| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
8. கோ³பகமொக்³க³ல்லானஸுத்தவண்ணனா
8. Gopakamoggallānasuttavaṇṇanā
79. கம்மங்யேவ கம்மந்தோ, ஸோ எத்த² அத்தீ²தி கம்மகரணட்டா²னங் ‘‘கம்மந்தோ’’தி வுத்தங். தேனாஹ ‘‘கம்மந்தட்டா²ன’’ந்தி. தேஹி த⁴ம்மேஹீதி பு³த்³த⁴கு³ணேஹி. தே பன ஸப்³ப³ஞ்ஞுதஞ்ஞாணப்பமுகா²தி கத்வா ஆஹ ‘‘ஸப்³ப³ஞ்ஞுதஞ்ஞாணத⁴ம்மேஹீ’’தி. ஸப்³பே³ன ஸப்³ப³ந்தி ஸப்³ப³ப்பகாரேன அனவஸேஸங், எத்தகோ கு³ணானங் பகாரபே⁴தோ³, தேஸு கிஞ்சிபி பகாரங் அனவஸேஸெத்வா. ஸப்³ப³கொட்டா²ஸேஹி ஸப்³ப³ந்தி யத்தகா கு³ணபா⁴கா³, தேஹி ஸப்³பே³ஹி அனவஸேஸங் நிஸ்ஸேஸமேவ கத்வா. யோபி அஹோஸீதி யோபி கோஸம்பி³வாஸீனங் பி⁴க்கூ²னங் வஸேன கோஸம்பி³யங் கலஹோ அஹோஸி. ஸோபி தத்தே²வ உப்பன்னட்டா²னேயேவ உப்பன்னமத்தோ வூபஸமிதோ. பரினிப்³பு³தகாலே பனஸ்ஸாதி அஸ்ஸ ஸம்மாஸம்பு³த்³த⁴ஸ்ஸ பரினிப்³பு³தகாலே பன. பி⁴ய்யோஸோமத்தாய பி⁴க்கூ² ஸமக்³கா³ ஜாதா, கத²ஞ்ச ஸங்வேகோ³ ஜாதோதி த³ஸ்ஸேதுங் ‘‘அட்ட²ஸட்டீ²’’திஆதி³ வுத்தங். ஸாதிஸயங் அபி⁴ண்ஹஞ்ச உபஸமப்பத்தியா அதிவிய உபஸந்துபஸந்தா. அனுஸங்யாயமானோதி அனு அனு ஸம்மதே³வ ஜானந்தோ விசாரெந்தோ வோஸாஸமானோ. ‘‘அனுஸஞ்ஞாயமானோ’’தி வா பாடோ². தத்த² ய-காரஸ்ஸ ஞ-காரங் கத்வா நித்³தே³ஸோதி ஆஹ ‘‘அனுவிசரமானோ’’தி.
79. Kammaṃyeva kammanto, so ettha atthīti kammakaraṇaṭṭhānaṃ ‘‘kammanto’’ti vuttaṃ. Tenāha ‘‘kammantaṭṭhāna’’nti. Tehi dhammehīti buddhaguṇehi. Te pana sabbaññutaññāṇappamukhāti katvā āha ‘‘sabbaññutaññāṇadhammehī’’ti. Sabbena sabbanti sabbappakārena anavasesaṃ, ettako guṇānaṃ pakārabhedo, tesu kiñcipi pakāraṃ anavasesetvā. Sabbakoṭṭhāsehi sabbanti yattakā guṇabhāgā, tehi sabbehi anavasesaṃ nissesameva katvā. Yopi ahosīti yopi kosambivāsīnaṃ bhikkhūnaṃ vasena kosambiyaṃ kalaho ahosi. Sopi tattheva uppannaṭṭhāneyeva uppannamatto vūpasamito. Parinibbutakāle panassāti assa sammāsambuddhassa parinibbutakāle pana. Bhiyyosomattāya bhikkhū samaggā jātā, kathañca saṃvego jātoti dassetuṃ ‘‘aṭṭhasaṭṭhī’’tiādi vuttaṃ. Sātisayaṃ abhiṇhañca upasamappattiyā ativiya upasantupasantā. Anusaṃyāyamānoti anu anu sammadeva jānanto vicārento vosāsamāno. ‘‘Anusaññāyamāno’’ti vā pāṭho. Tattha ya-kārassa ña-kāraṃ katvā niddesoti āha ‘‘anuvicaramāno’’ti.
