴க்கு²…பே॰… சதுராஸீதிஇத்தி²ஸஹஸ்ஸானி அஹேஸுங் ஸுப⁴த்³தா³தே³விப்பமுகா²னி. தஸ்ஸ மய்ஹங், பி⁴க்கு²…பே॰… சதுராஸீதிக²த்தியஸஹஸ்ஸானி அஹேஸுங் அனுயந்தானி பரிணாயகரதனப்பமுகா²னி. தஸ்ஸ மய்ஹங், பி⁴க்கு²…பே॰… சதுராஸீதிதே⁴னுஸஹஸ்ஸானி அஹேஸுங் து³கூலஸந்த³னானி கங்ஸூபதா⁴ரணானி. தஸ்ஸ மய்ஹங், பி⁴க்கு²…பே॰… சதுராஸீதிவத்த²கோடிஸஹஸ்ஸானி அஹேஸுங் கோ²மஸுகு²மானி கோஸெய்யஸுகு²மானி கம்ப³லஸுகு²மானி கப்பாஸிகஸுகு²மானி. தஸ்ஸ மய்ஹங், பி⁴க்கு²…பே॰… சதுராஸீதிதா²லிபாகஸஹஸ்ஸானி அஹேஸுங்; ஸாயங் பாதங் ப⁴த்தாபி⁴ஹாரோ அபி⁴ஹரியித்த².
‘‘Bhūtapubbāhaṃ, bhikkhu, rājā ahosiṃ khattiyo muddhāvasitto. Tassa mayhaṃ, bhikkhu, rañño sato khattiyassa muddhāvasittassa caturāsītinagarasahassāni ahesuṃ kusāvatī rājadhānippamukhāni. Tassa mayhaṃ, bhikkhu, rañño sato khattiyassa muddhāvasittassa caturāsītipāsādasahassāni ahesuṃ dhammapāsādappamukhāni. Tassa mayhaṃ, bhikkhu, rañño sato khattiyassa muddhāvasittassa caturāsītikūṭāgārasahassāni ahesuṃ mahābyūhakūṭāgārappamukhāni 3. Tassa mayhaṃ, bhikkhu, rañño sato khattiyassa muddhāvasittassa caturāsītipallaṅkasahassāni ahesuṃ dantamayāni sāramayāni sovaṇṇamayāni goṇakatthatāni paṭikatthatāni paṭalikatthatāni kadalimigapavarapaccattharaṇāni 4 sauttaracchadāni ubhatolohitakūpadhānāni. Tassa mayhaṃ, bhikkhu, rañño sato khattiyassa muddhāvasittassa caturāsītināgasahassāni ahesuṃ sovaṇṇālaṅkārāni sovaṇṇaddhajāni hemajālapaṭicchannāni uposathanāgarājappamukhāni. Tassa mayhaṃ, bhikkhu, rañño sato khattiyassa muddhāvasittassa caturāsītiassasahassāni ahesuṃ sovaṇṇālaṅkārāni sovaṇṇaddhajāni hemajālapaṭicchannāni valāhakaassarājappamukhāni. Tassa mayhaṃ, bhikkhu, rañño sato khattiyassa muddhāvasittassa caturāsītirathasahassāni ahesuṃ sovaṇṇālaṅkārāni sovaṇṇaddhajāni hemajālapaṭicchannāni vejayantarathappamukhāni. Tassa mayhaṃ, bhikkhu, rañño sato khattiyassa muddhāvasittassa caturāsītimaṇisahassāni ahesuṃ maṇiratanappamukhāni. Tassa mayhaṃ, bhikkhu…pe… caturāsītiitthisahassāni ahesuṃ subhaddādevippamukhāni. Tassa mayhaṃ, bhikkhu…pe… caturāsītikhattiyasahassāni ahesuṃ anuyantāni pariṇāyakaratanappamukhāni. Tassa mayhaṃ, bhikkhu…pe… caturāsītidhenusahassāni ahesuṃ dukūlasandanāni kaṃsūpadhāraṇāni. Tassa mayhaṃ, bhikkhu…pe… caturāsītivatthakoṭisahassāni ahesuṃ khomasukhumāni koseyyasukhumāni kambalasukhumāni kappāsikasukhumāni. Tassa mayhaṃ, bhikkhu…pe… caturāsītithālipākasahassāni ahesuṃ; sāyaṃ pātaṃ bhattābhihāro abhihariyittha.