80. ஹெட்டி²மபுச்ச²மேவாதி கோ³பகமொக்³க³ல்லானேன புச்சி²தபுச்ச²மேவ. ஸோ ஹி ‘‘தேஹி த⁴ம்மேஹீ’’திஆதி³னா, ‘‘அத்தி² கோசி தும்ஹாகங் ஸாஸனஸ்ஸ ஸாரபூ⁴தோ பி⁴க்கூ²’’தி புச்சி². அயஞ்ச தமேவ ‘‘படிஸரணோ’’தி பரியாயேன புச்சி². அப்படிஸரணேதி யங் தும்ஹே பி⁴க்கு²ங் படிபோ³தெ⁴ய்யாத², தாதி³ஸஸ்ஸ அபா⁴வேன அப்படிஸரணே. ததா²க³தேன பவேதி³தோ த⁴ம்மோ படிஸரணங் ஏதேஸந்தி த⁴ம்மபடிஸரணா. தேனாஹ ‘‘த⁴ம்மோ அவஸ்ஸயோ’’தி.
80.Heṭṭhimapucchamevāti gopakamoggallānena pucchitapucchameva. So hi ‘‘tehi dhammehī’’tiādinā, ‘‘atthi koci tumhākaṃ sāsanassa sārabhūto bhikkhū’’ti pucchi. Ayañca tameva ‘‘paṭisaraṇo’’ti pariyāyena pucchi. Appaṭisaraṇeti yaṃ tumhe bhikkhuṃ paṭibodheyyātha, tādisassa abhāvena appaṭisaraṇe. Tathāgatena pavedito dhammo paṭisaraṇaṃ etesanti dhammapaṭisaraṇā. Tenāha ‘‘dhammo avassayo’’ti.
81. ஆக³ச்ச²தீதி வாசுக்³க³தபா⁴வேன ஆக³ச்ச²தி. வத்து²வீதிக்கமஸங்கா²தே க³ருக³ருதரலஹுலஹுதராதி³பே⁴தே³ அஜ்ஜா²சாரே ஆபத்திஸமஞ்ஞாதி ஆஹ – ‘‘ஆபத்தி…பே॰… ஆணாதிக்கமனமேவா’’தி. யதா²த⁴ம்மந்தி த⁴ம்மானுரூபங். யதா²ஸிட்ட²ந்தி யதா²னுஸிட்ட²ங். த⁴ம்மோ நோதி எத்த² நோ-ஸத்³தோ³ அவதா⁴ரணே ‘‘ந நோ ஸமங் அத்தி² ததா²க³தேனா’’திஆதீ³ஸு (கு²॰ பா॰ 6.3; ஸு॰ நி॰ 226) விய. தேனேவாஹ ‘‘த⁴ம்மோவ காரேதீ’’தி.
81.Āgacchatīti vācuggatabhāvena āgacchati. Vatthuvītikkamasaṅkhāte garugarutaralahulahutarādibhede ajjhācāre āpattisamaññāti āha – ‘‘āpatti…pe… āṇātikkamanamevā’’ti. Yathādhammanti dhammānurūpaṃ. Yathāsiṭṭhanti yathānusiṭṭhaṃ. Dhammo noti ettha no-saddo avadhāraṇe ‘‘na no samaṃ atthi tathāgatenā’’tiādīsu (khu. pā. 6.3; su. ni. 226) viya. Tenevāha ‘‘dhammova kāretī’’ti.
83. ‘‘யதா² தங் தும்ஹாதி³ஸேஹி ரக்க²கேஹி கோ³பகேஹீ’’தி ஏவங் பஸன்னவேஸேன அத்தானங் உக்கங்ஸாபேதுகாமோ . அரியூபவாத³பாபங் க²மாபனே ஸதி அந்தராயாய ந ஹோதீதி ஆஹ – ‘‘இச்சேதங் குஸல’’ந்தி. கோ³னங்க³லமக்கடோதி கோ³னங்கு³ட்ட²மக்கடோ.
83. ‘‘Yathā taṃ tumhādisehi rakkhakehi gopakehī’’ti evaṃ pasannavesena attānaṃ ukkaṃsāpetukāmo . Ariyūpavādapāpaṃ khamāpane sati antarāyāya na hotīti āha – ‘‘iccetaṃ kusala’’nti. Gonaṅgalamakkaṭoti gonaṅguṭṭhamakkaṭo.
84. அயங் உக்கங்ஸாபேதுங் இச்சி²தங் யதா²ரத்³த⁴மத்த²ங் விஸங்வாதே³தி அவண்ணிதம்பி வண்ணிதங் கத்வா கதெ²ந்தோ; இமஸ்ஸ வசனஸ்ஸ படிக்கே²பேன இமினா தா³தப்³ப³பிண்ட³பாதஸ்ஸ அந்தராயோ மா ஹோதூதி ஏவங் பிண்ட³பாதங் ரக்கி²துங் ந கோ² பன ஸக்காதி யோஜனா. இத³ந்தி ‘‘ந கோ², ப்³ராஹ்மண, ஸோ ப⁴க³வா’’திஆதி³தே³ஸனங். அப்³ப⁴ந்தரங் கரித்வாதி நிப்³பா³னந்தோக³த⁴ங் கத்வா, அந்தரங் வா தஸ்ஸ நிஜ்ஜா²னஸ்ஸ காரணங் கத்வா. காமராக³வஸேன ஹி தங் நிஜ்ஜா²னங் ஹோதீதி. இதா⁴தி இமஸ்மிங் ஸுத்தபதே³ஸே. ஸப்³ப³ஸங்கா³ஹிகஜ்ஜா²னந்தி லோகியலோகுத்தரஸ்ஸ அந்தராயோ மா ஹோதூதி ஏவங் கத்வாபி ரூபாவசரஸ்ஸ மக்³க³ஜா²னஸ்ஸ ப²லஜா²னஸ்ஸாதி ஸப்³ப³ஸ்ஸபி ஸங்க³ண்ஹனவஸேன தே³ஸிதத்தா ஸப்³ப³ஸங்கா³ஹகஜ்ஜா²னங் நாம கதி²தங்.
84. Ayaṃ ukkaṃsāpetuṃ icchitaṃ yathāraddhamatthaṃ visaṃvādeti avaṇṇitampi vaṇṇitaṃ katvā kathento; imassa vacanassa paṭikkhepena iminā dātabbapiṇḍapātassa antarāyo mā hotūti evaṃ piṇḍapātaṃ rakkhituṃ na kho pana sakkāti yojanā. Idanti ‘‘na kho, brāhmaṇa, so bhagavā’’tiādidesanaṃ. Abbhantaraṃ karitvāti nibbānantogadhaṃ katvā, antaraṃ vā tassa nijjhānassa kāraṇaṃ katvā. Kāmarāgavasena hi taṃ nijjhānaṃ hotīti. Idhāti imasmiṃ suttapadese. Sabbasaṅgāhikajjhānanti lokiyalokuttarassa antarāyo mā hotūti evaṃ katvāpi rūpāvacarassa maggajhānassa phalajhānassāti sabbassapi saṅgaṇhanavasena desitattā sabbasaṅgāhakajjhānaṃ nāma kathitaṃ.
யங் நோ மயந்தி எத்த² நோதி நிபாதமத்தங். தங் நோதி எத்த² பன நோதி அம்ஹாகந்தி அத்தோ². உஸூயதி ராஜகிச்சபஸுததாதீ⁴னதாய ஏகத்தா²பி⁴னிவேஸபா⁴வதோ . மந்த³பஞ்ஞதாய வஸ்ஸகாரக³தஇஸ்ஸாபி⁴பூ⁴தசித்ததாய பரிபுண்ணங் கத்வா வுத்தம்பி அத்த²ங் அனுபதா⁴ரெந்தோ ஆஹ – ‘‘ஏகதே³ஸமேவ கதே²ஸீ’’தி. ஸேஸங் ஸுவிஞ்ஞெய்யமேவ.
Yaṃ no mayanti ettha noti nipātamattaṃ. Taṃ noti ettha pana noti amhākanti attho. Usūyati rājakiccapasutatādhīnatāya ekatthābhinivesabhāvato . Mandapaññatāya vassakāragataissābhibhūtacittatāya paripuṇṇaṃ katvā vuttampi atthaṃ anupadhārento āha – ‘‘ekadesameva kathesī’’ti. Sesaṃ suviññeyyameva.
கோ³பகமொக்³க³ல்லானஸுத்தவண்ணனாய லீனத்த²ப்பகாஸனா ஸமத்தா.
Gopakamoggallānasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 8. கோ³பகமொக்³க³ல்லானஸுத்தங் • 8. Gopakamoggallānasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 8. கோ³பகமொக்³க³ல்லானஸுத்தவண்ணனா • 8. Gopakamoggallānasuttavaṇṇanā