‘‘தேஸங் கோ² பன, பி⁴க்கு², சதுராஸீதியா நக³ரஸஹஸ்ஸானங் ஏகஞ்ஞேவ தங் நக³ரங் ஹோதி யமஹங் தேன ஸமயேன அஜ்ஜா²வஸாமி – குஸாவதீ ராஜதா⁴னீ. தேஸங் கோ² பன, பி⁴க்கு², சதுராஸீதியா பாஸாத³ஸஹஸ்ஸானங் ஏகோயேவ ஸோ பாஸாதோ³ ஹோதி யமஹங் தேன ஸமயேன அஜ்ஜா²வஸாமி – த⁴ம்மோ பாஸாதோ³. தேஸங் கோ² பன, பி⁴க்கு², சதுராஸீதியா கூடாகா³ரஸஹஸ்ஸானங் ஏகஞ்ஞேவ தங் கூடாகா³ரங் ஹோதி யமஹங் தேன ஸமயேன அஜ்ஜா²வஸாமி – மஹாப்³யூஹங் கூடாகா³ரங். தேஸங் கோ² பன, பி⁴க்கு², சதுராஸீதியா பல்லங்கஸஹஸ்ஸானங் ஏகோயேவ ஸோ பல்லங்கோ ஹோதி யமஹங் தேன ஸமயேன பரிபு⁴ஞ்ஜாமி – த³ந்தமயோ வா ஸாரமயோ வா ஸோவண்ணமயோ வா ரூபியமயோ வா. தேஸங் கோ² பன, பி⁴க்கு², சதுராஸீதியா நாக³ஸஹஸ்ஸானங் ஏகோயேவ ஸோ நாகோ³ ஹோதி யமஹங் தேன ஸமயேன அபி⁴ருஹாமி – உபோஸதோ² நாக³ராஜா. தேஸங் கோ² பன, பி⁴க்கு², சதுராஸீதியா அஸ்ஸஸஹஸ்ஸானங் ஏகோயேவ ஸோ அஸ்ஸோ ஹோதி யமஹங் தேன ஸமயேன அபி⁴ருஹாமி – வலாஹகோ அஸ்ஸராஜா. தேஸங் கோ² பன, பி⁴க்கு², சதுராஸீதியா ரத²ஸஹஸ்ஸானங் ஏகோயேவ ஸோ ரதோ² ஹோதி யமஹங் தேன ஸமயேன அபி⁴ருஹாமி – வேஜயந்தோ ரதோ². தேஸங் கோ² பன, பி⁴க்கு², சதுராஸீதியா இத்தி²ஸஹஸ்ஸானங் ஏகாயேவ ஸா இத்தீ² ஹோதி யா மங் தேன ஸமயேன பச்சுபட்டா²தி – க²த்தியானீ வா வேலாமிகா வா. தேஸங் கோ² பன, பி⁴க்கு², சதுராஸீதியா வத்த²கோடிஸஹஸ்ஸானங் ஏகஞ்ஞேவ தங் வத்த²யுக³ங் ஹோதி யமஹங் தேன ஸமயேன பரித³ஹாமி – கோ²மஸுகு²மங் வா கோஸெய்யஸுகு²மங் வா கம்ப³லஸுகு²மங் வா கப்பாஸிகஸுகு²மங் வா. தேஸங் கோ² பன, பி⁴க்கு², சதுராஸீதியா தா²லிபாகஸஹஸ்ஸானங் ஏகோயேவ ஸோ தா²லிபாகோ ஹோதி யதோ நாளிகோத³னபரமங் பு⁴ஞ்ஜாமி தது³பியஞ்ச ஸூபெய்யங் 5. இதி கோ², பி⁴க்கு², ஸப்³பே³ தே ஸங்கா²ரா அதீதா நிருத்³தா⁴ விபரிணதா. ஏவங் அனிச்சா கோ², பி⁴க்கு², ஸங்கா²ரா. ஏவங் அத்³து⁴வா கோ², பி⁴க்கு², ஸங்கா²ரா. ஏவங் அனஸ்ஸாஸிகா கோ², பி⁴க்கு², ஸங்கா²ரா. யாவஞ்சித³ங் , பி⁴க்கு², அலமேவ ஸப்³ப³ஸங்கா²ரேஸு நிப்³பி³ந்தி³துங், அலங் விரஜ்ஜிதுங், அலங் விமுச்சிது’’ந்தி. சதுத்த²ங்.
‘‘Tesaṃ kho pana, bhikkhu, caturāsītiyā nagarasahassānaṃ ekaññeva taṃ nagaraṃ hoti yamahaṃ tena samayena ajjhāvasāmi – kusāvatī rājadhānī. Tesaṃ kho pana, bhikkhu, caturāsītiyā pāsādasahassānaṃ ekoyeva so pāsādo hoti yamahaṃ tena samayena ajjhāvasāmi – dhammo pāsādo. Tesaṃ kho pana, bhikkhu, caturāsītiyā kūṭāgārasahassānaṃ ekaññeva taṃ kūṭāgāraṃ hoti yamahaṃ tena samayena ajjhāvasāmi – mahābyūhaṃ kūṭāgāraṃ. Tesaṃ kho pana, bhikkhu, caturāsītiyā pallaṅkasahassānaṃ ekoyeva so pallaṅko hoti yamahaṃ tena samayena paribhuñjāmi – dantamayo vā sāramayo vā sovaṇṇamayo vā rūpiyamayo vā. Tesaṃ kho pana, bhikkhu, caturāsītiyā nāgasahassānaṃ ekoyeva so nāgo hoti yamahaṃ tena samayena abhiruhāmi – uposatho nāgarājā. Tesaṃ kho pana, bhikkhu, caturāsītiyā assasahassānaṃ ekoyeva so asso hoti yamahaṃ tena samayena abhiruhāmi – valāhako assarājā. Tesaṃ kho pana, bhikkhu, caturāsītiyā rathasahassānaṃ ekoyeva so ratho hoti yamahaṃ tena samayena abhiruhāmi – vejayanto ratho. Tesaṃ kho pana, bhikkhu, caturāsītiyā itthisahassānaṃ ekāyeva sā itthī hoti yā maṃ tena samayena paccupaṭṭhāti – khattiyānī vā velāmikā vā. Tesaṃ kho pana, bhikkhu, caturāsītiyā vatthakoṭisahassānaṃ ekaññeva taṃ vatthayugaṃ hoti yamahaṃ tena samayena paridahāmi – khomasukhumaṃ vā koseyyasukhumaṃ vā kambalasukhumaṃ vā kappāsikasukhumaṃ vā. Tesaṃ kho pana, bhikkhu, caturāsītiyā thālipākasahassānaṃ ekoyeva so thālipāko hoti yato nāḷikodanaparamaṃ bhuñjāmi tadupiyañca sūpeyyaṃ 6. Iti kho, bhikkhu, sabbe te saṅkhārā atītā niruddhā vipariṇatā. Evaṃ aniccā kho, bhikkhu, saṅkhārā. Evaṃ addhuvā kho, bhikkhu, saṅkhārā. Evaṃ anassāsikā kho, bhikkhu, saṅkhārā. Yāvañcidaṃ , bhikkhu, alameva sabbasaṅkhāresu nibbindituṃ, alaṃ virajjituṃ, alaṃ vimuccitu’’nti. Catutthaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4-6. கோ³மயபிண்ட³ஸுத்தாதி³வண்ணனா • 4-6. Gomayapiṇḍasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4-6. கோ³மயபிண்ட³ஸுத்தாதி³வண்ணனா • 4-6. Gomayapiṇḍasuttādivaṇṇanā
